Korɛntitɔnŋ kiri (1) 5 - Jɔ Biibili ki

Korɛnti egilisi ki ciiru bi nɔɔmaan ki

¹ Yibɛɛ i ǹʼnama de-a mani mwɔɔnna nu, tu nankulunbi ki ma-a ábɛɛ kanfɛ, nwɔ̀ bishi yɛri ma-a shiya tɔri kiri kanfɛ kì, tu ábɛɛ ru, tu ǹʼbɛɛ a jitiŋ wɔ mari shi ji awɔ.

² Niŋ fa a fɔn na, ábɛɛ i ji faa á yɛri rakali-la! Niŋ bi ki kakan wuru-i niŋ i ábɛɛ ŋununshuuli, nwɔma konwɔtiŋ niŋ bijɛ ki ma-i, niŋ i kwɔ po san ábɛɛ kanfɛ.

³ Míŋ ábɛɛ kanfɛ nmaŋ kì, nka míŋ ciiru ɲakili ki i ábɛɛ fan. Míŋ kiti ki kwuru-i nintiŋ sun kɔ miŋ tu míŋ a ji ábɛɛ kanfɛ.

⁴ A manja tan Yesu tɔ ki bira, míŋ ɲini ki a ji ábɛɛ fan. Ŋuntiŋ Yesu wɔ sotinbi ki a tu yibɛɛ fan.

⁵ Niŋ koŋ kwuru ki kakan-i ntiŋ i wɔri shitaanni tɛ, ntiŋ firi ki i haliki, nwɔma ntiŋ ɲini ki i a mwu Ŋuntiŋ Yesu ki na shikaŋ ki ru.

⁶ Ábɛɛ ragbɛ ŋuŋ ki shɔ kì dɛ! Ábɛɛ ǹʼtɔ tu lenfe pyaanŋ ki fani nusumaan mwɔɔnna bataa tuutuu-ra kì wa?

⁷ Niŋ ki ra, á niŋ bijɛ ki bataa po san á kanfɛ, nwɔma á i ji miŋ tu fani ŋunaŋ nusumaan ni, lenfe bo nwɔ̀ri ru kì. Ábɛɛ fɔɔmaan ni yɛ miŋ tu fani lenfe bali li, sabu Kirisa kilɛn-i, ntiŋ i ji yibɔɔ jonbikɔ ki saraka ki i.

⁸ Niŋ ɲaan ki tɛ, yi fa niŋ ɲaannabyɛ ki ma bwuru wu lenfe bwuumaan ki bo-i nwɔ̀ ru kì, ninwɔ̀ i juubi ki fa kakaalibi ki i. Nka yi ɲaannabyɛ ki ma bwuru wu lenfe bo nwɔ̀ ru kì, ninwɔ̀ i fɔɔbi fa sɛli ki i.

⁹ Míŋ ǹʼbi-i ábɛɛ tɛ ńʼwɔ sɛbɛ tɔri ru, ńʼtu á fa nankulinŋ kiri fa dɛbɛ bi tɔri tenŋ sun kì.

¹⁰ Míŋ ka juniɲa ka ru nankulinŋ kiri fa a ru fyikatiŋ kiri fa a ru kwunŋ kiri fa a ru pɛli tantɔnŋ kiri wulubi-a kì dɛ! A nini wulu ji wuru-i, ábɛɛ wuru-ra ji po san-a juniɲa ki ru.

¹¹ Míŋ i nwɔ̀ bi-a, niŋ i kaa : Konwɔtiŋ ǹʼbi-a tu afinŋ bilinatɔnŋ i, ntiŋ i ji nankulinŋ i, walima fyikatiŋ i, walima pɛli tantɔnŋ i, walima koŋ tɔ bitɔnŋ i, walima lɔ mwunutɔnŋ sinaŋ i, walima kwunŋ i, ńʼtu á fa nintiŋ fa dɛbɛ bi tɔri tenŋ sun kì. Á fa niŋ bishi konaŋ ki fa hali nufinŋ nu ámaŋ fan kì.

^12-13 Ábɛɛ cirasun tu míŋ kiti ki kwuru-ra taannatɔnŋ kiri sun wa? Aayi, Kirinŋ i nini wɔ kiti ki kwurutɔnŋ ki i. Ábɛɛ ǹʼtɔ tu ábɛɛ fa koŋ wɔ̀ri i ámaŋ fan, tu ábɛɛ kakan á i kiti ki kwuru nini sun kì wa? Á ǹʼma miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ tu : « Á bi kulinŋ matɔnŋ ki kwɔ po san á kanfɛ. »