Mɛnu ɛ́ ńdɑ́Ꞌ ńcẅɛt 6 - Kɑɑ Fí

NɛŋíɛꞋ ŋɛmɛ-ŋwɑ́Ꞌ nǔu ŋwɑꞋnɛ

¹ M bɛ́t ńdíŋɛ líŋɛ́nɛ, ńjʉ́ɔ mɔ́ɔ-Njinjɔ ŋíɛꞋ ŋɛmɛ-ŋwɑ́Ꞌ nǔu nduŋmbi zʉꞋ nǔu mɛzʉꞋ mîmɑ́ sɑɑmbɑ́. N zúꞋ wɛcɔ́ tɑ́Ꞌ nǔu mɛnɑɑ mɑ́ mɛ́nɛ́kwɑ cú nu nɛ́ yɛcɔ́ ŋɡi yi ɛ́ pɔ́ pɔ pɑ́Ꞌ nɛfɑŋ ni ɛ́ kwɛnɛ́nɛ lɑ́ ŋɡɔ: Tɔ́.

² N diŋɛ ńjʉ́ɔ, tɑ́Ꞌ fúfú lʉ́ɔ cẅɛt, ŋu ẅí ɑ nɑ́ŋnɛ ndǔ ɡẅɛɛ kyɛꞌ. Pɛ́ ɡɑ́ cɔꞋ-nɛfɔɔ mbɔ̌ wɛ́. A pɔ́ ŋ́ɡʉ, ńnɛn ńtɔɔ mɛŋɡuŋ, ḿbɔ́ ɛ́sɑ́Ꞌ.

³ Mɔ́ɔ-Njinjɔ ŋíɛꞋ ŋɛmɛ-ŋwɑ́Ꞌ nǔu zʉꞋ mbɑ́ɑtɛ yɛ́pɑ́, n zúꞋ nɑɑ mbɑ́ɑtɛ yɛ́pɑ́ kɑꞋ ŋɡi yɛ́ ŋ́ɡɑ́ tʉ́ ńcú ŋɡɔ: Tɔ́.

⁴ Wɛcɔ́ tɑ́Ꞌ lʉ́ɔ ɡɔ́ɔ ńcẅɛt, ḿbɑŋ pɑ́Ꞌ múk lɑ́. Pɛ́ ɡɑ́ mɛtʉʉ mbɔ̌ ŋu ẅí ɑ kɑ nɑ́ŋnɛ ndǔ ŋɡɔ ɑ ɡʉ ḿmɑꞋ tɑ́kŋɛ ndǔ tsɛ́tsɑ́Ꞌ, ńjí ŋɡɔ pʉɔmɛsɔŋ ɡʉ ɛ́shɔtnɛ sɔptɛ mɛmbʉʉ mɔ́p ḿpfútɛ, ŋ́ɡɛ pɔ́Ꞌɔ, ŋ́ɡɑ́ mɑ́mɑ́ níi-ntsɔ mbɔ̌ wɛ́.

⁵ Mɔ́ɔ-Njinjɔ ŋíɛꞋ ŋɛmɛ-ŋwɑ́Ꞌ nǔu zʉꞋ mbɑ́ɑtɛ yɛ́tɑ́t, n zúꞋ nɑɑ mbɑ́ɑtɛ yɛ́tɑ́t kɑꞋ ŋɡi yɛ́ ŋ́ɡɑ́ tʉ́ ńcú ŋɡɔ: Tɔ́. N diŋɛ ńjʉ́ɔ tɑ́Ꞌ shíshí lʉ́ɔ cẅɛt. Ŋu ẅí ɑ nɑ́ŋnɛ ndǔ ɡẅɛɛ kílɔ lɔk fʉꞋ yúu mbɔ̌ wɛ́.

