Mɛnu ɛ́ ńdɑ́Ꞌ ńcẅɛt 7 - Kɑɑ Fí

Yúu mi ɛ́ ŋ́ɡɛ ńtɔ́ nǔu pʉɔ-Sɛ́

¹ M bɑ́ɑtɛ ńjʉ́ɔ pɛcʉ̈ɔ́Ꞌ-Sɛ́ pɛ́nɛ́kwɑ ndǔ tsɛ́tsɑ́Ꞌ, tʉ́ʉtɛ nǔu mɛshʉ́ mɛ́nɛ́kwɑ, ḿbɔ́ ńtɔꞋ mɛfɛfʉɔt mɛ́nɛ́kwɑ mí ɛ́ ndǔ tsɛ́tsɑ́Ꞌ, nɛpɔ́ yi yɛcɔ́ fɛfʉ̈ɔt kíi ńdɛɛ ndǔ tsɛ́tsɑ́Ꞌ pɔ́, ŋ́kɛ́ mbɔɔ lɛɛ ndǔ ŋki kɛ́ nɛpɑt pɔ́, ɛ́ kɛ́ mbɔɔ tsʉ́Ꞌnɛ yɛcɔ́ tɑ́Ꞌ tʉ́ pɔ́.

² N jʉ́ɔ wɛcɔ́ tɑ́Ꞌ Cʉ̈ɔꞋ-Sɛ́, pɔ́ ɛ́fú shʉ́ sɑ́Ꞌnɛm, ŋ́ɡẅɛɛ yúu mi Sɛ́ ẅi ɑ lɔ ḿbɔ́ pɔ ɡú, ɑ lɔk ńcʉ̈ɔꞋ lii yɛ́ nǔu yúu. Wîwɑ́ Cʉ̈ɔꞋ-Sɛ́ pɔ́ ńdɔk ŋɡi tɛnnɛ ńcú mbɔ̌ pɛcʉ̈ɔ́Ꞌ-Sɛ́ pɛ́nɛ́kwɑ pí pɛ́ kɑ ńtúunɛ wɔ́p ŋɡɔ pɔ́p ɡʉ ŋ́ɡɛ nu kɛpɔŋ ndǔ tsɛ́tsɑ́Ꞌ, mbɑ nǔu ŋki kɛ́ nɛpɑt lɑ́ ŋɡɔ:

³ Kɔɔ pʉʉ ɡɔ́ɔ ŋ́ɡɛ nu kɛpɔŋ ndǔ tsɛ́tsɑ́Ꞌ. Kɔɔ pʉʉ ɡɛ nǔu ŋki kɛ́ nɛpɑt. Kɔɔ pʉʉ ɡɛ nǔu mɛtʉ́. Pʉʉ zẅíꞋlɛ tɛ pɛk cʉɔꞌ lii nǔu nɛzíi-pɑfɑꞋ fɑꞋ-Sɛ́ wɛk.

⁴ M bɛn ŋ́kɛ́ ńzúꞋ pɛ́ cú ŋɡɔ, pʉɔ pí pɛ́ cʉɔꞌ lii-Sɛ́ nǔu nɛzíi nɔ́p ɛ́ pʉɔ ntsɑ́Ꞌ ŋkʉ nɛ́ ntsɑ́Ꞌ ntsɔ̌pɛ́nɛ́kwɑ mɛɡɛ́m mɛ́nɛ́kwɑ (144.000), tɛ fú nǔu mɛtsɛ́nndɑ́-pʉɔ-Íslɑyɛ̂l tsʉʉ tsʉʉ.

⁵ Ɛ́ kɑ ɡʉ nǔu njẅɛt-Jẅídɑ, pɛ́ ńcʉ̈ɔꞋ lii nǔu pʉɔ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Lẅibɛn, ɛ́ pɔ́ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Gɑd, ɛ́ pɔ́ ntsɑ́Ꞌ ntsɔ̌ppɑ́ (12.000),

⁶ ŋ́ɡʉ nǔu njẅɛt-Asɛt, ɛ́ pɔ́ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Nɛftɑlîi, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt Mɑnɑsɛ́, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000),

⁷ ŋ́ɡʉ nǔu njẅɛt-Símɔ̂ŋ, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Lɛ́vi, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Izɑkɑɑ, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000),

⁸ ŋ́ɡʉ nǔu njẅɛt-Zɑbulɔŋ, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Yɔsɛ̂p, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000), ŋ́ɡʉ nǔu njẅɛt-Mbɛ̌zɑmɛn, ɛ́ pɔ́ pʉɔ ntsɑ́Ꞌ ntsɔ̌ppɑ́ (12.000) pi pɛ́ cʉɔꞋnɛ lii-Sɛ́ nǔu nɛzíi nɔ́p.

