Korɛntitɔnŋ kiri (2) 1 - Jɔ Biibili ki

Pooli wɔ coolinŋ ki

¹ Míŋ, Pooli wɔ̀ i Yesu Kirisa wɔ cindaŋ i Kirinŋ baraka ra, míŋ fa yi tindaŋ Timote i ka sɛbɛ ka wɔri ta-a Korɛnti Kirinŋ wɔ konanbi ki tɛ, yi i ǹʼwɔri ta-ri Kirinŋ wɔ wɔlinŋ kiri bataa tɛ, nini wɔ̀ri i Akayi sɔɔta ki ru.

² Yi Tiŋ Kirinŋ fa yi Ŋuntiŋ Yesu Kirisa shɔɔrinŋ fa ɲaanfɛfili wɔri á tɛ.

Pooli wɔ shɔɔrinŋ tɔ coolinŋ ki Kirinŋ tɛ

³ Míŋ i coolinŋ wɔri-ra yi Ŋuntiŋ Yesu Kirisa tiŋ Kirinŋ tɛ, ninwɔ̀ i sunmakwulupatɔnŋ i, ŋì i koŋ siratu-ri waarinŋ bataa ru.

⁴ Mìnki i yibɛɛ siratu-a yɔɔ cɔɔri kiri waaci kiri ru, nwɔma yibɛɛ niŋ siratubi wɔ̀ kila-i Kirinŋ gbɛ, yi i so niŋ sɔɔ yi i kpeeri siratu, nwɔ̀ri i cɔɔri kwuru ki fɔn ru.

⁵ Yibɛɛ i cɔɔri-ra ǹʼmwɔɔnna Kirisa bi ki ra ɲaan wɔ̀ tɛ, mìŋ ɲaan tenŋ ki tɛ, yibɛɛ i ǹʼwɔ siratubi ki ja-a yɔɔ ɲaninkulutɔnbi ki ru.

⁶ A yibɛɛ ji ɲaanfɛkwulu lu, niŋ ŋuŋ ki i, nwɔma ábɛɛ i siratubi kila, niŋ fa á i á mwu. A yibɛɛ siratubi kila, niŋ i ma-a, nwɔma ábɛɛ i siratubi kila, á i so yibɔɔ cɔɔri kiri bishi ri pa-i á ra.

⁷ Yibɛɛ gbɛ faa-a ábɛɛ ru kusɛbɛ, sabu yibɛɛ ǹʼtɔ-i tu ábɛɛ cɔɔri Kirisa bi ki ra ɲaan wɔ̀ tɛ, tu ábɛɛ ra Kirinŋ wɔ siratubi ki kila mìŋ ɲaan ki tɛ.

⁸ Ńʼtindaŋ ni, ɲaanfɛkwulu wɔ̀ yibɛɛ kila-i Asi sɔɔta ki ru, yibɛɛ ǹʼtɛ ábɛɛ i tu niŋ tɔbali kì. Yibɛɛ cɔɔri kila-i nmaŋ, nwɔ̀ baraka pyiri wuru yibɛɛ sun kusɛbɛ, fɔ yi wuru ǹʼtɔ-a tu yi ɲaninkulutɔnŋ ni a tu kì.

⁹ Sɛli ki ra, yibɛɛ bataa wuru ǹʼbi-a tu kí a yibɛɛ kilɛn. Nka niŋ bataa ǹʼji-i yibɛɛ wu, tu yibɛɛ fa yi gbɛ bili yi yɛri ki wɔ so ki sun kì, nka tu yi i ǹʼbili Kirinŋ bantenŋ sun, ninwɔ̀ i konkwuu kiri ŋmɛni-na.

¹⁰ Mìnki yibɛɛ mwu san-i niŋ beŋ jɛ ki wu, ŋì i ji-a yi mwu sɛbɛ. Sɛli ki ra, yibɛɛ ɲakili i ǹʼna, tu ŋì a yibɛɛ mwu waarinŋ tɔri ru sɛbɛ,

¹¹ ábɛɛ yɛrima kiri tumaŋ shi-i niŋ nu áwɔ Kirinŋ nafɛ ki baraka ra. Niŋ ɲaan ki tɛ, Kirinŋ a shɔɔrinŋ wɔ̀ ma yibɛɛ tɛ koŋ mwɔɔnna wɔ Kirinŋ nafɛ kiri baraka ra, niŋ a ji sababu koŋ mwɔɔnna i baraka bi Kirinŋ tɛ yibɛɛ bira.

