Korɛntitɔnŋ kiri (2) 12 - Jɔ Biibili ki

Kirinŋ baraka de-i Pooli lu

¹ Konaŋ kiri i míŋ po-a ńʼyɛri ragbɛ sun, ŋuŋ dumiŋ niŋ na kì. Niŋ ki ra, Ŋuntiŋ ki finŋ wɔ̀ri ji-i míŋ wu, ŋì i tɔbi wɔ̀ wɔri míŋ tɛ, míŋ a ǹʼbɛɛ bi niŋ sun dɔnsaŋ.

² Míŋ i shuru bɛɛ tɔ-a, bilinatɔnŋ yɛ Kirisa ra, ninwɔ̀ i míŋ, ǹʼjiri bwununpyiirantɔnŋ i ɲɛniŋ, niŋ shi tunpa ta-i kirinpɔli ki ru fɔ cuunŋ cuunŋ, ntiŋ yɛrima ki shi tunpa-ri woo, walima ntiŋ jafinŋ ja-ri woo, míŋ niŋ tɔ kì, nka Kirinŋ ǹʼtɔ-i.

^3-4 Míŋ kɔniŋ ǹʼtɔ-i ńʼtu niŋ shuru ki tunpa alijina ki ru, nka ntiŋ yɛrima shi tunpa-ri woo, walima Kirinŋ ǹʼji ntiŋ wu jafinŋ nu woo, míŋ ǹʼtɔ kì, nka Kirinŋ ǹʼtɔ-i, ntiŋ wulu wɔ̀ri rama-i niŋ mani nu, nini so-a rakali-i kì, sabu konanmini kakan ŋi i niŋ wulu kiri bi nʼtɔnŋ na kì.

⁵ Míŋ a ńʼyɛri ragbɛ niŋ koŋ ki bishi ki bira, nka míŋ a ńʼyɛri ragbɛ ńʼwɔ bi tɔri wu kì, duu ńʼwɔ baraka kurubi.

⁶ Hali míŋ ji wuru ǹʼtɛ ŋí i ńʼyɛri ragbɛ, míŋ wuru-ra ji julutiŋ i kì, sabu míŋ wuru-ra wulu tɔri bi sɛli ki kɔɔtɛ kì. Nka míŋ a niŋ ma kì, nwɔma konaŋ ki i míŋ ja-a ɲaan wɔ̀ tɛ, kí i nwɔ̀ rama-ni ńʼbi ki sun, kí fa na míŋ gbɛ fwuu niŋ sun kì.

⁷ Nwɔma míŋ fa ńʼyɛri ragbɛ Kirinŋ wɔ botɔnsunfinŋ jimaan kari bi wu kì, ŋì cɔɔri bo-i míŋ sun, miŋ tu cii koŋ bu-a a firi ki ru ɲaan wɔ̀ tɛ. Niŋ ji-i miŋ tu Kirinŋ ncusun shitaanni i awɔ cintɔnŋ ki bɛɛ bo na míŋ bwɔ, nwɔma míŋ fa na ńʼyɛri ragbɛ kì.

⁸ Míŋ Ŋuntiŋ ki rafɛ-i kaan byaŋ, ńʼtu ŋì niŋ cɔɔri ki kɔ san míŋ na.

⁹ Nka ŋì i ǹʼnupwulu tu : « Mɔ́ɔ́n shɔɔrinŋ ki a miŋ po, sabu mɔ́ɔ́n sotinbi ki i ja-a mɔɔn baraka kurubi ki ru. » Niŋ ki ra, ǹʼdi-i míŋ tɛ ŋí i ńʼyɛri ragbɛ-ri ńʼwɔ baraka kurubi ki wu, nwɔma Kirisa wɔ sotinbi ki i tu ńʼsun.

¹⁰ Niŋ ki ra, míŋ ciirudimaan yɛ ńʼwɔ baraka kurubi ki ra. A kí ji míŋ ki-a, walima míŋ fɔɔnmaan i ji-i, hali kí ji míŋ cɔɔri-ra woo, walima yɛlinŋ ki ji so míŋ sun Kirisa bi ki ra woo, niŋ fɔn di-i míŋ tɛ, sabu a waaci wɔ̀ ru míŋ baraka ki kuru, míŋ i baraka kila-a niŋ waaci ki ru Kirisa gbɛ.

Pooli ciirufɔnɔbi ki Korɛntitɔnŋ kiri bira

¹¹ Míŋ wulu ki bi-i miŋ tu míŋ a ji ji julutiŋ i, nka ábɛɛ kiri míŋ po-i niŋ sun, sabu ábɛɛ kiri kakan wuru-i á i míŋ ŋununu kari tan, sabu hali míŋ ji finŋ tɔri i kì, ka cindaŋ kari wɔ̀ri gbɛ-i ábɛɛ ɲaanna, kí pari míŋ wu bi tɔri dantenŋ na kì.

