Korɛntitɔnŋ kiri (2) 5 - Jɔ Biibili ki

¹ Yibɔɔ pwɔkulinŋ sun firi kiri i miŋ tu mwuu ri. Yibɛɛ ǹʼtɔ-i tu niŋ mwuu ki li waarinŋ wɔ̀ ru pwɔkulinŋ ka sun, tu Kirinŋ a fu wɔri yibɛɛ tɛ kirinpɔli ki ra. Niŋ i ǹʼbi-a tu, a yibɛɛ beeni, Kirinŋ a firi tɔri wɔri yibɛɛ tɛ, ŋì i ninwɔ̀ ramɔni-i a yɛri ki gbɛɛra, niŋ firi ki dumiŋ li-a fɛsɛfɛsɛ kì.

² Ŋì i yibɛɛ tu ka pwɔkulinŋ sun firi ka ru, yibɛɛ i yaalinpo-a, yi i cɛɛn-ni yɔɔ kirinpɔlila firi ŋunaŋ ki bo ki cɛfan,

³ a yibɛɛ niŋ firi ki bo yi sun, yibɛɛ sunwɔ a tu kili kì.

⁴ Sɛli ki ra, ŋì i yibɛɛ tu ka pwɔkulinŋ sun firi ka ru, yibɛɛ i yi cɔɔn-na miŋ tu kí shii sɔɔ koŋ sun. Ŋì i miŋ tu yibɛɛ ǹʼtɛ yi i beeni kì dɛ! Nka yibɛɛ i ǹʼtɛ, yi i kirinpɔlila firi ki bo yi sun, nwɔma beeni wɔ ki i rucini ɲaninkulutɔnbi kɔbali wɔ ki ra.

⁵ Kirinŋ yɛrima ki niŋ bo-i yibɛɛ jɔ ru. Ŋì Ɲiniwɔlinŋ ki wɔri-i yibɛɛ tɛ, nwɔma a i ǹʼji yi wu tu afinŋ bi shɔɔrinŋ finŋ woo finŋ tɔnŋ wɔri yibɛɛ tɛ, tu niŋ pyɛ ki bataa a ɲaan tɛ.

⁶ Niŋ ki ra, hali yibɛɛ ji ǹʼtɔ-a tu ŋì i yibɛɛ tu ka pwɔkulinŋ sun firi ka ru, tu yibɛɛ maŋ nari faa Ŋuntiŋ ki wɔ mani ki ra, yibɛɛ siratumaan yɛ waarinŋ bataa ru.

⁷ Yibɛɛ ɲaniŋ tu bi kari ra, yi i kila yi i yi tu yìrì ra kì, nka yibɛɛ yi tu-i yìrì ra bilinabi ki baraka ra.

⁸ Yibɛɛ siratumaan yɛ waarinŋ bataa ru, ǹʼdi-i yibɛɛ tɛ yi i po san ka pwɔkulinŋ sun firi ka ru, yi i tiri kulu Ŋuntiŋ ki tɛ.

⁹ Niŋ ki ra, yibɛɛ pwɔkulinŋ sun woo, yibɛɛ Ŋuntiŋ ki fan woo, yibɛɛ i yi banba-a, yi i yi yɛri bidi Ŋuntiŋ ki tɛ.

¹⁰ Sabu yibɛɛ bataa kakan-i yi i ta tu Kirisa ɲaanfɛ, nwɔma kiti ki i kwuru yi sun, koŋ bataa i awɔ sali kila ŋì i kɛɲɛ yi tenŋ tenŋ ki fɔn wɔ shɔɔrinŋ mamaan walima yɔɔ bi kulinŋ mamaan ki wu, yɔɔ ɲaninkulutɔnbi ki ru pwɔkulinŋ ka sun.

Konanmini fa Kirinŋ faninmwuŋ namɔni bi ki Kirisa gbɛ

¹¹ Yibɛɛ i kɛni-na Ŋuntiŋ ki jɛŋ, niŋ ki ra, yibɛɛ konaŋ ki racin-ni ɲaan ki fɔn tɛ, nwɔma kí i ji Kirinŋ wɔ wulu ki tɛ. Kirinŋ i yibɛɛ ɲaan ki bataa tɔ-a, míŋ fani ɲakilila tu ábɛɛ yɛrima kiri yibɛɛ tɔ-a á ciiru nmaŋ, mìŋ ɲaan ki tɛ sɛbɛ.

