Korɛntitɔnŋ kiri (1) 10 - Jɔ Biibili ki

Isirayɛlidaŋ kiri wɔ Kirinŋ wulu sɔsɔ bi ki

¹ Ńʼtindaŋ ni, míŋ i ǹʼtɛ ńʼtu ábɛɛ i tu yibɛɛ tiŋ cɛɛnni kiri mabi kiri tɔbali li kì : Musa wɔ sunŋ ki ra, kí bataa wuru tiri-ra loŋ ki fɛ, kí fɔn bataa i ji wɛɛlufinju ki fwuu.

² Kí bataa i ji Musa wɔ wurama ki kila loŋ ki fa wɛɛlufinju ki ru.

³ Nufinŋ wɔ̀ po wuru Kirinŋ yɛrima ki gbɛ, kí bataa i niŋ nufinŋ ki bɛɛ nu.

⁴ Ju wɔ̀ po-i Kirinŋ gbɛ, kí bataa i ji ǹʼbɛɛ mwunu niŋ na. Niŋ ju ki wuru Kirinŋ wɔ ju u, nwɔ̀ wuru byin po-a faa ru. Niŋ faa ki po wuru Kirinŋ nu, ŋì i a maanni de-ri Isirayɛlidaŋ kiri fan. Niŋ faa ki wuru Kirisa.

⁵ Niŋ fa a fɔn na, kí bataa bi so di-i Kirinŋ tɛ kì, sabu kí mwɔɔnna beeni-i jaŋ ki faninmwuŋ.

⁶ Niŋ bi kiri bataa i yibɛɛ gbɛ ɲaanjifinŋ ni i, nwɔma yibɛɛ fa yi ɲaninpo bi kulinŋ kiri tɛ, miŋ tu kí ma-i ɲaan wɔ̀ tɛ kì.

⁷ Á fa ji nini bɛɛ sali, á i pɛli li tan-ni kì. Kirinŋ wɔ wulu ki i ǹʼbi-a ka ɲaan ka tɛ tu : « Konaŋ ki bataa i sɔɔ, kí i nuŋ ni nu, kí i mwunufinŋ ni mwunu. Niŋ kɔɔtɛ, kí i arì bo jɔnŋ kulinŋ kwuru ki bataa tan sun. »

⁸ Yi fa yi yɛri ji nankulinŋ ni i, miŋ tu ǹʼbɛɛ ri arì yɛri ji wuru ɲaan wɔ̀ tɛ kì, fɔ ŋì i ji sababu kí ru koŋ waa kɔniŋ fa byaŋ (23.000) i beeni sunŋ tenŋ.

⁹ Yi fa Kirisa kɔrɔbɔ, miŋ tu ǹʼbɛɛ ri ǹʼma wuru ɲaan wɔ̀ tɛ kì, niŋ i ji sababu kí i beeni myɛɛn ɲiin ta kiri ra.

¹⁰ Á fa ámaŋ ŋunuŋunu, miŋ tu ǹʼbɛɛ ri ǹʼma wuru ɲaan wɔ̀ tɛ kì, niŋ i ji sababu koŋ kilɛn mɛlɛkɛn ki i kí haliki.

¹¹ Niŋ ɲaanfɛkwulu bi kiri bataa kí kila-i, yìrì i sɛbɛ, nwɔma yìrì i ji ɲaanjifinŋ i, yibɛɛ juniɲa nakɔɔratɔnŋ kiri tɛ.

¹² Niŋ ki ra, konwɔtiŋ cirasun tu afinŋ tumaan a, tu nintiŋ a ɲakili tu a yɛri ra, nwɔma a fa na fɛɛn kì.

¹³ Kɔrɔbɔ bi wɔ̀ri ábɛɛ kila-i, á ǹʼtɔ tu niŋ bishi ǹʼbɛɛ ri kila fwuude ábɛɛ jɛŋ. Kirinŋ i dariwulutiŋ i, ŋì a ncusun kɔrɔbɔ bi i tu ábɛɛ ra tu nwɔ̀ a kwun ábɛɛ ru kì. Kɔrɔbɔ bi ki waari ki ru, Kirinŋ a na ɲaan wɔri ábɛɛ tɛ, á i so ǹʼkwun-i á ru.

Bilinatɔnŋ ki fa ɲinijɛ kiri dɛbɛ bi ki

¹⁴ Niŋ ki ra, ńʼwɔ wɔshuru byii ri, á bili pɛli tanmaanna ki jɛŋ.

¹⁵ Míŋ i wulu ki bi-a ábɛɛ tɛ ka ɲaan ka tɛ, sabu ábɛɛ i ɲakilitiŋ ni. Ábɛɛ yɛrima kiri míŋ bi wulu kiri rufɔɔka shɔ.

¹⁶ Yi yi miiri Ŋuntiŋ ki wɔ fani wɔlinŋ ki bi sun, yibɛɛ i baraka bi-a Kirinŋ tɛ mwunukulu wɔ̀ bira, niŋ yibɛɛ fa Kirisa cunŋ ki wɔ tenbi ki taanmashɛ ki ji-a kì wa? Yi i baraka bi-ri Kirinŋ tɛ bwuru wɔ̀ bira, niŋ i ji yibɛɛ fa Kirisa firi ki wɔ tenbi ki taanmashɛ ki i kì wa?

¹⁷ Bwuru ŋuŋ tenŋ i nmaŋ, niŋ ki ra, hali yibɛɛ ji mwɔ, yibɛɛ bataa i firi tenŋ i, sabu yibɛɛ fɔn bataa dɛbɛ-i bwuru ŋuŋ tenŋ sun.

