San Marcos 3 - San Marcos Mixteco de Coicoyán de las Flores

Iin tia̱a kúꞌvi̱ küvi sántaka̱a̱‑ra̱ ntaꞌá‑ra̱

¹ Ta ni̱ki̱ꞌvi tuku Jesús ini veꞌe ñu̱ꞌu nu̱ú ntákiꞌin táꞌan na̱ ñuu, ikán íyo iin tia̱a tia̱ kúꞌvi̱, ra̱ küvi sántaka̱a̱ iin ntaꞌá.

² Ta xi̱ntiaa na̱ fariséo Jesús, ña̱ ná kuni‑na̱ átu sántuva̱ꞌa‑Ña̱ míí ra̱ tia̱a ikán ki̱í sáto̱, ña̱ kúú ki̱í ntákiꞌin nteé, ña̱ ná kuvi chika̱a̱ kua̱chi‑na̱‑Ña̱.

³ Ta ka̱chi‑Ña̱ saá xíꞌin míí ra̱ tia̱a kúꞌvi̱ ntaꞌá ikán: ―Kuntichi, ra naꞌa mǎꞌñu yóꞌo.

⁴ Ra nta̱ka̱túꞌun Jesús na̱ ntée ikán, káchi‑Ña̱ saá: ―¿Ntáa kúú ña̱ núná nu̱ú‑yó kasa‑yó ki̱í sáto̱? ¿ña̱ va̱ꞌa á ña̱ väꞌa? ¿sáka̱ku‑yó iin na̱ yuví á kaꞌní‑yó iin‑na̱? Suu ki̱nto̱o tâxín yuꞌú ntiꞌi míí na̱ yuví ikán.

⁵ Saá ra, nta̱kue̱ꞌe̱ ini Jesús xi̱toꞌni‑Ña̱ nu̱ú ntiꞌi na̱ ntée ikán, ta ku̱suchí ini‑Ña̱ xa̱ꞌá ña̱ ntakú ini‑na̱, ta ka̱chi‑Ña̱ saá xíꞌin míí ra̱ tia̱a kúꞌvi̱ ntaꞌá ikán: ―Sántaka̱a̱ ntaꞌá‑ún. Sa̱ntaka̱a̱‑ra̱ ntaꞌá‑ra̱, ra ntu̱va̱ꞌa‑ña̱.

⁶ Ra tá ni̱ta̱ni̱ na̱ fariséo, nti̱ku̱n nta̱túꞌun táꞌan‑na̱ xíꞌin na̱ ntíku̱n réy Herodes ña̱ na̱xa koo kaꞌní‑na̱ Jesús.

Sána̱ꞌa̱ Jesús ra sántuva̱ꞌa‑Ña̱ na̱ yuví yuꞌú már

⁷ Ta Jesús xíꞌin na̱ sákuaꞌa nu̱ú‑Ña̱, kua̱ꞌa̱n‑na̱ yuꞌú már, ta kua̱ꞌá nta̱a̱ na̱ yuví Galilea ni̱nti̱ku̱n‑na̱‑Ña̱. Saá tu na̱ Judea,

⁸ na̱ Jerusalén, na̱ Idumea, na̱ iinka xiyo itia Jordán, na̱ ntée yachin Tiro xíꞌin Sidón, ra tá ku̱nta̱a̱ ini ntikuíi‑na̱ xa̱ꞌá ña̱ va̱ꞌa kíxa‑Ña̱, ki̱xa̱a̱‑na̱ nu̱ú‑Ña̱.

⁹ Ta ka̱chi Jesús xíꞌin na̱ sákuaꞌa nu̱ú‑Ña̱ ña̱ ná koo tu̱ꞌva iin várko, tá ku̱va ná kütiáꞌni náꞌa na̱ yuví nu̱ú‑Ña̱,

¹⁰ chi kua̱ꞌá na̱ kúꞌvi̱ sa̱ntuva̱ꞌa‑Ña̱, xa̱ꞌá ña̱ ikán kúú‑ña̱ kua̱ꞌá ka na̱ kúꞌvi̱ ki̱xa̱a̱ nu̱ú‑Ña̱ ná tutu̱vi ntaꞌá‑na̱‑Ña̱.

