San Marcos 12 - San Marcos Mixteco de Coicoyán de las Flores

Sána̱ꞌa̱ Jesús xíꞌin tu̱ꞌun ña̱ táxi ku̱va xa̱ꞌá na̱ kökúni̱ ñaꞌá

¹ Tá nti̱ꞌi, ki̱xáá Jesús sána̱ꞌa̱‑Ña̱ xíꞌin tu̱ꞌun ña̱ táxi ku̱va, ka̱chi‑Ña̱ saá: ―Ni̱xi̱yo iin tia̱a, ra̱ sa̱nte̱e kua̱ꞌá tún úva, ra nta̱kasi‑ra̱ nu̱ú íyo‑tún; ta sa̱va̱ꞌa‑ra̱ iin nu̱ú tavá‑ra̱ tiá úva, saá tu sa̱va̱ꞌa‑ra̱ iin veꞌe súkun ná kuntiaa‑ra̱ nu̱ú íyo‑tún. ’Ta tá nti̱ꞌi, ta̱xi too‑ra̱ ñuꞌú úva ntaꞌá na̱ kachíñu xíꞌin úva ikán ná kachíñu‑na̱ nu̱ú‑ña̱, suu chaꞌvi‑na̱ xa̱ꞌá‑ña̱ nu̱ú‑ra̱, ra saá nta̱kiꞌin‑ra̱ kua̱ꞌa̱n‑ra̱.

² Tá ni̱xa̱a̱ míí ki̱í kaꞌntia‑na̱‑rí, ra ta̱chíñu‑ra̱ iin ra̱ káchíñu nu̱ú‑ra̱ nu̱ú míí na̱ káchíñu xíꞌin úva ikán ña̱ ná chaꞌvi‑na̱ ña̱ níká‑na̱ nu̱ú‑ra̱.

³ Suu ti̱in‑na̱ ra̱ tia̱a ikán, ra ka̱ni‑na̱‑ra̱, ra ta̱chíñu‑na̱‑ra̱ ná ntikó‑ra̱ nu̱ú ki̱xi‑ra̱, suu nii iin ña̱ꞌa könítaxi‑na̱ ntaꞌá‑ra̱.

⁴ Ta ta̱chíñu‑ra̱ iinka ra̱ káchíñu nu̱ú‑ra̱, ra̱ yóꞌo sa̱takue̱ꞌe̱‑na̱ xi̱ní, ra ni̱ka̱ꞌa̱n väꞌa‑na̱ xíꞌin‑ra̱.

⁵ Ra ta̱chíñu‑ra̱ iinka‑ra̱, ra̱ yóꞌo xa̱ꞌní‑na̱. Ra ta̱chíñu‑ra̱ kua̱ꞌá ka‑na̱, ra sava‑na̱ ka̱ni‑na̱, ra iinka‑na̱ xa̱ꞌní‑na̱.

⁶ ’Ntáa iin nta̱a̱ se̱ꞌe‑ra̱ ki̱nto̱o, tia̱ kúni̱ va̱ꞌa‑ra̱. Ra nu̱ú ntíꞌi ta̱chíñu‑ra̱‑ra̱ nu̱ú‑na̱, ka̱ꞌán‑ra̱ saá: “Se̱ꞌe‑i̱, ra kasa tǒꞌo‑na̱‑ra̱.”

⁷ Suu na̱ káchíñu xíꞌin úva ikán ka̱chi xíꞌin táꞌan‑na̱ saá: “Ra̱ yóꞌo kúú ra̱ kinto̱o ntiꞌi ña̱ꞌa yóꞌo ntaꞌá. Ná kaꞌní‑yó‑ra̱, ra ná nto̱o ntiꞌi‑ña̱ ntaꞌá‑yó.”

⁸ Ra ti̱in‑na̱‑ra̱, ra xa̱ꞌní‑na̱‑ra̱, ta sa̱kána‑na̱‑ra̱ chí sa̱tá ñuꞌú úva ikán.