Nɔɔ-pʉɔ yi ɛ́ fúnɛ mɛŋɡɔŋ mɛŋɡɔŋ

⁹ N jʉ́ɔ mɔ mɛyúu tɛ ḿbɔ́tnɛ ńnɑ́ŋ, m bɛn ńjʉ́ɔ nɔɔ-lɑ́Ꞌ yi mbɔ ŋu pɔɔ sɑ́ŋ tɛ ńjí ndɛn pɔ́. Mbɔ pʉɔ fú nǔu mɛŋɡɔŋ tsʉʉ, ɛ́fú nǔu mɛnjẅɛt mɛnjẅɛt, ḿbɔ́ mɛntɛ́ mɛntɛ́, ɛ́sẅíŋɛ mɛsẅíŋɛ ntɛ́ ntɛ́ mi ɛ́ ndǔ tsɛ́tsɑ́Ꞌ. Pɔ́p kɑ tʉ́ʉ mbi kɔꞋ-nɛfɔɔ, mbɑ mbi Mɔ́ɔ-Njinjɔ, ḿmɑꞋ mɛfúfú ndẅí, ŋ́ɡẅɛɛ mɛzɑ́ŋ-nɛtʉ́ɔ,

¹⁰ ḿbɔ́ ńdɔk ŋɡi tɛnnɛ ńcú ŋɡɔ: «Luk fú mbɔ̌ Sɛ́ wɛkŋɛ ẅí ɑ nɑ́ŋnɛ ndǔ kɔꞋ-nɛfɔɔ mbɑ mbɔ̌ Mɔ́ɔ-Njinjɔ.»

¹¹ Ɛ́ ɡɔ́ ḿbɔ́ pɔ́Ꞌɔ, pɛcʉ̈ɔ́Ꞌ-Sɛ́ tsʉʉ tʉ́ʉtɛ ńtʉ̈ɔ́Ꞌlɛ kɔꞋ-nɛfɔɔ-Sɛ́, ńtʉ́ɔꞋlɛ pɛlʉ́m, mbɑ mɛyúumɛku mɛ́nɛ́kwɑ ńníꞋ sɔŋ. Pɛcʉ̈ɔ́Ꞌ-Sɛ́ ɛ̂pɑ́ vu sɛ́, ɛ́sɔp shʉ́ wɔ́p sɛ́, mbi kɔꞋ-nɛfɔɔ, ŋ́ɡúꞋlɛ Sɛ́,

¹² ḿbɔ́ ńcú ŋɡɔ: Ɛ́ pɔ́ꞌɔ, ɡúꞋlɛ, nɛɡúꞋ, jínu, nɛɡɑ́ pɑ́Ꞌlɑ́, nɛɡɑ́ mɛkuꞋ, mɛtʉʉ pɔ́p ŋɡúꞋ pɔ́ mbɔ̌ Sɛ́ nǔu mɛŋɡuꞋ mɛŋɡuꞋ. Ɛ́ pɔ́Ꞌɔ.

¹³ Wɛcɔ́ tɑ́Ꞌ nǔu pɛlʉ́m ɡɔ́ɔ ŋ́kɛ́ ḿbíkŋɛ wɑ́ɑ ŋɡɔ: Pʉɔ pɔnɛ pi pɔ́p mɑꞋ mɛfúfú ndẅí lɑɑ pɔ́p pɛ́ wɔ̌, ḿbɛn ɛ́fú ɡɔ́?

¹⁴ N tsɔ́Ꞌ ŋɡɔ, Ndɛ, ɡu jínɛ. A cú ŋɡɔ pɔ́p pʉɔ pi pɔ́p fúnɛ tsɛt mɑ́mɑ́ ŋɡʉ̈ɔ́Ꞌ yɑ́. Pɔ́p kɑ lɔk mɛci-mɔ́ɔ-Njinjɔ, ɛ́suk mɛndẅí mɔ́p tɛ ɛ́ lɛ́ɛnɛ, ńtsʉ́Ꞌ fúfú.

¹⁵ Ɛ́ yúu mi ɛ́ ɡɛnɛ pɔ́p tʉ́ʉ mbi kɔꞋ-nɛfɔɔ-Sɛ́, ḿbɔ́ tsɛt zʉꞋ-nɔŋpɔꞋ, ḿbɔ́ ŋ́ɡúꞋlɛ wɛ́ nɛnɛm mbɑ nɛtúꞋ. Ŋu ẅí ɑ nɑ́ŋnɛ ndǔ kɔꞋ-nɛfɔɔ, ɑ ɡʉ ɛ́fii ntɑp wɛ́ ńdɔk ŋ́kẅíitɛ wɔ́p.

¹⁶ Nji pɔɔ pɛn ńzɑ́ŋ wɔ́p pɔ́, ɡɑ́k yɔ́p pɔɔ pɛn ɛ́shí pɔ́. Nɛm pɔɔ pɛn ńtɔɔ ndǔ yɔp pɔ́. Yɛcɔ́ yúu pɔɔ pɛn ŋ́ɡɛ mbʉʉ yɔp tɔɔnɛ pɔ́.

¹⁷ MbíꞋŋɡɔ mɔ́ɔ-Njinjɔ ẅí ɑ tʉ́ʉnɛ tsɛtsɛt kɔꞋ-nɛfɔɔ ɡʉ ḿbɔ́ ŋɡɑŋpyɛ́p wɔ́p, ńdɔk wɔ́p ŋ́ɡʉ nǔu mɛtẅɛ́Ꞌ-ŋki, zʉꞋ yi ŋki ɡʉ ŋ́ɡɛ pɛ́ pɔ́ ɡú. Sɛ́ ɡʉ ńtuk ŋki-mík mɔ́p tsʉʉ.