San Marcos 11 - San Marcos Mixteco de Coicoyán de las Flores

Kíꞌvi Jesús Jerusalén

¹ Tá kua̱ꞌa̱n kúyachin‑na̱ Jerusalén, ta ni̱ya̱ꞌa‑na̱ chí ñuu Betfagé xíꞌin ñuu Betania, ra xíꞌin nu̱ú yukú naní Olivo, ta̱chíñu Jesús u̱vi̱ na̱ sákuaꞌa nu̱ú‑Ña̱,

² ta ka̱chi‑Ña̱ saá xíꞌin‑na̱: ―Kuáꞌan‑ntó ñuu loꞌo íyo nu̱ú ña̱á, ra tá xa̱ ná xa̱a̱‑ntó kuni‑ntó núꞌni iin vurru loꞌo, rí täꞌan ka ntaa nii iin‑na̱ sa̱tá, ra ntaxín‑ntó‑rí ná kixi‑rí xíꞌin‑ntó.

³ Ta átu ntáa‑na̱ káꞌa̱n xíꞌin‑ntó: “¿Na chiñu ntáxín‑ntó‑rí?”, ta kachi‑ntó saá xíꞌin‑na̱: “Xitoꞌo‑yó xíniñúꞌu‑rí, ra tá nti̱ꞌi sántikó‑Ña̱‑rí.”

⁴ Tá ni̱xa̱a̱‑na̱, ra nta̱ni̱ꞌí‑na̱ míí vurru loꞌo núꞌni‑rí iin yéꞌe ña̱ íyo káyu ikán, ra nta̱xín‑na̱‑rí.

⁵ Ra sava na̱ íyo ikán, ni̱nta̱ka̱túꞌun‑na̱‑na̱: ―¿Na chiñu ntáxín‑ntó‑rí?

⁶ Ta nta̱kuiin‑na̱ tá ku̱va ni̱ka̱ꞌa̱n Jesús xíꞌin‑na̱, ra ta̱xi‑na̱ kua̱ꞌa̱n‑na̱.

⁷ Ta ni̱xa̱a̱‑rí xíꞌin‑na̱ nu̱ú Jesús, ta chi̱núú‑na̱ saꞌmá nâní ña̱ ntósó sa̱tá saꞌmá‑na̱ sa̱tá‑rí, ra nta̱a Jesús sa̱tá‑rí.

⁸ Kua̱ꞌá‑na̱ sa̱ka̱a̱‑na̱ míí saꞌmá nâní‑na̱ ichí, ta iinka‑na̱ sa̱ka̱a̱ ntaꞌá itún, ña̱ xa̱ꞌntia‑na̱ yukú.

⁹ Ra tá ku̱va na̱ kua̱ꞌa̱n chí nu̱ú xíꞌin na̱ kua̱ꞌa̱n chí sa̱tá kúsi̱í ini‑na̱, ra ntáꞌyu̱‑na̱, káchi‑na̱ saá: ―¡Hosána! ¡Ña̱ ma̱ní Ntióxi̱ ná koo xíꞌin Ña̱ va̱xi chiñu Xitoꞌo‑yó!

¹⁰ Iin réy tá ku̱va táta‑yó David, va̱xi‑Ña̱ ná kaꞌntia‑Ña̱ chiñu nu̱ú‑yó xíꞌin ña̱ ma̱ní Ntióxi̱. ¡Hosána, ná ntasa káꞌnu‑yó Ntióxi̱ nta̱a̱ ntiví!

¹¹ Tá ni̱ki̱ꞌvi Jesús Jerusalén nta̱kiꞌin‑Ña̱ kua̱ꞌa̱n‑Ña̱ chí ini nu̱ú íyo Veꞌe Ñu̱ꞌu Káꞌnu. Nta̱kutoꞌni‑Ña̱ ntikuíi xiyo, ra tá nti̱ꞌi, nta̱kiꞌin‑Ña̱ kua̱ꞌa̱n‑Ña̱ ñuu Betania xíꞌin na̱ u̱xi̱ u̱vi̱ sákuaꞌa nu̱ú‑Ña̱, saá chi xa̱ kua̱á kúú‑ña̱.

Káꞌa̱n väꞌa Jesús xa̱ꞌá tún o̱ko̱ u̱xi̱

¹² Ta iinka ki̱í, tá ka̱na‑na̱ ñuu Betania, xíꞌi̱ Jesús sǒko.