⁹ ’Ra, ¿na‑ña̱ kúú‑ña̱ kasa míí ra̱ xitoꞌo ñuꞌú ikán? Ntikó‑ra̱, sántiꞌi xa̱ꞌá‑ra̱ na̱ káchíñu xíꞌin úva ikán, ra taxi‑ra̱‑ña̱ ntaꞌá iinka‑na̱.

¹⁰ ’¿Á köníkaꞌvi‑ntó Tu̱ꞌun Ntióxi̱?, ña̱ káchi: Yu̱ú ña̱ ku̱ntasí na̱ sáva̱ꞌa veꞌe, ni̱xa̱a̱‑ña̱ ntu̱u‑ña̱ ña̱ tíin iin níi saá míí veꞌe.

¹¹ Xitoꞌo‑yó ka̱chi ña̱ saá ná koo‑ña̱, ra ntákutúꞌun ini‑yó xíꞌin‑ña̱.

¹² Ra ku̱nta̱a̱ ini na̱ kúchêe nu̱ú na̱ judío ña̱ xa̱ꞌá mií‑na̱ ni̱ka̱ꞌa̱n Jesús xíꞌin tu̱ꞌun ña̱ táxi ku̱va yóꞌo, ra ntu̱kún‑na̱ xiyo nu̱ú tiin‑na̱‑Ña̱, suu ni̱yǔꞌvi‑na̱ nu̱ú na̱ yuví kua̱ꞌá, ra nta̱koo‑na̱‑Ña̱, ra nta̱kiꞌin‑na̱ kua̱ꞌa̱n‑na̱.

Xítontosó‑na̱ Jesús á kuvi chaꞌvi‑na̱ nu̱ú César

¹³ Ta ta̱chíñu‑na̱ sava na̱ fariséo xíꞌin na̱ ntíku̱n réy Herodes nu̱ú Jesús ná sántakava‑na̱‑Ña̱ xíꞌin ña̱ ntakuiin‑Ña̱,

¹⁴ ra tá ni̱xa̱a̱‑na̱, ta ka̱chi‑na̱ xíꞌin‑Ña̱: ―Mástro, xíni̱‑nti̱ tia̱ nta̱a̱ kúú‑ún, ra köntáa‑ún xa̱ꞌá ña̱ káꞌán nii iin‑na̱, chi iin nu̱ú kúú ntiꞌi va‑na̱ nu̱ú‑ún, ra ña̱ nta̱a̱ va sána̱ꞌa̱‑ún ichí Ntióxi̱. ¿Á ntútaꞌan chaꞌvi‑yó ña̱ ntúkún César? ¿Á chaꞌvi‑yó á chäꞌvi‑yó?

¹⁵ Suu Jesús, xíni̱‑Ña̱ ña̱ síín ña̱ káꞌa̱n‑na̱, ra síín ña̱ kíxa‑na̱, ra nta̱kuiin‑Ña̱: ―¿Na chiñu kúni̱‑ntó sántakava‑ntó yu̱ꞌu̱? Taxi‑ntó iin xǔꞌun ña̱ denário ná kuni‑yu̱.

¹⁶ Ta ki̱xa̱a̱ xǔꞌun xíꞌin‑na̱ nu̱ú‑Ña̱, ra ka̱chi‑Ña̱ saá: ―¿Yoo nǎꞌna kúú ña̱ yóꞌo, ra yoo ki̱ví kúú‑ña̱ íyo yóꞌo? Ta ka̱chi‑na̱ saá xíꞌin‑Ña̱: ―Ña̱ César.

¹⁷ Ta ka̱chi Jesús saá: ―Taxi‑ntó ña̱ꞌa César ntaꞌá César, ra taxi‑ntó ntaꞌá Ntióxi̱ ña̱ꞌa Ntióxi̱. Ra nta̱kutúꞌun ini‑na̱ xíꞌin‑Ña̱.

