Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Korɛntitɔnŋ kiri (2) 8 - Jɔ Biibili ki


Bilinatɔnŋ kwuru kiri wɔ jalinŋ nakɔli bi ki
( Ɔrɔmutɔnŋ kiri 15.25–27 ; Korɛntitɔnŋ kiri (1) 16.1–4 )

1 Yi tindaŋ ni, Kirinŋ shɔɔrinŋ wɔ̀ ma-i Maseduwanɛ sɔɔta ki ru bilinatɔnŋ kwuru kiri tɛ, yibɛɛ i ǹʼtɛ yi niŋ ɲaanbi ábɛɛ tɛ.

2 Kí ɲaanfɛkwulu bi sinaŋ mwɔɔnna ni kila-i, kí fa arɔɔ gbɛwɔbi ki sun, kí ciirudi wuru kusɛbɛ. Niŋ ciirudibi ki ncusun-i kí i arì gbɛrupili kusɛbɛ, kí i ye Yerusalɛmu kili ki ru bilinatɔnŋ kiri tɛ.

3 Míŋ i kí shɛɛri i, tu kí ka ki tan ŋì i kɛɲɛ arɔɔ so ki wu, hali ŋì i fwuu niŋ sun. Kí ka ki tan-i ciirudibi wu, koŋ kí karaba kì.

4 Kí yibɛɛ rafɛ-i ɲaan ki fɔn tɛ, nwɔma arì i so arì gbɛfɛfinŋ ni wɔri ta-i Yerusalɛmu kili ki ru bilinatɔnŋ kiri tɛ.

5 Kí nwɔ̀ ma-i, yibɛɛ wuru ǹʼmiiri-ra ɲaan wɔ̀ tɛ, kí ǹʼma-i kí i ǹʼfwuu niŋ sun pewu! Ǹʼjɔnɔ ki, kí arì yɛri bataa ki wɔri-i Ŋuntiŋ ki tɛ, niŋ kɔɔtɛ, kí i arì yɛri bo yibɔɔ bo ru sɛbɛ ŋì i kɛɲɛ Kirinŋ dintɛ bi ki wu.

6 Niŋ ki ra, yibɛɛ Tite rafɛ-i, tu ntiŋ ta ábɛɛ tɛ nmaŋ, ntiŋ niŋ jalinŋ nakɔli baara shɔɔrinŋ ki wɔ̀ tɔnpa wuru ábɛɛ kanfɛ, ntiŋ i ta niŋ nafaa.

7 Ábɛɛ i jɛŋ bilinabi ki fa Kirinŋ wɔ wulu sunjomaanna ki ru, á i ji jɛŋ bitɔbi ki ru, á cɛrukɔlimaan i ji-i, niŋ fa yibɛɛ bi i ji di ábɛɛ tɛ, miŋ tu ábɛɛ ǹʼja-i yibɛɛ ra ɲaan wɔ̀ tɛ. Ábɛɛ i jɛŋ niŋ bi kiri bataa ra. Niŋ ki ra, á ncusun á i ji jɛŋ ka jalinŋ nakɔli baara shɔɔrinŋ ka ra sɛbɛ.

8 Míŋ faan bo-a ábɛɛ sun tu a kari wɔ ki bishi ma kì dɛ! Nka míŋ i ábɛɛ kaashi kiri wɔ cɛrukɔli ki bi-a ábɛɛ tɛ, nwɔma á i ǹʼtɔ tu ábɔɔ bidintɛbi ki ma-a ɲaan wɔ̀ tɛ, tu niŋ ǹʼsɛlɛsɛli ki i.

9 Sabu, ábɛɛ Ŋuntiŋ Yesu Kirisa wɔ shɔɔrinŋ ki tɔ-i, ninwɔ̀ wuru fintiŋ i, nka ntiŋ ji-i gbɛwɔ ɔ ábɛɛ bira, nwɔma ntiŋ wɔ gbɛwɔbi ki bira ábɛɛ ji finŋ tiŋ ni i.

10-11 Nwɔ̀ i míŋ gbɛ ka bi ka sun, niŋ i kaa, ŋì i shi fɔ ɲankaŋ, ka jalinŋ ka wɔri bi ki wuru ábɛɛ tɔnŋ na, niŋ bantenŋ i kì, ábɛɛ á gbɛ de-i ǹʼbaara ki ru cunadibi wu, á tiri jɛŋ mìŋ cunadibi tenŋ ki wu, á i ǹʼnafaa á faan ki bataa wu. Ninki a pari.

