Korɛntitɔnŋ kiri (1) 14 - Jɔ Biibili ki

Cintɔnbi wulu bi ki fa wulu kwuru tɔri bi bi ki

¹ Ńʼtindaŋ ni á á banba, á i bidintɛbi ki ceeli, á i ji Ɲiniwɔlinŋ ki wɔ kafinŋ kiri tɛ. Á i cintɔnbi wulu kiri ceeli ŋì i fwuu kafinŋ pyɛ kiri sun.

² Konwɔtiŋ wulubi-a wulu kwuru tɔri ru, nintiŋ i wulubi-a konaŋ ni tɛ kì, ntiŋ i wulubi-a Kirinŋ tɛ, sabu koŋ ntiŋ wɔ wulu ki kɔri tɔ-a kì. Ntiŋ i gonto wulu li bi-a Ɲiniwɔlinŋ ki wɔ so ki wu.

³ Nka konwɔtiŋ i cintɔnbi wulu bi-a, nintiŋ i wulubi-a konaŋ ni tɛ, ntiŋ i ye-ri kí tɛ, kí i gbɛ bilinabi ki ru, kí i cunadibi kila niŋ fa kí i siratubi kila.

⁴ Konwɔtiŋ i wulu kwuru tɔri bi-a, nintiŋ i ǹʼbɛɛ bo-a a yɛrima ki wɔ bilinabi faan ki sun, nka konwɔtiŋ i cintɔnbi wulu bi-a, nintiŋ i ǹʼbɛɛ bo-ri bilinatɔnŋ kwuru ki bataa wɔ bilinabi faan ki sun.

⁵ Ǹʼdi-i míŋ tɛ ábɛɛ bataa i wulu kwuru tɔri bi-ri, nka konwɔtiŋ i cintɔnbi wulu bi-a, niŋ di-i míŋ tɛ ŋì i fwuu wulu kwuru tɔri bi ki sun. Ŋi i cintɔnbi wulu bi, tɔnɔ i niŋ nu ŋì i fwuu wulu kwuru tɔri bi ki sun, fɔ a ǹʼbitɔnŋ ki ǹʼkɔri ki bi, nwɔma bilinatɔnŋ kiri i ǹʼtɔnɔ ki kila.

⁶ Ayiwa ńʼtindaŋ ni, a míŋ ta ábɛɛ tɛ, ŋí i ta ńʼbo wulubi sun ábɛɛ tɛ wulu kwuru tɔri ru ábɛɛ nwɔ̀ tɔ-a kì, ábɛɛ ra nafan danwɔ kila niŋ nu? A mɔ́ɔ́n wulu ki fɔɔ ŋì i Kirinŋ wɔ bi ri ji-ri ábɛɛ wu kì, ǹʼdumiŋ tɔbi wɔri-ra á tɛ kì, cintɔnbi wulu dumiŋ i kì, ǹʼdumiŋ kalinŋ wɔri-ra á tɛ kì, niŋ a nfɛnŋ shɔ ábɛɛ sun?

⁷ Yi wɔbwɔfinŋ kiri shɛɛli, miŋ tu kpilaaŋ fa kɔniŋ. A yìrì wulu kiri po san arìmaŋ nu kì, yìrì i wulu wɔ̀ bi-a, koŋ a niŋ dantɔ dɔɔkunŋ?

⁸ Karidaŋ kiri i rakɔli-la bwuru wɔ̀ fyɛ wulu wu, a niŋ wulu ki ja fɔɔ kì, nkɛnŋ na a yɛri ramɔni kari tamaanna ki tɛ?

⁹ Mìŋ ɲaan tenŋ ki tɛ, a ábɔɔ wulu ki fɔɔ kì, nkɛnŋ a ábɔɔ bi wɔ ki dantɔ? Ŋì i ji-a miŋ tu ábɛɛ wulu gbansanŋ bi-a.

¹⁰ Wulu kwuru mwɔɔnna i juniɲa ciiru, nka ǹʼbataa daŋ i tɔ-ri.

¹¹ Nka míŋ wulu wɔ̀ dantɔ-a kì, konwɔtiŋ i niŋ wulu ki bi-a, nintiŋ i ji-a jɛ ɛ míŋ gbɛ, míŋ yɛrima ki i ji jɛ ɛ nintiŋ gbɛ.

¹² Miŋ tu Ɲiniwɔlinŋ ki wɔ kafinŋ kiri tɔ ki i ábɛɛ ru ɲaan wɔ̀ tɛ, kafinŋ wɔ̀ri i ǹʼbɛɛ bo-a bilinatɔnŋ kwuru ki wɔ jɛŋ ta ki sun, á nini mwɔɔnna ceeli.

