Korɛntitɔnŋ kiri (2) 13 - Jɔ Biibili ki

Pooli wɔ racinwulu lakɔɔra kiri

¹ Ka ra ji míŋ ta kaan byantɔnŋ ki i ábɛɛ tɛ kaa. Miŋ tu Kirinŋ wɔ wulu ki i ǹʼbi-a ɲaan wɔ̀ tɛ, bi kiri bataa ra ta ɲaanpo shɛɛri fuuli, walima shɛɛri byaŋ wɔ wulu bimaan sun.

² Míŋ ta kaan fuluntɔnŋ ki ábɛɛ tɛ, nwɔ̀ri bijɛ ki ma wuru-i, míŋ ka bi wuru nini tɛ kɔ, hali míŋ maŋ ji nari ábɛɛ ra dɔɔ, nwɔ̀ri bijɛ ki ma-i, míŋ i ǹʼjɛnbi-a niŋ fa koŋ pyɛ kiri bataa tɛ tu míŋ na ta ábɛɛ tɛ nmaŋ, tu míŋ a ta mini bijɛmatɔnŋ ki tɔri tenŋ ŋununa kili kì.

³ Miŋ tu ábɛɛ i ǹʼtɛ á i ǹʼtɔ tu Kirisa ji wulubi-a míŋ tɔnŋ na, á ǹʼtɔ tu ntiŋ baraka bali i ábɛɛ kanfɛ kì, nka tu ntiŋ wɔ sotinbi ki gbɛ ábɛɛ kanfɛ.

⁴ Sɛli yɛ, Kirisa kpinkpi-i suu ki sun waarinŋ wɔ̀ ru, so wuru ntiŋ gbɛ kì, nka ntiŋ ŋmɛni-i, dɔnsaŋ ntiŋ ɲaninkulutɔnŋ yɛ Kirinŋ wɔ sotinbi ki baraka ra. Mìŋ ɲaan tenŋ ki tɛ, yibɛɛ i baraka bali li i Kirisa sali, nka yibɛɛ i ǹʼji-a ábɛɛ wu tu yibɛɛ fa ntiŋ ɲaninkulutɔnŋ ni i, niŋ fa tu yibɛɛ baara ki ma-a ábɛɛ kanfɛ Kirinŋ wɔ sotinbi ki baraka ra.

⁵ Á á yɛri rufɔɔ, á i á yɛri shɛɛli, a ábɛɛ ji bilinabi saa ki sun, walima a ábɛɛ ji ǹʼsun kì. Ábɛɛ ǹʼja á yɛri ciiru tu Kirisa ábɛɛ fan kì wa? A niŋ ji-i kì, ábɛɛ waa-a bilinabi ki ra!

⁶ Nka míŋ cirasun tu ábɛɛ kɔniŋ ǹʼtɔ-i tu yibɛɛ waa bilinabi ki ra kì!

⁷ Yibɛɛ i Kirinŋ nafɛ-a, nwɔma ábɛɛ fa bijɛ ma kì. Yibɛɛ ǹʼtɛ yi i ǹʼji tu yibɛɛ so-a bi ra kì, nka yibɛɛ i ǹʼtɛ tu ábɛɛ i bi shɔɔrinŋ ma, hali ǹʼji miŋ tu yibɛɛ kiri ra ji waa bilinabi ki ra.

⁸ So tɔri yibɛɛ gbɛ, yi i Kirinŋ wɔ sɛli ki kari kì, duu yi i ǹʼpa ǹʼcɛfan.

⁹ Hali yibɛɛ baraka ki ji kuru, a ábɛɛ baraka ki ja ji gbɛ bilinabi ki ru, niŋ i yibɛɛ ciirudi-a. Yibɔɔ Kirinŋ nafɛ ki i kaa tu ábɛɛ ji koŋ nafaamaan ni i.

¹⁰ Niŋ ki ra, ŋì i míŋ tu mani narimaŋ nu, míŋ i ka sɛbɛ ka bo ta-a ábɛɛ tɛ, nwɔma a míŋ na so ábɛɛ kanfɛ waarinŋ wɔ̀ ru, ŋì i kɛɲɛ Ŋuntiŋ ki wɔ so wɔrimaan ki wu míŋ tɛ, ŋí fa na ta wulu furu ri bi á tɛ sɛbɛ kì. Ŋuntiŋ ki niŋ so ki wɔri-i yibɛɛ tɛ ábɔɔ jɛŋ ta ki bira, ŋì i ǹʼwɔri ábɛɛ halikirama bira kì.

¹¹ Ayiwa ńʼtindaŋ ni, Kirinŋ tu á fan, ŋì i ɲaanfɛfili wɔri á tɛ! Á á cunadi, á i ji koŋ nafaamaan ni i. Á i ámaŋ cunadi-ri. Á á ɲakilila kiri ji tenŋ i, á i fu, a niŋ ma, bidintɛbitiŋ Kirinŋ ki, ninwɔ̀ i ɲaanfɛfilitiŋ Kirinŋ ki i, niŋ a tu ábɛɛ fan.

¹² Á ámaŋ co bidintɛbi coolinŋ wu. Kirinŋ wɔ wɔlinŋ kiri bataa i ábɛɛ co-a.

¹³ Yibɛɛ Ŋuntiŋ Yesu Kirisa wɔ shɔɔrinŋ ki fa Kirinŋ wɔ bidintɛbi ki niŋ fa Ɲiniwɔlinŋ ki wɔ tenbi ki tu á bataa fan.