¹⁸ Ábɛɛ Isirayɛlidaŋ kiri ɲaan ki shɛɛli, nwɔ̀ri i Kirinŋ tɛ sarakawɔrɔmaŋ ki sun finŋ kilɛnmaan kiri nu-a, tenbi i nini fa Kirinŋ faninmwuŋ, sabu sarakawɔrɔmaŋ ki i Kirinŋ wɔ.

¹⁹ Míŋ i ǹʼtɛ ŋí i nfɛnŋ bi ábɛɛ tɛ? Tu pɛlilashɛn ki fa pɛli kiri finŋ sɔbɛ ri i wa?

²⁰ Aayi, míŋ i ǹʼtɛ, ŋí i ǹʼbi tu kíbɛɛ i saraka wɔ̀ri san-a, ńʼtu kí yìrì san-a ɲinijɛ ri tɛ, ńʼtu kí yìrì san-a Kirinŋ tɛ kì, míŋ dumiŋ ǹʼtɛ ábɛɛ fa ɲinijɛ ri i dɛbɛ kì.

²¹ Ábɛɛ ra so á mwunu-i Ŋuntiŋ ki wɔ mwunukulu ki ra, á i á mwunu ɲinijɛ kiri wɔ ki ra mìŋ manaanŋ tenŋ ki ru kì. Ábɛɛ ra so nufinŋ ki nu-i Ŋuntiŋ ki wɔ tabali ki sun, á i ta ǹʼtɔri nu ɲinijɛ kiri wɔ tabali ki sun kì.

²² Walima yibɛɛ i ǹʼtɛ yi Ŋuntiŋ ki wɔ tɛnbi ki darupo bo yi sun wa? Ábɛɛ i ǹʼmiiri-ra tu yibɛɛ faan ki gbɛ ǹʼwɔ ki wu wa?

Kirinŋ gbɛ bi ki yi mabi ki bataa ru

²³ Ǹʼbɛɛ ri tu saa i yibɛɛ gbɛ, yi i bi bataa ma, nka sɛli ki ra, bi bataa ma shɔ kì. Kí tu saa i yi gbɛ yi i bi bataa ma, nka sɛli ki ra, bi bataa ma ǹʼbɛɛ bo-a koŋ wɔ bilinabi sun kì.

²⁴ Tu koŋ tɔri tenŋ fa a yɛri nafan ceeli kì, nka tu ntiŋ koŋ tɔri kiri wɔ ki ceeli.

²⁵ Finŋ woo finŋ i ju-a kuka ra, á niŋ bataa sa nu, á fa nanɔri tan niŋ kilaka ɲaan sun kì, nwɔma ábɛɛ ciiru tɔnŋ ki fa na á sɔsɔ kì,

²⁶ sabu ǹʼsɛbɛ-i Kirinŋ wɔ wulu ki ru tu : « Pwɔkulinŋ ki fa a ciiru finŋ kiri bataa i Ŋuntiŋ Kirinŋ ki wɔ. »

²⁷ A bilinabali ki bɛɛ ábɛɛ dɔri nufinŋ wu awɔ mani nu, a ntiŋ ta finŋ woo finŋ wɔri ábɛɛ tɛ, á niŋ nu byɛyi. Á fa nanɔri tɔri tenŋ tan niŋ bi sun kì, nwɔma ábɛɛ ciiru tɔnŋ ki fa na á sɔsɔ kì.

²⁸ Nka, a koŋ ǹʼbi ábɛɛ tɛ tu : « shɛn ka kilɛn-i pɛli la » walima « ǹʼji-i saraka a », wulubitɔnŋ ki bira, á fa niŋ nu kili kì, nwɔma nintiŋ ciiru tɔnŋ ki fa na ntiŋ sɔsɔ kì.

²⁹ A míŋ ǹʼbi tu ciiru tɔnŋ ki fa sɔsɔ tan kì, míŋ ábɛɛ yɛrima kiri ciiru tɔnŋ kiri wulu bi-a kì, nka konwɔtiŋ ki tɔɔnnakwun ki tan-i, ninki wɔ ki wulu yɛ. Ábɛɛ ra ǹʼbi tu « nfɛnŋ na míŋ ńʼyɛri suu san-ni ńʼdintɛ bi ma sun koŋ tɔri bira?

³⁰ Míŋ baraka bi-i Kirinŋ tɛ nufinŋ wɔ̀ bira, nfɛnŋ na koŋ tɔri i míŋ tɔli-li niŋ bira? »

³¹ Niŋ na, ábɛɛ ji nuŋ nu-a woo, á ji mwunufinŋ mwunu-na woo, á ji finŋ woo finŋ ma-a, á Kirinŋ gbɛ ǹʼbataa ra.

³² Á fa ji koŋ tɔri tenŋ ŋununli sababu u kì. Ŋì shiya tɔri woo, Yawutu i woo, nwɔ̀ri bili-i Kirinŋ na woo, á fa ji koŋ tɔri tenŋ ŋununli sababu u kì.

³³ Míŋ yɛri ki i ǹʼma-a mìŋ ɲaan ki tɛ, ŋí i koŋ bataa dintɛ bi ki ma-ni, ŋí a ńʼtenŋ wɔ nafan ki ceeli-li kì, nka míŋ i koŋ mwɔɔnna nafan ki ceeli-la, nwɔma kí i so arì mwu-i.