Korɛntitɔnŋ kiri (2) 9 - Jɔ Biibili ki

Yentɛfinŋ kiri bi ki

¹ Ŋuŋ ǹʼna míŋ i wulu tɔri sɛbɛ wɔri ta ábɛɛ tɛ Kirinŋ wɔ wɔlinŋ kiri wɔ yentɛfinŋ kiri bi sun kili kì.

² Sabu míŋ ǹʼtɔ-i, ńʼtu yentɛmaanna ki wuru ábɛɛ tɔnɲaarabi sun, ninki i ncin míŋ i ńʼyɛri ragbɛ ábɛɛ bi ki wu Maseduwanɛ bilinatɔnŋ kiri ɲaanna. Ńʼtu ábɛɛ Akayi bilinatɔnŋ kwuru kiri ramɔnimaan wuru-i kabi ɲankaŋ, á i áwɔ yentɛfinŋ ki wɔri. Niŋ cɛrukɔli ki wɔ̀ kila-i ábɛɛ gbɛ, mwɔɔnna i ǹʼtɛ arì i ǹʼma ábɔɔ ki sali.

³ Míŋ i yi tindaŋ kari bo ta ábɛɛ tɛ, nwɔma yibɛɛ ábɛɛ tɔ shɔɔrinŋ wɔ̀ bi-i niŋ fa ji ǹʼgbansanŋ i kì. Nwɔ̀ a di míŋ tɛ, niŋ i tu kí ta fa ábɛɛ ramɔnimaan wu, miŋ tu míŋ bi-i kí tɛ ɲaan wɔ̀ tɛ.

⁴ A niŋ ji-i kì, a Maseduwanitɔnŋ kiri bɛɛ ri na ta míŋ fan ábɛɛ tɛ, a kí ta fa ábɛɛ ramɔnimaan wu kì, niŋ a ji ɲaankwunŋ yibɛɛ gbɛ, koŋ ábɔɔ ki bi-a kili kì.

⁵ Niŋ ki ra, míŋ ǹʼja-i ńʼtu ǹʼpari ŋí i tindaŋ kari bo ta ńʼjɛŋ ábɛɛ tɛ, nwɔma ábɛɛ yentɛfinŋ wɔ̀ri wulubi-i, á fa kí i ta yìrì ɲaanpo-ri míŋ jɛŋ sun. Niŋ a ǹʼji tu ǹʼma ciirudibi wu, tu koŋ ábɛɛ karaba bo ǹʼsun kì.

Koŋ ka ki tɔnɔ ki

⁶ Á ǹʼtɔ tu konwɔtiŋ bilaŋ pyaanŋ firi-ra, tu nintiŋ i bilaŋ pyaanŋ tɛri-ra, nka tu nwɔ̀tiŋ bilaŋ mwɔɔnna firi-ra, tu nintiŋ i bilaŋ mwɔɔnna ki tɛri-ra sɛbɛ.

⁷ Koŋ fɔn tenŋ tenŋ ka ki tan, ŋì i kɛɲɛ ntiŋ nwɔ̀ bo-i a ciiru, ŋì i ma ciirudibi wu, ŋì fa ji ǹʼkarabamaan i kì. Sabu konwɔtiŋ i ka ki tan-a ciirudibi wu, nintiŋ bidi-i Kirinŋ tɛ.

⁸ So i Kirinŋ gbɛ ŋì i finŋ shɔɔrinŋ kiri bataa wɔri ábɛɛ tɛ, á i á maku shɔ finŋ kiri bataa kila, nwɔma á i so ye-i koŋ mwɔɔnna tɛ waarinŋ mwɔɔnna nu.

⁹ Kirinŋ wɔ wulu ki i ǹʼbi-a tu : « Ntiŋ i a gbɛ rupili-la kusɛbɛ, ntiŋ i gbɛwɔ kiri ka, ntiŋ wɔ shɔɔrinŋ ki kɔ-a fyewu kì. »

¹⁰ Kirinŋ wɔ̀ ki i finŋ tu ki wɔri-ra ji kaantɔnŋ ki tɛ, mìŋ tenŋ ki i nufinŋ ki wɔri-ri, mìnki a na ábɛɛ maku shɔ finŋ kiri bataa wɔri ábɛɛ tɛ, ŋì i yìrì mwɔ, nwɔma koŋ pyɛ kiri i so mwɔɔnna kila-i ábɛɛ gbɛ sɛbɛ.

¹¹ Niŋ ɲaan ki tɛ, ŋì a shɔɔrinŋ kwuru ki bataa ma ábɛɛ tɛ, nwɔma á i so koŋ tɔri kiri ka-i waarinŋ fɔn bataa ru. Niŋ na, koŋ mwɔɔnna a baraka bi Kirinŋ tɛ ábɔɔ yentɛfinŋ ki bira, yibɛɛ gbɛ kiri ra ta ninwɔ̀ wɔri kí tɛ.

¹² Sɛli yɛ, ábɛɛ i finŋ wɔ̀ wɔri-ra, niŋ a Yerusalɛmu wɔlinŋ kiri maku shɔ, niŋ bantenŋ i kì, ŋì a ji sababu kí mwɔɔnna i baraka bi Kirinŋ tɛ sɛbɛ.

¹³ Kí ábɔɔ yentɛfinŋ kari ja waarinŋ wɔ̀ ru, kí a ǹʼtɔ tu ábɛɛ koŋ kwuru wɔ̀ri i. Niŋ na, kí a Kirinŋ gbɛ ábɛɛ bira. Sabu, kí a ǹʼja tu ábɛɛ á tu Yesu Kirisa Wulujii ki ra, á i tiri-ri ǹʼwɔ saa ki fan, niŋ fa tu áwɔ gbɛrupilibi ki baraka ra, tu ábɛɛ á tu á i ye arìbɛɛ fa bilinatɔnŋ pyɛ kiri bataa tɛ.

¹⁴ Kirinŋ wɔ shɔɔrinŋ mwɔɔnna ka wɔrimaan ki bira ábɛɛ tɛ, kí a Kirinŋ nafɛ ábɛɛ tɛ, nwɔma kí i ǹʼji ábɛɛ wu tu ábɛɛ bidi arìbɛɛ tɛ.

¹⁵ Yi baraka bi Kirinŋ tɛ awɔ kafinŋ shɔɔrinŋ ki bira, ninwɔ̀ bishi nmaŋ kì!