Mɛnu ɛ́ ńdɑ́Ꞌ ńcẅɛt 9 - Kɑɑ Fí

¹ Cʉ̈ɔꞋ-Sɛ́ mbɑ́ɑtɛ yɛ́tɑɑ tɔ́ŋ yɛ́ ntɑŋ. Mɔ n jʉ́ɔ wɛcɔ́ cʉ̈ɔ́ꞌ-sɑŋ, mbɔ ɑ fú tʉ́nɛ́pú ḿvu ndǔ tsɛ́tsɑ́Ꞌ. Pɛ́ ŋ́ɡɑ́ mɑ́jɔ́Ꞌ lɔk ńtsɔ́Ꞌ ntsu nɛpʉ́ kɛ́ ndúŋ mbɔ̌ wɛ́.

² Cʉ̈ɔ́Ꞌ-sɑŋ ɛ̂wɑ́ tsɔ́Ꞌ ntsu-nɛpʉ́ kɛ́ ndúŋ. Ndíndí fú zúꞋu ŋ́kɔ́Ꞌ pɑ́Ꞌ ndíndí ẅí ɛ́ fúnɛ zʉꞋ yi pɛ́ ńtɔɔ tsɑ́Ꞌ zúꞋu lɑ́. Ẅîwɑ́ ndíndí jʉ́ zʉꞋ tɛ pɛ́ pɔɔ pɛn ńjʉ́ɔ sɑ̌ɑ yúu pɔ́ mbɑ lík-nɛm.

³ Ŋɡẅíimɛ cẅɛt tsɛt ndíndí-múk ɛ̂wɑ́, mbuu ɛ́sɑt ndǔ tsɛ́tsɑ́Ꞌ. Pɛ́ ɡɑ́ mɛtʉʉ mbɔ̌ pɔ́p nɛlɔk ńtsúktɛ pʉɔ pɑ́Ꞌ pɛŋɡɑ́ɑsɛ́ pi pɔ́p ndǔ tsɛ́tsɑ́Ꞌ tsúktɛ́nɛ pʉɔ lɑ́.

⁴ Pɛ́ cú mbɔ̌ pɔ́p ŋɡɔ kɔɔ pɔ́p ɡɛ nu kɛpɔŋ nǔu nɛɡíi, ŋɡɔ kɔɔ pɔ́p ɡɛ nu kɛpɔŋ nǔu yɛcɔ́ yúu mi ɛ́ sɑ́Ꞌnɛ ndǔ tsɛ́tsɑ́Ꞌ, kɛ́ pɔ́ ŋ́ɡwɛtnɛ, ŋɡɔ kɔɔ pɔ́p ɡɛ nu kɛpɔŋ nǔu yɛcɔ́ tʉ́, ŋɡɔ pɔ́p ɡɛ nu kɛpɔŋ pɔ nǔu pʉɔ pí lii-Sɛ́ kɑ́ pɔ́ nǔu nɛzíi nɔ́p pɔ́.

⁵ Pɛ́ ŋkɑɑ ɡɑ́ mɛtʉʉ mbɔ̌ pɔ́p ɛ́ pɔ́ nɛlɔk ńjẅí pʉɔmɛsɔŋ pɔ́. Ɛ́ kɑ ɡʉ pɔ nɛlɔk ŋ́ɡɑ́ wɔ́p nɛ́ ŋɡʉ̈ɔ́Ꞌ, ŋ́ɡɑ́ ɡɑ́nɛ pɛsɑŋ pɛ́tɑɑ. Yîyɑ́ ŋɡʉ̈ɔ́Ꞌ kɛ ḿbɔ́ pɔ pɑ́Ꞌ yi ŋu jʉ́ɔnɛ nǔu pɑ́Ꞌ ŋɡɑ́ɑsɛ́ tsúknɛ wɛ́ lɑ́.

⁶ Ɛ́ ɡʉ ḿbɔ́ nǔu ŋkɑ́ ɛ̂yɑ́, pʉɔmɛsɔŋ lɔɔ nɛvú mbɔɔ jʉ́ɔ, ńtsɑ́ɑ nɛpfú, lɑ́ nɛvú kʉ̈ɔ́ wɔ́p kʉɔnɛ.

⁷ Yîyɑ́ ŋɡẅíimɛ kɑ pɔ́ pɔ pɑ́Ꞌ pɛlʉɔ́ pi pɛ́ niitɛ wɔ́p nɛlɔk ŋ́ɡʉ ńdʉ́ɔꞋ ntsɔ lɑ́. Yɛcɔ́ yúu kɑ pɔ́ tú pɔ́p, ḿbɔ́ pɔ pɑ́Ꞌ cɔꞋ-nɛfɔɔ yi pɛ́ kɑ lɔknɛ tʉ́n-ŋɡɔ̂l ńniitɛ lɑ́. Mɛshʉ́ mɔ́p pɔ́ pɔ pɑ́Ꞌ mɛshʉ́-pʉɔmɛsɔŋ lɑ́.

