HPAJI NINGLI 6 - Jinghpaw Hanson Version Bible

¹ Bai, jan a npu e nga ai, yak la ai amu langai mi ngai mu nngai: dai gaw masha ni a ntsa e li la nga ai:

² Karai Kasang gaw masha langai mi hpe aja gumhpraw, sutgan hte arawng sadang jaw ya nna, shi myit masin ra mara lu ai hte hpa n kadawn timung, dai hpe sha na ahkang, Karai Kasang n jaw ai majaw, maigan wa langai mi shang sha nga ai: dai mung kaman lila hte jung ai ana rai nga ai.

³ Masha wa gaw shaning law law hkrung nga lu nna, kasha latsa shaprat timung, shi a myit masin gaw ngamu ngamai n hkam la lu ai hte, makoi mayang n hkrum ai si wa rai yang, san mat ai nbya gaw shi hta grau kaja nga ai, ngu nna ngai tsun nngai:

⁴ Kaning rai nme law, san mat ai shinggyim hkum gaw, kaman dan pru nna, nsin de lai mat ai hte, de a amying gaw nsin hta makoi magap da nga ai;

⁵ Dai hta kaga, dai gaw jan hpe n mu lu ai hte, hpa mung n chye nga ai; rai timung, dai gaw shawng na wa hta grau ban sa lu nga ai:

⁶ Gaja wa shi gaw shaning hkying mi hkrung shagup nga lu timung, ngamu ngamai n hkam la lu ai rai yang, hpalam la a ta? Yawng mayawng gaw shara mi de sha du na ma ai, n rai ni?

⁷ Makan shakut ai yawng gaw kan a matu sha rai nga timung, sha mayu ai myit gaw hkru kat hkraw ai n rai.

⁸ Dai rai yang, hpaji rawng ai wa gaw, angawk ai wa hta hpa akyu grau rawng a ta? Masha ni a arawn alai pyi chye hkan ai matsan mayan wa mahtang, hpa akyu lu la a ta?

⁹ Tinang myi e nan mu lu ai akyu gaw, lawhpa myit hta grau kaja nga ai; dai mung kaman lila hte nbung shachyut ai hkrai rai nga ai.

¹⁰ Moi na byin mabyin hpe, chyaloi nhkoi shamying da ngut sai; masha wa gaw hpa wa rai nga ai hpe moi nna chye chyalu rai nga ai; shi gaw shi hta grau kaba ai wa hpe mara shagun lu ai n rai.

¹¹ Kaman lila jat ai lam law nga ai rai nna, masha gaw hpa akyu rawng a ta?

¹² Masha gaw, shi kaman lila hkrung nga ai prat tup, shingnip zawn lai mat wa sayang, shi a matu kaja nga ai lam hpa re ai, kadai chye lu a ta? Jan a npu e htawm hpang de hpa byin na ra ai lam, shi hpe kadai tsun lu a ta?