Korɛntitɔnŋ kiri (2) 7 - Jɔ Biibili ki

¹ Míŋ tindaŋ byii ri, a Kirinŋ ji niŋ bi kiri tɔnŋ wɔri yibɛɛ tɛ, yi yi wu fɔɔ, yi i po san firi ki nɔɔbi kiri, fa ciiru tɔnŋ ki nɔɔbi kiri bataa ru, yi i yɔɔ fɔɔbi ki rafaa Kirinŋ jɛŋ kɛmi ki wu.

Pooli ciirudibi ki

² Á á ɲaanfɛjii po yi tɛ. Yibɛɛ bi kulinŋ ma koŋ tɔri tenŋ wu kì, yi koŋ tɔri tenŋ bo fɔni saa fan kì, yi dumiŋ koŋ tɔri wɔ finŋ daali mwu san ntiŋ wu kì.

³ Míŋ i ka bi-a ábɛɛ tɛ, ŋí i ǹʼji tu ábɛɛ pɔli kì dɛ! Míŋ ǹʼbi-i ábɛɛ tɛ kɔ ńʼtu ábɛɛ bidi yibɛɛ tɛ haali. Finŋ tɔri tenŋ a so yibɛɛ san-i ábɛɛ ra pwɔkulinŋ ka sun kì, hali beŋ ki a so yibɛɛ fa ábɛɛ san-i yimaŋ na kì.

⁴ Míŋ gbɛ faa-a ábɛɛ ru kusɛbɛ, ŋí i ńʼyɛri ragbɛ-ri ábɛɛ wu. Sɛli ki ra, míŋ i ɲaanfɛkwulu mwɔɔnna nu, nka míŋ ciirudi-i ábɛɛ bira.

⁵ Sɛli ki ra, kabi yibɛɛ so-i kwumaŋ Maseduwanɛ kɛniŋ ki ru, yibɛɛ so-ri hali ɲaanfɛfili pyaanŋ kila-i sun kì. Ɲaanfɛkwulu bi ri so-i yibɛɛ sun yi kɛlinŋ ki fɔn tɛ. Kari ki wuru yibɛɛ fa konaŋ ki faninmwuŋ, kɛmi i ji yi ciiru.

⁶ Nka Kirinŋ wɔ̀ i konanmini siratu-a, niŋ yibɛɛ siratu-i Tite namaan ki wu.

⁷ Tite namaan ki ciirudibi ki bantenŋ i kì, nka ábɔɔ bi kiri niŋ yɛrima ki siratu-i ɲaan wɔ̀ tɛ, niŋ yibɛɛ bataa ɲakili sɔɔ-ɔ. Ntiŋ tu yibɛɛ tɛ tu míŋ fyii ábɛɛ wu, tu ábɛɛ ntɔri bi áwɔ bi fwuudemaan ki bira, tu á i míŋ bi ki pa á gbɛ fuuli la dɔɔ, niŋ bataa namamaan ki ǹʼbɛɛ bo-i mɔ́ɔ́n ciirudibi ki sun.

⁸ Míŋ ǹʼtɔ-i tu mɔ́ɔ́n sɛbɛ ki ru wulu kiri ábɛɛ yaa, nka míŋ a ntɔri bi yìrì bira kì. Míŋ wuru-ra ntɔri bi, sabu míŋ ǹʼja wuru tu mɔ́ɔ́n sɛbɛ ki ábɛɛ ɲaannuŋunu waarinŋ bɛɛ ru.

⁹ Nka dɔnsaŋ, míŋ ciirudi-i. Míŋ ciirudi ábɔɔ ɲaannuŋunu ki bira kì, nka ábɔɔ ɲaannuŋunu ki wɔ̀ so-i ncusun-i ábɛɛ áwɔ bijɛ kiri tɔnbo, ninki míŋ ciirudi-i. Ábɔɔ ɲaannuŋunu ki ji-i Kirinŋ dintɛ bi i, niŋ ɲaan ki tɛ, yibɛɛ bi wɔ̀ ma-i ábɛɛ wu, niŋ ji bijɛ ɛ kì.

