Korɛntitɔnŋ kiri (1) 2 - Jɔ Biibili ki

Pooli wɔ waajulu ki Korɛnti kili ki ru

¹ Ńʼtindaŋ ni, míŋ ta-i ábɛɛ tɛ waaci wɔ̀ ru, míŋ ta ǹʼji ábɛɛ wu tu míŋ wulu tɔ-a ŋí i fwuu koŋ bataa sun kì, walima ńʼtu míŋ ɲakilitiŋ i, ŋí i fwuu koŋ bataa sun kì dɛ! Miŋ ta-i Kirinŋ wɔ gonto ki bi ábɛɛ tɛ,

² sabu míŋ ǹʼbo wuru ńʼciiru, ńʼtu ŋì i míŋ tu ábɛɛ kanfɛ, ńʼtu míŋ a finŋ tɔri bi ábɛɛ tɛ Yesu Kirisa bi ki fa ntiŋ wɔ kpinkpi suu sun beŋ ki bantenŋ ciniŋ kì.

³ Niŋ fa míŋ wuru ábɛɛ kanfɛ waarinŋ wɔ̀ ru, míŋ baraka ki kuru wuru ńʼyɛri ɲaanna, ŋí i kɛni-ni, ŋí i sɛrɛsɛrɛ-ri.

⁴ Mɔ́ɔ́n wulu ki fa ńʼwɔ waajulu ki wuru konaŋ wɔ ɲakilitinbi wulu kì, nka Ɲiniwɔlinŋ ki wɔ so ki wuru ǹʼji-a wulu u, koŋ wuru-ra so a gbɛ bili-i nwɔ̀ sun.

⁵ Nwɔma ábɔɔ bilinabi ki cɛ fa sɔɔ konanmini wɔ ɲakilitinbi wulu sun kì, nka fɔ ǹʼcɛ sɔɔ Kirinŋ wɔ sotinbi ki sun.

Kirinŋ wɔ ɲakilitinbi ki bi ki

⁶ Nka nwɔ̀ri tiri-i jɛŋ bilinabi ki ru kɔ, yibɔɔ waajulu ki i ɲakilitinbi i nini ɲaanna. Niŋ ɲakilitinbi ki fa juniɲa wɔ ki tenŋ i kì, ǹʼdumiŋ fa ka juniɲa ka ŋununtiŋ kiri wɔ ki tenŋ i sɛbɛ kì, niŋ ŋununtiŋ kiri bataa i kɔ-a.

⁷ Nka yibɛɛ i Kirinŋ wɔ ɲakilitinbi ki sunjo-a konaŋ ki tɛ, niŋ i gonto o, ninwɔ̀ radumaan yɛ juniɲa nu konaŋ kiri sun. Kabi juniɲa tɔnpa ki jɛŋ, Kirinŋ niŋ ma sɔɔ wuru yibɛɛ jɛŋ, nwɔma yibɛɛ i na so awɔ nɔɔri ki kila-i.

⁸ Ka juniɲa ka ru ŋununtiŋ kiri tɔri ka ɲakilitinbi ka tɔ kì, kí ji wuru ǹʼtɔ-ri, kí wuru-ra Ŋuntiŋ nɔɔritiŋ ki kpinkpi suu sun kì.

⁹ Miŋ tu ǹʼsɛbɛ-i Kirinŋ wɔ wulu ki ru tu : « Konanmini ɲaniŋ finŋ wɔ̀ri ja kì, ntiŋ tɔɔn wulu wɔ̀ri rama ja kì, bi wɔ̀ri jɛri ntiŋ ɲakilila sun kì, Kirinŋ niŋ finŋ kiri ramɔni-i kpeeri tɛ, ǹʼbidi-i nwɔ̀ri tɛ. »

¹⁰ Niŋ ɲaan ki tɛ, Kirinŋ niŋ finŋ kiri ji-i yibɛɛ wu Ɲiniwɔlinŋ ki baraka ra. Ɲiniwɔlinŋ ki i bi kiri bataa rufɔɔ-ra, fɔ ŋì i ta so Kirinŋ wɔ gonto sinaŋ kiri sun.

¹¹ Koŋ tɔri tenŋ so-a konanmini ciiru tɔ-i kì, duu ntiŋ ɲini ki yɛrima kì. Mìŋ ɲaan tenŋ ki tɛ sɛbɛ, koŋ so-a Kirinŋ wɔ bi kiri tɔ-i Kirinŋ ɲini ki ciniŋ kì.

¹² Yibɛɛ ɲini wɔ̀ kila-i, niŋ ka juniɲa ka wɔ kì, niŋ po-i Kirinŋ nu, nwɔma Kirinŋ kafinŋ wɔ̀ri wɔri-i yibɛɛ tɛ, yi i nini tɔ.

¹³ Yibɛɛ ninki sunjo-a yi i ǹʼkɛɲɛ konanmini wɔ ɲakilitinbi wu kì, duu Kirinŋ Ɲiniwɔlinŋ ki i nwɔ̀ ji-a yibɛɛ wu. Ɲiniwɔlinŋ ki i nwɔ̀ri gbɛ, niŋ bi kiri i ji-a nini wu Ɲiniwɔlinŋ ki wɔ wulu ki wu.

¹⁴ Ɲiniwɔlinŋ ki konwɔtiŋ gbɛ kì, nintiŋ a tu-a ǹʼwɔ bi kiri ra kì, sabu ntiŋ i yìrì ji-a maannikɔnɔbi i. Ntiŋ yɛri so-a yìrì ɲaantɔ-i kì, sabu koŋ so-a Kirinŋ wɔ bi kiri ɲaantɔ-i Ɲiniwɔlinŋ ki bantenŋ baraka ra.

¹⁵ Ɲiniwɔlinŋ ki i konwɔtiŋ gbɛ, nintiŋ i so-a bi bataa ɲaanpo san-i amaŋ nu, nka koŋ so-a ntiŋ wɔ kiri ɲaanpo san-i amaŋ nu kì.

¹⁶ Sabu ǹʼsɛbɛ-i Kirinŋ wɔ wulu ki ru tu : « Nkɛnŋ Ŋuntiŋ ki ɲakilila bi kiri tɔ-a, ntiŋ i ǹʼbi tu afinŋ a ǹʼnacin? » Nka Kirisa ɲakilila ki i yibɛɛ ciiru.