Korɛntitɔnŋ kiri (1) 4 - Jɔ Biibili ki

Kirisa wɔ cindaŋ kiri bi ki

¹ Niŋ ɲaan ki tɛ, míŋ tindaŋ ni, á yibɛɛ shɛɛli-li Kirisa tɛ baara matɔnŋ bantenŋ ni i, niŋ fa Kirinŋ wɔ gonto ri ɲaanbitɔnŋ ni i.

² Niŋ cinŋ ki biye-i nwɔ̀ri gbɛsun, ǹʼyɔ bi-a nini tɛ tu kí ji kpeeri i, koŋ i bili-la nwɔ̀ri ra niŋ cinŋ ki mamaŋ ki ru.

³ Míŋ gbɛ, ábɛɛ i nwɔ̀ bi-a niŋ fa koŋ tɔri kiri i nwɔ̀ bi-a mɔ́ɔ́n cinŋ ki bi ki sun, niŋ bi sinaŋ i míŋ gbɛ kì. Míŋ yɛrima ki ǹʼtɛ, ŋí i bi tɔri bi ńʼyɛri ki wɔ cinŋ ki bi sun kì.

⁴ Sɛli yɛ, míŋ ciiru ki ńʼsɔsɔ-a kì, nka niŋ ǹʼji-a tu míŋ pɔlibali i kì dɛ! Ŋuntiŋ ki i mɔ́ɔ́n kitikwurutɔnŋ ki i.

⁵ Niŋ ki ra, á fa á ciirukwulu á i kiti ki fɛɛn koŋ sun ǹʼwaaci ki sobali i kì, á ncusun Ŋuntiŋ ki na. Finŋ woo finŋ nadu-i, ŋì a na nini bataa po taanna, niŋ fa ŋì i na konaŋ ciiru bi radumaan kiri po ji. Niŋ shikaŋ, konwɔtiŋ fa gbɛbi wɔ̀ kakan-i ntiŋ a niŋ kila Kirinŋ gbɛ.

Korɛntitɔnŋ kiri wɔ tɛnbi ki

⁶ Ńʼtindaŋ ni, míŋ ńʼyɛri fa Apolɔsi shi ji-i ɲaanjifinŋ ni i ábɛɛ tɛ, nwɔma nwɔ̀ sɛbɛ-i Kirinŋ wɔ wulu ki ru, koŋ fa na fwuu niŋ sun kì. Ábɛɛ ru, koŋ fa na a yɛri ragbɛ ntiŋ i ji ǹʼbɛɛ tɛ, ntiŋ i a kaan ǹʼbɛɛ tɛ kì.

⁷ Niŋ na, nkɛnŋ miŋ pari koŋ pyɛ kiri wu? Nfɛnŋ finŋ miŋ gbɛ tu Kirinŋ nwɔ̀ wɔri miŋ tɛ kì? A Kirinŋ ji ǹʼwɔri miŋ tɛ, nfɛnŋ na miŋ i nʼyɛri ji-ri niŋ wu, miŋ tu koŋ a ji ǹʼwɔri miŋ tɛ kì?

⁸ Ábɛɛ á dintɛfinŋ kiri kila-i kɔ. Ábɛɛ ji-i fintiŋ ni i kɔ, á i ji masa ri á i yibɛɛ tu. Sɛli ki ra, míŋ i ǹʼtɛ ńʼtu ábɛɛ i ji masa ri i, nwɔma yibɛɛ fa ábɛɛ i masabi ki ma yimaŋ fan.

⁹ Ǹʼyɔ míŋ ɲaanna, ńʼtu Kirinŋ a ji yibɛɛ, Yesu wɔ cindaŋ kiri bo konaŋ bataa kɔɔtɛ, yibɛɛ i miŋ tu koŋ wɔ̀ri bo-i kilɛnmaanna tɛ, sabu yibɛɛ ji-i shɛɛlifinŋ ni i juniɲa gbɛ, mɛlɛkɛn kiri gbɛ, niŋ fa konaŋ kiri gbɛ.

