San Marcos 4 - San Marcos Mixteco de Coicoyán de las Flores

Ntákani Jesús tu̱ꞌun ña̱ táxi ku̱va xa̱ꞌá ra̱ kóꞌni ntikín válí

¹ Ta ki̱xáá tuku Jesús sána̱ꞌa̱‑Ña̱‑na̱ yuꞌú már. Ta ku̱yachin kua̱ꞌá na̱ yuví nu̱ú‑Ña̱, ña̱ ikán nta̱a‑Ña̱ ini iin várko, nta̱kuntúꞌú‑Ña̱, ra ntikuíi‑na̱ ki̱nto̱o chí yuꞌú‑rá.

² Ra xíꞌin tu̱ꞌun ña̱ táxi ku̱va ki̱xáá‑Ña̱ sána̱ꞌa̱‑Ña̱ kua̱ꞌá ña̱ꞌa nu̱ú‑na̱, ra ka̱chi‑Ña̱ saá:

³ ―¡Kuni so̱ꞌo‑ntó ña̱ yóꞌo! Iin tia̱a tia̱ káchíñu, ka̱na‑ra̱ koꞌni‑ra̱ ntikín válí.

⁴ Tá kóꞌni‑ra̱‑ña̱, íyo ña̱ ni̱ko̱yo yuꞌú ichí. Ta ni̱xa̱a̱ saa xa̱xí‑rí‑ña̱.

⁵ Sava ka ntikín válí ni̱ko̱yo‑ña̱ nu̱ú ntée yu̱ú, nu̱ú köo kua̱ꞌá ñuꞌú, ta nti̱ku̱n na̱na‑ña̱ chi kuäꞌá ñuꞌú;

⁶ suu ka̱na ni̱ka̱ntií, ra ni̱ka̱yu̱‑ña̱, chi kuäꞌá tio̱ꞌo‑ña̱, ña̱ ikán ni̱ꞌi̱chi̱‑ña̱.

⁷ Ra sava ka ntikín válí ni̱ko̱yo‑ña̱ nu̱ú íyo iñú, suu xa̱ꞌnu iñú, ra sa̱ntu̱xi̱n‑ña̱‑ña̱, ra köo ña̱ꞌa nítaxi‑ña̱.

⁸ Suu sava ka ntikín válí ni̱ko̱yo‑ña̱ nu̱ú ñuꞌú va̱ꞌa, ta na̱na‑ña̱, ra xa̱ꞌnu‑ña̱, ra ta̱xi‑ña̱ ña̱ꞌa. Íyo ña̱ ta̱xi o̱ko̱ u̱xi̱, iinka‑ña̱ ta̱xi u̱ni̱ xiko, ra iinka‑ña̱ ta̱xi iin siénto nu̱ú iin iin ntikín.

⁹ Ta ka̱chi‑Ña̱ saá xíꞌin‑na̱: ―Na̱ xíni so̱ꞌo, ná kuni va̱ꞌa so̱ꞌo‑na̱.

Na chiñu ntákani Jesús xíꞌin tu̱ꞌun ña̱ táxi ku̱va

¹⁰ Tá ki̱nto̱o mií‑Ña̱, ra míí u̱xi̱ u̱vi̱ na̱ sákuaꞌa nu̱ú‑Ña̱ xíꞌin sava ka na̱ ntée xíꞌin‑Ña̱, nta̱ka̱túꞌun‑na̱‑Ña̱ xa̱ꞌá míí tu̱ꞌun ña̱ táxi ku̱va ikán.

¹¹ Ta ka̱chi‑Ña̱ saá xíꞌin‑na̱: ―Nu̱ú ntóꞌo̱ táxi Ntióxi̱ ná kunta̱a̱ ini‑ntó ña̱ íyo sěꞌe xa̱ꞌá na̱xa ku̱va xáꞌntia‑Ña̱ chiñu, suu nu̱ú sava ka‑na̱, xíꞌin tu̱ꞌun ña̱ táxi ku̱va va sána̱ꞌa̱‑i̱ nu̱ú‑na̱.

¹² Ta saá nii na̱xa ka ná kutoꞌni‑na̱, ra ntäkuni‑na̱‑ña̱, ra nii na̱xa ka ná kutiaa so̱ꞌo‑na̱, ra künta̱a̱ ini‑na̱‑ña̱, tá ku̱va ná ntïkó‑na̱ nu̱ú Ntióxi̱, ra kükáꞌnu ini‑Ña̱ xa̱ꞌá‑na̱.

Jesús ntákani‑Ña̱ na kúú ña̱ kúni̱ káchi tu̱ꞌun ña̱ táxi ku̱va xa̱ꞌá tia̱ kóꞌni ntikín válí

¹³ Ta káchi‑Ña̱ saá xíꞌin‑na̱: ―¿Á kökúnta̱a̱ ini‑ntó xíꞌin tu̱ꞌun yóꞌo? ¿Na̱xa koo ná kunta̱a̱ ini‑ntó xíꞌin sava ka tu̱ꞌun ña̱ táxi ku̱va?