¹³ Ta xi̱ni‑Ña̱ íntichi iin tún o̱ko̱ u̱xi̱ nu̱ú xíka, ta íyo yu̱ku̱ ntaꞌá‑tún, ta ni̱xa̱ꞌa̱n‑Ña̱ xi̱ni‑Ña̱ átu íyo kui̱ꞌi ntaꞌá‑tún. Suu tá ni̱xa̱a̱‑Ña̱ nu̱ú íyo‑tún, köo ña̱ꞌa níntani̱ꞌí‑Ña̱; yu̱ku̱ kuití va nta̱ni̱ꞌí‑Ña̱, saá chi süvi yo̱ó kúún‑rí kúú‑ña̱.

¹⁴ Ta ni̱ka̱ꞌa̱n‑Ña̱ xíꞌin‑tún, káchi‑Ña̱ saá: ―Nii iin ka‑na̱ ná käxí kui̱ꞌi ntaꞌá‑ún. Ta xi̱ni so̱ꞌo na̱ sákuaꞌa nu̱ú‑Ña̱ ña̱ ni̱ka̱ꞌa̱n‑Ña̱.

Tává Jesús na̱ íxǐko ini nu̱ú íyo Veꞌe Ñu̱ꞌu Káꞌnu

¹⁵ Ra tá ni̱xa̱a̱‑na̱ Jerusalén, ni̱ki̱ꞌvi‑Ña̱ ini nu̱ú íyo Veꞌe Ñu̱ꞌu Káꞌnu, ta ki̱xáá‑Ña̱ tává‑Ña̱ na̱ íxǐko xíꞌin na̱ xíín, ta sa̱ntuva‑Ña̱ mésa nu̱ú sáma‑na̱ xǔꞌun xíꞌin nu̱ú íxǐko‑na̱ saa sa̱ta,

¹⁶ ta könítaxi‑Ña̱ ya̱ꞌa‑na̱ xíꞌin ña̱ꞌa míí ini nu̱ú íyo Veꞌe Ñu̱ꞌu Káꞌnu.

¹⁷ Ta ki̱xáá‑Ña̱ sána̱ꞌa̱‑Ña̱ nu̱ú‑na̱, káchi‑Ña̱ saá: ―¿Á süu saá káchi Tu̱ꞌun Ntióxi̱: “Veꞌe‑i̱, ra, ‘veꞌe nu̱ú káꞌa̱n na̱ yuví ntiꞌi ñuu ña̱ yúví xíꞌin‑i̱’ kunaní‑ña̱?” suu ntóꞌo̱, nta̱sa‑ntó‑ña̱ “nu̱ú ntásěꞌe na̱ kuíꞌná.”

¹⁸ Ta xi̱ni so̱ꞌo na̱ su̱tu̱ xi̱kua̱ꞌá, ra saá tu na̱ sána̱ꞌa̱ léy Ntióxi̱ ña̱ nta̱koo Moisés ña̱ ka̱chi‑Ña̱, ta nta̱túꞌun táꞌan‑na̱ na̱xa kaꞌní‑na̱‑Ña̱, chi ni̱yǔꞌvi‑na̱ nu̱ú‑Ña̱, saá chi ntikuíi na̱ yuví nta̱kutúꞌun ini na̱xa ku̱va sána̱ꞌa̱‑Ña̱.

¹⁹ Ra tá xa̱ kua̱á, ka̱na Jesús kua̱ꞌa̱n‑Ña̱ xíꞌin na̱ sákuaꞌa nu̱ú‑Ña̱ míí ñuu ikán.

Tún o̱ko̱ u̱xi̱ íchi

²⁰ Tá naꞌa, ni̱ya̱ꞌa Jesús xíꞌin na̱ sákuaꞌa nu̱ú‑Ña̱, ta xi̱ni‑na̱ míí tún o̱ko̱ u̱xi̱ ña̱ ni̱ꞌi̱chi̱ nta̱a̱ tio̱ꞌo‑tún.

²¹ Ta nta̱ku̱ꞌun ini Pedro, ra ka̱chi‑ra̱ saá xíꞌin Jesús: ―Mástro, kutoꞌni: ni̱ꞌi̱chi̱ tún o̱ko̱ u̱xi̱ ni̱ka̱ꞌa̱n väꞌa‑ún xa̱ꞌá.

²² Ta nta̱kuiin Jesús, káchi‑Ña̱ saá: ―Kantíxa‑ntó Ntióxi̱.