Ntáka̱túꞌun‑na̱ xa̱ꞌá ña̱ ntatiaku na̱ yuví

¹⁸ Tá nti̱ꞌi, ku̱yachin sava na̱ saduséo nu̱ú Jesús, na̱ káchi ña̱ köntátiaku na̱ yuví, ra nta̱ka̱túꞌun‑na̱‑Ña̱, káchi‑na̱ saá:

¹⁹ ―Mástro, Moisés tia̱a‑ra̱ nu̱ú mií‑yó átu ntáa iin tia̱a ni̱xi̱ꞌi̱, ra ni̱nto̱o ñá síꞌi‑ra̱, ra köníxi̱yo se̱ꞌe‑ra̱ xíꞌin‑ñá, ra ntúxá ntakiꞌin iin ñani‑ra̱ ñá síꞌi‑ra̱, ra ná koo se̱ꞌe ñani‑ra̱ xíꞌin‑ñá.

²⁰ Ni̱xi̱yo u̱xa̱ ñani. Ra̱ tia̱a nuú ki̱ꞌin‑ra̱ ñá síꞌi‑ra̱, ra ni̱xi̱ꞌi̱‑ra̱, ra köníxi̱yo se̱ꞌe‑ra̱ xíꞌin‑ñá,

²¹ ta ra̱ u̱vi̱ ta̱nta̱ꞌá‑ra̱ xíꞌin ñá ki̱nto̱o ntáꞌvi, suu ni̱xi̱ꞌi̱ tu ra̱ ikán. Nii ra̱ ikán köníxi̱yo se̱ꞌe xíꞌin‑ñá, ta ra̱ u̱ni̱ saá nto̱ꞌo tu ra̱ ikán va,

²² ra ni̱xi̱yo‑ñá xíꞌin u̱xa̱ saá‑na̱, suu nta̱a̱ nii iin‑na̱ köníxi̱yo se̱ꞌe xíꞌin‑ñá, ra nta̱a̱ nu̱ú ntíꞌi ni̱xi̱ꞌi̱ tu mií va‑ñá.

²³ Tá ná ntatiaku‑na̱, ¿yoo ñá síꞌi kuu‑ñá, chi ñá síꞌi u̱xa̱ saá‑na̱ xi̱kuu‑ñá?

²⁴ Ra nta̱kuiin Jesús, káchi‑Ña̱ saá: ―Ntó sáka̱ kúú‑ntó xa̱ꞌá ña̱ kökúnta̱a̱ ini‑ntó Tu̱ꞌun Ntióxi̱ nii nteé‑Ña̱.

²⁵ Chi ná ntatiaku na̱ yuví, ra köo ka‑na̱ tanta̱ꞌá, chi kuu‑na̱ tá ku̱va na̱ ángel na̱ íyo ntiví.

²⁶ Suu xa̱ꞌá ña̱ ntatiaku na̱ ni̱xi̱ꞌi̱: ¿á köníkaꞌvi‑ntó ña̱ tia̱a Moisés ña̱ ni̱ka̱ꞌa̱n Ntióxi̱ xíꞌin‑ra̱ nuú tún iñú káyu̱ ikán? Ntióxi̱ ka̱chi‑Ña̱ xíꞌin ra̱ Moisés: “Yu̱ꞌu̱ kúú Ntióxi̱ Ña̱ ntákaꞌán tia̱ Abraham, Isaac xíꞌin Jacob.”

²⁷ Süvi Ntióxi̱ na̱ ni̱xi̱ꞌi̱, chi Ntióxi̱ na̱ tiáku kúú‑Ña̱. Ntóꞌo̱, ra, kua̱ꞌá sáka̱‑ntó.

