Ŋɡɑlɑ̂t 5 - Kɑɑ Fí

Kɔɔ pʉʉ pɛn nzʉʉ ḿbɛ́m ŋkwɑɑ

¹ Kɛlístɔ kɑ zɑ́Ꞌ ŋkʉ-puꞋ lɔ́ŋ pɛkŋɛ nɛpɔ́ yi pɛkŋɛ ɡʉ ḿbɔ́ pʉɔ pi pɔ́p tsuŋ ńduk kwɑɑ-nɛpʉ́ʉ. Pɔ́Ꞌɔ lɑ́, pʉʉ kúꞋlɛ nînɑ́ nɛpɔ́ sʉ́Ꞌnɛ, ḿbɑ́ɑ nɛpɛn ḿbɛ́m yɛcɔ́ yúu pɛn ńdɔk wʉ́ʉ ŋ́ɡɛ pɛkwɑɑ.

² Mɔ Pɔ̂l, tsʉ́Ꞌnɛ ɛ sẅíi wʉ́ʉ. Pʉʉ lɑɑ ḿbíkŋɛ ŋɡɔ pɛ́ púꞋ wʉ́ʉ, lɑ pʉʉ pɔ́ pʉɔ-Sɛ́, mbɔ yúu mi Kɛlístɔ kɑ ɡɛnɛ mbíꞋ tú yʉ́ʉ kɛ́ pɛn cẅɛ́lɛ́ wʉ́ʉ nǔu yɛcɔ́ yúu pɔ́.

³ Mɔ ḿbɛn ńcú nǔu yɛcɔ́ ŋkɑ́ mbɔ̌ mbɑ wɛ́tɛ́ ŋu lɑ́ ẅí ɛ́ píkŋɛ ŋɡɔ pɛ́ púꞋ wɛ́, ŋɡɔ ɑ ɡẅɛɛ nɛɡɛ yúu tsʉʉ yi nɛpʉ́ʉ-Mɔ̌sɛ̂ɛ sɛ́ ḿbíkŋɛ.

⁴ Pʉʉ pi pʉʉ sɛ́ ńdɔɔ nɛɡɛ yúu mi nɛpʉ́ʉ ɛ̂nɑ́ sɛ́ ḿbíkŋɛ lɑ́ ńdɔk ŋ́kuꞋ pʉɔ pi pɔ́p mbi Sɛ́ ḿbɔ́ ndʉ́ŋndʉŋ lɑ́, pʉʉ pɑ́Ꞌɑ ńdɔk ḿbɔ́ pʉɔ pí pʉʉ fɑknɛ mbʉʉ nǔu Kɛlístɔ. Ɛ́ pɔ́ pɔ́Ꞌɔ pʉʉ lɔk ḿbɛ́ nu yi Sɛ́ lɑ́Ꞌ ḿbɔ́ ŋ́ɡʉ ńdɔk ŋ́ɡɑ́ fuꞋ fɛ̌ɛ yʉ́ʉ.

⁵ Ɛ́ ɡʉ nǔu pɛk pi pɛk zɑ́pnɛ tʉ́m nǔu Kɛlístɔ, pɛk sɛ́ ńzúꞋ nu pɔ mbɔ̌ Zẅikŋɛ Lɛ́ɛnɛ́nɛ, ɛ́ sɛ́ ŋ́ɡɛ pɛk pɔ́ ńzẅíꞋlɛ ŋɡɔ Sɛ́ ŋ́ɡɛ ŋ́ɡɛ pɛk pɔ́ pʉɔ pi pɔ́p mbi yɛ́ ḿbɔ́ ndʉ́ŋndʉŋ.

⁶ MbíꞋŋɡɔ ŋu lɑɑ ńdɑt mbʉʉ nǔu Kɛlístɔ, mbɔ pɛ́ kɛ́ púꞋ wɛ́ pɔ́, kɛ nɛnɑ́ kɛ́ púꞋ wɛ́ ɔɔ, mbɔ ɛ́ kɑ́ pɔ́ yɛcɔ́ nu pɔ́. Nɛzɑ́p tʉ́m nǔu Kɛlístɔ ḿbɛn ŋ́kɔŋ pʉɔmɛsɔŋ pɔ́nɛ nu.