⁸ Mɛnuk-tú mɔ́p kɑ pɔ́ pɔ pɑ́Ꞌ mɛnuk-tú-pɑŋɡɛ́ lɑ́. Mɛsɔŋ mɔ́p pɔ́ pɔ pɑ́Ꞌ mɛsɔŋ-púꞋntʉʉ lɑ́.

⁹ Nzɔꞌ yɔp kɑ pɔ́ pɔ pɑ́Ꞌ ŋkɑ́ yi pɛ́ zɑ́p ndẅí-ntsɔ yí pɛ́ kɑ lɔknɛ tʉ́n ńtẅí lɑ́. Pɔ́p pɔ́ tɛ ḿbɔ́ ńtɑt, mɛpɑp mɔ́p ɡɛ zʉꞋ zɔt pɑ́Ꞌ ŋkɑ́ yi pɛkɑ́lɛk pí pɛlʉɔ́ tɛ ńzɑ́ɑ shuŋnɛ, ɛ́ pɔ́ ńzɔt ńdɛɛ ŋ́ɡʉ ńdʉɔ́Ꞌ ntsɔ lɑ́.

¹⁰ Mɛsɑ́ŋ mɔ́p ɡẅɛɛ mɛnzɔ́ŋ, ḿbɔ́ pɔ pɑ́Ꞌ mɛ́ ŋɡɑ́ɑsɛ́ lɑ́. Mɛtʉʉ mɔ́p nɛlɔk ŋ́ɡɑ́ pʉɔ nɛ́ ŋɡʉ̈ɔ́Ꞌ nǔu pɛsɑŋ pɛ́tɑɑ fú nǔu mɛsɑ́ŋ mɔ́p ɛ̂mɑ́.

¹¹ Ŋu ẅí ɑ mbɔ̌ pɔ́p ḿbɔ́ pɑ́Ꞌ fɔɔ wɔp, ḿbɔ́ ɛ́sɑ́Ꞌ wɔ́p, pɔ́ zẅikŋɛ kɛpɔŋ ẅi ɑ ɡẅɛɛnɛ nu nǔu nɛpʉ́ kɛ́ ndúŋ ẅi lík yɛ́ nǔu sẅiŋɛ-Hɛbɛlʉ́ʉ ḿbɔ́ ŋɡɔ Ambɑdɔŋ, ḿbɔ́ nǔu sẅiŋɛ-pʉɔ-Ŋɡɛlɛ́k ḿbɔ́ ŋɡɔ Apɔlyɔŋ ńdɔk ńcú ŋɡɔ: ŋɡɑŋntɑ́k.

¹² Nduŋmbi ŋɡʉ̈ɔ́Ꞌ lɛɛ. Ɛ́ pʉ́ɔ mɛcɔ́ mɛŋɡʉ̈ɔ́Ꞌ mɛmbɑ́ pɛ́t nzʉʉ ḿbɔ́ ńtɔ́.

¹³ Cʉ̈ɔꞋ-Sɛ́ mbɑ́ɑtɛ yɛ́nɛ́ntúkú tɔ́ŋ yɛ́ ntɑŋ. N zúꞋ yɛcɔ́ ŋɡi fú nǔu mɛndɔ́ŋ mɛ́nɛ́kwɑ mi ɛ́ nǔu zʉꞋ yí pɛ́ tɔɔnɛ yúu-pɔꞋ zúꞋu ńcẅɛt. Yîyɑ́ zʉꞋ pɔ́ mbi Sɛ́, mbɔ pɛ́ kɑ lɔk tʉ́n-ŋɡɔ̂l ńniitɛ.

¹⁴ Ŋɡi ɛ̂yɑ́ cú mbɔ̌ Cʉ̈ɔꞋ-Sɛ́ ẅi ɑ mbɑ́ɑtɛ yɛ́nɛ́ntúkú, ẅi ɑ kɑ ɡẅɛɛnɛ ntɑŋ ŋɡɔ ɑ kyɛ́Ꞌtɛ mɛzẅikŋɛ kɛpɔŋ mɛ́nɛ́kwɑ mi pɛ́ kɑ lɔknɛ mɛcɛ̂n ŋ́kút wɔ́p, pɔ́p pɔ́ mbʉʉ ŋki ẅí pɛ́ fúŋnɛ ŋɡɔ Ɛfɛlɑ̂tɑ lɑ́.

¹⁵ Pɛ́ ɡɔ́ɔ ŋ́kɛ́ ŋ́kyɛ́Ꞌtɛ mɛzẅikŋɛ kɛpɔŋ ɛ̂mɑ́ mɛ́nɛ́kwɑ. Mbɔ Sɛ́ kɑ niitɛ wɔ́p ńdɔk ńzẅíꞋlɛ yîyɑ́ lɛ́Ꞌlɑ́Ꞌ, ẅîwɑ́ sɑŋ, yîyɑ́ ŋɡuꞋ, nɛpɔ́ yi pɔ́p ɡʉ ńjẅí tɑ́Ꞌ nji nǔu pʉɔmɛsɔŋ nji yɛ́tɑ́t.

¹⁶ N zúꞋ pɛ́ cú ndɛn pɑlʉ̈ɔ́Ꞌ ntsɔ pí pɔ́p lɔknɛ pɛlʉ̈ɔ́ ńnɛn ŋɡɔ pɔ́p pɛmilyɔŋ ŋkʉ yɛ́pɑ́.

