Korɛntitɔnŋ kiri (2) 11 - Jɔ Biibili ki

Cindaŋ purubitɔnŋ kiri bi ki

¹ Ńʼtindaŋ ni, á á tɔnsunfili ńʼtɛ pyaanniŋ, hali ǹʼbɛɛ ri ji ǹʼbi-a tu mɔ́ɔ́n wulu ki julu la wulu u, á niŋ kwun á ru.

² Míŋ i ábɛɛ bidi-i ńʼtɛ fɔ ŋí i á tɛnbi tan-ni, niŋ tɛnbi ki i po-a Kirinŋ nu. Míŋ ábɛɛ sunpa-i shuru tenŋ pe tɛ, nwɔ̀ i Kirisa. Míŋ i ǹʼtɛ ŋí i na ábɛɛ ji ntiŋ wu, miŋ tu maannaanŋ wɔlinŋ shurubitɔbali.

³ Nka miŋ tu Awa ncusun-i myɛɛn ki i a fɔni awɔ daalinŋ ki wu ɲaan wɔ̀ tɛ, míŋ i kɛni-na, ńʼtu ábɛɛ fa na ncusun mìŋ ɲaan ki tɛ, ábɛɛ ɲakili kiri i rapwulu san áwɔ tirika shɔɔrinŋ ka fa áwɔ fɔɔbi ka sun Yesu Kirisa wɔ saa ki fan kì.

⁴ Míŋ ǹʼja-i tu ábɛɛ ncusun koŋ tɔri ri i na-ni Yesu wulu ki bi-ri ábɛɛ tɛ ɲaan tɔri tɛ, nwɔ̀ fa yibɔɔ wulu bimaan ki po kì. Ábɛɛ i á tɔɔn cu-ri nini wɔ wulu kiri tɛ ncinŋ. Ŋì i ǹʼja tu kí ta Ɲiniwɔlinŋ ki wulubi á tɛ ɲaan tɔri tɛ, nwɔ̀ fa yibɔɔ wulu bimaan ki tenŋ i kì, niŋ fa kí i Wulujii ki rapwulu bi á tɛ ɲaan tɔri tɛ, nwɔ̀ fa yibɔɔ bimaan ki tenŋ i kì, ábɛɛ i ji nini tɛ.

⁵ Míŋ ɲaanna ńʼtu ábɔɔ cindaŋ sinaŋ kari pari míŋ wu bi tɔri dantenŋ na kì.

⁶ Hali míŋ ji so-a wulu bimaanna ki gbɛ kí sali kì, nwɔ̀ i bitɔbi ki i, yibɛɛ niŋ ji-i ábɛɛ wu finŋ bataa ra, niŋ fa ɲaan ki bataa tɛ.

⁷ Míŋ ńʼsunjɛri-i ábɛɛ tɛ, ŋí i Wulujii ki sunjo á tɛ ǹʼmaan na. Míŋ ńʼsunjɛri ki wɔ̀ tan-i, niŋ ɲaan ki tɛ, ŋí i ábɛɛ fɛshi, míŋ bijɛ ma-i niŋ i wa?

⁸ Míŋ ńʼtu-i ŋí i jalinŋ mwu bilinatɔnŋ kwuru tɔri ri wu, nwɔma ŋí i so baara ki ma-i ábɛɛ kanfɛ. Míŋ wuru ábɛɛ fan waarinŋ wɔ̀ ru, finŋ mwɔɔnna bi míŋ kila-i, nka míŋ ji ábɛɛ tɔri tenŋ ŋununu shii i kì.

⁹ Sabu tindaŋ wɔ̀ri po-i Maseduwanɛ, nini na-i míŋ maku shɔfinŋ kiri bataa wɔri ńʼtɛ. Míŋ i ńʼtu ɲaan tɔri tenŋ tɛ, ŋí ńʼwɔ fɔɔn ka shii ki sɔɔ ábɛɛ tɔri tenŋ sun kì. Míŋ a ǹʼji mìŋ ɲaan tenŋ ki tɛ hali siri.