⁷ Pʉʉ kɑ pɔ́ ŋ́ɡʉ nɛ́ mbi kwɑꞋ sʉ́Ꞌnɛ, wɔ̌ tɔꞋ wʉ́ʉ nɛpɛn ńzúꞋ nu yi ɛ́ nɛ́nẅín ńtík ku nǔu?

⁸ Ẅîwɑ́ ɡwɛ́tnɛmbɔp ẅí pɛ́ kɑ sẅíinɛ wʉ́ʉ tɛ pʉʉ pɛ́m, ɛ́ ŋ́kɑɑ ḿbɔ́ fú mbɔ̌ Sɛ́ ẅí ɑ sɛ́ ɛ́fúŋ wʉ́ʉ pɔ́.

⁹ Pʉʉ lɑɑ ḿbɑ́ɑ kɛpɔŋ ɛ́ cẅɛt kɔ́ɔtɛ ẅí ɑ sɛ́ ńdɔɔ nɛnɑ́ŋ.

¹⁰ Lɑ́ Tsɑpʉɔ kɛ́ ḿbɔ́ ŋ́ɡɛ n jí ŋɡɔ pʉʉ kɛ́ kẅiꞋ yɛcɔ́ yúu nǔu yúu mi ŋ kɑ zíꞋnɛ wʉ́ʉ pɔ́. M bɛn ḿbɔ́ ńjí ŋɡɔ ŋu ẅí ɑ sɛ́ ḿmɑꞋ ntɑkŋɛ tsɛtsɛt pʉʉ, ɑ lɑɑ ḿbɔ́ pɔ wɔ̌ lɑ́ ɔɔ, mbɔ Sɛ́ ɡʉ ŋ́ɡɛ ńzɑ́Ꞌ ntsɑŋ yɛ́.

¹¹ Pɔ́ɔpɛ́mɑ́ pɑ́ɑ, mɔ pɛ́Ꞌnɛ ḿbɛn ḿbɔ́ ɛ́sɑ́Ꞌ ŋɡɔ pʉɔ ɡɛ pɛ́ púꞋ wɔ́p, pɑyúdɑ pɛn ŋ́kʉ́ʉnɛ wɑ́ɑ pɔ mɛlɑ́Ꞌ kʉ̈ɔ́? Mbɔ nɛpɔ́ ẅí Kɛlístɔ kɑ pfúnɛ nǔu tʉ́ mbɑ́ŋtɛ pɑ́ŋtɛ́nɛ kɑ́ pɛn ŋ́ɡɑ́ɑnɛ wɔ́p pɔ́.

¹² Ɛ́ ɡʉ nǔu pʉɔ pi pɔ́p púunɛ́nɛ wʉ́ʉ nǔu nu nɛpúꞋ ŋu, pɔ́p lɔk nu yɔ́p ŋ́ɡʉ mbi, kwɑꞋ pɔ́p shɔtnɛ́nɛ ɛ́shʉ̈ɔ́ túmbʉʉ yɔ́p.

¹³ Pɔ́ɔpɛ́mɑ́ pɑ́ɑ, ɛ́ ɡʉ nǔu pʉʉ, mbɔ Sɛ́ kɑ fúŋnɛ wʉ́ʉ pɑ́Ꞌ pʉʉ ɡʉ ńduk kwɑɑ-nɛpʉ́ʉ. Lɑ Kɔɔ pʉʉ lɛɛtɛ nǔu, ŋ́ɡɛ yúu mi mbʉʉ yʉʉ sɑ́Ꞌnɛ wʉ́ʉ pʉʉ ɡɛ. Tɛ ńtsʉ́Ꞌ pɔ́Ꞌɔ, pʉʉ ɡɛ ŋkɔŋɛ pɔ́ tsɛtsɛt pʉʉ, pʉʉ cẅɛ́lɛ́ mɛmbʉʉ mʉ́ʉ.

¹⁴ MbíꞋŋɡɔ nu yi ɛ́ kútnɛ mɛtú mɛnu mi ɛ́ tsɛt nɛpʉ́ʉ cú ŋɡɔ: Kɔŋ mɔ́ɔmɑ́ wu ŋumɛsɔŋ pɑ́Ꞌ túmbʉʉ yú.

