1 Batesalonika 1 - Indagano Inyaaya mu-Chijita

Obhukeesya

¹ Inyarubha inu, niikaamire anye Pawuro, niri aamwi na Sirwano na Timoteewo. Echibhakaamira emwe bhanu muri mw‑ikanisa rinu riri mu‑musi gwa Tesaroonike, emwe bhanu mwikirisiisye Raata Nyamuwanga na Raatabhugenyi Yeesu Kirisito. Obhwitiriranya na omurembe bhibhe aamwi na emwe.

Obhurame na eriikirisya rya Abhatesaroonike

² Echisiima Nyamuwanga bhuri rusuku inguru yeemwe bhoone na chitakuyigwa okubhasabhirwa.

³ Bhunu echibhasabhirwa ku‑Nyamuwanga Raata weeswe, echiichuka imbere yaaye, emirimu jeemwe jinu omukora mu‑riikirisya. Echiichuka okukomeera kwemwe kunu okuruubhana na eryenda ryemwe, ka wone, okwigumiirisya kwemwe kunu okuruubhana na obhwiyikanyo bhwemwe bhwa okusubha rindi Raatabhugenyi Yeesu Kirisito.

⁴ Mbe, emwe abhayiri bheeswe, bhanu mwenderwe na Nyamuwanga, echimenya ati, omwene abhasorere okubha abhaana bhaaye.

⁵ Echimenya kutyo, kwa okubha omwanya gunu ꞉chaabharaasisiisye Emisango ja Ekisi inguru ya Yeesu, ꞉chitaabharaasisiisye emisango era. Tari okuraasya kweswe, ꞉kwaruubheene na ebhiruguusyo bhinu bhyakorwaga na Mwoyo Mweru. ꞉Chaaraasiisye chimenyere kisi ati, emisango ejo ni ja echimari. Emwe abheene mumenyere kutyo chaariga chiri aamwi na emwe, korereki chibhasakire.

⁶ Emwe noorwo kutyo ꞉mwanyaasiibhwe muno inguru ya eriikirisya ryemwe, ꞉mwaruubhire omusango ogwo kwa rikonderwa rinu ꞉mwayaanirwe na Mwoyo Mweru. Kwa okukora kutyo, ꞉mwaruubhire echijekekanyo cheeswe na echa Raatabhugenyi Yeesu.

⁷ Kurwa ejo, noorwo emwe mwabheeye echijekekanyo cha ekisi, ku‑bheekirisya bhoone bha mu‑mukoowa gwa Makedooniya na ogwa Akaaya.

⁸ Okusookana na emwe, abhaanu ꞉bhoonguuwe Emisango ja Ekisi inguru ya Raatabhugenyi Yeesu. Itari ku‑bhaanu bha Makedooniya na Akaaya era, tari eriikirisya ryemwe ku‑Nyamuwanga rimenyekeene bhuri rubhaara. Kurwa ejo, eswe chitakunyaaka okubhwira abhaanu inguru ya eriikirisya ryemwe.

⁹ Abhaanu abho abhatonda kutyo ꞉mwachikumire na kutyo ꞉mwasigire okuramya amasusano geemwe, nimuyinduka, nimuramya Nyamuwanga omuwanga na owa echimari.

¹⁰ Wone abhatonda kutyo omurindirira Omwana waaye, asubhe rindi okusooka mu‑rwire. Oyo niwe Nyamuwanga ꞉aasuuruuye okusooka mu‑bhafuuwe. Niwe Yeesu unu kaachichungura okusooka mu‑ndamu ya Nyamuwanga inu eyiija.