¹³ Niŋ ki ra, konwɔtiŋ i wulu kwuru tɔri bi-a, tu ntiŋ Kirinŋ nafɛ, tu ŋì niŋ ǹʼkɔri ki bi ki kafinŋ ki wɔri a tɛ sɛbɛ.

¹⁴ A míŋ ji Kirinŋ nafɛ-a wulu kwuru tɔri ru, niŋ Kirinŋ nafɛ ki i ji-a míŋ ɲini ki wɔ, nka míŋ ɲakili ki faan ji-a ǹʼsun kì.

¹⁵ Míŋ kakan ŋí i ǹʼdanwɔ ma? Míŋ a Kirinŋ nafɛ ńʼɲini ki wu, ŋí i ǹʼnafɛ ńʼɲakili ki wu sɛbɛ. Míŋ a Kirinŋ gbɛ shu pɔri ńʼɲini ki wu, ŋí i ǹʼpɔri ńʼɲakili ki wu sɛbɛ.

¹⁶ A miŋ ji baraka bi-a Kirinŋ tɛ wulu kwuru tɔri ru, koŋ wɔ̀ri tɔɔnye-i miŋ tɛ, nini a «  Amiina  » bi dɔɔkunŋ mɔɔn baraka bimaan ki kɔmaan ki ra, sabu miŋ nwɔ̀ bi-i, kí niŋ dantɔ kì.

¹⁷ Sɛli yɛ, mɔɔn baraka bimaan ki shɔ-i, nka miŋ kaashi kiri nafan kila ǹʼnu kì.

¹⁸ Míŋ i baraka bi-a Kirinŋ tɛ, nwɔ̀ a tu-i míŋ i wulubi-ri wulu kwuru tɔri ru ŋì i fwuu ábɛɛ bataa sun.

¹⁹ Nka bilinatɔnŋ kiri faninmwuŋ, a míŋ wuludaŋ taanŋ bantenŋ bi konaŋ kiri dantɔ wulu lu, niŋ pari-i míŋ tɛ wuludaŋ waa byinŋ (10.000) bimaan wu, wulu kwuru tɔri ru koŋ nwɔ̀ dantɔ-a kì.

²⁰ Ńʼtindaŋ ni, á fa bi kiri shɛɛli miŋ tu tiraŋ ni kì. Nka nwɔ̀ i bijɛ ki i, á ji miŋ tu tiraŋ ni, nka bi shɛɛlika ɲaan ki tɛ, á ji bwuumaan ni i.

²¹ Ǹʼsɛbɛ-i sariya sɛbɛ ki ru tu Ŋuntiŋ Kirinŋ ǹʼbi tu : « Míŋ a na wulubi koŋ kari tɛ shiya tɔri konaŋ ni tɔnŋ na, hali niŋ fa a fɔn na, kí a na arì tɔɔnye míŋ tɛ kì. »

²² Niŋ ki ra, wulu kwuru tɔri bi ki taanmashɛ bilinatɔnŋ kiri gbɛ kì, nka taanmashɛ yɛ bilinabali kiri gbɛ. Nka ŋi i cintɔnbi wulu bi, niŋ i taanmashɛ ɛ bilinatɔnŋ kiri gbɛ, nka niŋ taanmashɛ ɛ bilinabali kiri gbɛ kì.

²³ Ábɛɛ yɛrima kiri ǹʼshɛɛli, a bilinatɔnŋ kwuru ki a rakɔli, kí bataa i arì bo wulu kwuru tɔri bi sun, a bilinatɔnŋ tɔri walima bilinabali ki bɛɛ na fa kí wu, ntiŋ a ǹʼbi tu julu bo-a kí ru kì wa?

²⁴ Nka, a kí bataa ji cintɔnbi wulu bi-a, a koŋ tɔri walima bilinabali ta de kí kanfɛ, kí bataa wɔ wulu kiri ra ntiŋ ɲakili ki rapwulu, ntiŋ i ntɔri bi awɔ bijɛ mamaan kiri ra.