¹¹ Tá xíni ta̱chí u̱ꞌvi̱ Ña̱, ntákantee‑ña̱ nu̱ú‑Ña̱, ta káchi‑ña̱ saá xíꞌin‑Ña̱: ―¡Yóꞌo̱ kúú Se̱ꞌe Ntióxi̱!

¹² Ta xáꞌntia Jesús chiñu nu̱ú ta̱chí u̱ꞌvi̱ ña̱ ná käꞌa̱n‑ña̱ yoo kúú míí Jesús.

Ntáka̱xin Jesús u̱xi̱ u̱vi̱ na̱ sákuaꞌa nu̱ú‑Ña̱

¹³ Tá nti̱ꞌi, nta̱a Jesús yukú, ta ka̱na‑Ña̱ na̱ kúni̱ mií‑Ña̱, ta ni̱xa̱a̱‑na̱ nu̱ú‑Ña̱.

¹⁴ Ta nta̱ka̱xin‑Ña̱ u̱xi̱ u̱vi̱‑na̱ tá ku̱va ná kaka tuun‑na̱ xíꞌin‑Ña̱, ta ta̱xi‑Ña̱ chiñu ntaꞌá‑na̱ ná ntakani‑na̱ tu̱ꞌun‑Ña̱,

¹⁵ ra saá tu ná kuvi [sántuva̱ꞌa‑na̱ na̱ kúꞌvi̱,] ra tavá‑na̱ ta̱chí u̱ꞌvi̱.

¹⁶ Na̱ yóꞌo kúú míí u̱xi̱ u̱vi̱ na̱ nta̱ka̱xin‑Ña̱: Simón tia̱ chi̱ka̱a̱‑Ña̱ ki̱ví Pedro;

¹⁷ tia̱ Jacobo xíꞌin ñani‑ra̱ Juan, na̱ se̱ꞌe Zebedeo, na̱ ni̱ka̱ꞌa̱n‑Ña̱ “Boanerges” xíꞌin, ña̱ kúni̱ kachi “Se̱ꞌe ña̱ ntáꞌyu̱ sa̱ví”;

¹⁸ tia̱ Andrés, tia̱ Felipe, tia̱ Bartolomé, tia̱ Mateo, tia̱ Tomás, tia̱ Jacobo, se̱ꞌe Alfeo; tia̱ Tadeo, tia̱ Simón ra̱ cananísta,

¹⁹ xíꞌin ra̱ Judas Iscariote, tia̱ ntaxǐko Jesús nu̱ú ntíꞌi.

Chíka̱a̱ kua̱chi‑na̱ Jesús ña̱ ntáka̱a̱ ta̱chí u̱ꞌvi̱ ini‑Ña̱

²⁰ Ta ki̱xa̱a̱ Jesús iin veꞌe, ta nta̱kiꞌin táꞌan tuku na̱ yuví kua̱ꞌá, ra nta̱a̱ köníkuvi kuxi‑Ña̱ xíꞌin na̱ sákuaꞌa nu̱ú‑Ña̱.

²¹ Tá xi̱ni so̱ꞌo na̱ veꞌe‑Ña̱ xa̱ꞌá ña̱ kíxa‑Ña̱, ra nta̱ntukún‑na̱‑Ña̱, ña̱ ná nu̱ꞌu̱‑Ña̱ xíꞌin‑na̱, chi ka̱ꞌán‑na̱ ña̱ sána kúú‑Ña̱.

²² Ta na̱ sána̱ꞌa̱ léy Ntióxi̱ ña̱ nta̱koo Moisés na̱ ke̱e Jerusalén, ka̱chi‑na̱ saá xa̱ꞌá‑Ña̱: ―Beelzebú, rí kúchêe nu̱ú ta̱chí u̱ꞌvi̱, ntáka̱a̱ ini‑ra̱, ra xa̱ꞌá rí ikán va tává‑ra̱ ta̱chí u̱ꞌvi̱.