¹⁷ Yɔ pɑ́Ꞌ Sɛ́ kɑ ŋíɛꞋnɛ mík mɑ́ɑ, n jʉ́ɔ pɛlʉ̈ɔ́, tɛ mbɑ pʉɔ pí pɔ́p kɑ pɔ́nɛ ndǔ. Pɔ́p kɑ mɑꞋ mɛkɛm-ndẅí-ntsɔ mi pɛ́ lɔknɛ tʉ́n ńniitɛ, ɛ́ pɔ́ nzɔꞋ pɔ́p ḿbɑŋ pɑ́Ꞌ múk lɑ́, ḿbɛn ŋ́ŋwɑŋɛ ŋwɑŋɛ́nɛ pɑ́Ꞌ yɛcɔ́ ŋɡɔꞋ yí ndɛn nǔu tɛꞋ lɑ́, lii yɛ́ pɔ́ pɑ́Ꞌ yɛcɔ́ ntɛ́ mɛkɑɑ lɑ́. Tú-pɛlʉɔ́ kɑ pɔ́ pɔ pɑ́Ꞌ tú-púꞋntʉʉ lɑ́. Múk, nɛ́ ndíndí mbɑ yɛcɔ́ ntɛ́ mɛkɑɑ pɔ́ ɛ́fú ntsu pɔ́p ńcẅɛt.

¹⁸ Múk ɛ̂wɑ́, pɔ́p ndíndí, mbɑ pɔ́p yîyɑ́ ntɛ́ mɛkɑɑ, ɛ́ yúu mɑ́ yi ɛ́ ɡɑ́nɛ ŋɡʉ̈ɔ́Ꞌ, mbɔ ɛ́ kɑ pɔ́ ɛ́fú ntsu-pɛlʉ̈ɔ́ ńcẅɛt lɑ́, ɛ́ kɑ jẅí tɑ́Ꞌ nji nǔu pʉɔmɛsɔŋ nji yɛ́tɑ́t.

¹⁹ Ɛ́ pɔ́ mbíꞋŋɡɔ mɛtʉʉ-pɛlʉ́ɔ pɔ́ pɔ ntsu pɔ́p, mbɑ nǔu mɛsɑ́ŋ mɔ́p. Mɛsɑ́ŋ mɔ́p pɔ́ pɔ pɑ́Ꞌ mɛnɔ́ lɑ́, ŋ́ɡẅɛɛ mɛtú, ńdɔk pɔ mɛ́tɛ́ ŋ́ɡɛ nu kɛpɔŋ.

²⁰ Ɛ́ ɡʉ nǔu pfuꞋ pʉɔ pí sɑ̌ɑ yúu mi ɛ́ ɡɑ́nɛ ŋɡʉ̈ɔ́Ꞌ ŋkɑɑ wɔ́p jẅí, pɔ́p kɛ́ ḿbɔɔ kúpmɛ mɑt wɔ́p ḿmɛꞋ mɛfɑꞋ kɛpɔŋ mí pɔ́p lɔɔnɛ pɔ́. Pɔ́p ŋkɑɑ nɑ́ nɛɡúꞋlɛ mɛzẅikŋɛ kɛpɔŋ pɔ́. Pɔ́p pɔɔ nɑ́ nɛɡúꞋlɛ yúu mi pɛ́ ɡúꞋlɛ́nɛ ŋɡɔ ɛ́ mɛsɛ́ pɔ́, mi pɛ́ kɑ lɔknɛ tʉ́n-ŋɡɔ̂l ńniitɛ, kɛ pɔ́ mi pɛ́ kɑ lɔknɛ tʉ́n-ŋkɑ́p ńniitɛ pɔ́, kɛ mi pɛ́ kɑ lɔknɛ tʉ́n-Mbɛlɔŋzɛ ńniitɛ pɔ́, kɛ mi pɛ́ kɑ lɔknɛ ŋɡɔꞋ ńniitɛ pɔ́, kɛ mi pɛ́ kɑ lɔknɛ kɛm tʉ́ ńniitɛ pɔ́, mɛyúu mi ɛ́ kɑ́ kuꞋ nɛjʉ́ɔ zʉꞋ pɔ́, ŋ́kɛ́ mbɔɔ kuꞋ nɛzúꞋ nu pɔ́, ŋ́kɛ́ mbɔɔ kuꞋ nɛnɛn pɔ́.

²¹ Pɔ́p kɑ pɛ́t kɛ́ kúpmɛ mɑt wɔp, mbɔɔ nɑ́ nɛjẅí ŋu pɔ́, ŋ́kɛ́ mbɔɔ nɑ́ nɛkɑŋ pɔ́, ŋ́kɛ́ mbɔɔ nɑ́ pɑ́Ꞌ ḿbɔ́ mbɛ́ɛnɛ pɔ́p pɑŋɡɛ́ tsɛtsɛt pɔ́p kẅɛ́ɛtɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ pɔ́, ŋ́kɛ́ mbɔɔ tsɔ́ŋ nɑ́.