Kɔlɔsitɔnŋ kiri 1 - Jɔ Biibili ki

Coolinŋ ki

¹ Míŋ Pooli wɔ̀ i Yesu Kirisa wɔ cindaŋ i, ŋì i kɛɲɛ Kirinŋ dintɛ bi ki wu, míŋ fa yi tindaŋ Timote i ábɛɛ co-a,

² ábɛɛ wɔ̀ri i Kirinŋ wɔ konanbi ki i, Kɔlɔsi kili ki ru, á i ji yibɛɛ tindaŋ dariwulutiŋ ni i, Kirisa wɔ tenbi ki ru. Yi Tiŋ Kirinŋ awɔ shɔɔrinŋ ki fa awɔ ɲaanfɛfili ki wɔri á tɛ.

Pooli wɔ coolinŋ ki Kirinŋ tɛ Kɔlɔsitɔnŋ kiri bira

³ A yibɛɛ ji Kirinŋ nafɛ-a, ninwɔ̀ i yibɛɛ Ŋuntiŋ Yesu Kirisa Tiŋ ki i, yibɛɛ i coolinŋ wɔri-ra ǹʼtɛ waarinŋ bataa ru ábɛɛ bira,

⁴ sabu ábɛɛ bili-i Yesu Kirisa ra ɲaan wɔ̀ tɛ, niŋ fa ábɛɛ Kirinŋ wɔ wɔlinŋ kiri bidi-i á tɛ ɲaan wɔ̀ tɛ, yibɛɛ niŋ bataa rama-i.

⁵ Ábɛɛ i niŋ ma-a, sabu gbɛbilimaŋ i ábɛɛ gbɛ Kirinŋ wɔ ki ru. Ábɛɛ niŋ gbɛbilimaŋ ki tɔ-i sɛli ki sunjomaan ki baraka ra, ninwɔ̀ i Wulujii ki i.

⁶ Niŋ Wulujii ki so-i ábɛɛ tɛ, miŋ tu ǹʼso-i juniɲa bataa tɛ ɲaan wɔ̀ tɛ, ŋì i tiri-ri jɛŋ. Ǹʼyɔ mìŋ ɲaan tenŋ ki tɛ ábɛɛ faninmwuŋ, kabi ábɛɛ Kirinŋ wɔ shɔɔrinŋ wulu ki rama-i, á i ǹʼsɛli ki tɔ.

⁷ Epafirasi, ninwɔ̀ i yibɛɛ baara mashi i, nwɔ̀ bidi-i yibɛɛ tɛ haali, ninki ábɛɛ kini-i niŋ bi kiri ra. Bilinakoŋ yɛ Kirisa tɛ baara ki ru ábɛɛ kanfɛ.

⁸ Ɲiniwɔlinŋ ki bidintɛbi wɔ̀ wɔri-i ábɛɛ tɛ, mìntiŋ ki niŋ ɲaanbi-i yibɛɛ tɛ.

Pooli wɔ Kirinŋ nafɛ ki Kɔlɔsitɔnŋ kiri tɛ

⁹ Niŋ ki ra, kabi yibɛɛ ábɛɛ mabi kiri wulu ki rama-i, yibɛɛ i Kirinŋ nafɛ-a ábɛɛ tɛ waarinŋ bataa ru, nwɔma ábɛɛ i so ǹʼdintɛ bi ki bataa tɔ-i, ŋì i ɲakilitinbi fa bitɔbi sɔbɛ wɔri á tɛ, ŋì i po Ɲiniwɔlinŋ ki gbɛ.

¹⁰ A niŋ ma, ábɛɛ tiri kɛɲɛ Ŋuntiŋ ki dintɛ bi ki wu, á mabi kiri i di ǹʼtɛ sɛbɛ, ábɛɛ ra so Kirinŋ dintɛ bi ki ma-i, á i mabi shɔɔrinŋ kwuru ki bataa ma, á i ta jɛŋ Kirinŋ tɔbi sɛlɛsɛli ki ra.

¹¹ Kirinŋ faan wɔri á tɛ waarinŋ bataa ru, ŋì i po a yɛri ki wɔ sotinbi nɔɔritiŋ ki ru, nwɔma ábɛɛ i ta jɛŋ bilinabi ki ru, á i so bi bataa kwun-i á ru.

¹² Á baraka bi Tiŋ Kirinŋ tɛ, á i á yoori, sabu ŋì finŋ wɔ̀ri ramɔni bo-i awɔ wɔlinŋ kiri jɛŋ awɔ masabi sarintiŋ ki ru, ŋì ncusun-i ábɛɛ i lu kila niŋ nu.

¹³ Ŋì yibɛɛ mwu san-i mancinŋ ki wɔ faan ki ru, ŋì i yi de a dintɛ Danshuru ki wɔ masabi ki ru.

¹⁴ Ninki ji-i yibɛɛ ŋunsan ki i, yɔɔ bijɛ kiri i tu yi tɛ.