¹² Sɛli ki ra, bi wɔ̀ri i ǹʼji-a tu míŋ Yesu wɔ cindaŋ i, nini ji-i ábɛɛ wu cunadibi wu, niŋ fa Kirinŋ wɔ taanmashɛ ri fa botɔnsunbi ri fa sotinbi mwɔɔnna ni wu.

¹³ Míŋ bi shɔɔrinŋ danwɔ ma egilisi pyɛ kiri tɛ, tu míŋ niŋ ma ábɛɛ tɛ kì? Míŋ ábɛɛ gbɛfɛ jalinŋ mwu kì, a niŋ ji-i, á niŋ pɔli ki tu ńʼtɛ.

¹⁴ Míŋ i ǹʼtɛ ŋí i ta ńʼta kaan byantɔnŋ ki ra ábɛɛ tɛ kaa. Míŋ i ǹʼtɛ ŋí i ta ńʼshii bo ábɛɛ sun sɛbɛ kì, sabu míŋ ábɛɛ gbɛfɛfinŋ kiri cɛfan kì, nka míŋ i ábɛɛ yɛrima kiri cɛfan. Tiraŋ kiri arì jifinŋ kiri jɛŋ sɔɔ-ra kì, nka jifinŋ kiri i arɔɔ tiraŋ kiri jɛŋ sɔɔ-ra.

¹⁵ Finŋ woo finŋ kɔniŋ i míŋ gbɛ, míŋ a ńʼtu ŋí i niŋ bataa wɔri ábɛɛ bira, fɔ ŋì i ta bo ńʼyɛri ŋuniŋ ki sun. Á míŋ ábɛɛ bidi ńʼtɛ niŋ ɲaan ki tɛ, ninki i ǹʼbɛɛ san-a míŋ bidintɛka ki ra ábɛɛ tɛ wa?

¹⁶ Ábɛɛ yɛrima kiri ǹʼtɔ-i tu míŋ ńʼshii sɔɔ ábɛɛ tɔri tenŋ sun kì. Nka, ǹʼbɛɛ ri dumiŋ a ǹʼbi tu : « Pooli kɛrɛbi-i dɛ, ntiŋ i yibɛɛ gbɛfɛ jalinŋ ki nu-i kɛrɛbi ra. »

¹⁷ Míŋ nwɔ̀ri cin wuru ábɛɛ tɛ, nini bɛɛ ta-i ábɛɛ gbɛfɛfinŋ mwu míŋ tɔ wu wa?

¹⁸ Míŋ Tite rafɛ-i tu ntiŋ fa yi tindaŋ ki ta ábɛɛ tɛ nmaŋ. Ntiŋ ta-i gbɛfɛfinŋ mwu ábɛɛ wu míŋ tɔ wu wa? Aayi! Ábɛɛ i ǹʼtɔ-a tu míŋ fa Tite wɔ ɲakilila ki tenŋ i, niŋ fa tu yi fɔn bataa i ji saa tenŋ fan.

¹⁹ Kabi waaci ŋmani na, ábɛɛ i ǹʼmiiri-ra tu yibɛɛ ra ji jii wɔrimaŋ ceeli-la yi yɛri tɛ. Aayi! Niŋ i kì, nka yibɛɛ i ka bataa bi-a Kirinŋ ɲaanfɛ yi fa Yesu Kirisa wɔ tenbi ki baraka ra. Tindaŋ byii ri, yibɛɛ ka bataa bi-a ábɛɛ tɛ, nwɔma ábɛɛ i ta jɛŋ áwɔ bilinabi ki ru.

²⁰ Míŋ i kɛni-na, ńʼtu míŋ fa na ta fa ábɛɛ wu ɲaan ki bɛɛ tɛ, nwɔ̀ a fu míŋ sun kì, walima ábɛɛ na ta míŋ ja ɲaan ki bɛɛ tɛ, nwɔ̀ a fu ábɛɛ sun kì. Míŋ kɛni-na ńʼtu míŋ fa ta fa kari myɛɛnniŋ wu ábɛɛ faninmwuŋ kì, niŋ fa ɲaannajuubi, niŋ fa tɔnkwulubi, niŋ fa fyikatinbi, niŋ fa maŋ tɔlimaanna ni, fa maŋ tɔ bimaanna, niŋ fa yɛri ragbɛmaanna, ŋì i bo bi ɲaanmimaan tɔri ri sun.

²¹ Míŋ i kɛni-na, ńʼtu míŋ na ta ábɛɛ tɛ, ńʼtu míŋ a ta ɲaankwun Kirinŋ ɲaanfɛ sɛbɛ ábɛɛ bira. Koŋ mwɔɔnna wɔ̀ri bijɛ ma-i kɔ, a kí ji ntɔri bi niŋ bijɛ kiri ra kì, kí i arɔɔ bi nɔɔmaan kiri fa nankulunbi ki fa arɔɔ bijɛ kwuru ki bataa tɔnbo kì, ńʼtu míŋ a ta ɲaannaju po nini bira sɛbɛ.