¹² Ŋì i miŋ tu yibɛɛ yi tɔ shɔɔrinŋ bi-a ábɛɛ tɛ sɛbɛ kì dɛ! Yibɛɛ i ɲaan wɔri-ra ábɛɛ tɛ, á i á ciirudi yibɛɛ wu kusɛbɛ, koŋ wɔ̀ri i arì yɛri ji-a ciiru tɔnnabi kiri wu kì, kí i arì ragbɛ bantenŋ tan-ni taanna finŋ ja wɔ̀ kiri wu, á i wulubimaŋ kila nini gbɛ.

¹³ Yibɛɛ i julutiŋ ni i wa? A yibɛɛ ji julutiŋ ni i ábɛɛ ɲaanna, Kirinŋ cɛfan bi yɛ. Nka ábɛɛ dumiŋ ji ǹʼtɔ-a tu yibɛɛ julutiŋ ni i kì, á ǹʼtɔ tu yibɛɛ ǹʼtɛ yi i ye ábɛɛ tɛ.

¹⁴ Sɛli ki ra, yibɛɛ i bi finŋ woo finŋ ma-a, yibɛɛ i ǹʼma-a, sabu yibɛɛ ǹʼtɔ-i tu yibɛɛ bidi Kirisa tɛ haali. Yibɛɛ bili-i ǹʼna tu ntiŋ tenŋ pe beeni konaŋ ki bataa ta ru. Niŋ kɔri ki i ji tu konaŋ bataa beeni ntiŋ fan.

¹⁵ Ntiŋ beeni-i konaŋ ki bataa ta ru, nwɔma tu nwɔ̀ri i arì ɲaanna, nini fa tiri ŋì i kɛɲɛ arì dintɛ bi wu kili kì, nka kí i tiri ŋì i kɛɲɛ Yesu dintɛ bi kiri wu, nka ŋì i ma-a Yesu tɛ, ninwɔ̀ beeni-i ntiŋ i ŋmɛni kí bira.

¹⁶ Niŋ ki ra, yibɛɛ koŋ tɔri tenŋ shɛɛli-la konanmini wɔ shɛɛlika ɲaan tɛ kili kì. Niŋ kɔri ki i tu, yibɛɛ konanmini kɔɔsun ki shɛɛli-la kili kì duu ntiŋ ciiru ki. Hali yibɛɛ ji wuru Kirisa bi ki shɛɛli-la kɔɔsun bi kiri ra fɔlɔ, dɔnsaŋ yibɛɛ ǹʼshɛɛli-la ninkunŋ kili kì.

¹⁷ A konwɔtiŋ fa Kirisa dɛbɛ, nintiŋ i ji-a miŋ tu koŋ ŋunaŋ, finŋ woo finŋ i ǹʼbwuumaan, niŋ bataa i fɔni-na, finŋ ŋunaŋ ni i na.

¹⁸ Niŋ bataa i po-a Kirinŋ nu, ninwɔ̀ ki yibɛɛ fa a faninmwuŋ ki ramɔni-i Kirisa baraka ra, ŋì i kila ŋì i niŋ faninmwuŋ namɔni baara ki biye yibɛɛ gbɛsun.

¹⁹ Kirisa bira, Kirinŋ niŋ fu ki de-i a fa konanmini faninmwuŋ, ŋì i kɔ́ɔ́ bi kulinŋ kiri tu kí tɛ. Ŋì ninki wulu sunjorama ki baara ki wɔri-i yibɛɛ tɛ.

²⁰ Niŋ ɲaan ki tɛ, yibɛɛ i Kirisa wɔ koŋ sɔɔmaan ni i ábɛɛ faninmwuŋ, ŋì i ji miŋ tu Kirinŋ wulubi-a ábɛɛ tɛ yibɛɛ tɔnŋ na. Niŋ ki ra, yibɛɛ i ábɛɛ rafɛ-a, á ǹʼma Kirisa tɔ ki bira, á fa Kirinŋ i fu.

²¹ Kirisa wɔ̀ ki bijɛ ma kì, Kirinŋ awɔ kiti ki fɛɛn ninki sun yibɛɛ bijɛmatɔnŋ kiri ta ru, nwɔma yi i ji koŋ telimaan ni i a ɲaanfɛ Kirisa bira.