Korɛntitɔnŋ kiri (1) 3 - Jɔ Biibili ki

Kirinŋ wɔ wulusunjotɔnŋ kiri tumaŋ ki

¹ Ńʼtindaŋ ni, míŋ wulubi ábɛɛ tɛ miŋ tu bilinatɔnŋ kɔɔmaan ni kì, nka míŋ ǹʼbi-i ábɛɛ tɛ, miŋ tu ŋí a ji ǹʼbi-a juniɲa nu konaŋ ni tɛ, konwɔtiŋ ni i faa miŋ tu danjeelinŋ ni, Kirisa ra.

² Ninki ǹʼcin-i, míŋ i ɲɛŋ wɔri ábɛɛ tɛ. Míŋ nufinŋ sunfuru wɔri ábɛɛ tɛ kì, sabu ábɛɛ wuru-ra so ǹʼnu-i sun kì. Hali jiŋ, ábɛɛ ra so nufinŋ sunfuru nu-i sun kì, sabu ábɛɛ i faa tiri kɛɲɛ-a á firi ki dintɛ bi jɛ kiri wu.

³ A ɲaannajuubi ki fa fubalibi ki ji ábɛɛ faninmwuŋ, niŋ i ǹʼji-a tu ábɛɛ tiri-ra, á i ǹʼkɛɲɛ-ni á firi kiri dintɛ bi jɛ kiri wu miŋ tu ka juniɲa ka ru konaŋ kiri.

⁴ Ábɛɛ ru, a ǹʼbɛɛ ri ji ǹʼbi-a tu : « Míŋ i Pooli cɛfan », koŋ tɔri ri i ǹʼbi-ri tu : « Míŋ i Apolɔsi cɛfan. » Niŋ juniɲa ka ru konaŋ kiri ɲaan ki i kì wa?

⁵ Apolɔsi nkɛnŋ? Míŋ Pooli i ji nkɛnŋ? Yibɛɛ i Kirinŋ wɔ baara matɔnŋ gbansanŋ ni i, nwɔ̀ri ábɛɛ bo-i bilinabi saa ki sun, ŋì i kɛɲɛ Ŋuntiŋ ki wɔ baara wɔrimaan ki wu yibɛɛ fɔn tenŋ tenŋ tɛ.

⁶ Míŋ finŋ ki firi-i, Apolɔsi i ǹʼju ki bo, nka Kirinŋ i ǹʼfali.

⁷ Niŋ ɲaan ki tɛ, nwɔ̀tiŋ finŋ ki firi-i woo, nwɔ̀tiŋ ju ki bo-i ǹʼna woo, nini tɔri bi ki ŋuniŋ ki i kì, duu Kirinŋ wɔ̀ ki ǹʼfali-i.

⁸ Nwɔ̀tiŋ finŋ ki firi-i niŋ fa nwɔ̀tiŋ ju ki bo-i ǹʼna, nini koŋ fuuli ki fɔn i finŋ tenŋ ni i, Kirinŋ a na kí fɔn sali, ŋì i kɛɲɛ kí fɔn tenŋ tenŋ wɔ baara mamaan ki wu.

⁹ Sabu yibɛɛ fɔn bataa i baara mashi ri i Kirinŋ gbɛ. Ábɛɛ i miŋ tu Kirinŋ wɔ ji ki, niŋ fa á i ji miŋ tu ǹʼwɔ fu, ǹʼyɔ nwɔ̀ tan-a.

Koŋ bataa wɔ baara maka ɲaan nufɔɔ bi ki

¹⁰ Míŋ fu ki cɛ ki sɔɔ-ɔ, ŋì i kɛɲɛ míŋ kafinŋ ki wu Kirinŋ gbɛ miŋ tu fu tantɔnŋ ɲakilitiŋ, niŋ kɔɔtɛ, koŋ tɔri i na fu ki tan tunpa niŋ fu cɛ sɔɔmaan ki sun. Nka koŋ finŋ woo finŋ i fu ki tan tunpa-a niŋ fu cɛ sɔɔmaan ki sun, tu koŋ fɔn tenŋ tenŋ awɔ tanka ki cɔye.

¹¹ Sabu fu cɛ wɔ̀ sɔɔ-ɔ, niŋ i Yesu Kirisa yɛrima ki i, koŋ tɔri tenŋ so-a ǹʼtɔri sɔɔ kili kì.

¹² A konwɔtiŋ ja ji fu ka tan tunpa niŋ fu cɛ ki sun, sɛniŋ wu, walima warifɔ wu, walima kwɔ kpaafuru wu, walima suu wu, walima cunŋ wu, walima ɲɔɔnni wu,

¹³ kiti ki shikaŋ ki ru, koŋ fɔn bataa wɔ baara a na ja, ŋì i sunsunu tuu wu, nwɔma ǹʼkwuru i tɔ.

¹⁴ A tuu ki konwɔtiŋ wɔ baara mamaan bilituru kì, nintiŋ a sali kila.

¹⁵ Nka a tuu ki nwɔ̀tiŋ wɔ bilituru, nintiŋ a bɔni awɔ sali ki ru, nka ntiŋ a a mwu, miŋ tu konwɔtiŋ bili de-i tuu ru, ntiŋ i po.

¹⁶ Ábɛɛ ǹʼtɔ tu ábɛɛ Kirinfusinaŋ ki i, niŋ fa tu Kirinŋ Ɲini ki sɔɔ ábɛɛ ciiru kì wa?

¹⁷ A konwɔtiŋ Kirinfusinaŋ ki li, Kirinŋ yɛrima ki ra nintiŋ li, sabu Kirinfusinaŋ ki i fu wɔlinŋ i, ábɛɛ kiri i niŋ i.

¹⁸ Koŋ tɔri fa a yɛri sunnɛɛn kì. A konwɔtiŋ ji ábɛɛ ru, ntiŋ i a yɛri ji-ri koŋ ɲakilitiŋ i, ŋì i kɛɲɛ ka juniɲa ka wu, tu nintiŋ a yɛri ji maannikɔni i, nwɔma a i ɲakilitinbi sɔbɛ ki kila.

¹⁹ Sabu ka juniɲa ka ru ɲakilitinbi ki i maannikɔnɔbi i Kirinŋ ɲaanna. Niŋ ki ra, ǹʼsɛbɛ-i Kirinŋ wɔ wulu ki ru tu : « Ǹʼyɔ ɲakilitiŋ kiri pa-a arì yɛrima ki wɔ kɛrɛbi ki wu. »

²⁰ Ǹʼsɛbɛ-i sɛbɛ tu : « Ŋuntiŋ Kirinŋ i ka juniɲa ka ru ɲakilitiŋ kiri ciiru bi kiri tɔ-a, tu nini bi tawɔ ri i. »

²¹ Niŋ na, koŋ tɔri fa a yɛri ragbɛ ŋuŋ ki ji konaŋ ni kì, sabu finŋ ki fɔn bataa i ábɔɔ.

²² Pooli woo, Apolɔsi woo, Pyɛɛri woo, juniɲa woo, ɲaninkulutɔnbi woo, beŋ woo, dɔnsaŋ finŋ kiri woo, finŋ naanna kiri woo, yìrì bataa i ábɛɛ kiri wɔ.

²³ Nka ábɛɛ i Kirisa wɔ ri. Kirisa i ji Kirinŋ wɔ.