Korɛntitɔnŋ kiri (1) 7 - Jɔ Biibili ki

Pooli wulu wɔ̀ bi-i fwuru bi ki sun

¹ Ábɛɛ ranɔri wɔ̀ tan-i míŋ na áwɔ sɛbɛ ki ru, míŋ a ǹʼbɛɛ bi niŋ sun dɔɔ. Ábɛɛ tu « Ǹʼpari shuru sun, ntiŋ fa myɛ mari ra kì ». Niŋ i ɲakilila shɔɔrinŋ i.

² Nka, nwɔma nankulunbi fa ma kì, shuru ki fɔn tenŋ tenŋ mari cɛn, mari ki fɔn tenŋ tenŋ i sɔɔ a shinŋ ŋununu.

³ Shuru ki a tukulu ki rafaa mari ki kɛlintɛ, mìŋ ɲaan tenŋ ki tɛ, mari ki i a tukulu ki rafaa shuru ki kɛlintɛ.

⁴ Sabu mari ki firi ki ǹʼyɛri wɔ kì, nmari shinŋ ki wɔ yɛ. Mìŋ ɲaan ki tɛ, shuru ki firi ki ntiŋ yɛri ki wɔ kì, ntiŋ wɔ mari ki wɔ yɛ.

⁵ Á fa á kaan ámaŋ tɛ bilifinŋ ki ru kì, fɔ á ji fu waaci sun tu á ra niŋ ji Kirinŋ nafɛ waaci i. Nka, a niŋ waaci ki fwuude, á á pwulu na ámaŋ tɛ, a niŋ ji-i kì ábɛɛ ra so á yɛri rasɔɔ-ɔ kì. Á fa saa wɔri shitaanni ki tɛ, ŋì i á sunnɛɛn bo bijɛ ma ki sun kì.

⁶ Míŋ wulu wɔ̀ri bi-i, nini i nacinwulu li i, nka míŋ ǹʼbi tu, ŋì i ma ninkunŋ ɲaan bataa tɛ kì dɛ!

⁷ A ńʼtu míŋ sun, koŋ bataa wuru-ra tu mari cɛnbali míŋ sali. Nka koŋ fɔn tenŋ tenŋ fa a kafinŋ yɛ Kirinŋ gbɛ, ŋì bi ki bɛɛ so wɔri-i ǹʼbɛɛ tɛ, ŋì bi tɔri so wɔri koŋ tɔri tɛ.

⁸ Ŋì a di míŋ tɛ, ŋí i ǹʼbi tu nwɔ̀ri cɛn tan-i sun kì, niŋ fa tu kanimari kiri tu arì cinancinŋ míŋ sali, tu niŋ shɔ.

⁹ Nka a konwɔtiŋ ǹʼtɔ tu a ra so a yɛri rasɔɔ-ɔ kì, tu ntiŋ mari cɛn, sabu ŋi i cɛn tan, niŋ pari-i ŋi i nʼyɛri cɔɔri mari bi walima shuru bi tɔ ki wu nʼnu.

¹⁰ Bilinatɔnŋ wɔ̀ri mari cɛn-i, míŋ a nwɔ̀ bi furu nini tɛ walima Ŋuntiŋ ki i nwɔ̀ bi-a, niŋ i kaa : mari kakan ŋì i po san a shinŋ ŋununu kì.

¹¹ Nka a mari ja ji a kaan a shinŋ tɛ, tu nmari cɛnbali tu, walima tu nmari a pwulu a shinŋ bwuumaan ki tɛ. Mìŋ ɲaan ki tɛ, tu shuru ki fa awɔ mari bo sɛbɛ kì.

¹² Míŋ a nwɔ̀ bi bilinatɔnŋ pyɛ kiri tɛ, niŋ i míŋ yɛrima ki wɔ wulu u, Ŋuntiŋ ki wulu i kì, ńʼtu a mari bilinabali ji shuru bilinatɔnŋ wɔ mari i, nmari i a tu nmari i tu niŋ shuru ki wɔ sɔɔ ki ru, tu niŋ shuru ki fa niŋ mari ki kalikali kì.

¹³ Mìŋ ɲaan tenŋ ki tɛ, a mari ki bɛɛ ji bilinabi ma, nmari shinŋ ki dumiŋ bilinabi ki ma kì, a niŋ shuru ki a tu arì i tu arìmaŋ fan, tu niŋ mari ki fa po san niŋ shuru ki ŋununu nu kì.

¹⁴ Sabu shuru bilinabali ki i ji-a Kirinŋ koŋ i, awɔ mari ki wɔ bilinabi bi sababu ra, mìŋ ɲaan tenŋ ki tɛ, mari bilinabali ki i ji Kirinŋ koŋ i, awɔ shuru ki wɔ bilinabi ki sababu ra. A niŋ ji wuru niŋ ɲaan ki tɛ kì, kí daŋ kiri wuru-ra ji daŋ nɔɔmaan ni i, nka sɛli ki ra, kí daŋ kiri fɔɔmaan ni yɛ.