¹⁴ Tia̱ kóꞌni ntikín válí kúú ra̱ sántiu̱tia̱ tu̱ꞌun Ntióxi̱.

¹⁵ Íyo sava‑na̱ kúú‑na̱ tá ku̱va ntikín válí ni̱ko̱yo yuꞌú ichí ikán. Xíni so̱ꞌo‑na̱ míí tu̱ꞌun ikán, suu tá nti̱ꞌi xi̱ni so̱ꞌo‑na̱‑ña̱, nti̱ku̱n va̱xi ti̱miáꞌá, ra íxǐta‑rí tu̱ꞌun Ntióxi̱ ña̱ ni̱nte̱e ini‑na̱.

¹⁶ Ta iinka‑na̱ kúú‑na̱ tá ku̱va ntikín válí ña̱ ni̱ko̱yo nu̱ú ntée yu̱ú, na̱ yóꞌo kúú‑na̱ xíni so̱ꞌo tu̱ꞌun Ntióxi̱, ra nti̱ku̱n ntákiꞌin‑na̱‑ña̱, ra kúsi̱í ini‑na̱,

¹⁷ suu kökúnu tio̱ꞌo‑na̱. Ña̱ ikán kama ntíꞌi xa̱ꞌá‑na̱, chi tá va̱xi tu̱ntóꞌo á táxín‑na̱‑na̱ xa̱ꞌá tu̱ꞌun Ntióxi̱, ra kama ntákava‑na̱.

¹⁸ Ta iinka‑na̱ kúú‑na̱ tá ku̱va ntikín válí ña̱ ni̱ko̱yo nu̱ú íyo iñú, na̱ yóꞌo kúú‑na̱ xíni so̱ꞌo tu̱ꞌun Ntióxi̱,

¹⁹ suu ntíꞌi chá ka ini‑na̱ xa̱ꞌá ña̱ yúví yóꞌo, ta sántáꞌvi xǔꞌun na̱ xíꞌin kua̱ꞌá ka ña̱ꞌa kútóo‑na̱ kuu ña̱ꞌa‑na̱, ta ntikuíi ña̱ yóꞌo sántiꞌi xa̱ꞌá‑ña̱ tu̱ꞌun Ntióxi̱, ra ña̱ ikán köxáꞌnu ka‑na̱, nii köntúkua̱ꞌá ka‑na̱.

²⁰ Ta iinka‑na̱ kúú‑na̱ tá ku̱va ntikín válí ña̱ ni̱ko̱yo nu̱ú ñuꞌú va̱ꞌa. Xíni so̱ꞌo‑na̱ tu̱ꞌun Ntióxi̱, ra kántíxa‑na̱‑ña̱, ta xáꞌnu‑na̱, ra táxi‑na̱ ña̱ꞌa. Íyo‑na̱ táxi o̱ko̱ u̱xi̱, iinka‑na̱ táxi u̱ni̱ xiko, ra iinka‑na̱ táxi siénto iin iin‑na̱.

Köo ña̱ꞌa ña̱ íyo sěꞌe ña̱ ntätu̱vi

²¹ Ta ka̱chi‑Ña̱ saá xíꞌin‑na̱: ―Tá túun‑ntó iin ití, ¿á chíka̱a̱‑ntó‑tún ti̱xin iin xa̱tún á ti̱xin iin xi̱to? ¿Á süu chínúú‑ntó‑tún nu̱ú súkun ná ntaye̱ꞌe̱?

²² Saá tu kúú‑ña̱ yóꞌo, chi köo ña̱ꞌa ña̱ íyo sěꞌe ña̱ ntätu̱vi, chi ña̱ íyo sěꞌe xa̱a̱ va‑ña̱ kana‑ña̱ nu̱ú yéꞌe̱.

²³ Na̱ xíni so̱ꞌo, ná kuni va̱ꞌa so̱ꞌo‑na̱.

²⁴ Ta ka̱chi‑Ña̱ saá xíꞌin‑na̱: ―Kuni va̱ꞌa so̱ꞌo‑ntó ña̱ yóꞌo, chi na̱xa kíꞌin ku̱va‑ntó iinka‑na̱, saá kiꞌin ku̱va Ntióxi̱ ntóꞌo̱, ra chinúú ka‑Ña̱‑ña̱ nu̱ú‑ntó.

²⁵ Chi na̱ xa̱ íyo ña̱ꞌa nu̱ú kúú na̱ ni̱ꞌí ka‑ña̱, suu na̱ köo ña̱ꞌa nu̱ú, nta̱a̱ ña̱ loꞌo íyo nu̱ú‑na̱ ntuntiaa va‑ña̱.

Tu̱ꞌun ña̱ táxi ku̱va xa̱ꞌá nu̱ní

²⁶ Ta ka̱chi Jesús saá xíꞌin‑na̱: ―Soꞌo kúú xíꞌin na̱ xáꞌntia Ntióxi̱ chiñu nu̱ú, tá ku̱va kúú xíꞌin nu̱ní ña̱ chíꞌi iin tia̱a.

