San Marcos 6 - San Marcos Mixteco de Coicoyán de las Flores

Kökántíxa na̱ ñuu Nazaret Jesús

¹ Ta ka̱na Jesús ñuu ikán, ra nti̱kó‑Ña̱ ñuu‑Ña̱ xíꞌin na̱ sákuaꞌa nu̱ú‑Ña̱.

² Tá ni̱xa̱a̱ ki̱í sáto̱, ki̱xáá‑Ña̱ sána̱ꞌa̱‑Ña̱ ini veꞌe ñu̱ꞌu nu̱ú ntákiꞌin táꞌan na̱ ñuu; ta kua̱ꞌá na̱ xi̱ni so̱ꞌo nta̱kutúꞌun ini‑na̱, ra ka̱chi‑na̱ saá: ―¿Ntáa chí kíꞌin‑ra̱ ña̱ sána̱ꞌa̱‑ra̱? ¿Ntáa va̱xi tu̱ꞌun ntíchi káꞌa̱n‑ra̱ xíꞌin ña̱ xítúꞌun kíxa‑ra̱?

³ ¿Á süu tia̱ káchíñu xíꞌin itún, se̱ꞌe María va kúú‑ra̱, ta ñani‑ra̱ kúú Jacobo, José, Judas xíꞌin Simón? ¿Á süu íyo tu ná ku̱ꞌva va‑ra̱ xíꞌin‑yó yóꞌo? Ta köníkuni‑na̱ kutiaa so̱ꞌo‑na̱‑Ña̱.

⁴ Ña̱ ikán ka̱chi‑Ña̱ saá xíꞌin‑na̱: ―Iin tia̱a ra̱ sáya̱ꞌa tu̱ꞌun káꞌa̱n Ntióxi̱ nu̱ú na̱ yuví, tá kúú ntiꞌi xiyo kíxa tǒꞌo‑na̱‑ra̱, suu na̱ ñuu mií‑ra̱ kökíxa tǒꞌo‑na̱‑ra̱, ra saá tu na̱ kítáꞌan xíꞌin‑ra̱ xíꞌin na̱ veꞌe‑ra̱.

⁵ Ta ikán köníkuvi kasa‑Ña̱ ña̱ xítúꞌun, suu loꞌo na̱ kúꞌvi̱ ku̱vi chi̱núú‑Ña̱ ntaꞌá‑Ña̱ sa̱tá, ra ntu̱va̱ꞌa‑na̱.

⁶ Ta nta̱kutúꞌun ini‑Ña̱ xíꞌin‑na̱, chi köníkantíxa‑na̱‑Ña̱. Ta xi̱ka‑Ña̱ ñuu válí yachin ikán nta̱kani‑Ña̱.

Xáꞌntia Jesús chiñu nu̱ú u̱xi̱ u̱vi̱ na̱ sákuaꞌa nu̱ú‑Ña̱

⁷ Ta ka̱na Jesús u̱xi̱ u̱vi̱ na̱ sákuaꞌa nu̱ú‑Ña̱, ta ta̱chíñu‑Ña̱‑na̱ tá u̱vi̱ tá u̱vi̱‑na̱, ra ta̱xi‑Ña̱ chiñu ntaꞌá‑na̱ ña̱ ná kuvi kaꞌntia‑na̱ chiñu nu̱ú ta̱chí u̱ꞌvi̱.

⁸ Ta ta̱chíñu‑Ña̱‑na̱ ná ku̱ꞌu̱n iin nta̱a̱ karróti va xíꞌin‑na̱, ra nii xi̱tá va̱ꞌa, nii leka, nii xǔꞌun ná küꞌu̱n xíꞌin‑na̱;

⁹ ná kua̱ñu̱‑na̱ nti̱xán ku̱ꞌu̱n‑na̱, suu ná küꞌu̱n ka iinka naꞌa saꞌmá xíꞌin‑na̱ ña̱ ntasa̱ma‑na̱.

¹⁰ Ta ka̱chi‑Ña̱ saá xíꞌin‑na̱: ―Ntáa mií veꞌe ná xa̱a̱‑ntó, ra ikán kinto̱o va‑ntó nta̱a̱ ná kana‑ntó míí ñuu ikán.

