1 KORINHTU 2 - Jinghpaw Hanson Version Bible

¹ Ngai chyawm gaw, hpunau ni e, nanhte kaw sa du jang, Karai Kasang a sung htum ai ga nanhte hpe tsun dan ai shaloi, reng ai ningtam hte hpaji byeng-ya hte ngai sa du nngai n rai.

² Kaning rai nme law, Yesu Hkristu hte shi a wudang jen da ai lam hta kaga, ngai nanhte a man e hpa mung n chye dum na, ngu nna ngai myit da se ai.

³ Bai, ngai gaw, gawng kya ai hte, hkrit kamyin nna hkrit gari ai law law hte, nanhte hte rau nga nga nngai rai nna,

⁴ nanhte a makam masham gaw, masha a hpaji byeng-ya hte n rai,

⁵ Karai Kasang a atsam hte sha grin nga lu u ga, nye a aga hte nye a hkaw dan ai gaw, shalen chye ai hpaji byeng-ya ningtam n nang ai sha, Wenyi hte atsam rawng ai sakse lam rai nga ai.

Wenyi Kaw Na Hpaji Byeng-ya

⁶ Rai timung, anhte gaw kup tsup ai ni hpe hpaji byeng-ya tsun dan ga ai: ndai mungkan ga na hpaji byeng-ya n rai; ndai mungkan ga na hten bya nga ma ai du ni a hpaji byeng-ya mung n re ai sha,

⁷ makoi magap da ai hte, ginding aga garai n lat kaw nna, anhte a hpung shingkang a matu mara Karai Kasang san tawn da ai, Karai Kasang a hpaji byeng-ya hpe, sung htum ai ga hte anhte tsun dan ga ai.

⁸ Ndai hpaji gaw, ndai mungkan ga na kadai du ni mung, n chye ma ai; chye taw gaw, hpung shingkang rawng ai Madu hpe shanhte wudang hta n jen da na ma ai.

⁹ Shing rai, ka da nga ai hte maren, “Myi e n mu, na hte n na yu nna, Masha myit hta n hkawn pru ai lam, Karai Kasang gaw shi hpe tsawra ai ni a matu mara lajang da ai hpa rai timung,” anhte tsun dan ga ai.

¹⁰ Karai Kasang chyawm gaw, Wenyi a lata hte ndai lam hte hpe anhte kaw shapraw shadan dan mi ai: kaning rai nme law, dai Wenyi gaw Karai Kasang a sung htum ai kaw du hkra, yawng mayawng hte hpe manaw yu nga ai.

¹¹ Masha hta rawng ai wenyi sha n rai yang gaw, masha hte seng ai hte hpe kadai wa chye lu a ta? Dai hte maren, Karai Kasang a Wenyi sha n rai yang gaw, Karai Kasang hte seng ai hte hpe gade ai mung n chye lu nga ai.

¹² Anhte chyawm gaw mungkan ga a wenyi hpe hkam la saga ai n rai; Karai Kasang e anhte hpe jaw da ai chyeju hpe anhte chye lu u ga, Karai Kasang kaw na Wenyi hpe anhte hkam la saga ai:

¹³ dai chyeju a lam, masha a hpaji ga sharin ai hku hte maren anhte tsun dan ga ai n rai; Wenyi sharin ai hku hte maren anhte tsun dan ga ai: Wenyi hte seng ai lam hte hpe, Wenyi hte seng ai ga hte anhte shapraw shadan ga ai.

¹⁴ Myi na ta naw re ai shinggyim masha gaw, Karai Kasang a Wenyi hte seng ai lam hte hpe hkam la lu ai n rai, dai hte gaw shi a matu angawk angak rai nga ai rai nna, Wenyi myit e sha dai hte hpe jeyang lu ai re ai majaw, shi gaw dai hte hpe chye na lu ai n rai.

¹⁵ Wenyi rawng ai wa chyawm gaw yawng mayawng hte hpe jeyang lu nga ai; shi hpe mahtang gaw kadai rai timung jeyang ya lu ai n rai.

¹⁶ Kaning rai nme law, dai Madu hpe sharin achyin ya lu u ga, shi a amyit hpe kadai chye ga nga a ta? Anhte chyawm gaw Hkristu a amyit rawng nga ga ai.