Korɛntitɔnŋ kiri (1) 6 - Jɔ Biibili ki

Bilinatɔnŋ kiri wɔ maŋ dɔri bi ki faan nu

¹ A pɔli de ábɛɛ tindaŋ fuuli faninmwuŋ, nfɛnŋ na ábɛɛ i ámaŋ dɔri-ri kitikwurutɔnŋ Kirinŋ tɔbali kiri tɛ? Ábɛɛ so-a tiri-i bilinatɔnŋ kiri tɛ niŋ pɔli ki wu, kí i niŋ ɲaanpo kì wa?

² Ábɛɛ ǹʼtɔ tu bilinatɔnŋ kiri a na ka juniɲa ka ru konaŋ ki wɔ kiti ki kwuru kì wa? A ábɛɛ ji-a na juniɲa ki wɔ kiti kwuru, ábɛɛ ra waa ka bi pyaanŋ kari ɲaanpo-i wa?

³ Ábɛɛ ǹʼtɔ tu yibɛɛ ra na mɛlɛkɛn kiri wɔ kiti ki kwuru kì wa? Kí i na ta ǹʼbi tu ka juniɲa ka ru kiti kwurumaanna wa?

⁴ Niŋ na, a ka juniɲa ka ru bi ɲaanpomaanna na ábɛɛ tɛ, nfɛnŋ na ábɛɛ i niŋ wɔri-ri koŋ tɛ, bilinatɔnŋ kiri sunu ja-a nwɔ̀tiŋ nu kì.

⁵ Míŋ i nwɔ̀ bi-a, niŋ i ábɔɔ ɲaankwunŋ dɛ! Koŋ ábɛɛ ru, nwɔ̀tiŋ a so ábɛɛ faninmwuŋ kiti kwuruka ra kì wa?

⁶ Fɔ ábɛɛ i ámaŋ dɔri-ri faan kulu Yesu Kirisa tɔbali li ɲaanfɛ, tu nini ábɔɔ wulu ɲaanpo wa?

⁷ A ábɛɛ ji ámaŋ dɔri-ra faan kulu, niŋ i ǹʼji-a tu ábɛɛ baraka ki kuru Kirisa bilinabi ki ru. Nfɛnŋ na, ábɛɛ so-a á tindaŋ ki wɔ pɔli ki kwun-i á ru kì? Nfɛnŋ na, ábɛɛ i ncusun-a koŋ i fɛɛn á sun kì?

⁸ Nka ábɛɛ kiri i bi fubali kiri ma-a ámaŋ wu, á i fɛɛn-ni ámaŋ sun. Ábɛɛ tindaŋ tenŋ kiri i niŋ ma-a ámaŋ wu.

⁹ Á ǹʼtɔ tu koŋ telibali kiri wɔ lu Kirinŋ wɔ masabi ki ru kì. Á fa á yɛri sunnɛɛn kì : kakaali kiri, nankulinŋ kiri, pɛli tantɔnŋ kiri, shuru maŋ bilitɔnŋ kiri,

¹⁰ kwunŋ kiri, gbɛrufuru kiri, lɔrutɛfɛ kiri, kiilinŋ tantɔnŋ kiri, walima daalintiŋ kiri tɔri tenŋ a Kirinŋ wɔ Masabi ki kila kì.

¹¹ Ábɛɛ bɛɛ ri wuru mìŋ ɲaan ki tɛ. Nka dɔnsaŋ, ábɛɛ wu-i, á i bo á ciin na, á i ji Kirinŋ wɔ wɔlinŋ ni i. Ábɛɛ ji-i koŋ telimaan ni i Ŋuntiŋ Yesu Kirisa tɔ ki bira, niŋ fa yibɔɔ Kirinŋ Ɲini ki baraka ra.

Yi yi firi ki bo Kirinŋ wɔ bo ru

¹² Ǹʼbɛɛ i ǹʼbi-a : « Míŋ a so bi bataa ma-i », sɛli i niŋ i, nka nafan bi bataa ma nu míŋ sun kì : « Míŋ a so bi bataa ma-i », niŋ i sɛli i, nka míŋ a ncusun ŋí i ji finŋ tɔri tenŋ wɔ joŋ i kì.

¹³ Ábɛɛ i ǹʼbi-a tu : « Nufinŋ ki po cii ki bira, tu cii ki i po nufinŋ ki bira. » Nka Kirinŋ a na yìrì fɔn fuuli ki haliki. Konanmini firi ki po nankulunbi mamaanna tɛ kì. Firi ki i Ŋuntiŋ ki wɔ, Ŋuntiŋ ki i ji firi ki wɔ.

¹⁴ Kirinŋ Ŋuntiŋ Yesu ki ŋmɛni po san-i konkwuu kiri kanfɛ ɲaan wɔ̀ tɛ, ŋì a na yibɛɛ ŋmɛni mìŋ ɲaan ki tɛ awɔ sotinbi ki baraka ra.

¹⁵ Ábɛɛ ǹʼtɔ-a tu ábɛɛ firi kiri Kirisa firi ki mani kiri bɛɛ ri kì wa? Míŋ a so Kirisa firi ki mani ki bɛɛ shi-i, ŋí i ta niŋ ji nankulinŋ firi ki mani ki bɛɛ ɛ wa? Aayi dɛ, niŋ a so ma-i kì.

¹⁶ Ábɛɛ ǹʼtɔ tu konwɔtiŋ ja ji dɛbɛ nankulinŋ wu, tu nintiŋ fa niŋ nankulinŋ ki ji-a koŋ tenŋ i kì wa? Sabu ǹʼbi-i Kirinŋ wɔ wulu ki ru tu : « Kí koŋ fuuli ki i ji-a koŋ tenŋ i. »

¹⁷ Nka konwɔtiŋ fa Ŋuntiŋ ki dɛbɛ-i, nintiŋ fa Ŋuntiŋ ki i ji-a tenŋ i ɲini ki ra.

¹⁸ Niŋ ki ra, á bili nankulunbi ki jɛŋ! Konanmini i bijɛ tɔri finŋ woo finŋ ma-a, niŋ bataa i tu-a ntiŋ firi ki kɔɔsun, nka konwɔtiŋ i nankulunbi ki ma-a, nintiŋ i a firi ki yɛkɛ shi-a.

¹⁹ Ábɛɛ ǹʼtɔ tu ábɛɛ firi ki Ɲiniwɔlinŋ ki sɔɔmaŋ ki i kì wa? Niŋ Ɲiniwɔlinŋ ki wɔ̀ sɔɔ-ɔ ábɛɛ ciiru, Kirinŋ niŋ wɔri-i ábɛɛ tɛ. Dɔnsaŋ, ábɛɛ á yɛri wɔ kili kì.

²⁰ Sabu Kirinŋ ábɛɛ ŋunsan-i kpaafuru ra, niŋ ki ra, á ǹʼgbɛ á firi kiri wu yɛri rasɔɔbi wu.