¹¹ Átu ntáa ñuu ná ntäkiꞌin‑na̱ ntóꞌo̱, ra ná küni so̱ꞌo‑na̱ ña̱ káꞌa̱n‑ntó, kana‑ntó ikán, ra sákisi‑ntó yáká xa̱ꞌá‑ntó, tá ku̱va ná kunta̱a̱ ini‑na̱ ña̱ väꞌa kíxa‑na̱. [Ña̱ nta̱a̱ ná ka̱ꞌa̱n‑i̱ xíꞌin‑ntó: ki̱í ná ntoꞌo ini‑na̱ xa̱ꞌá kua̱chi‑na̱, ra, loꞌo va nto̱ꞌo ini na̱ Sodoma xíꞌin na̱ Gomorra nu̱ú ka na̱ ñuu ikán.]

¹² Ta ka̱na‑na̱, ki̱xáá‑na̱ ntákani‑na̱ nu̱ú na̱ yuví ná ntantikó kava ini‑na̱ xa̱ꞌá kua̱chi‑na̱.

¹³ Ta ta̱vá‑na̱ kua̱ꞌá ta̱chí u̱ꞌvi̱ ini‑na̱, ra chi̱ka̱a̱‑na̱ síti xi̱ní kua̱ꞌá na̱ yuví kúꞌvi̱, ra ntu̱va̱ꞌa‑na̱.

Tá xáꞌní‑na̱ Juan

¹⁴ Ta xi̱ni so̱ꞌo réy Herodes xa̱ꞌá Jesús, saá chi iin níi káꞌa̱n‑na̱ xa̱ꞌá‑Ña̱, ta káchi sava‑na̱ saá: ―Nta̱tiaku Juan tia̱ sákuntiutiá ñaꞌá, ta ña̱ ikán íyo nteé‑ra̱ ña̱ va̱ꞌa kíxa‑ra̱ ña̱ xítúꞌun.

¹⁵ Iinka‑na̱ káchi saá: ―Tia̱ Elías kúú‑ra̱. Ta iinka‑na̱ káchi saá: ―Iin tia̱a tia̱ sáya̱ꞌa tu̱ꞌun káꞌa̱n Ntióxi̱ nu̱ú na̱ yuví tá ku̱va na̱ xi̱ka xi̱naꞌá kúú‑ra̱.

¹⁶ Tá xi̱ni so̱ꞌo tia̱ réy Herodes ña̱ yóꞌo, ka̱chi‑ra̱ saá: ―Tia̱ yóꞌo kúú Juan, ta yu̱ꞌu̱ kúú ra̱ xa̱ꞌntia chiñu ña̱ ná kaꞌntia‑na̱ su̱kún‑ra̱, suu nta̱tiaku‑ra̱.

¹⁷ Chi míí réy Herodes ta̱chíñu na̱ ni̱xa̱ꞌa̱n ti̱in Juan, ta ka̱tún‑na̱‑ra̱ xíꞌin kadéna ini veꞌe ka̱a̱, xa̱ꞌá ñá Herodías, ñá síꞌi Felipe, tia̱ kúú ñani réy. Chi nta̱kiꞌin‑ra̱‑ñá ntu̱u‑ñá ñá síꞌi‑ra̱,

¹⁸ ña̱ ikán ni̱ka̱ꞌa̱n Juan xíꞌin réy Herodes, káchi‑ra̱ saá: ―Küvi koo ñá síꞌi ñani‑ún xíꞌin‑ún.

¹⁹ Ta ñá Herodías ni̱sa̱á ini‑ñá xíꞌin Juan, ta ku̱ni̱‑ñá kaꞌní‑ñá‑ra̱, ta köníkuvi kaꞌní‑ñá‑ra̱,

²⁰ chi ni̱yǔꞌvi réy Herodes nu̱ú Juan, chi xíni̱‑ra̱ ña̱ kúú Juan iin tia̱a i̱í nu̱ú Ntióxi̱, ta iin tia̱a xíka ichí ntǎku, ta ña̱ ikán xi̱ntiaa‑ra̱‑ra̱. Tá xíni so̱ꞌo‑ra̱ ña̱ káꞌa̱n Juan, nii kökúnta̱a̱ ini‑ra̱, kúsi̱í ini‑ra̱ tiáa so̱ꞌo‑ra̱ ña̱ ntákani Juan.

²¹ Suu xi̱ntatu‑ñá, ra ni̱xa̱a̱ ki̱í tá ni̱xi̱nu réy Herodes kui̱ya̱‑ra̱, ta xa̱kin‑ra̱ vikó nu̱ú ka̱na‑ra̱ na̱ kúchêe íyo chiñu xíꞌin‑ra̱, xíꞌin na̱ kúchêe nu̱ú na̱ lapa, xíꞌin na̱ xi̱kua̱ꞌá nu̱ú na̱ Galilea.