²⁵ Ntiŋ ciiru bi radumaan kiri ra po taanna, ntiŋ i a kwushiri, ntiŋ i a ɲaannu ki da fwuniŋ sun, ntiŋ i Kirinŋ gbɛ, ntiŋ i ǹʼbi tu « Sɛli ki ra, Kirinŋ i ábɛɛ fan! »

Kirinŋ gbɛmaanna gbɛbili ka ɲaan ki

²⁶ Ńʼtindaŋ ni, ábɛɛ kakan á i nfɛnŋ ma? A ábɛɛ ámaŋ nakɔli, a Kirinŋ gbɛ shu ji ǹʼbɛɛ gbɛ, nintiŋ niŋ pɔri. A wulu ji ǹʼbɛɛ gbɛ, ntiŋ koŋ pyɛ kiri kali niŋ na. A Kirinŋ ji wulu de ǹʼbɛɛ daru, nintiŋ niŋ bi. A ǹʼbɛɛ ji ǹʼtɛ, a i wulubi wulu kwuru tɔri ru, nintiŋ i niŋ bi. A ǹʼtɔri ji-a so niŋ wulu kwuru tɔri ki kɔri bi-i, nintiŋ i niŋ bi. Nka niŋ bataa ŋuŋ ki i tu ǹʼbɛɛ i bo bilinatɔnŋ kiri wɔ baraka ki sun.

²⁷ Nwɔ̀ri ra wulubi wulu kwuru tɔri ki ru, nini ji koŋ fuuli walima koŋ byaŋ i, ŋì fa fwuu niŋ sun kì. Kí wulu ki bi tenŋ tenŋ sun, koŋ i ji nmaŋ, nwɔ̀ a kɔ́ɔ́ wulu bimaan ki kɔri ki bi.

²⁸ Nka a koŋ kila nwɔ̀tiŋ a ǹʼkɔri ki bi kì, tu wulu kwuru tɔri bitɔnŋ ki a gbansan jama ki ru. Ntiŋ i ǹʼbi-ri a ciiru, a fa Kirinŋ faninmwuŋ.

²⁹ Nwɔ̀ri i cintɔnbi wulu ki bi-a, nini ji koŋ fuuli walima koŋ byaŋ i, ŋì fa fwuu niŋ sun kì. Ǹʼpyɛ kiri i arì tɔɔnye-ri, kí i niŋ wulu kiri rufɔɔ-ri.

³⁰ Ŋì i ǹʼbɛɛ tu cintɔnbi wulu ki bi-a, a Kirinŋ wulubi koŋ tɔri tɛ, nwɔ̀ i wulu ki bi-a, tu nintiŋ a gbansan.

³¹ Niŋ ɲaan ki tɛ, ábɛɛ ra so cintɔnbi wulu ki bi wɔri-i ámaŋ tɛ tenŋ tenŋ sun, á i konaŋ ki bataa kali, nwɔma kí bataa i tɔnnafurubi kila.

³² Cintɔnŋ kiri kakan-i kí i so arì yɛri pa-i, ŋì i kí tu cintɔnbi wulu ki bi-a.

³³ Sabu Kirinŋ bi ɲaanmimaan ki tɛ kì, fɔ ɲaanfɛfili. Miŋ tu ǹʼyɔ ma-a Kirinŋ wɔ wɔlinŋ kiri bataa wɔ egilisi kiri ru ɲaan wɔ̀ tɛ,

³⁴ a ábɛɛ ji manjamaŋ kiri ru, tu mari kiri arì gbansan, sabu kí kakan kí i wulubi niŋ mani nu kì. Kí kakan-i kí i arì yɛri sunjɛri miŋ tu Kirinŋ wɔ sariya sɛbɛ ki i ǹʼbi-a ɲaan wɔ̀ tɛ.

³⁵ A kí ji ǹʼtɛ arì i bi ki bɛɛ ɲaantɔ, kí niŋ nanɔri arɔɔ shuru kiri ra kulu. Ǹʼshɔ mari ra, ŋì i wulubi bilinatɔnŋ kwuru kiri wɔ manjamaŋ ki ru kì.

³⁶ Ábɛɛ cirasun tu Kirinŋ wɔ wulu ki cɛtu ábɛɛ kiri gbɛ wa? Walima tu ǹʼso ábɛɛ bantenŋ tɛ wa?

³⁷ A konwɔtiŋ ǹʼbi tu afinŋ cintɔnŋ i walima tu Kirinŋ wɔ kafinŋ ki bɛɛ afinŋ gbɛ, ntiŋ kakan-i ntiŋ i ǹʼtɔ tu míŋ sɛbɛ wɔ̀ wɔri ta-a ábɛɛ tɛ kaa, tu niŋ Ŋuntiŋ ki wɔ cinŋ bimaan a.

³⁸ A konwɔtiŋ niŋ tɔ kì, niŋ i taanmashɛ ɛ tu Kirinŋ nintiŋ tɔ-a sɛbɛ kì.

³⁹ Niŋ na, ńʼtindaŋ ni, á cintɔnbi ki ceeli á faan ki bataa wu, nka á fa koŋ suu wulu kwuru tɔri bi ki sun kì.

⁴⁰ Nka, á á banba, á i bi bataa maka shɔ, niŋ fa ŋì i kɛɲɛ a maka ɲaan ki wu.