¹⁵ Nka a shuru walima mari bilinabali ki ǹʼbi tu a ra ji a shinŋ ki walima awɔ mari bilinatɔnŋ ki tɛ kì, koŋ fa a kaan niŋ sun kì. Niŋ ɲaan ki tɛ, niŋ tindaŋ bilinatɔnŋ mari walima ǹʼshuru ki ɲaanfɛ a fili. Sabu Kirinŋ ábɛɛ dɔri-i, tu á tu ɲaanfɛfili lu.

¹⁶ Sabu, minwɔ̀ i bilinatɔnŋ ki i, miŋ a ǹʼtɔ dɔɔkunŋ tu miŋ shinŋ ki walima mɔɔn mari ki mwu sababu ki a po miŋ nu?

Kirinŋ konaŋ kiri dɔri-i ŋì i kí tu ɲaan wɔ̀ tɛ, kí tu bi ki niŋ ɲaan ki tɛ

¹⁷ Ŋì i san niŋ na, Ŋuntiŋ ki kafinŋ wɔ̀ wɔri-i koŋ fɔn tenŋ tenŋ tɛ, niŋ fa ŋì kí dɔri-i ŋì i kí tu ɲaan wɔ̀ tɛ, tu kí tiri kɛɲɛ niŋ wu. Míŋ i niŋ kalinŋ ki wɔri-ra bilinatɔnŋ kwuru kiri bataa tɛ mani bataa ru.

¹⁸ A Kirinŋ ji konwɔtiŋ dɔri, niŋ i fa ntiŋ sɔɔmaan wu peefɛ, tu niŋ tu niŋ ɲaan ki tɛ. A nwɔ̀tiŋ dɔri ŋì i ntiŋ tu sɔɔpeefɛbali, tu niŋ tu niŋ ɲaan ki tɛ sɛbɛ.

¹⁹ Ŋi i sɔɔpeefɛ walima nʼsɔɔpeefɛ kì, niŋ finŋ tɔri kì, bi ŋuŋ ki i nwɔ̀, niŋ i Kirinŋ wɔ cinŋ bimaan ki mabi ki i.

²⁰ Koŋ tenŋ tenŋ ki fɔn tu a dɔrika ɲaan ki tɛ Kirinŋ gbɛ.

²¹ A Kirinŋ ji miŋ dɔri ŋì i miŋ tu jonbi ru, nʼɲakili ki fa ɲaanmi kì, nka a miŋ dumiŋ ji-a so po san-i niŋ jonbi ki ru, nʼbanba ŋi i po san ǹʼnu,

²² sabu Ŋuntiŋ ki joŋ wɔ̀ dɔri-i, niŋ i Ŋuntiŋ ki wɔ koŋ ŋunsanmaan a. Mìŋ ɲaan tenŋ ki tɛ, konwɔtiŋ joŋ i ka juniɲa ka ru kì, a Ŋuntiŋ ki niŋ dɔri, nintiŋ i ji-a Kirisa wɔ joŋ i.

²³ Kirinŋ ábɛɛ sa-i kpaafuru ra, niŋ ki ra, á fa ji koŋ wɔ joŋ ni i kili kì.

²⁴ Ńʼtindaŋ ni, Kirinŋ ábɛɛ fɔn tenŋ tenŋ dɔri-i bilinabi ki ru, ŋì i á tu ɲaan wɔ̀ tɛ, á tu niŋ ɲaan ki tɛ ǹʼɲaanfɛ.

²⁵ Ábɛɛ wɔ̀ri cɛn-i sun kì, niŋ fa ábɛɛ wɔ̀ri cɛn tan-i sun kì, Ŋuntiŋ ki wɔ wulu míŋ gbɛ ŋí i ǹʼbi ábɛɛ tɛ kì, nka míŋ a ńʼciiru ɲakili bi ábɛɛ tɛ, sabu Ŋuntiŋ ki wɔ shɔɔrinŋ ki baraka ra, ábɛɛ gbɛ faa míŋ nu.

²⁶ Ŋì i kɛɲɛ dɔnsaŋ waaci ki furubi ki wu, míŋ i ǹʼbi-a ńʼtu koŋ fɔn i ɲaan wɔ̀ tɛ, ńʼtu ntiŋ tu ninkunŋ, ńʼtu niŋ shɔ.

²⁷ A mari ji miŋ gbɛ, fa ǹʼpani kì. A miŋ ji mari cɛn-i sun kì, fa ǹʼceeli ŋi i ǹʼbɛɛ cɛn kì.