²² Ta ni̱ki̱ꞌvi ñá loꞌo se̱ꞌe ñá Herodías, ta ti̱xáꞌá‑ñá, ta ku̱si̱í ini tia̱ réy xíꞌin na̱ xi̱ntee xíꞌin‑ra̱. Sá ka̱chi réy saá xíꞌin ñá loꞌo ikán: ―Ntukún na‑ña̱ kúú‑ña̱ kúni̱‑ún, ta taxi‑i̱‑ña̱ ntaꞌá‑ún.

²³ Ta chi̱naꞌá‑ra̱, káchi‑ra̱ saá: ―Ntáa mií ña̱ꞌa kúni̱‑ún, nta̱a̱ sava ña̱ íyo ntaꞌá‑i̱, taxi‑i̱ ntaꞌá‑ún.

²⁴ Ta ka̱na ñá loꞌo ikán ni̱ka̱ꞌa̱n‑ñá xíꞌin nána‑ñá: ―¿Na‑ña̱ kúú‑ña̱ ntukún‑i̱? Ta ka̱chi nána‑ñá saá: ―Xi̱ní Juan tia̱ sákuntiutiá ñaꞌá ntukún‑ún.

²⁵ Ta nti̱ku̱n ni̱ki̱ꞌvi‑ñá nu̱ú réy, ta ni̱ka̱ꞌa̱n‑ñá, káchi‑ñá saá: ―Ña̱ kúni̱‑i̱ míí tá káꞌa̱n kúú xi̱ní Juan tia̱ sákuntiutiá ñaꞌá ini iin xikóꞌó.

²⁶ Ta tia̱ réy ku̱suchí nti̱va̱ꞌa ini‑ra̱, suu xa̱ ta̱xi va‑ra̱ tu̱ꞌun‑ra̱ nu̱ú‑ñá xíꞌin na̱ ntée xíꞌin‑ra̱, ña̱ ikán köníkuvi ntikó ka yuꞌú‑ra̱ nu̱ú‑ñá.

²⁷ Ta nti̱ku̱n ta̱chíñu tia̱ réy iin tia̱a tia̱ ntiáa veꞌe ka̱a̱, ña̱ ná kixi xi̱ní Juan xíꞌin‑ra̱.

²⁸ Ta nti̱ku̱n kua̱ꞌa̱n tia̱ ntiáa ikán, ta xa̱ꞌntia‑ra̱ su̱kún Juan ini veꞌe ka̱a̱, ta ki̱xa̱a̱ xi̱ní Juan ini iin xikóꞌó xíꞌin‑ra̱, ra ta̱xi‑ra̱‑ña̱ ntaꞌá ñá loꞌo ikán, ta ñá loꞌo ikán ta̱xi‑ñá‑ña̱ ntaꞌá nána‑ñá.

²⁹ Ra ku̱nta̱a̱ ini na̱ sákuaꞌa nu̱ú Juan, ta ki̱xi‑na̱, nta̱kiꞌin‑na̱ ikí ku̱ñu̱‑ra̱, ta ni̱xa̱ꞌa̱n‑na̱ sa̱ntu̱xi̱n‑na̱‑ra̱.

Táxi Jesús xíxi u̱ꞌu̱n míl na̱ tia̱a

³⁰ Ta nta̱kiꞌin táꞌan na̱ ta̱chíñu Jesús xíꞌin‑Ña̱, ta ki̱xáá‑na̱ ntátúꞌun‑na̱ xíꞌin‑Ña̱ na‑ña̱ kúú‑ña̱ ki̱xa‑na̱ xíꞌin na‑ña̱ kúú‑ña̱ sa̱na̱ꞌa̱‑na̱.

³¹ Ra nta̱a̱ köníkuvi kuxi‑Ña̱ xíꞌin‑na̱ xa̱ꞌá ña̱ kua̱ꞌá nti̱va̱ꞌa na̱ yuví xíka nuu, na̱ va̱xi, ra na̱ kua̱ꞌa̱n, ña̱ ikán ka̱chi‑Ña̱ saá xíꞌin‑na̱: ―Naꞌa‑ntó ná ku̱ꞌu̱n mií kuití‑yó iinka xiyo nu̱ú kuvi ntakiꞌin nteé‑yó.

³² Ta ka̱na‑na̱ kua̱ꞌa̱n‑na̱ xíꞌin iin várko iinka xiyo nu̱ú köntée na̱ yuví.