12 Miŋ bi woo bi mabi po-i nʼyɛri ru Kirinŋ bira, niŋ di-i ǹʼtɛ. Nka so wɔ̀ i miŋ gbɛ, ǹʼma kɛɲɛ ninki wu, sabu so wɔ̀ miŋ gbɛ kì, Kirinŋ niŋ ceeli-la miŋ gbɛ kì.

13 Ŋì miŋ tu yibɛɛ ǹʼbi-a tu á ye á kaashi kiri tɛ, á i pwulu á i ji gbɛwɔ ri kì dɛ! Nka yibɛɛ i ǹʼtɛ ábɛɛ i ye ámaŋ tɛ bidintɛbi wu.

14 Dɔnsaŋ, finŋ i ábɛɛ gbɛ, ábɛɛ kakan-i á i ye finŋ bali kiri tɛ. Waarinŋ tɔri ru, a finŋ na ji ábɛɛ gbɛ kì, ŋì i ji kíbɛɛ gbɛ, kí i so ye-i ábɛɛ tɛ sɛbɛ. Niŋ ɲaan ki tɛ, ábɛɛ fɔn a ji tenŋ i.

15 Ǹʼyɔ miŋ tu ǹʼsɛbɛ-i Kirinŋ wɔ wulu sɛbɛ ki ru ɲaan wɔ̀ tɛ tu : « Konwɔtiŋ ǹʼmwɔɔnna shi-ri, nintiŋ wɔ ki wuru kɛɲɛ-a ntiŋ wu, konwɔtiŋ ǹʼpyaanŋ shi-ri, nintiŋ wɔ ki wuru waa-ra kì. »


Tite fa a tirishi kiri

16 Yibɛɛ baraka bi-a Kirinŋ tɛ, sabu Ŋì i ncin-i ábɛɛ bi i di Tite tɛ yibɛɛ sali.

17 Yibɛɛ wuru nwɔ̀ ceeli-la ntiŋ gbɛ, ntiŋ a tu-i niŋ na ntiŋ i ta ábɛɛ tɛ, niŋ bantenŋ i kì, ntiŋ yɛri ki wuru tamaŋ ceeli-la ábɛɛ tɛ nmaŋ sun.

18 Bilinatɔnŋ kwuru kiri bataa i yi tindaŋ wɔ̀ tɔ jii bi-a Wulujii sunjorama ki bira, yibɛɛ ra niŋ bo ta Tite fan ábɛɛ tɛ.

19 Niŋ fa, bilinatɔnŋ kwuru kiri yɛrima kiri niŋ tindaŋ ki ɲaannashi-i sɛbɛ, tu ntiŋ bo yibɛɛ sun tu yi i ta ka buɲafinŋ kari wɔri yimaŋ fan, yibɛɛ i niŋ baara ki ma-a yi i Ŋuntiŋ ki gbɛ, niŋ fa yi ǹʼji tu yibɛɛ ǹʼtɛ yi i ye yi tindaŋ kiri tɛ.

20 Yibɛɛ ǹʼma-a ɲaan ki bataa tɛ, nwɔma koŋ fa pɔlimaŋ kila yi ra, ka wari mwɔɔnna ka paka ɲaan bira kì.

21 Yibɛɛ i ǹʼtɛ yi yɛri paka shɔ Ŋuntiŋ ki bantenŋ ɲaanfɛ kì, yibɛɛ i ǹʼtɛ yi i shɔ konaŋ kiri ɲaanfɛ sɛbɛ.

22 Yibɛɛ i yi tindaŋ tɔri bo ta-a koŋ fuuli kari fan ábɛɛ tɛ sɛbɛ. Yibɛɛ ntiŋ sunsunu-i ɲaan mwɔɔnna, yi i ǹʼja tu ntiŋ cɛrukɔlimaan i waaci fɔn bataa ru, nka ntiŋ cɛrukɔlimaan yɛ dɔnsaŋ, ŋì i fwuu a jɔnɔ ki sun, sabu ntiŋ gbɛ faa-a ábɛɛ ru kusɛbɛ.

23 Nwɔ̀ i Tite, niŋ i míŋ tirishi niŋ fa míŋ baara mashi i ábɛɛ kanfɛ. Tindaŋ fuuli kari i ji bilinatɔnŋ kwuru kiri wɔ cintɔnŋ ni i, nwɔ̀ri Kirisa tɔ ki gbɛ-i arɔɔ baara maka ɲaan ki wu.

24 Niŋ ki ra, á ǹʼji kí wu, tu kí bidi ábɛɛ tɛ sɔbɛ ra, nwɔma bilinatɔnŋ kwuru kiri i ǹʼtɔ, tu yibɛɛ jii wuru-i, yi i ábɛɛ tɔ shɔɔrinŋ bi.

© Wycliffe Bible Translators, Inc.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