²⁸ Nka konwɔtiŋ mari cɛn-i, nintiŋ bijɛ ma kì, a danmari wɔ̀ ji cɛn, niŋ bijɛ ma sɛbɛ kì. Nka nwɔ̀ri ǹʼma-i kɔ, kí a cɔɔri sinaŋ wɔ̀ kila, míŋ i ǹʼtɛ ŋí i ábɛɛ mwu ninki wu.

²⁹ Niŋ na, ńʼtindaŋ ni, míŋ a nwɔ̀ bi ábɛɛ tɛ, niŋ i kaa : juniɲa kɔ ki myɛ-i. Mari i nwɔ̀ri gbɛ, tu kí ǹʼji miŋ tu mari arì gbɛ kì.

³⁰ Nwɔ̀ri i ŋuntan-a, nini i ji miŋ tu kí ciirudimaan a. Nwɔ̀ri i yɛtan-a, nini i ji miŋ tu kí ɲaannu ŋunumaan a. Nwɔ̀ri ku sa-i, nini i ji miŋ tu kusamaan kí gbɛ kì.

³¹ Koŋ wɔ̀ri i ka juniɲa ka ru finŋ kiri jiisan-a, nini ǹʼji miŋ tu arìbɛɛ finŋ tɔri kila kì. Sabu ka juniɲa ka ra fwuude.

³² Míŋ i ǹʼtɛ, ńʼtu ábɛɛ fa á ciirufɔni kì. Konwɔtiŋ mari cɛn kì, nintiŋ i a cɛrukɔli-la Ŋuntiŋ ki tɛ baara ki ra, ntiŋ i a yɛri bidi ǹʼtɛ.

³³ Nka konwɔtiŋ mari cɛn-i, nintiŋ i a ciirufɔni-na juniɲa nu finŋ kiri bira, nwɔma a i awɔ mari ki dintɛ bi jɛ kiri ma.

³⁴ Niŋ na, ntiŋ ciiru ɲakili ki i tu-a niŋ fɔɔnbi fuuli ki sun. Mìŋ ɲaan tenŋ ki tɛ, mari wɔ̀, walima maannaanŋ wɔ̀ cɛn-i sun kì, niŋ ciiru ɲakili ki i tu-a Ŋuntiŋ ki wɔ baara ki ra, nwɔma a i so a yɛri bataa wɔri-i Ŋuntiŋ ki tɛ. Nka nwɔ̀ cɛn-i, niŋ ciiru ɲakili ki i tu-a ka juniɲa ka ru finŋ kiri ra, a i a shinŋ ki dintɛ bi kiri ma.

³⁵ Míŋ i ka bi-a ábɛɛ yɛrima kiri bira. Míŋ ǹʼtɛ ŋí i yaa bo ábɛɛ yɛɛra kì, nka míŋ i ǹʼtɛ ábɛɛ bi shɔɔrinŋ ma, á i á cɛrukɔli waarinŋ bataa ru Ŋuntiŋ ki wɔ cinŋ ki ra á ciiru ki bataa wu.

³⁶ A konwɔtiŋ ǹʼja tu cɛn waari ki fwuude-a afinŋ danmari maannaanŋ ki sun, tu ǹʼkakan ŋì i cɛn, ntiŋ a dintɛ bi ki ma, ntiŋ i ǹʼcɛn, niŋ bijɛ ɛ kì.

³⁷ Nka nwɔ̀tiŋ ǹʼbi tu afinŋ a a danmari ki wɔri fwuru ra kì, koŋ dumiŋ faan bo ntiŋ sun kì, nintiŋ bi shɔɔrinŋ ma-i.

³⁸ Niŋ na, a konwɔtiŋ a danmari wɔri fwuru ra, ntiŋ bi shɔɔrinŋ ma-i, nka nwɔ̀tiŋ awɔ ki cɛn kì, nintiŋ wɔ ki pari-i.

³⁹ Mari wɔ̀ cɛn-i, niŋ kɔli-i a shinŋ ki ra ŋì i ntiŋ tu a ɲaanna. Nka a ntiŋ beeni, a ǹʼdi niŋ mari ki tɛ, nmari i so-a cɛn-i a dintɛ shuru tɔri sun. Nka tu niŋ shuru tɔri ki ji Ŋuntiŋ ki wɔ saa tiritɔnŋ i.

⁴⁰ Niŋ fa a fɔn na, míŋ ɲaanna, a nmari tu-ri shuru shibali, niŋ wuru-ra pari nmari sun shuru shi bi ki wu. Míŋ yɛri ki bili-i ǹʼna, ńʼtu Kirinŋ Ɲini ki míŋ fan sɛbɛ ka wulu kari bimaŋ ki ru.