³³ Suu kua̱ꞌá na̱ yuví xi̱ni ña̱ kua̱ꞌa̱n‑na̱, ta nta̱kuni‑na̱‑na̱; ña̱ ikán kua̱ꞌá na̱ ñuu xíka xa̱ꞌá‑na̱ kua̱ꞌa̱n‑na̱, ra kama ka ni̱xa̱a̱ na̱ ikán nu̱ú‑na̱.

³⁴ Tá ka̱na‑Ña̱ ini várko xi̱ni‑Ña̱ kua̱ꞌá na̱ yuví, ta ku̱ntáꞌvi ini‑Ña̱‑na̱, chi ku̱va ntikachi rí köo xitoꞌo kúú‑na̱, ta ki̱xáá‑Ña̱ sána̱ꞌa̱‑Ña̱ kua̱ꞌá ña̱ꞌa nu̱ú‑na̱.

³⁵ Tá xa̱ kua̱á, ra, ku̱yachin na̱ sákuaꞌa nu̱ú Jesús nu̱ú‑Ña̱, ta ka̱chi‑na̱ saá xíꞌin‑Ña̱: ―Köo mií ña̱ꞌa yóꞌo, ra xa̱ kua̱á kúú‑ña̱.

³⁶ Tachíñu‑na̱ ná ku̱ꞌu̱n‑na̱ ñuu xíꞌin yukú yachin nu̱ú ntée na̱ yuví tá ku̱va ná kuvi kuiin‑na̱ ña̱ꞌa kuxi‑na̱.

³⁷ Suu nta̱kuiin Jesús, káchi‑Ña̱ saá xíꞌin‑na̱: ―Taxi mií‑ntó ná kuxi‑na̱. Ta nta̱kuiin‑na̱, káchi‑na̱ saá: ―¿Á kúni̱‑ún ná ku̱ꞌu̱n‑nti̱ kuiin‑nti̱ ña̱ꞌa xíꞌin u̱vi̱ siénto denário, ra taxi‑nti̱ kuxi‑na̱?

³⁸ Ta nta̱ka̱túꞌun‑Ña̱‑na̱: ―¿Na̱xa xi̱tá va̱ꞌa níꞌi‑ntó? Kuáꞌan‑ntó kuni‑ntó. Tá ni̱xa̱ꞌa̱n‑na̱ xi̱ni‑na̱, ta ka̱chi‑na̱ saá: ―Íyo u̱ꞌu̱n xi̱tá va̱ꞌa xíꞌin u̱vi̱ tia̱ka.

³⁹ Ta ta̱chíñu‑Ña̱‑na̱ ná sántakuntee‑na̱ na̱ yuví tá tiáꞌntia tá tiáꞌntia nu̱ú itia kuîí.

⁴⁰ Ta nta̱kuntee tá tiáꞌntia tá tiáꞌntia‑na̱, tá siénto‑na̱ xíꞌin tá u̱vi̱ xiko u̱xi̱‑na̱.

⁴¹ Ta ti̱in‑Ña̱ u̱ꞌu̱n xi̱tá va̱ꞌa xíꞌin u̱vi̱ tia̱ka, ta nta̱niꞌi‑Ña̱ nu̱ú‑Ña̱ chí ntiví, ta nta̱kua̱ꞌa‑Ña̱ tixa̱ꞌvi Ntióxi̱, ta nta̱ta̱ꞌví‑Ña̱ míí xi̱tá va̱ꞌa ikán, ta ta̱xi‑Ña̱‑ña̱ ntaꞌá na̱ sákuaꞌa nu̱ú‑Ña̱ ná ntata̱ꞌví‑na̱‑ña̱ xíꞌin na̱ yuví. Ta nta̱ta̱ꞌví‑Ña̱ u̱vi̱ tia̱ka xíꞌin ntikuíi‑na̱.

⁴² Ta xi̱xi ntiꞌi‑na̱ nta̱a̱ chi̱tú ti̱xin‑na̱.

⁴³ Ta nta̱so̱kó ka xi̱tá va̱ꞌa xíꞌin tia̱ka, ra nta̱kiꞌin‑na̱ u̱xi̱ u̱vi̱ to̱ká chítú ka‑ña̱.

⁴⁴ Na̱ xi̱xi xi̱kuu u̱ꞌu̱n míl tia̱a.