Ña̱ xáꞌntia Ntióxi̱ ña̱ káꞌnu ka nu̱ú ntiꞌi‑ña̱

²⁸ Tá xi̱ni so̱ꞌo iin na̱ sána̱ꞌa̱ léy Ntióxi̱ ña̱ nta̱koo Moisés ña̱ ka̱chi Jesús xíꞌin sava ka na̱ ikán, ra nta̱kuni‑ra̱ ña̱ va̱ꞌa nta̱kuiin Jesús yuꞌú‑na̱, ra ku̱yachin‑ra̱ nu̱ú‑Ña̱ ná ntaka̱túꞌun‑ra̱‑Ña̱, káchi‑ra̱ saá: ―¿Nu̱ú ntikuíi ña̱ xáꞌntia Ntióxi̱ nu̱ú‑yó, ntáa kúú ña̱ káꞌnu ka nu̱ú ntiꞌi‑ña̱?

²⁹ Ta nta̱kuiin Jesús, káchi‑Ña̱ saá: ―Ña̱ káꞌnu ka nu̱ú ntiꞌi‑ña̱ kúú: “Kutiaa so̱ꞌo, ñuu Israel, Xitoꞌo‑yó Ntióxi̱ iin nta̱a̱ kúú‑Ña̱.

³⁰ Kuni̱‑ún Xitoꞌo‑ún Ntióxi̱ xíꞌin ntikuíi ínima̱‑ún, xíꞌin ntikuíi ini‑ún, xíꞌin ntikuíi ña̱ ntákani ini‑ún, xíꞌin ntikuíi nteé‑ún.”

³¹ Ta ña̱ ntíku̱n kúú: “Kuni̱‑ún na̱ ñani táꞌan‑ún tá ku̱va kúni̱‑ún mií‑ún.” Köo iinka ña̱ káꞌnu ka nu̱ú ña̱ yóꞌo.

³² Ta míí ra̱ ikán ka̱chi‑ra̱ saá: ―Va̱ꞌa ka̱chi‑ún, Mástro. Ña̱ nta̱a̱ káꞌa̱n‑ún, iin nta̱a̱ míí túꞌun kúú Ntióxi̱, ra köo iinka‑Ña̱.

³³ Ta ña̱ kuni̱‑yó Ntióxi̱ xíꞌin ntikuíi ínima̱‑yó, xíꞌin ntikuíi ini‑yó, xíꞌin ntikuíi ña̱ ntákani ini‑yó, xíꞌin ntikuíi nteé‑yó, xíꞌin ña̱ kuni̱‑yó na̱ ñani táꞌan‑yó, yaꞌvi chá ka ña̱ ikán nu̱ú ña̱ sókó‑yó kití nu̱ú Ntióxi̱ xíꞌin ntikuíi ka ña̱ꞌa ña̱ sókó‑yó nu̱ú‑Ña̱.

³⁴ Ta tá xi̱ni so̱ꞌo Jesús va̱ꞌa nta̱kuiin‑ra̱, ka̱chi‑Ña̱ saá xíꞌin‑ra̱: ―Köxíka íyo‑ún ña̱ ná kaꞌntia Ntióxi̱ chiñu nu̱ú‑ún. Tá nti̱ꞌi, nii iin ka‑na̱ köníxa̱a̱ nteé ini ntaka̱túꞌun‑na̱‑Ña̱.

¿Yoo se̱ꞌe kúú Cristo?

³⁵ Ta sána̱ꞌa̱ Jesús ini nu̱ú íyo Veꞌe Ñu̱ꞌu Káꞌnu, ta káchi‑Ña̱ saá: ―¿Á kúnta̱a̱ ini‑ntó na kúú‑ña̱ kúni̱ kachi na̱ sána̱ꞌa̱ léy Ntióxi̱ ña̱ nta̱koo Moisés xa̱ꞌá Cristo, Ña̱ tachíñu Ntióxi̱ kixi sáka̱ku na̱ yuví, tá káꞌa̱n‑na̱ ña̱ se̱ꞌe David kúú‑Ña̱?

³⁶ Espíri̱tu̱ I̱í Ntióxi̱ ta̱xi tu̱ꞌun ña̱ ni̱ka̱ꞌa̱n David, káchi‑ra̱ saá: Ka̱chi Xitoꞌo‑yó xíꞌin Xitoꞌo‑i̱, “Kuntúꞌú koo̱ xiyo kuáꞌa‑i̱, Nta̱a̱ ná koyo‑yu̱ na̱ väꞌa xíni xíꞌin‑ún ti̱xin xa̱ꞌá‑ún.”