¹⁰ Kirisa wɔ sɛli wɔ̀ i míŋ gbɛ, niŋ ki ra, míŋ ǹʼbi-ri tu, koŋ a so míŋ suu ńʼyɛri ragbɛmaanna sun Akayi sɔɔta ki mani tɔri tenŋ nu kì.

¹¹ Nfɛnŋ na, míŋ i niŋ bi, ábɛɛ ɲaanna tu ábɛɛ bidi míŋ tɛ kì wa? Kirinŋ i ǹʼtɔ-a tu ábɛɛ bidi míŋ tɛ.

¹² Míŋ i baara ki ma-a ábɛɛ kanfɛ ɲaan wɔ̀ tɛ, míŋ a tu ǹʼma-a mìŋ ɲaan tenŋ ki tɛ, nwɔma nwɔ̀ri i ǹʼbi-a tu arìbɛɛ fa yibɛɛ fɔn baara kwuru tenŋ ma-a, daŋ i sɔɔ nini wɔ wulu kiri ra.

¹³ Cindaŋ purubitɔnŋ ni yɛ, baara matɔnŋ kɛrimaan ni yɛ, kí i konaŋ ki fɔni-ni, kí i arì yɛri ji-a miŋ tu Kirisa wɔ cindaŋ ni i.

¹⁴ Nka niŋ bali-la yibɛɛ ra kì, sabu shitaanni a yɛri rapwulu ji-i miŋ tu Kirinŋ wɔ mɛlɛkɛn nɔɔritiŋ ki bɛɛ ɛ.

¹⁵ Niŋ na, a shitaanni wɔ baara matɔnŋ kari arì rapwulu ji miŋ tu baara matɔnŋ telimaan ni i, niŋ kakan ŋì i bali yibɛɛ ra kì. Nka waaci rakɔɔra kiri ra, Kirinŋ i a na kí sali, ŋì i kɛɲɛ kɔ́ɔ́ bi kulinŋ mamaan kiri wu.

Pooli wɔ yɛlinŋ ki awɔ cindanbi baara ki ru

¹⁶ Míŋ a pwulu ǹʼsun, koŋ tɔri tenŋ fa míŋ ji julutiŋ i kì. Hali ábɛɛ ji míŋ ji-a julutiŋ i, á á tɔnsunfili ńʼtɛ pyaanniŋ, nwɔma míŋ yɛrima ki i ńʼyɛri ragbɛ pyaanniŋ sɛbɛ.

¹⁷ Míŋ a nwɔ̀ bi dɔɔ, Ŋuntiŋ ki ǹʼtɛ yi wulu bi ninkunŋ kì dɛ! Nka míŋ a wulubi miŋ tu julutiŋ.

¹⁸ Miŋ tu koŋ mwɔɔnna i arì yɛri ragbɛ-a, ŋì i kɛɲɛ konanmini wɔ maka ɲaan ki wu, niŋ ki ra, míŋ yɛrima ki a ńʼnagbɛ sɛbɛ kɛ!

¹⁹ Ábɛɛ wɔ̀ri i ǹʼbi-a tu ábɛɛ ɲakilitiŋ ni i, nfɛnŋ na ábɛɛ i á tu-ri julutiŋ kiri wɔ wulu kiri ra?

²⁰ Niŋ koŋ kiri wɔ̀ri i ábɛɛ pa-a miŋ tu joŋ ni, kí i á gbɛfɛfinŋ kiri mwu-ni, kí i fɛɛn-ni á sun, kí i arɔɔ fintinbi ji-ri á wu, kí i á rufyɛ-ri, niŋ fa kí i hali gbɛta fyɛ-ri á cufɛ, ábɛɛ i á tu-a niŋ fɔn na.

²¹ Míŋ ɲaankwunmaan i ka bi-a, á á yɛkɛtu yi tɛ, yibɛɛ kiri yi yɛri rufyɛ-i, sabu koŋ pyɛ kiri i arì yɛri ragbɛ-a bi wɔ̀ri wu, míŋ yɛrima ki wuru-ra so ńʼnagbɛ-i niŋ bi kiri wu sɛbɛ, nka míŋ ńʼyɛri ragbɛ, niŋ i julu la wulu u dɛ!