¹⁵ Lɑ́ ḿbɔ́ yi pʉʉ lɑɑ ḿbɔ́ ŋ́ɡɛ pɑ́Ꞌ mɛnɑɑ tɛt ḿbɔ́ ńnɛ́mtɛ mɛmbʉʉ mʉ́ʉ ńníꞋ mɛfʉ́ŋ, pʉʉ lɑk tú yʉ́ʉ, mbíꞋŋɡɔ pʉʉ pɔ́Ꞌɔ, ńtsʉ́Ꞌ ńdɔɔ pɔ nɛpʉ́ʉpɛ mɛmbʉʉ mʉ́ʉ.

Pʉʉ pɛ́m Zẅikŋɛ-Sɛ́ tsʉ́Ꞌnɛ ɛ́sɑ́Ꞌ wʉ́ʉ

¹⁶ Ŋ ɡʉ ńcú mbɔ̌ pʉʉ ŋɡɔ: Pʉʉ pɛ́m Zẅikŋɛ-Sɛ́ tsiinɛ wʉ́ʉ nǔu wʉ́ʉ nɛpɔ́, pɔ́Ꞌɔ pʉʉ pɔɔ ɡɛ mɛnu kɛpɔŋ mi mbʉʉ yʉ́ʉ tsʉ́ʉnɛ́nɛ wʉ́ʉ ŋɡɔ pʉʉ ɡɛ pɔ́.

¹⁷ MbíꞋŋɡɔ mɛnu mi mbʉʉ-ŋumɛsɔŋ tsʉ́ʉnɛ́nɛ wɛ́ ŋɡɔ ɑ ɡɛ ɛ́ kɑ́ pɔ́ mi Zẅikŋɛ Lɛ́ɛnɛ́nɛ sɛ́ ŋ́kɔŋ ŋɡɔ ɑ ɡɛ pɔ́. Mɛnu mi Zẅikŋɛ Lɛ́ɛnɛ́nɛ sɛ́ ŋ́kɔŋ ɛ́ kɑ́ pɔ́ mi mbʉʉ-ŋumɛsɔŋ kɔŋnɛ pɔ́, pɔ́p pɛ́pɑ́ lɔk ńdʉꞋnɛ lʉꞋnɛ́nɛ. Ɛ́ pɔ́Ꞌɔ lɑ́ pʉʉ kɑ́ ɡẅɛɛ nɛɡɛ yúu mi pʉʉ tsɑ́ɑnɛ pɔ́.

¹⁸ Lɑ́ pʉʉ lɑɑ ḿbɛ́m Zẅikŋɛ Lɛ́ɛnɛ́nɛ pɔ́ ńtsiinɛ wʉ́ʉ, mbɔ nɛpʉ́ʉ kɛ́ pɛn ŋ́ɡẅɛɛ nɛsɑ́Ꞌ wʉ́ʉ pɔ́.

¹⁹ Pɛ́ sɛ́ ńtsuŋ ńjí mɛnu mi mbʉʉ-ŋumɛsɔŋ tsʉ́ʉnɛ́nɛ wɛ́ ɑ fɑɑnɛ, nu pɑ́Ꞌ nɛfúŋ pɑŋɡɛ́ kɛ nɛlɔɔ mbɛ́ɛnɛ ɔɔ, nu pɑ́Ꞌ nɛɡɛ mɛnu ntsɛ́llɛ́, nu pɑ́Ꞌ ŋu nɛtík tʉ́m yɛ́ pɔ nǔu nu-mpfuꞋ.

²⁰ Pɑ́Ꞌ nɛɡúꞋlɛ yúu ŋɡɔ ɛ́ mɛsɛ́, pɑ́Ꞌ nɛɡẅɛɛ nɛkɑŋ, pɑ́Ꞌ nɛji mbuu, pɑ́Ꞌ nɛtɑ́k mɛfɛꞋ, pɑ́Ꞌ nɛɡẅɛɛ kɛ́ɡʉ̈ɔꞋ, pɑ́Ꞌ nɛcʉ̈ɔ́k, pɑ́Ꞌ nɛlɔɔ pɔ nɛtʉ́ʉ mbi nǔu mbɑ kʉ̈ɔ́ lɑ́, pɑ́Ꞌ nɛnɑ́ŋ pɔ fyɑkŋɛ fyɑkŋɛ́nɛ, pɑ́Ꞌ nɛɡɛ tɔŋ.

