Shawlumon A Mahkawn Ga 2 - Jinghpaw Hanson Version Bible

Tsaw

¹ Ngai chyawm gaw, Sharun pa na mari pan, Kadit hkan e tu ai hkalaw pan sha, rai nga nngai.

Tsawra Ai Wa

² Nye nja jan gaw, ju singwum e tu ai hkalaw pan zawn, shayi chyinghkawn ni a ka-ang e, dan nga ai.

Tsaw

³ Ngai tsawra ai wa mahtang, maling e tu ai lwi dwi hpun zawn, Brang sek ni a ka-ang e, dan nga ai. Ngai gaw shi a shingnip kata e ngwipyaw let dung nga nna, De a asi gaw nye a n-gup hta dwi nga ai.

⁴ Shi gaw, poi galaw ai nta hta ngai hpe jashawn nna, Nye ntsa na dawnghkawn gaw, sumtsaw sumra rai nga ai.

⁵ Ngai gaw sumtsaw sumra hte machyi nngai majaw, Ngai hpe tsabyi si hte shadaw, lwi dwi si hte shapyaw.

⁶ Shi a pai lata nye a baw npu e tawn nna, Shi a hkra lata ngai hpe ginshum u ga.

⁷ Yerusalem a shayi chyinghkawn ni e, Tsawra ai myit, shi hkrai n pru yang, Dai hpe hkum jasu, hkum jahprang mu yaw, Ngu nna, nam na ashu ashan ni hte chyahkyi ni hpe dum let, Ngai nanhte hpe htet da nngai law.

⁸ Ngai tsawra wa a nsen law! Yu u, shi du ra ai: Bum ni hpe shi gumtawng lai nna, Kawng ni hpe shingtawt lai nga ai.

⁹ Ngai tsawra ai wa gaw, chyahkyi yan shat krang la hte bung nga ai; Yu u, shi gaw anhte a bunghku shinggan de tsap nga ai: Hkuwawt hku mada yu let, Hkinji hku azi yu nga ai.

¹⁰ Ngai tsawra ai wa shaga nna, ngai hpe tsun ai gaw: Nye a nja jan e, nye tsawm htap ai num e, Rawt nna sa wa su.

¹¹ Yu u, nshung ta lai sai, Marang mung hpawng nna lamu san sai.

¹² Pa hkan e nampan pu sai; U ni kashai ai aten mung, du ra ai: An a ga hta hkrudu tut du ai nsen mung, na lu sai.

¹³ Lakum hpun gaw tsit ai si hpe shamyin nu ai; Tsabyi ru ni mung pu pu nna, Ngwipyaw bat shamawng ma ai. Nye nja jan e, nye tsawm htap ai num e, Rawt nna sa wa su.

Tsawra Ai Wa

¹⁴ Bum na lungbra ni hte, nhkap hkan e shanu nga ai, Nye a hkrudu e: Na a myi man ngai mu lu n ga, Na a nsen ngai na lu n ga; na a nsen ngwipyaw nga ai; Na a myi man mung, hpraw tsawm nga ai.

¹⁵ Tsabyi ru ni hpe jahten ai nam gwi ni hte, Nam gwi hkalung ni hpe, an a matu rim la mu: An a tsabyi ru ni gaw apu pu masai, nga ai.

Tsaw

¹⁶ Ngai tsawra ai wa gaw, nye a rai nga ai, Ngai mung shi a rai nga nngai. Shi gaw hkalaw pan prang e sagu ni hpe shayaw nga ai.

¹⁷ Ngai tsawra ai wa e, shani nhtoi garai n katsi ai hte, Shingnip shingna garai n hkoi mat yang, Kayin nna, Behtera bum ntsa e nga ai, Chyahkyi hte shat krang la zawn, tai nga u.