KASA 12 - Jinghpaw Hanson Version Bible

Htawng Kaw Na Petru Mauhpa Lawt Lu Ai Lam

¹ Dai aten hte yang, Herod hkawhkam gaw, Hpung masha nkau mi hpe zingri zingrat na dakan nga ai.

² Shing rai, Yawhan a kahpu Yaku hpe htau kau wu ai.

³ Dai lam Yuda ni yu kabu ai mu jang, Petru hpe mung rim la shayan wu ai. Dai aten gaw Azuma poi rai nga ai.

⁴ Ya Shalai wa poi lai jang she, mung masha ni hpe shapraw ya na myit da wu ai majaw, shi hpe rim la ngut yang htawng hta bang da nhtawm, shi hpe sin nga na matu, hpyen hpung mali a lata de ap ya mu ai.

⁵ Shing rai Petru htawng hta rawng nga ai; Hpung masha ni chyawm gaw shi a matu mara Karai Kasang kaw akroi anoi akyu hpyi ma ai.

⁶ Herod gaw shi hpe shapraw la na a shawng shana e, Petru gaw hpri sumri lahkawng gyit nna, hpyen ma lahkawng lapran e yup nga ai: sin langa ni mung, htawng chyinghka e sin nga ma ai.

⁷ Shaloi, yu u, Madu a kasa langai mi pru tsap nna, dai gawk hta nhtoi htoi nga ai: shi gaw Petru a garep gumhpuk ya nna, “Alawan rawt u,” ngu nna jasu wu ai; shaloi hpri sumri ni mung shi a lata na malaw mat lu ai.

⁸ Bai lamu kasa gaw, “Shingkyit kyit nna, kyepdin din u,” ngu wu ai. Shi mung galaw wu ai. Bai, “Na nba lawai nna ngai kaw hkan rit,” ngu wu ai.

⁹ Shaloi shi pru nna hkan nang nga ai; rai timung, lamu kasa shabyin ai amu dai hpe gaja wa re ai, shi n chye nna, shingran rai nga ai, ngu nna myit nga ai.

¹⁰ Ya shan gaw sin ai shara gap padu lahkawng lai nna, mare de pru ai hpri chyinghka du jang, chyinghka dai mung shi chyu hpaw mat wa ai rai nna, shan pru nhtawm, mare lam langai mi hta hkan sa wa nna, lamu kasa gaw, shaloi jang shi hte hka mat wa ai.

¹¹ Ya Petru myit arai la lu jang, Madu gaw shi a lamu kasa shangun dat nna, Herod a lata hte Yuda masha ni myit mada ai lam yawng hta na ngai hpe shaw la sai gaw, ya ngai teng teng chye se ai, nga nna,

¹² dai lam myit aru ngut jang, masha tsawmra wa hpawng nna, akyu hpyi nga ai shara, Marku mying hkawt mying ai, Yawhan a kanu Mari a nta de du wa ai.

¹³ Shing rai dai wang chyinghka wa akawk wu yang, Rode mying ai num kasha langai mi, madat yu na nga pru sa ai.

¹⁴ Shi gaw Petru a nsen re ai chye jang, kabu ai majaw chyinghka n hpaw ya ai sha, nhku de gat shang wa nna, “Petru gaw chyinghka lam e tsap nga ai,” ngu nna tsun dan wu ai.

¹⁵ Shanhte chyawm gaw, “Nang mana ndai,” shi e ngu mu ai. Shi mahtang, “gaja wa rai nga ai,” nga nna a tsun shanang nga ai. Bai shanhte gaw, “Shi a lamu kasa rai nga lu ai,” nga ma ai.

¹⁶ Rai timung, Petru gaw a akawk nga ai rai nna, shanhte hpaw la mu yang, shi hpe mada yu nna, mau mahka nga ma ai.

¹⁷ Shi gaw, shanhte hpe tsin mu ga nga nna, lata dingsi nhtawm, shi hpe Madu e htawng hta na kaning rai shaw la ai lam shanhte hpe tsun dan nna, “Ndai lam ni Yaku hte kahpu kanau ni hpe tsun shana dat mu,” ngu mu ai. Shaloi shi pru nna, shara kaga de sa mat wa ai.

¹⁸ Ya nhtoi htoi yang hpyen masha ni gaw, Petru hta hpa byin ai n chye ma ai majaw, grai ruk rak bu ma ai.

¹⁹ Herod chyawm gaw Petru hpe tam nna nmu jang, sin langa ni hpe gawn yu nhtawm, shanhte hpe sat kau na lam dawdan nga ai. Dai hpang shi gaw Yuda mung nna Kesare mare de yu wa nna nga nga ai.

Herod Si Ai Lam

²⁰ Dai hte yang hkawhkam wa gaw Turu hte Sidun masha ni hpe grai pawt bu da wu ai; dai rai nna, shanhte gaw myit langai sha hte shi hpang de sa nna, Blastu ngu ai, shi a kun hkringmang wa kaw sa hpa let, majan htinglu na lam sa hpyi ma ai: kaning rai nme law, shanhte a mung mahtang hkawhkam a mung na, lusha shahpa lu la ma ai.

²¹ Shaloi, madat da ai shani hta e, Herod gaw hkawhkam hpun palawng sumli nna, tingnyang hta dung let, shanhte hpe ga dan dat mu ai.

²² Shaloi mung masha ni gaw, “Ndai gaw shinggyim masha nsen n rai, Karai Wa a nsen she rai nga ai,” nga nna jahtau ma ai.

²³ Dai shaloi jang, Karai Kasang a hpung shingkang hpe n tau yu wu ai majaw, Madu a lamu kasa shi hpe ari jaw nna, byet e sha ai hte shi nsa hti mat ai.

²⁴ Dai Madu a mungga chyawm gaw galu kaba wa nna, maden jat wa sai.

²⁵ Barnaba yan Shawlu gaw, shan a galaw daw ai amu hpe ngut jang, Marku ngu ai Yawhan hpe shaga la nhtawm, Yerusalem mare na bai wa ma ai.