Korɛntitɔnŋ kiri (1) 13 - Jɔ Biibili ki

Bidintɛbi ki

¹ Hali míŋ ji konanmini ni wɔ wulu li bi-a fɔ ŋí i mɛlɛkɛn kiri wɔ bi-ri, a bidintɛbi ji míŋ nu kì, míŋ finŋ tɔri tenŋ i wulu gbansanŋ bitɔnŋ niŋ fa tɛniŋ wulu ciniŋ kì.

² Hali míŋ ji cintɔnbi wulu bi-a, ŋí i bi radumaan kiri fa finŋ fɔn kwuru tɔ-ri, niŋ fa ńʼwɔ bilinabi ki i so-ri tɔnŋ ni jɔrɔkɔ san-i arì ta ru, a bidintɛbi ji míŋ nu kì, míŋ finŋ tɔri kì.

³ Hali míŋ ji ńʼgbɛɛrafinŋ kiri bataa wɔri-ra gbɛwɔ ri tɛ, niŋ fa ŋí i ńʼfiri ki wɔri tu ŋì bilituru kí bira, a bidintɛbi ji míŋ nu kì, niŋ a finŋ tɔri shɔ míŋ sun kì.

⁴ Bidintɛ bi i konwɔtiŋ ciiru, ntiŋ tɔnsunfili-i, ntiŋ i bi shɔɔrinŋ ma-ni, tɛnbi ji-a ntiŋ nu kì, ntiŋ a yɛri ji-a kì, ntiŋ dumiŋ a yɛri ragbɛ-a kì.

⁵ Ntiŋ i koŋ ɲaankwunbi ma-a kì, niŋ fa ntiŋ a tenŋ nafan ceeli-la kì. Ntiŋ tɔnkwulumaŋ di kì, ntiŋ tɛɛ tu-a a ciiru kì.

⁶ Ntiŋ a ciirudi-a bi kɛrimaan na kì, sɛli ki i ntiŋ ciirudi-a.

⁷ Ntiŋ i koŋ bataa wɔ pɔli tu-a ntiŋ tɛ waaci bataa ru, ntiŋ i bili-la bi bataa ra, bi tɔri tenŋ ntiŋ gbɛɛratɛɛ-ra kì, ntiŋ i bi bataa pa-ri a ra.

⁸ Bidintɛ bi ki kɔ-a kì, nka cintɔnbi wulu kiri ra kɔ, wulu kwuru tɔri bi ki i ji-a kɔ, bitɔbi ki i ji-a kɔ mìŋ ɲaan tenŋ ki tɛ.

⁹ Sabu yibɔɔ bitɔbi ki rafaamaan i kì, yɔɔ cintɔnbi wulu kiri rafaamaan i sɛbɛ kì.

¹⁰ Nka a bi rafaamaan ki ja na waarinŋ wɔ̀ ru, bi rafaabali kiri ra kɔ.

¹¹ Ŋì i míŋ tu tiranbi ki ra, míŋ wuru wulu ki bi-a miŋ tu tiraŋ, ŋí i ńʼmiiri-ri miŋ tu tiraŋ, ŋí i bi kiri ja-ri miŋ tu tiraŋ. Nka míŋ na-i gbɛ, míŋ i tiranbi bi kiri tɔnbo.

¹² Dɔnsaŋ, yibɛɛ i finŋ wɔ̀ri ja-a, nini i miŋ tu koŋ finŋ miniŋ ja-a yɛrɛfɛri ru, nwɔ̀ jaka shɔ-a kì. Nka jibi bɛɛ, yi a na yìrì jaka shɔ fɛrifɛri. Dɔnsaŋ mɔ́ɔ́n bitɔbi ki rafaamaan i kì, nka jibi i jibi ru, míŋ a na finŋ bataa tɔka shɔ, miŋ tu Kirinŋ i míŋ tɔ-a ɲaan wɔ̀ tɛ.

¹³ Ka bataa ciiru, finŋ wɔ̀ri kɔ-a kì, nini i bilinabi ki fa gbɛbilimaŋ ki, niŋ fa bidintɛbi ki i. Nka finŋ byaŋ kari ru, yìrì ru sinaŋ ki i bidintɛbi ki i.