Xíka Jesús nu̱ú ti̱kuíi

⁴⁵ Ta nti̱ku̱n xa̱ꞌntia Jesús chiñu nu̱ú na̱ sákuaꞌa nu̱ú‑Ña̱ ná ki̱ꞌvi‑na̱ ini várko ña̱ ná kunúú‑na̱ ku̱ꞌu̱n‑na̱ iinka xiyo yuꞌú már ñuu Betsaida, nani íntiǎyu ka‑Ña̱ na̱ yuví kua̱ꞌá.

⁴⁶ Tá nti̱ꞌi ikán, nta̱kiꞌin‑Ña̱ kua̱ꞌa̱n‑Ña̱ yukú ka̱ꞌa̱n‑Ña̱ xíꞌin Táta‑Ña̱.

⁴⁷ Tá ku̱ñǔu, várko ikán xa̱ kua̱ꞌa̱n‑tún nta̱a̱ mǎꞌñu sava már xíꞌin‑na̱, ra ntáa míí túꞌun Jesús ni̱nto̱o ikán.

⁴⁸ Ta xi̱ni‑Ña̱, u̱ꞌvi̱ kúú kua̱ꞌa̱n‑na̱, chi chí nu̱ú‑na̱ va̱xi ta̱chí nteé. Ra tá xa̱ kua̱ꞌa̱n túvi ku̱yachin Jesús nu̱ú‑na̱, xíka‑Ña̱ nu̱ú ti̱kuíi, ta ku̱ni̱‑Ña̱ ntakunúú‑Ña̱ nu̱ú‑na̱.

⁴⁹ Ta xi̱ni‑na̱‑Ña̱ xíka‑Ña̱ nu̱ú ti̱kuíi, ta ka̱ꞌán‑na̱ ña̱ íꞌna kúú‑Ña̱, ta ni̱nta̱ꞌyu̱‑na̱,

⁵⁰ chi ntikuíi‑na̱ xi̱ni‑Ña̱, ta ni̱yǔꞌvi‑na̱. Suu nti̱ku̱n ni̱ka̱ꞌa̱n Jesús xíꞌin‑na̱, káchi‑Ña̱ saá: ―¡Chika̱a̱ nteé ini‑ntó! ¡Yu̱ꞌu̱ kúú‑i̱, küyǔꞌvi‑ntó!

⁵¹ Ta nta̱a‑Ña̱ ini várko xíꞌin‑na̱, ta xi̱kui̱i̱n ta̱chí. Ta ni̱yǔꞌvi nti̱va̱ꞌa‑na̱, ra nta̱kutúꞌun ini‑na̱,

⁵² chi täꞌan ka kunta̱a̱ va̱ꞌa ini‑na̱ xa̱ꞌá xi̱tá va̱ꞌa ña̱ xi̱xi‑na̱ ikán, chi täꞌan ka ntanu̱ná nu̱ú‑na̱ ná kunta̱a̱ ini‑na̱‑ña̱.

Jesús sántuva̱ꞌa‑Ña̱ na̱ kúꞌvi̱ ñuu Genesaret

⁵³ Tá ni̱xa̱a̱‑na̱ ñuu Genesaret iinka xiyo yuꞌú már, ra ka̱tún‑na̱ várko yuꞌú ti̱kuíi ikán,

⁵⁴ ta ni̱ta̱ni̱‑na̱ ini‑tún. Ta nti̱ku̱n nta̱kuni na̱ yuví ikán Jesús,

⁵⁵ ta kama nta̱túꞌun‑na̱ xa̱ꞌá‑Ña̱ xíꞌin ntikuíi na̱ ñuu yachin, ta ki̱xáá na̱ ñuu yachin ikán kíxa̱a̱‑na̱ xíꞌin na̱ kúꞌvi̱, na̱ ntósó nu̱ú xi̱to válí, ntáa mií nu̱ú kúnta̱a̱ ini‑na̱ íyo‑Ña̱.

⁵⁶ Ta ntáa mií nu̱ú kíꞌvi‑Ña̱, á ñuu válí, á ñuu náꞌnu, á yukú, xáa̱‑na̱ ntákoo‑na̱ míí na̱ kúꞌvi̱ míí ichí ikán, ta xáku ntáꞌvi míí na̱ kúꞌvi̱ ikán nu̱ú‑Ña̱ ña̱ ná taxi kuití‑Ña̱ tutu̱vi ntaꞌá‑na̱ yuꞌú saꞌmá‑Ña̱, ta ntikuíi na̱ tu̱tu̱vi ntaꞌá Jesús, ntu̱va̱ꞌa‑na̱.