Pooli awɔ Korɛnti ta ki rupwulu-i

¹² Yibɛɛ ra so yi yɛri ragbɛ-i bi wɔ̀ wu, niŋ i kaa : yibɛɛ tirika ki ábɛɛ kanfɛ niŋ fa mani bataa ru, yibɛɛ cirasun tu yibɛɛ niŋ ma ciirufɔɔbi niŋ fa sɛli ki wu Kirinŋ ɲaanfɛ, ninwɔ̀ po konanmini wɔ ɲakilitinbi ru kì, fɔ Kirinŋ wɔ shɔɔrinŋ ki baraka ra.

^13-14 Á ǹʼtɔ tu yibɛɛ finŋ tɔri tenŋ sɛbɛ wɔri ta-a ábɛɛ tɛ, tu ábɛɛ ra so nwɔ̀ kali-i á i ǹʼdaŋ tɔ kì. Yibɛɛ Ŋuntiŋ Yesu pwulu na shikaŋ ki ru, yibɛɛ ra ji ábɛɛ ŋununfɛshi ŋuŋ i, miŋ tu ábɛɛ ra ji yibɛɛ ŋununfɛshi ŋuŋ ɲaan wɔ̀ tɛ. Ábɛɛ niŋ ɲaantɔ-i pyaanniŋ kɔ, nka míŋ ǹʼtɔ-i tu ábɛɛ ra na ǹʼɲaan ki bataa tɔ.

¹⁵ Míŋ bili wuru niŋ na fɔ ŋí i ǹʼbi ńʼtu míŋ a ta ábɛɛ tɛ sun, nwɔma míŋ fa ábɛɛ i yimaŋ ja kaan fuuli, Ŋuntiŋ ki wɔ shɔɔrinŋ ki i nafaa kaan fuuli.

¹⁶ Míŋ wuru ǹʼtɛ, ŋí i de ábɛɛ tɛ sun, ŋí i kila ŋí i tiri Maseduwanɛ sɔɔta ki ru, ńʼpwulula ki i de á tɛ sɛbɛ, nwɔma á i ye míŋ tɛ ńʼwɔ ta bi ki ra Yude sɔɔta ki ru.

¹⁷ Ábɛɛ cirasun tu míŋ wuru niŋ bi kiri gbɛbili-la waarinŋ wɔ̀ ru, tu míŋ wuru ńʼsɔbɛ ra kì wa? Tu míŋ yìrì gbɛbili-li ŋì i kɛɲɛ konanmini ɲakilila wu, ŋí i « aawe » fa « aawoo » bi manaanŋ tenŋ nu wa?

¹⁸ Kirinŋ i dariwulutiŋ i, ǹʼyɔ míŋ ciiru ki tɔ-a, tu míŋ wuru ǹʼtɛ ŋí i « aawe » fa « aawoo » bi ábɛɛ tɛ waarinŋ tenŋ nu kì.

¹⁹ Sabu míŋ fa Silasi fa Timote, Yesu Kirisa, Kirinŋ danshuru wɔ̀ bi sunjo-i ábɛɛ tɛ, niŋ « aawe » bi-a bi ru, ŋì i pwulu, ŋì i « aawoo » bi mìŋ bi tenŋ ki ru kì. Niŋ wɔ ki i « aawe » e waarinŋ bataa ru.

²⁰ Sɛli ki ra, Kirinŋ a tɔnŋ wɔri-i bi finŋ woo finŋ na, niŋ bataa i nafaa-ra Kirisa ra. Niŋ ki ra, yibɛɛ i ǹʼbi-a tu « aawe » Kirisa baraka ra, yi i Tiŋ Kirinŋ gbɛ-ri.

²¹ Mìŋ Kirinŋ ki yɛri ki yibɛɛ fa ábɛɛ dɛbɛ-i, ŋì i yi baraka gbɛ Kirisa ra, ŋì i yi ɲaannashi ji awɔ konanbi i,

²² ŋì i awɔ taanshɛ ye yi ra, ŋì i awɔ Ɲiniwɔlinŋ ki bo yi ciiru tɔnŋ kiri ra, niŋ i ǹʼji yi wu tu afinŋ bi shɔɔrinŋ finŋ woo finŋ tɔnŋ wɔri yibɛɛ tɛ, tu niŋ pyɛ ki bataa a ɲaan tɛ.

²³ Nfɛnŋ ncin míŋ so ńʼpwulu ta-i Korɛnti kili kì? Kirinŋ i míŋ ciiru ki tɔ-a, míŋ niŋ ma-i, nwɔma ŋí i bi tu ábɛɛ tɛ.

²⁴ Yibɛɛ ǹʼtɛ yi i ji ábɛɛ ŋununtiŋ ni i áwɔ bilinabi ki ru kì, sabu ábɛɛ kɔɔ bilinabi ki ru kɔ, nka yibɛɛ i ǹʼtɛ yi i baara ma ábɛɛ fan yi á ciirudi.