²³ Ña̱ nta̱a̱ ná ka̱ꞌa̱n‑i̱ xíꞌin‑ntó: Átu iin‑na̱ ná ka̱ꞌa̱n xíꞌin xi̱kí yóꞌo: “Kutiaꞌa ña̱á, ta sákána mií‑ún ini már”, ta ná chïka̱a̱ u̱vi̱ ini‑na̱ chi ná kantíxa‑na̱ ña̱ kuu ña̱ ni̱ka̱ꞌa̱n‑na̱, ra kuu va‑ña̱.

²⁴ Ña̱ ikán káꞌa̱n‑i̱ xíꞌin‑ntó: Kantíxa‑ntó ña̱ ni̱ni̱ꞌí‑ntó ntikuíi ña̱ ntúkún‑ntó tá xíka̱ ta̱ꞌví‑ntó nu̱ú Ntióxi̱, ta ni̱ꞌí‑ntó‑ña̱,

²⁵ ta tá káꞌa̱n‑ntó xíꞌin Ntióxi̱, kukáꞌnu ini‑ntó xa̱ꞌá na̱ kíxa ña̱ väꞌa xíꞌin‑ntó, ña̱ ná kuvi kukáꞌnu ini Táta‑ntó Ña̱ íyo ntiví xa̱ꞌá kua̱chi mií‑ntó.

²⁶ [Suu átu ntóꞌo̱ ná kükáꞌnu ini‑ntó xa̱ꞌá na̱ kíxa ña̱ väꞌa xíꞌin‑ntó, nii Táta‑ntó Ña̱ íyo ntiví kükáꞌnu ini‑Ña̱ xa̱ꞌá kua̱chi‑ntó].

¿Yoo ta̱xi chiñu ntaꞌá Jesús?

²⁷ Ra ni̱xa̱a̱ tuku‑na̱ Jerusalén, tá nani xíka nuu‑Ña̱ ini nu̱ú íyo Veꞌe Ñu̱ꞌu Káꞌnu, ku̱yachin na̱ su̱tu̱ xi̱kua̱ꞌá xíꞌin na̱ xi̱kua̱ꞌá nu̱ú na̱ ñuu, ra saá tu na̱ sána̱ꞌa̱ léy Ntióxi̱ ña̱ nta̱koo Moisés,

²⁸ ta ni̱nta̱ka̱túꞌun‑na̱‑Ña̱, káchi‑na̱ saá xíꞌin‑Ña̱: ―¿Yoo kúú‑ún ña̱ kíxa‑ún ña̱ yóꞌo? ¿Yoo kúú‑na̱ ta̱xi chiñu ntaꞌá‑ún ña̱ kíxa‑ún ña̱ yóꞌo?

²⁹ Ta nta̱kuiin Jesús, káchi‑Ña̱ saá: ―Suu iin nta̱a̱‑ña̱ ná ntaka̱túꞌun‑yu̱ ntóꞌo̱, ra ntakuiin‑ntó, ta ntatúꞌun‑i̱ xíꞌin‑ntó yoo kúú‑na̱ ta̱xi chiñu ntaꞌá‑i̱ ña̱ kíxa‑i̱ ña̱ yóꞌo.

³⁰ ¿Yoo ta̱chíñu Juan ná sákuntiutiá‑ra̱ na̱ yuví? ¿Ntióxi̱ á na̱ yuví? Ntakuiin‑ntó.

³¹ Ra ki̱xáá ntátúꞌun táꞌan mií‑na̱, káchi‑na̱ saá: ―Átu ná ntakuiin‑yó ña̱ Ntióxi̱ ta̱chíñu ra̱, ra ntakuiin‑ra̱: “¿Na chiñu köníkantíxa‑ntó‑ra̱?”

³² Suu küvi kachi‑yó: “Na̱ yuví” ... Saá chi ni̱yǔꞌvi‑na̱ nu̱ú na̱ ñuu, chi ntikuíi‑na̱ ka̱ꞌán ña̱ Juan ntixa kúú tia̱a tia̱ sa̱ya̱ꞌa tu̱ꞌun káꞌa̱n Ntióxi̱ nu̱ú na̱ yuví.

³³ Ta nta̱kuiin‑na̱, káchi‑na̱ saá: ―Xïni̱‑nti̱. Ra ka̱chi Jesús saá xíꞌin‑na̱: ―Ra nii yu̱ꞌu̱ käꞌa̱n‑i̱ xíꞌin‑ntó yoo ta̱xi chiñu ntaꞌá‑i̱ ña̱ kíxa‑i̱ ña̱ yóꞌo.