²⁷ Á kíxi̱‑ra̱ á ntíto‑ra̱, ñǔu ra ntuví, ntiútia̱ mií va míí itu, ta xáꞌnu‑ña̱, ta kökúnta̱a̱ ini‑ra̱ na̱xa ni̱ntiu̱tia̱‑ña̱, ra na̱xa xáꞌnu‑ña̱.

²⁸ Chi saá nu̱ú ñuꞌú xáꞌnu va itu, xina ka itu válí, tá nti̱ꞌi kána isá, tá nti̱ꞌi ntúu‑ña̱ nií.

²⁹ Tá xa̱ va̱ꞌa nií, kíxáá‑na̱ sákee‑na̱, chi xa̱ ni̱xa̱a̱ ki̱í‑ña̱.

Tu̱ꞌun ña̱ táxi ku̱va xa̱ꞌá ntikín loꞌo naní mostása

³⁰ Ta ka̱chi tuku Jesús saá xíꞌin‑na̱: ―¿Na kúú ña̱ kuvi kiꞌin ku̱va‑yó xíꞌin na̱xa ku̱va kúú xíꞌin na̱ xáꞌntia Ntióxi̱ chiñu nu̱ú? ra ¿xíꞌin ntáa tu̱ꞌun ña̱ táxi ku̱va kuvi ka̱ꞌa̱n‑i̱ xíꞌin‑ntó xa̱ꞌá ña̱ yóꞌo?

³¹ Tá ku̱va kúú xíꞌin iin ntikín loꞌo naní mostása, ña̱ chíꞌi‑na̱ nu̱ú ñuꞌú, nii na̱xa ka loꞌo‑ña̱ nu̱ú ntikuíi ntikín válí, tá chíꞌi‑na̱‑ña̱, xáꞌnu‑ña̱,

³² ta káꞌnu xáꞌnu‑ña̱ nu̱ú ntiꞌi ka ña̱ꞌa chíꞌi‑yó. Ntánti̱ka̱ ntaꞌá‑ña̱, ra nta̱a̱ saa kuvi koo‑rí nta̱tí ntaꞌá‑ña̱.

Ntákani Jesús tu̱ꞌun ña̱ táxi ku̱va nu̱ú‑na̱

³³ Xíꞌin kua̱ꞌá tu̱ꞌun ña̱ táxi ku̱va táꞌan ña̱ yóꞌo nta̱kani Jesús nu̱ú na̱ yuví, tá ku̱va ná kuvi kunta̱a̱ ini‑na̱.

³⁴ Nina tu̱ꞌun ña̱ táxi ku̱va nta̱kani‑Ña̱ nu̱ú‑na̱. Suu tá íyo mií‑Ña̱ xíꞌin na̱ sákuaꞌa nu̱ú‑Ña̱, ntákani‑Ña̱ ntiꞌi ña̱ kúni̱ kachi‑ña̱ nu̱ú‑na̱.

Xáꞌntia Jesús chiñu nu̱ú ta̱chí xíꞌin ti̱kuíi

³⁵ Tá ku̱ñǔu míí ki̱í ikán, ka̱chi Jesús saá xíꞌin na̱ sákuaꞌa nu̱ú‑Ña̱: ―Ná ku̱ꞌu̱n‑yó iinka xiyo már.

³⁶ Ta nta̱koo‑Ña̱ na̱ yuví kua̱ꞌá, ta saá káa‑Ña̱ íntúꞌú‑Ña̱ ini várko kua̱ꞌa̱n‑Ña̱ xíꞌin‑na̱. Ta saá tu kua̱ꞌa̱n kua̱ꞌá ka várko xíꞌin‑na̱.

³⁷ Ta iin ntíta ki̱xa̱a̱ ta̱chí nteé, ta ki̱xáá‑ña̱ káni ntiaa‑ña̱ várko, ta ki̱xáá chítú‑tún xíꞌin ti̱kuíi.

³⁸ Nani saá íntúꞌú nti̱xin Jesús chí kaꞌá várko kíxi̱‑Ña̱, ra íntúꞌú iin saꞌmá xi̱ní‑Ña̱. Ra nta̱niꞌi‑na̱‑Ña̱, káchi‑na̱ saá xíꞌin‑Ña̱: ―¡Mástro! ¿Á köntíꞌi ini‑ún ná kuvi̱‑yó?

³⁹ Ta nta̱káxin ini‑Ña̱, ra sa̱na̱ni‑Ña̱ ta̱chí, ta ka̱chi‑Ña̱ saá xíꞌin már: ―¡Xa̱ va̱ꞌa! ¡Koo tâxín! Ta ku̱tâxín ta̱chí, ta saá tu ti̱kuíi va.

⁴⁰ Ta ka̱chi‑Ña̱ saá xíꞌin‑na̱: ―¿Na chiñu íyǔꞌvi‑ntó? ¿Á kökántíxa ni̱ꞌi‑ntó yu̱ꞌu̱?

⁴¹ Ta ntixa nta̱a̱ ni̱yǔꞌvi‑na̱, ta ka̱chi xíꞌin táꞌan‑na̱ saá: ―¿Yoo kúú ra̱ yóꞌo nta̱a̱ ta̱chí xíꞌin ti̱kuíi kántíxa‑ña̱‑ra̱?