²¹ Pɑ́Ꞌ nɛtík lík nǔu yúu pʉɔ, pɑ́Ꞌ nɛnɔ́ mɛluꞋ tɛ ḿbɑ́, pɑ́Ꞌ nɛcúꞋlɛ nǔu ndíinɑ nɛkwɛ́t yúu ŋ́ɡɛ mɛnu sʉ́ʉ, mbɑ pɑ́Ꞌ nɛɡɛ mɛcɔ́ mɛyúu mi ɛ́ fínɛ mi pɛ́ tʉ́ʉnɛ lɑɑ. Ŋ kɑ zɛɛ ɛ́sẅíi wʉ́ʉ, ŋ ɡʉ ḿbɛn ɛ́sẅíi wʉ́ʉ ŋɡɔ: Pʉɔ pi pɔ́p ɡɛnɛ yɔ ntɛ́ mɛnu kɛ́ lɑ́Ꞌ ɡẅɛɛ zʉꞋ nǔu nu nɛfɔɔ Sɛ́ pɔ́.

²² Lɑ́, mɛnu sʉ́Ꞌnɛ mi Zẅikŋɛ Lɛ́ɛnɛ́nɛ ɡɛnɛ ŋu ɡɛ ɛ́ mɔnɛ: Ḿbɔ́ nɛɡẅɛɛ ŋkɔŋɛ, ḿbɔ́ nɛnɑ́ŋ nɛ́ tsɑ́ɑtɛ, ḿbɔ́ nɛnɑ́ŋ nɛ́ mɔ́fíitɛ, ḿbɔ́ nɛɡẅɛɛ kɔkmbʉʉ, ḿbɔ́ nɛtʉ́ʉ nɛcẅɛ́lɛ pʉɔ, ḿbɔ́ nɛɡẅɛɛ pɔŋtʉ́m, ḿbɔ́ nɛnɑ́ŋ kɛ́ pɔ́ ŋɡɑŋ mɛfúklɛ,

²³ ḿbɔ́ nɛpɔ́tnɛ, ḿbɔ́ nɛkúꞋlɛ mbʉʉ. Ɛ́ kwɑꞋ nɛ́nẅín, nɛpʉ́ʉ kɑ́ lʉꞋ mɔnɛ mɛyúu pɔ́.

²⁴ Pʉɔ pi pɔ́p pɛ́ Yɛ́su Kɛlístɔ kɑ ḿmɛꞋnɛ yúu kɛpɔŋ yi ɛ́ pɔŋnɛ mbʉʉ yɔp, pɔ́p minɛ mbʉʉ ɛ̂yɑ́ tsɑ́ɑnɛ, lɑ ɛ́ pɔ́ pɑ́Ꞌ ŋkɑ́ yi pɔ́p kɑ kẅii mbʉʉ ɛ̂yɑ́ nǔu tʉ́ mbɑ́ŋtɛ pɑ́ŋtɛ́nɛ lɑ́.

²⁵ Pɑ́Ꞌ wɛkŋɛ nɛpɔ́ wɛ ŋkɔ̂ɔnɛ fú pɔ mbɔ̌ Zẅikŋɛ Lɛ́ɛnɛ́nɛ lɑ́, pɛkŋɛ nɛn nǔu ntɛ́ yi Zẅikŋɛ ɛ̂yɑ́ sɛ́ ńnyɛt wɛkŋɛ.

²⁶ Kɔɔ pɛkŋɛ ŋɑ́Ꞌtɛ mbʉʉ, Kɔɔ pɛkŋɛ tɑ́k fɛꞋ tsɛtsɛt pɛkŋɛ, kɔɔ pɛkŋɛ ɡẅɛɛ kɛ́ɡʉ̈ɔꞋ tsɛtsɛt pɛkŋɛ. A 5.9 ɛ́ pɔ́ ŋɡɔ: Mɔ́zʉꞋ fɛntɛ ɡɛ fɑlîn tsɛpnɛ kɔ́Ꞌ.