¹⁵ Kirisa i Kirinŋ jabali ki miniŋ ki i, mìntiŋ gbɛ-i finŋ pomaan kiri bataa wu,

¹⁶ sabu, kirinpɔli la finŋ kiri fa pwɔkulinŋ sun finŋ kiri bataa po-i mìntiŋ ki sababu ra. Finŋ wɔ̀ri i ja-a niŋ fa finŋ wɔ̀ri ja-a kì, masabi kiri fa ŋununtinbi kiri, ŋì i ta bo faantiŋ kiri fa sotiŋ kiri sun, mìntiŋ sɔɔ-ɔ, yìrì bataa i ramɔni, niŋ fa yìrì i ji ramɔni mìntiŋ ki tɛ.

¹⁷ Mìntiŋ i finŋ bataa jɛŋ, finŋ bataa i ji da amaŋ na mìntiŋ sababu ra.

¹⁸ Kirisa ra bilinatɔnŋ kiri i ntiŋ firi ki i, mìntiŋ ki i ji niŋ firi ki ŋuniŋ ki i. Finŋ kiri bataa tɔnpa-i mìntiŋ ki wu. Mìntiŋ jɔnɔ ŋmɛni po san-i konkwuu kiri ru, nwɔma ntiŋ i ji finŋ bataa ŋununtiŋ i.

¹⁹ Sabu, ǹʼji-i Kirinŋ dintɛ bi, ŋì i a ɲaan ki bataa rafaa mìntiŋ nu.

²⁰ Kirinŋ fu de-i a fa juniɲa bataa faninmwuŋ mìntiŋ ki sababu ra. Finŋ wɔ̀ri i pwɔkulinŋ ki sun, niŋ fa nwɔ̀ri i kirinpɔli ki ra, ŋì i ɲaanfɛfili wɔri nini tɛ, mìntiŋ ki cunŋ ki baraka ra, ninwɔ̀ kɔnkɔli-i kpinkpisuu ki sun.

²¹ Á ǹʼtɔ tu ábɛɛ yɛrima kiri maŋ nari-ri Kirinŋ na sun, ábɛɛ wuru Kirinŋ ɲa ni i, áwɔ ɲakilila jɛ kiri fa áwɔ bi kulinŋ kiri bira.

²² Nka dɔnsaŋ, ábɛɛ fa Kirinŋ faninmwuŋ ki ramɔni-i a Danshuru ki wɔ konanminibi firi ki beŋ ki baraka ra, nwɔma ábɛɛ wu fɔɔmaan fa á pɔlibali i na afinŋ tɛ.

²³ Nka niŋ fa a fɔn na, á á cɛrukɔli tu bilinabi ki ru. Ábɛɛ gbɛbilimaŋ wɔ̀ kila-i Wulujii ramamaan ki bira, á fa ncusun finŋ dantenŋ i á ɲakili ki ɲaanmi san niŋ sun kì. Ábɛɛ niŋ Wulujii ki rama-i, ŋì i ji sunjo juniɲa nu konaŋ bataa tɛ, míŋ Pooli i ji ǹʼnu baara matɔnŋ i.

Pooli wɔ cinŋ ki bilinatɔnŋ kwuru kiri kanfɛ

²⁴ Dɔnsaŋ, míŋ i ńʼyoori-ra ńʼwɔ cɔɔri kilamaan ki ra ábɛɛ bira, sabu nwɔ̀ cin wuru Kirisa wɔ cɔɔri ki ra, míŋ i niŋ nafaa-ra ńʼfiri ki wu, Kirisa firi ki tɛ, ninwɔ̀ i bilinatɔnŋ kwuru kiri i.

²⁵ Kirinŋ niŋ bilinatɔnŋ kwuru ki ru baara ki biye-i míŋ gbɛsun, tu míŋ niŋ baara ki ma ábɛɛ tɛ, ŋí i Kirinŋ wɔ wulu ki sunjoka shɔ á tɛ.

²⁶ Niŋ gonto ki wɔ̀ radumaan wuru-i waaci mwɔɔnna nu konaŋ kiri sun, ŋì i a yɛri ji-a dɔɔ Kirinŋ wɔ wɔlinŋ kiri wu.

²⁷ Nafan sinaŋ wɔ̀ fa gbɛbi wɔ̀ i niŋ gonto ki ru, shiya kiri bataa kɛlintɛ, Kirinŋ i ji ǹʼtɛ niŋ i tɔ, niŋ i kaa : a Kirisa ji ábɛɛ fan, gbɛbilimaŋ i ábɛɛ ra, á i ji-a de Kirinŋ wɔ nɔɔri ki ru.

²⁸ Yibɛɛ i niŋ Kirisa ki bi ki sunjo-a, yi i konaŋ kiri bataa racin-ni, yi i kí kali-li ɲakilitinbi ki bataa wu, nwɔma konaŋ ki bataa tenŋ tenŋ i so ji-i koŋ nafaamaan ni i, Kirinŋ ɲaanfɛ Kirisa sababu ra.

²⁹ Niŋ ki ra, míŋ baara ki ma-a, ŋí i kari ki tan-ni Kirisa wɔ sotinbi ki wu, ninwɔ̀ i baara ki ma-a míŋ ciiru.