¹⁰ Nka yibɛɛ i miŋ tu julutiŋ ni Kirisa tɔ ki bira. Ábɛɛ fa Kirisa wɔ tenbi ki baraka ra, ábɛɛ ji-i ɲakilitiŋ ni i dɔɔ. Yibɛɛ kiri ji-i baraka bali kiri i, ábɛɛ i ji barakatiŋ kiri i. Yibɛɛ i fyɛbi kila-a, ábɛɛ i gbɛbi kila-ri.

¹¹ Fɔ ŋì i na so dɔnsaŋ sun, yibɛɛ yɛlimaan yɛ bɛɛ ki fa jumwunu ki gbɛɛra, bonsunjuulinŋ yi gbɛ kì, kí i yi bwɔ-a niŋ fa sɔɔmaŋ tenŋ yi ra kì.

¹² Yibɛɛ yɛrima kiri i baara ma-a yi gbɛ kiri ra, yi i yɛli-li. Konaŋ kiri i yi ki-ri, yi i juba san-ni kí tɛ, kí i yi cɔɔri-ri, yi i ǹʼpa-ri yi ra.

¹³ Nwɔ̀ri i yibɛɛ tɔ jɛ bi-a yi ɲaanna, yibɛɛ i nini nupwulu-la wulu shɔɔrinŋ na. Yibɛɛ ji-i miŋ tu juniɲa wɔ shinŋ ni, fɔ ŋì i na so jiŋ sun, shɔkulu yibɛɛ ra koŋ tɔri tenŋ gbɛ kì.

¹⁴ Á fa npwulu-li tu míŋ ka sɛbɛ ka tan-a, ŋí i ábɛɛ ɲaankwun kì dɛ? Míŋ i ábɛɛ racin-a miŋ tu koŋ i a dintɛ daŋ nacin-a ɲaan wɔ̀ tɛ.

¹⁵ Hali kalimɔɔ waabyinŋ (10.000) ji ábɛɛ ra jiŋ, tiŋ tenŋ pe i ábɛɛ ra, mínki Kirinŋ wɔ Wulujii ki bi-i ábɛɛ tɛ, ninki i ncin ábɛɛ i ji Kirinŋ daŋ ni i Yesu Kirisa wɔ tenbi ki bira.

¹⁶ Niŋ ki ra, míŋ i ábɛɛ rafɛ-a, ńʼtu á tiri kɛɲɛ míŋ tirika ɲaan ki wu.

¹⁷ Ninki ncin-i, míŋ i Timote cin tiri-ri ábɛɛ tɛ, ninwɔ̀ i míŋ dintɛ daŋ i, niŋ fa koŋ kulumaan i ji-i Kirisa bilinabi ki ru. Ntiŋ a ta ábɛɛ ɲakilila bo míŋ tirika ɲaan ki tɛ Kirisa bilinabi ki ru, miŋ tu míŋ i Yesu Kirisa wɔ konanbi ki kali-la ɲaan wɔ̀ tɛ mani bataa ru.

¹⁸ Ábɛɛ kanfɛ, konaŋ kiri bɛɛ ri i npwulu-la, tu míŋ a ji-a ta ábɛɛ shɛɛli kili kì, ninki i ncin-ni kí i arì yɛri ragbɛ-ri ka ɲaan ka tɛ.

¹⁹ Nka a ǹʼdi Kirinŋ tɛ, ŋì a cin kili kì, míŋ a ta ábɛɛ tɛ nmaŋ. Niŋ yɛri ragbɛtɔnŋ kiri i wulu sinaŋ sinaŋ wɔ̀ri bi-a, kí a so nwɔ̀ ra, míŋ a ta niŋ ja.

²⁰ Sabu Kirinŋ wɔ Masabi ki tɔnŋ na wulu bantenŋ i kì, ǹʼkakan-i ǹʼwɔ sotinbi ki i ja tirika ɲaan ki ra.

²¹ Dɔnsaŋ, ábɛɛ tu dɔɔkunŋ? Ŋí tiri suulinŋ wu ńʼgbɛɛra á cɛfan wa? Walima ŋí tiri bidintɛbi fa tɔnsunfili wu á tɛ?