Korɛntitɔnŋ kiri (1) 12 - Jɔ Biibili ki

Ɲiniwɔlinŋ ki wɔ kafinŋ kiri bi ki

¹ Ńʼtindaŋ ni, Ɲiniwɔlinŋ ki i kafinŋ wɔ̀ri wɔri-ra, míŋ i ǹʼtɛ ábɛɛ i nini ɲaan ki tɔ.

² Á ǹʼtɔ tu, ábɛɛ wuru Kirinŋ tɔbali li waarinŋ wɔ̀ ru, tu ábɛɛ wuru bili de-a pɛli li cɛfan, finŋ wɔ̀ri yɛri so-a wulubi-i kì.

³ Niŋ ki ra, míŋ a ǹʼbi ábɛɛ tɛ, ńʼtu konwɔtiŋ so-a ǹʼbi-i tu : « Yesu danka-i », Kirinŋ Ɲini ki nintiŋ gbɛ kì, niŋ fa mìŋ ɲaan tenŋ ki tɛ, koŋ so-a ǹʼbi-i tu « Yesu i Ŋuntiŋ i », Ɲiniwɔlinŋ ki wɔ so ki kɔɔtɛ kì.

⁴ Kafinŋ kwuru mwɔɔnna i nmaŋ, nka mìŋ Ɲiniwɔlinŋ tenŋ ki i nini bataa wɔri-ra.

⁵ Baaratɔnŋ kwuru ki mwɔ-i, nka yìrì bataa i ma-a Ŋuntiŋ tenŋ tɛ.

⁶ Baaramaka kwuru mwɔɔnna i nmaŋ, nka Kirinŋ tenŋ pe i yìrì tɔbi ki de-a arì matɔnŋ kiri ciiru.

⁷ Ɲiniwɔlinŋ ki i kafinŋ wɔri-ra bilinatɔnŋ ki fɔn tenŋ tenŋ tɛ, nwɔma koŋ pyɛ kiri bataa i po ntiŋ doŋ na.

⁸ Wulubimaŋ ki ru, Ɲiniwɔlinŋ ki ɲakilitinbi wɔri-i ǹʼbɛɛ tɛ, mìŋ tenŋ ki i bitɔbi wɔri ǹʼtɔri tɛ.

⁹ Mìŋ Ɲiniwɔlinŋ tenŋ ki i bilinabi sinaŋ wɔri-ra ǹʼbɛɛ tɛ, mìŋ tenŋ ki i kiratɔnŋ kiri kene ki so wɔri-ri ǹʼtɔri tɛ.

¹⁰ Ɲiniwɔlinŋ ki botɔnsunbi ri ma so wɔri-i ǹʼbɛɛ tɛ, ŋì i cintɔnbi wulu bi so wɔri ǹʼtɔri tɛ, niŋ fa ŋì i so wɔri ǹʼtɔri tɛ, ntiŋ i Ɲiniwɔlinŋ ki wɔ so ki tɔ po san-ni ɲinijɛ kiri wɔ so ki ru. Mìŋ Ɲini tenŋ ki i so wɔri-ri ǹʼbɛɛ tɛ, ntiŋ i wulu kwuru tɔri bi-ri, ŋì i niŋ wulu kwuru tɔri ki kɔri ki bi ki so wɔri ǹʼtɔri tɛ.

¹¹ Ɲiniwɔlinŋ tenŋ i bi kari bataa ma-a, ŋì i koŋ fɔn tenŋ tenŋ ka-a a tɔ ra kafinŋ na, ŋì i kɛɲɛ a yɛri ki dintɛ bi ki wu.

¹² Konanmini firi ki i finŋ tenŋ i, nka ǹʼfa a fɔn na, mani mwɔɔnna i ǹʼna. Niŋ mani kiri fa arì mwɔbi ki sun, yìrì bataa i firi tenŋ i. Kirisa i mìŋ ɲaan tenŋ ki tɛ.

¹³ Sabu, miŋ tu ŋi Yawutu woo, ŋi shiya tɔri woo, ŋi joŋ walima ŋi joŋ i kì woo, yi bataa wu-i Ɲiniwɔlinŋ tenŋ baraka ra, nwɔma yi i ji firi tenŋ i. Yi bataa i ji mìŋ Ɲiniwɔlinŋ tenŋ ki kila.

¹⁴ Konanmini firi ki mani tenŋ bantenŋ i kì, nka yìrì mwɔ-i.

¹⁵ A kanŋ ki ǹʼbi tu : « Míŋ i gbɛ ɛ kì, niŋ na, míŋ firi ki mani ki bɛɛ ɛ kì. » Niŋ a ǹʼpo san firi ki wɔ bira wa?

