Korɛntitɔnŋ kiri (2) 10 - Jɔ Biibili ki

Pooli wɔ wulu kiri a tɔ bitɔnŋ kiri tɛ

¹ Ǹʼyɔ bi-a tu míŋ ji ábɛɛ faninmwuŋ, tu míŋ ji-a koŋ sunjɛrimaan a, nka tu míŋ ja ji maŋ nari ábɛɛ ra, tu ŋí i ji shurukoŋ i. Míŋ i ábɛɛ rafɛ-a, á ǹʼma Kirisa wɔ tɔnsunfili ki fa ntiŋ wɔ shɔɔrinŋ ki bira,

² á fa ta ńʼpo wulu furu bi sun á tɛ, a míŋ na ta so ábɛɛ tɛ waarinŋ wɔ̀ ru kì dɛ! Nka koŋ wɔ̀ri i ǹʼbi-a tu yibɛɛ yi wɔ baara ki ma kɛɲɛ-a konanmini wɔ maka ɲaan bantenŋ wu, mɔ́ɔ́n wulu furu ki i bi-a niŋ bishi koŋ kiri tɛ.

³ Sɛli yɛ, yibɛɛ i konanmini ni i, nka yibɛɛ yɔɔ kari ki tan-a konanmini wɔ tanka ɲaan tɛ kì.

⁴ Yibɔɔ kari ki tan-a konanmini wɔ kari tanfinŋ ni na kì, kari tanfinŋ ni yɛ, nwɔ̀ri faan ki i po-a Kirinŋ gbɛ, ŋì i ɲa kiri faan ki fa kɔ́ɔ́ ɲakilila jɛ kiri li-ri.

⁵ Mìŋ ɲaan tenŋ ki tɛ, ɲakilila jɛ kiri, niŋ fa finŋ woo finŋ i konaŋ kiri suu-ra Kirinŋ tɔ ki sun, yibɛɛ i nini bataa kari-ra, yi i konaŋ kiri bataa ɲakilila ki rapwulu, nwɔma kí i Kirisa wulu pa.

⁶ Ábɛɛ ja ji ǹʼji yibɛɛ wu tu ábɛɛ bataa Kirisa wulu pa waarinŋ wɔ̀ ru, nwɔ̀ri Kirisa wulu pa-a kì, yibɛɛ ra nini kulu.

⁷ Ábɛɛ yɛrima kiri bi kiri shɛɛli a ɲaanfɛ, a konwɔtiŋ ji bili ǹʼna tu afinŋ Kirisa wɔ, nintiŋ i ǹʼtɔ tu afinŋ Kirisa wɔ ɲaan wɔ̀ tɛ, tu yibɛɛ yɛrima kiri Kirisa wɔ ri mìŋ ɲaan tenŋ ki tɛ.

⁸ Ŋuntiŋ ki sotinbi wɔ̀ wɔri-i yibɛɛ tɛ, hali míŋ ji ńʼyɛri ragbɛka jitan-a pyaanniŋ niŋ wu, niŋ míŋ ɲaankwun-a kì, Ŋuntiŋ ki ǹʼwɔri-i yibɛɛ tɛ ábɔɔ jɛŋ ta ki bira, ŋì i ǹʼwɔri ábɛɛ halikirama bira kì.

⁹ Míŋ ǹʼtɛ, ŋí i ji ábɛɛ gbɛ koŋ nukɛnitɔnŋ bantenŋ i ńʼwɔ sɛbɛ kiri wu kì.

¹⁰ Sabu kí i nwɔ̀ bi-a mɔ́ɔ́n sɛbɛ kiri sun, niŋ i kaa tu : « Faan fa baraka i Pooli wɔ sɛbɛ kiri ru wulu kiri ru, nka a ntiŋ ji yibɛɛ kanfɛ, ntiŋ so-a niŋ bishi wulu li bi-i kì, yìrì ji-a wulu ɲaansun ni i kì. »

¹¹ Konwɔtiŋ niŋ wulu ki bi-a, tu ntiŋ ǹʼtɔ tu yibɛɛ ǹʼbi-a ɲaan wɔ̀ tɛ yɔɔ sɛbɛ kiri ru, tu yibɛɛ ra ta ǹʼji mìŋ ɲaan tenŋ ki tɛ, a yibɛɛ ta so ábɛɛ kanfɛ.

¹² Yibɛɛ ra yi yɛri pyi niŋ koŋ kiri wu kì, nini wɔ̀ri i arì yɛri tɔ shɔɔrinŋ bi-a. Yibɛɛ ra yi tu yi ǹʼbi tu yibɛɛ fa nini tenŋ i kì, sabu kí koŋ tɔri bo-a arì yɛri kiri jɛŋ kì, niŋ i ɲakili balibi i.

¹³ Yibɛɛ ra yi yɛri ragbɛka jitan, yi i fwuu yi daŋ ki sun kì. Kirinŋ tumaŋ wɔ̀ wɔri-i yibɛɛ tɛ, ninki ncusun-i yibɛɛ i so fɔ ábɛɛ tɛ, yibɛɛ ra yi yɛri ragbɛ, ŋì i kɛɲɛ niŋ wu.

¹⁴ Kirinŋ mani wɔ̀ri ɲaannashi wuru-i, tu yibɛɛ ta Yesu Kirisa wɔ Wulujii ki sunjo yìrì ru, ábɔɔ mani ki ta-i kɛɲɛ niŋ bɛɛ ɛ, ninki fani ncin-i yibɛɛ i so ábɛɛ tɛ. Niŋ i ǹʼji-a tu yibɛɛ fwuu yi daŋ ki sun kì.

¹⁵ Yibɛɛ yi yɛri ragbɛka jitan-a, miŋ tu yi a ji yi yɛri ji-a koŋ tɔri wɔ baara mamaan wu kì, nka yibɛɛ bili-i ǹʼna, tu ábɔɔ bilinabi ki ja ji ta jɛŋ, ǹʼbɛɛ ra bo yibɔɔ baara mwɔɔn ki sun, ábɛɛ kanfɛ yɔɔ baara ma sɔɔta ki ru.

¹⁶ Niŋ ɲaan ki tɛ, yibɛɛ ra so ta-i Kirinŋ wɔ Wulujii ki sunjo ábɔɔ mani ki kɔɔtɛ sɔɔta kiri ru, niŋ a pari yɛri ragbɛ wu, koŋ tɔri wɔ baara ma mwɔɔn wu arɔɔ mani ni nu.

¹⁷ Sabu ǹʼsɛbɛ-i Kirinŋ wɔ wulu ki ru tu : « Konwɔtiŋ ji-a a yɛri ragbɛ, ntiŋ a yɛri ragbɛ Ŋuntiŋ ki mabi ki ra a tɛ. »

¹⁸ Á ǹʼtɔ tu konwɔtiŋ a yɛri rakali-la, tu nintiŋ ki bidi Ŋuntiŋ ki tɛ kì dɛ! Nka Ŋuntiŋ ki yɛrima ki i nwɔ̀ tɔ shɔɔrinŋ bi-a, ŋì i nintiŋ ki tɛ.