²³ Tá nti̱ꞌi ka̱na Jesús na̱, ra nta̱kani‑Ña̱ nu̱ú‑na̱ xíꞌin tu̱ꞌun ña̱ táxi ku̱va, káchi‑Ña̱ saá: ―¿Á kuvi tavá ti̱miáꞌá mií‑rí kěꞌe?

²⁴ Átu na̱ yuví iin ñuu ná ntata̱ꞌví‑na̱, ra kani táꞌan xíꞌin táꞌan‑na̱, küvi kuntee‑na̱.

²⁵ Ta átu iin na̱ veꞌe ná ntata̱ꞌví‑na̱, ra kani táꞌan xíꞌin táꞌan‑na̱, küvi kuntee‑na̱.

²⁶ Ta átu míí ti̱miáꞌá ná kani táꞌan‑rí xíꞌin ña̱ ntíku̱n‑rí, ra küvi koo‑rí, chi ntiꞌi nteé‑rí.

²⁷ ’Nii iin‑na̱ küvi ki̱ꞌvi veꞌe iin tia̱a ntakú ntukuíꞌná‑na̱ ña̱ꞌa‑ra̱, átu xina ka ná kätún‑na̱‑ra̱, chi saá ví kúú‑ña̱ kuvi ntukuíꞌná‑na̱ ña̱ꞌa veꞌe‑ra̱.

²⁸ ’Ña̱ nta̱a̱ ná ka̱ꞌa̱n‑i̱ xíꞌin‑ntó: kukáꞌnu ini Ntióxi̱ xa̱ꞌá kua̱chi, ntikuíi ña̱ ná kasa iin na̱ yuví xíꞌin ntikuíi tu̱ꞌun väꞌa ná ka̱ꞌa̱n‑na̱ xa̱ꞌá‑Ña̱.

²⁹ Suu ntáa‑na̱ ná ka̱ꞌa̱n väꞌa xa̱ꞌá Espíri̱tu̱ I̱í Ntióxi̱, ra kükáꞌnu ini Ntióxi̱ xa̱ꞌá kua̱chi ikán ntiꞌi saá tiémpo, chi iin saá kuiso va‑na̱‑ña̱.

³⁰ Ña̱ yóꞌo kúú ña̱ ni̱ka̱ꞌa̱n Jesús, chi ka̱chi‑na̱ saá: “Ta̱chí u̱ꞌvi̱ ntáka̱a̱ ini‑ra̱”.

¿Yoo kúú nána Jesús xíꞌin ñani‑Ña̱?

³¹ Ta ni̱xa̱a̱ nána Jesús xíꞌin na̱ ñani‑Ña̱, ta ki̱nto̱o‑na̱ chí kěꞌe, ra ta̱chíñu‑na̱ chiñu ña̱ ná kixi‑Ña̱ nu̱ú‑na̱.

³² Ta íntúꞌú‑Ña̱ mǎꞌñu na̱ yuví kua̱ꞌá, ta ni̱xa̱a̱ chiñu nu̱ú‑Ña̱: ―Nána‑ún xíꞌin na̱ ñani‑ún íyo‑na̱ chí kěꞌe, ta ntúkún‑na̱ yóꞌo̱.

³³ Ta nta̱kuiin‑Ña̱, káchi‑Ña̱ saá xíꞌin‑na̱: ―¿Yoo kúú nána‑i̱, ra yoo kúú na̱ ñani‑yu̱?

³⁴ Ta xi̱toꞌni‑Ña̱ nu̱ú ntikuíi na̱ ntée ikán, káchi‑Ña̱ saá: ―Na̱ ntée yóꞌo kúú nána‑i̱ xíꞌin na̱ ñani‑yu̱,

³⁵ chi ntikuíi na̱ kántíxa ña̱ kúni̱ Ntióxi̱, na̱ ikán kúú ñani‑i̱ xíꞌin ku̱ꞌva‑i̱ xíꞌin nána‑i̱.