¹⁶ A tɔɔnta ki ǹʼbi tu : « Míŋ i ɲaninaŋ i kì, niŋ na míŋ firi ki mani ki tɔri kì », niŋ a ǹʼpo san firi ki wɔ bira wa?

¹⁷ A konanmini firi ki mani ki bataa ji wuru ɲaninaŋ i, konanmini wuru-ra wulu lama-ni dɔɔkunŋ? Walima a ǹʼbataa ji wuru tɔɔnta a, ǹʼwuru-ra kini ki rama-ni dɔɔkunŋ?

¹⁸ Nka sɛli ki ra, Kirinŋ konanmini firi ki mani kiri fɔn tenŋ tenŋ po-i ǹʼna, ŋì i kɛɲɛ a yɛri ki dintɛ bi wu.

¹⁹ A konanmini firi ki bataa ji wuru mani tenŋ pe e, ǹʼwuru-ra so bi-i ǹʼtɛ tu firi wa?

²⁰ Konanmini firi ki mani kiri mwɔ-i, nka firi tenŋ pe yɛ.

²¹ Niŋ ki ra, ɲaninaŋ so-a ǹʼbi-i gbɛ tɛ tu : « míŋ maku tu miŋ na kì », niŋ fa ŋuniŋ so-a ǹʼbi-i kanŋ ni tɛ tu : « míŋ maku tu ábɛɛ ra kì. »

²² Nka firi ki mani wɔ̀ri sunfuru kì, yibɛɛ maku i tu-a niŋ kiri ra kusɛbɛ.

²³ Yibɛɛ i firi ki mani wɔ̀ri shɛɛli-la gbɛbilimaŋ ni i, yibɛɛ i yi ɲakili tu-a nini na kusɛbɛ. Firi ki mani wɔ̀ri i ɲaankwunŋ maŋ ni i, yi i ɲakili tu-ri nini na ǹʼmwɔɔnna ŋì i fwuu mani pyɛ kiri bataa sun.

²⁴ Mani wɔ̀ri ɲaankwunŋ maŋ ni i kì, yibɛɛ maku ǹʼna yi i nini nakpari kì. Kirinŋ firi ki ramɔni-i, ŋì i gbɛbi bo ǹʼmani kiri bɛɛ ri sun, nini wɔ̀ri fa ǹʼkakan kì.

²⁵ Ŋì niŋ ma-i, nwɔma firi ki mani ki tɔri dantenŋ fa a kila san ǹʼtɔri ra kì, nka firi ki mani ki bataa i a ɲakili tu amaŋ na.

²⁶ A firi ki mani ki bɛɛ ji cɔɔri ru, ǹʼpyɛ kiri bataa i cɔɔri-ra ǹʼfan, a ǹʼbɛɛ gbɛbi kila, ǹʼpyɛ kiri bataa i arì ciirudi-a ǹʼfan.

²⁷ Ábɛɛ i Kirisa firi ki i. Ábɛɛ bataa tenŋ tenŋ i niŋ firi ki mani ki bɛɛ ɛ.

²⁸ Niŋ ɲaan ki tɛ, Kirinŋ koŋ wɔ̀ri sɔɔ-ɔ awɔ bilinatɔnŋ kwuru kiri ŋununu, nini i kari i : ǹʼjɔnɔ ki, Yesu wɔ cindaŋ kiri, ǹʼfuluntɔnŋ ki, cintɔnŋ kiri, ǹʼbyantɔnŋ ki, kalimɔɔ kiri, niŋ kɔɔtɛ kabakobi kiri ma ki so wɔri-i nwɔ̀ri tɛ, niŋ fa so wɔri-i nwɔ̀ri tɛ kí i kiratɔnŋ kiri kene, niŋ fa yentɛtiiri, niŋ fa jɛntiiri, niŋ fa so wɔri-i nwɔ̀ri tɛ kí i wulu kwuru tɔri ri bi-ri.

²⁹ Bilinatɔnŋ kiri bataa Yesu wɔ cindaŋ ni i kì. Kí bataa Kirinŋ wɔ cintɔnŋ ni i kì. Kí bataa dumiŋ kalimɔɔ ri i kì. Kabakobi ma so wɔri kí bataa tɛ sɛbɛ kì.

³⁰ Walima so wɔri kí bataa tɛ kí i kiratɔnŋ ni kene kì, so dumiŋ wɔri kí bataa tɛ kí i wulu kwuru tɔri ri bi kì. Niŋ fa koŋ fɔn so-a wulu kwuru tɔri kɔri bi-i kì.

³¹ Niŋ ki ra, Kirinŋ wɔ kafinŋ wɔ̀ri tukulu gbɛ-i kusɛbɛ, á nini ceeli. Dɔnsaŋ míŋ a saa ji ábɛɛ wu, nwɔ̀ tukulu gbɛ-i yìrì bataa wu.