³⁷ ’Ta átu míí David káꞌa̱n “Xitoꞌo‑i̱” xíꞌin‑Ña̱, ra ntakani ini‑ntó tá káꞌa̱n na̱ sána̱ꞌa̱ léy Ntióxi̱ ña̱ nta̱koo Moisés ña̱ kúú‑Ña̱ se̱ꞌe David. Ta míí na̱ yuví kua̱ꞌá ikán xi̱ni so̱ꞌo‑na̱‑Ña̱, ra ku̱tóo‑na̱ na̱xa káꞌa̱n‑Ña̱.

Káꞌa̱n Jesús xa̱ꞌá na̱ sána̱ꞌa̱ léy Ntióxi̱ ña̱ nta̱koo Moisés

³⁸ Ta sána̱ꞌa̱‑Ña̱ káchi‑Ña̱ saá: ―Kuénta koo‑ntó xíꞌin na̱ sána̱ꞌa̱ léy Ntióxi̱ ña̱ nta̱koo Moisés, chi kútóo‑na̱ kuntixi va̱ꞌa‑na̱, ta kútóo‑na̱ ná ka̱ꞌa̱n tǒꞌo na̱ yuví xíꞌin‑na̱ tá xíka‑na̱ nu̱ú ya̱ꞌvi,

³⁹ ta kútóo‑na̱ kuntee‑na̱ nu̱ú ntée na̱ xi̱kua̱ꞌá ini veꞌe ñu̱ꞌu, saá tu kútóo‑na̱ ña̱ xina mií‑na̱ kuxi.

⁴⁰ Ta ntákiꞌin‑na̱ ntiꞌi ña̱ꞌa ná síꞌi ntôo ntáꞌvi. Ta xa̱ꞌá ña̱ kútóo‑na̱ kinto̱o va̱ꞌa‑na̱, naꞌá káꞌa̱n‑na̱ xíꞌin Ntióxi̱ nu̱ú na̱ yuví kua̱ꞌá. Xa̱ꞌá ña̱ yóꞌo kua̱ꞌá ka sántoꞌo Ntióxi̱ ini‑na̱.

Xǔꞌun sókó ñá ni̱nto̱o ntáꞌvi

⁴¹ Íntúꞌú Jesús nu̱ú táán‑na̱ xǔꞌun ña̱ sókó‑na̱, ta xítoꞌni‑Ña̱ na̱xa táán na̱ yuví xǔꞌun ini xa̱tún ikán. Ta kua̱ꞌá na̱ kuíka kua̱ꞌá xǔꞌun táán‑na̱.

⁴² Suu ni̱xa̱a̱ iin ñá ntáꞌvi ñá ni̱xi̱ꞌi̱ ií, ta chi̱ka̱a̱‑ñá u̱vi̱ xǔꞌun válí ña̱ loꞌo ya̱ꞌvi.

⁴³ Ta ka̱na Jesús na̱ sákuaꞌa nu̱ú‑Ña̱, ta ni̱ka̱ꞌa̱n‑Ña̱ xíꞌin‑na̱: ―Ña̱ nta̱a̱ káꞌa̱n‑i̱ xíꞌin‑ntó: Ñá ntáꞌvi yóꞌo, kua̱ꞌá ka chi̱ka̱a̱‑ñá nu̱ú ntiꞌi ka na̱ ni̱so̱kó xǔꞌun,

⁴⁴ chi ntikuíi‑na̱ chi̱ka̱a̱‑na̱ ña̱ ntôo nu̱ú va‑na̱. Suu ñá ntáꞌvi yóꞌo ñá kúntáꞌvi kúú‑ñá, ra chi̱ka̱a̱‑ñá ntiꞌi ña̱ níꞌi‑ñá, ña̱ xíniñúꞌu‑ñá kutiaku‑ñá.