²² A kí ǹʼbi tu arìbɛɛ Iburu ri i, míŋ yɛrima ki i niŋ bɛɛ ɛ. A kí ǹʼbi tu arìbɛɛ Isirayɛlidaŋ ni i, míŋ yɛrima ki i niŋ bɛɛ ɛ. Á kí ǹʼbi tu arìbɛɛ Aburahamu nupo ri i, míŋ yɛrima ki i niŋ bɛɛ ɛ.

²³ A kí ǹʼbi tu arìbɛɛ Kirisa tɛ baara matiiri i, míŋ a niŋ julu la wulu bi, míŋ i niŋ bɛɛ i ŋí i fwuu kí sun pewu. Sabu míŋ yɛlinŋ tan-i ŋí i fwuu kí sun, ŋí i bo nkasu ru ŋì i fwuu kí sun, ŋí i bwɔ mwɔɔnna kwun ǹʼnu kí wu, niŋ fa beŋ ki i a kɔri de ńʼna kaan mwɔɔnna.

²⁴ Yawutu kiri míŋ bwɔ-i kaan taanŋ, ǹʼfɔn tenŋ tenŋ ki i ji, suulinŋ kaan tenŋ i cin ǹʼna kaan yaafuuli.

²⁵ Ɔrɔmutɔnŋ kiri míŋ bwɔ-i kaan byaŋ bali la, ŋí i ji jɛri kwɔ ra, tu ŋí a kilɛn, kwurinŋ ji li-i ńʼwu kaan byaŋ, ŋí i ji cii tenŋ fa sunŋ tenŋ ma ju cuumaan faninmwuŋ.

²⁶ Míŋ wɔru ta mwɔɔnna tan-i, ŋí i cɔɔri mwɔɔnna kila, baa ju kiri sun, kakaali li gbɛfɛ, míŋ yɛrima ki wɔ shiya kiri fa shiya tɔri kiri kanfɛ, kili ki ru niŋ fa jaŋ ki fan, wɛɛlufinju ki sun, niŋ fa yi tindaŋ kɔni kiri kanfɛ.

²⁷ Míŋ baara furu mwɔɔnna ma-i, ŋí yɛlinŋ mwɔɔnna pa ńʼna. Míŋ sanɲaanna mwɔɔnna tan-i, bɛɛ ki fa jumwunu ki i ji ńʼpa, waaci mwɔɔnna míŋ nufinŋ kila kì, ŋí i tu nuŋ nubali waaci mwɔɔnna, shii ki fa juulinŋ bali bi ki i ji ńʼyɛli.

²⁸ Míŋ tɔnŋ a so bi pyɛ kiri sun kì, nka míŋ ɲakili ki bataa wuru bilinatɔnŋ kwuru kiri bi sun jibi woo jibi.

²⁹ A bilinatɔnŋ ki bɛɛ baraka rakuru, ŋì i ji-a tu míŋ baraka ki rakuru ntiŋ fan sɛbɛ. A ǹʼbɛɛ fɛɛn bilinabi ki ru, ntiŋ i bijɛ ma, niŋ i míŋ yaa-ra kusɛbɛ.

³⁰ A míŋ ji-a ńʼyɛri ragbɛ, míŋ a ńʼyɛri ragbɛ ńʼwɔ baraka kurubi ki wu.

³¹ Kirinŋ wɔ̀ ki i Ŋuntiŋ Yesu Kirisa tiŋ ki i, yi i ninwɔ̀ gbɛ-a waaci bataa, niŋ i ǹʼtɔ-a tu míŋ puru bi-a kì.

³² Ŋì i míŋ tu Damasi, masa Aretasi awɔ kɛniŋ jɛntɔnŋ sinaŋ wɔ̀ sɔɔ wuru kili ki ŋununu, niŋ ǹʼbi wuru tu kí kili ki demantɔnŋ kiri kɔrɔshi, nwɔma arì i míŋ pa.

³³ Nka bilinatɔnŋ kiri i míŋ bo shɛɛrinŋ nu, kí i míŋ po kafarinta ra, kí i míŋ jɛri yaa ra kili ki kwɔ ki kɔɔtɛ, ninki bantenŋ i míŋ mwu kí wu.