¹⁰ Sabu ɲaannuŋunu wɔ̀ i Kirinŋ dintɛ bi i, niŋ i ye-a koŋ tɛ, ntiŋ i awɔ bijɛ ki tɔnbo, koŋ ntɔri bi-a niŋ mamaan ki ra kì. Nka ka juniɲa ka ru ɲaannuŋunu ki i na-a beŋ wu.

¹¹ Sɛli yɛ, ábɛɛ ɲaannuŋunubi kila-i. Niŋ ji-i Kirinŋ dintɛ bi i. Á ǹʼshɛɛli, niŋ ábɛɛ rapwulu-i ɲaan wɔ̀ tɛ! Bi wɔ̀ ma-i ábɛɛ kanfɛ, ábɛɛ ǹʼshi-i á gbɛ fuuli la, á i á yɛri rafɛ-ri. Ábɛɛ ǹʼji-i tu bijɛ mamaan ki fu ábɛɛ sun kì, tu ábɛɛ tɔnkwulu á yɛri cɛfan niŋ bi ki bira, kɛmi sinaŋ i de á ru míŋ jɛŋ. Dɔnsaŋ, míŋ fyii i ábɛɛ ru, á i ji ǹʼtɛ á i Kirinŋ dintɛ bi ki ma sɛbɛ, á i niŋ bijɛmatɔnŋ ki kulu. Niŋ na, ábɛɛ ǹʼji-i ɲaan bataa tɛ, tu ábɛɛ kanŋ wuru bi ka ru kì.

¹² A míŋ sɛbɛ wɔri ta ábɛɛ tɛ, nwɔ̀tiŋ bi kulinŋ ki ma-i, míŋ ǹʼwɔri ta niŋ bira kì, bi kulinŋ ki ma-i nwɔ̀tiŋ wu, ńʼdumiŋ ǹʼwɔri ta nintiŋ bira sɛbɛ kì. Míŋ ǹʼwɔri ta-i, nwɔma yibɛɛ bi ki gbɛ-i ábɛɛ gbɛ Kirinŋ ɲaanfɛ ɲaan wɔ̀ tɛ, á bataa i niŋ tɔ.

¹³ Niŋ ki ra, ábɛɛ nwɔ̀ ma-i, niŋ yibɛɛ tɔnfili-i. Ciirudibi sinaŋ tɔri na-i bo niŋ tɔnfili ki sun yibɛɛ gbɛ, waarinŋ wɔ̀ ru, yibɛɛ Tite ciirudimaan ki ja-i, tu ábɛɛ afinŋ siratu á i a ɲakili ki sɔɔ.

¹⁴ Míŋ ábɛɛ tɔ shɔɔrinŋ bi wuru ntiŋ tɛ kɔ, míŋ ŋununfɛshi kila-i niŋ nu. Yibɛɛ finŋ woo finŋ bi-i ábɛɛ tɛ, niŋ bataa i sɛli i. Mìŋ ɲaan tenŋ ki tɛ, yibɛɛ wulu finŋ woo finŋ bi-i Tite tɛ ábɛɛ bi sun, nini bataa ji-i sɛli i.

¹⁵ Dɔnsaŋ, ábɛɛ bi ki gbɛ-i Tite gbɛ haali! Ábɛɛ bataa ntiŋ ŋununafuka shɔ-i, á i ntiŋ gbɛ, kɛmi fa gbɛbi wu ɲaan wɔ̀ tɛ, niŋ po san ntiŋ ciiru kì dɛ!

¹⁶ Míŋ yɛri ki ciirudimaan yɛ, sabu míŋ a so ńʼgbɛ bili-i ábɛɛ sun bi bataa bi ru.