Korɛntitɔnŋ kiri (2) 6 - Jɔ Biibili ki

¹ Niŋ ɲaan ki tɛ, yibɛɛ wɔ̀ri i Kirinŋ baara mashi ri i, yibɛɛ i ábɛɛ rafɛ-a, tu ábɛɛ Kirinŋ wɔ shɔɔrinŋ wɔ̀ kila-i, tu á fa niŋ bo á gbɛ kɔɔsun, ŋì i ji finŋ gbansanŋ i kì.

² Á ǹʼtɔ tu Kirinŋ ǹʼbi-a awɔ wulu ki ru tu : « Míŋ ábɔɔ rafɛ kiri mwu-i ńʼdintɛ waaci kiri ru. Ŋí i ye á tɛ á mwu shikaŋ ki ru. » Á ǹʼshɛɛli, Kirinŋ dintɛ waaci ki i dɔɔ, mwu shikaŋ ki i jiŋ.

³ Nwɔma pɔlimaŋ fa kila yibɔɔ baara ki ra kì, yibɛɛ i yi banba-a ɲaan ki fɔn tɛ, yi fa ji koŋ tɔri tenŋ fɛɛn ŋuŋ i kì.

⁴ Niŋ ki ra, yibɛɛ i ǹʼma-a ɲaan ki fɔn bataa tɛ, yi i ǹʼji tu yibɛɛ Kirinŋ tɛ baara matɔnŋ sɛlɛsɛli li i. Yibɛɛ i cɔɔri kiri fa tɔnfɔɔbi kiri fa yɛlinŋ sinaŋ kiri bataa kwun-a yi ru.

⁵ Kí i yi bwɔ-a, kí i yi bo-ri nkasu ru, kí i kpeeri rusu bo-ri yi sun, kí i yi yɛli-li, kí i yi san-ni yi ɲaanna, yi bɛɛkɔni ki i tu-ri,

⁶ niŋ bataa ciiru, yibɛɛ fɔɔmaan ni yɛ, yi sɛli ki tɔ-ri, yi tɔnsunfilimaan ni i ji-i. Yibɛɛ i shɔɔrintiŋ ni i, Ɲiniwɔlinŋ ki i ji yi fan, koŋ bataa bi i ji di yi tɛ ciirufɔɔbi wu.

⁷ Yibɛɛ i wulu ki sunjo-a konaŋ ki tɛ, sɛli niŋ fa Kirinŋ wɔ sotinbi ki wu. Telibi ki i yibɔɔ kari tanfinŋ ki fa yi sunsuufinŋ ki i.

⁸ Konaŋ kiri bɛɛ ri i yibɛɛ gbɛ-a, ǹʼtɔri ri i yi rufyɛ-ri. Ǹʼbɛɛ ri i yi tɔ jɛ bi-a, ǹʼtɔri i yi tɔ shɔɔrinŋ bi-ri sɛbɛ, niŋ tɔri ǹʼtɔri san-a yibɛɛ ra kì. Ǹʼbɛɛ ri tu yibɛɛ konaŋ ni sunnɛɛn-na, nka yibɛɛ dumiŋ i ji sɛli ki sun.

⁹ Kí i ǹʼji-a miŋ tu arìbɛɛ yibɛɛ tɔ-a kì, nka kí bataa i yibɛɛ tɔ-a, tu yibɛɛ beenimaan ni i, nka yibɛɛ ɲaninkulutɔnŋ ni i ji-i. Kí i ɲaniŋ kwuru ki bataa sɔɔ-ra yibɛɛ sun, nka kí yi kilɛn kì.

¹⁰ Kí ɲaanna, yibɛɛ i makwulukoŋ ni i, nka yibɛɛ ciirudimaan yɛ waarinŋ bataa ru. Kí tu yi yɛlinkɔni ni i, nka yibɛɛ i koŋ mwɔɔnna ji-a fintiŋ ni i, kí tu yi gbɛwɔ ri i, nka finŋ bataa i ji yibɔɔ.

¹¹ Korɛntitiiri, yibɛɛ sɛli ki bi-i ábɛɛ tɛ, yi i ábɛɛ bidi yi tɛ ciirufɔɔbi wu.

¹² Yibɛɛ yi kaan ábɛɛ bidi yi tɛ kì, nka yibɛɛ bidi ábɛɛ kiri tɛ kì.

¹³ Á ncusun ŋí i wulubi á tɛ miŋ tu koŋ i wulubi-a a dintɛ daŋ ni tɛ ɲaan wɔ̀ tɛ : « Á fa á kaan yi tɛ kì, yibɛɛ ábɛɛ bidi-i yi tɛ ɲaan wɔ̀ tɛ, á yi bidi á tɛ mìŋ ɲaan ki tɛ. »

Mancinŋ ki fa manisarinŋ ki fubalibi ki

¹⁴ Koŋ wɔ̀ri bili Yesu ra kì, á fa nini fa dɛbɛ arɔɔ bi kulinŋ mabi kiri sun kì. Telibi ki fa telibalibi ki a so fu-i dɔɔkunŋ? Ɲaan tɔri tɛ, manisarinŋ ki fa mancinŋ ki so-a dɛbɛ-i dɔɔkunŋ?

¹⁵ Fubi danwɔ Kirisa fa shitaanni faninmwuŋ? Bilinatɔnŋ ki fa bilinabali ki ciiru ɲakili kiri ra so ji-i tenŋ i dɔɔkunŋ?

¹⁶ Fu danwɔ Kirinfusinaŋ ki fa pɛli kiri faninmwuŋ? Yibɛɛ kiri i Kirinŋ ɲaninkulutɔnŋ ki wɔ fu ki i. Kirinŋ yɛrima ki niŋ bi-i awɔ wulu ki ru tu : « Míŋ a sɔɔ kí faninmwuŋ, ŋí i tiri-ri kí fan míŋ a ji kɔ́ɔ́ Kirinŋ ki i, kí i ji mɔ́ɔ́n konanbi ki i. »

¹⁷ Niŋ ki ra, Ŋuntiŋ Kirinŋ tu awɔ konanbi ki tɛ tu : « Á po san kí kanfɛ, á i á san kí ra, á fa myɛ finŋ nɔɔmaan tɔri tenŋ na kì. A niŋ ma, míŋ a ji ábɛɛ tɛ.

¹⁸ Míŋ a ji ábɛɛ tiŋ ki i, ábɛɛ i ji míŋ danshuru ri fa ńʼdanmari ri i, Ŋuntiŋ ki, Sobataatiŋ ki tu ninkunŋ. »