⁶ N zúꞋ yɛcɔ́ yúu fú tsɛtsɛt mɛnɑɑ mɛ́nɛ́kwɑ ńcẅɛt, ḿbɔ́ pɑꞋ ŋɡi-ŋu lɑ́, ḿbɔ́ ńcú ŋɡɔ: Gɛ nǔu ntɛ́ yi pɛ́ ɡʉ ńdɔk ŋkɑ́p-fɑꞋ-tɑ́Ꞌ lɛ́Ꞌlɑ́Ꞌ, ńzúu pɔ ndɑꞋ tɑ́Ꞌ kílɔ mɛsɑ́ŋntsʉ́ʉ, ḿbɔ́ yi ɛ́ lɑɑ ḿbɔ́ ŋɡɛsɑ́ŋ yɛkŋɛ, pɛ́ lɔk ŋkɑ́p-fɑꞋ-tɑ́Ꞌ lɛ́Ꞌlɑ́Ꞌ, ńzúu kílɔ yɛ́tɑ́t, ŋ́ɡʉ nǔu mɛɡwɛ́t pɔ́p mɛluꞋ, kɔɔ ɡɛ nǔu ntɛ́ yi pɛ́ ɡʉ ńjɑ́k.

⁷ Mɔ́ɔ-Njinjɔ ŋíɛꞋ ŋɛmɛ-ŋwɑ́Ꞌ nǔu zʉꞋ mbɑ́ɑtɛ yɛ́nɛ́kwɑ, n zúꞋ nɑɑ mbɑ́ɑtɛ yɛ́nɛ́kwɑ kɑꞋ ŋɡi yɛ́ ŋ́ɡɑ́ tʉ́ ńcú ŋɡɔ: Tɔ́.

⁸ N diŋɛ ńjʉ́ɔ wɛcɔ́ lʉ́ɔ cẅɛt, ŋ́ɡɛ́p sʉ́ʉ sʉ́ʉnɛ. Lík-ŋu ẅí ɑ nɑ́ŋnɛ ndǔ pɔ́ ŋɡɔ nɛvú. ZʉꞋ yí pɛpfú zúꞋu pɔ́ nzʉʉ yɛ́. Pɛ́ ɡɑptɛ ndǔ tsɛ́tsɑ́Ꞌ nji yɛ́nɛ́kwɑ, ŋ́ɡɑ́ tɑ́Ꞌ nji ŋɡɔ pɔ́p sɑ́Ꞌ nɛpɔ́ yi pɔ́p ɡʉ ńdɔk níi-ntsɔ, ńdɔk cʉ́, ńdɔk ɡwɑ́Ꞌ mbɑ mɛnɑɑ-tɛt, ńjẅítɛ pʉɔ nǔu yîyɑ́ ɡúŋ.

⁹ Mɔ́ɔ-Njinjɔ ŋíɛꞋ ŋɛmɛ-ŋwɑ́Ꞌ nǔu zʉꞋ mbɑ́ɑtɛ yɛ́tɑ́ɑ, n jʉ́ɔ mɛtʉ́m-pʉɔ pí pɛ́ kɑ jẅítɛ́nɛ wɔ́p, mbíꞋŋɡɔ pɔ́p kɑ sẅíi nu-Sɛ́ mbɑ nǔu pɑ́Ꞌ pɔ́p kɑ cúnɛ yúu mi pɔ́p jínɛ nǔu nu-Yɛ́su, nɔɔtɛ nɛtsɛ́n-zʉꞋ yí pɛ́ nɔŋnɛ pɔꞋ zúꞋu,

¹⁰ ḿbɔ́ ŋ́kíi nɛ́ ŋɡi tɛnnɛ ńcú ŋɡɔ: Tsɑpʉɔ, ɡu ẅí ɔ Sɛ́, ḿbɔ́ ŋu ẅí ɑ sẅíinɛ nu nɛ́nẅín, ɔ ɡʉ ńzẅíꞋlɛ tɛ ŋ́kúu pɔ shʉ́nɛ, lɑ ŋ́ŋɑk pʉɔ ndǔ tsɛ́tsɑ́Ꞌ, ńníꞋ ŋɡʉ̈ɔ́Ꞌ tú pɔ́p ntɛ́ pɑ́Ꞌ pɔ́p kɑ jẅítɛ́nɛ wɛ́k?

¹¹ Pɛ́ ɡɔ́ɔ ŋ́kɛ́ ŋ́ɡɑ́ fúfú ndẅí mbɔ̌ mbɑ wɔ̌ lɑ́ nǔu pɔ́p, ńcú mbɔ̌ pɔ́p ŋɡɔ pɔ́p nɑ́Ꞌ ḿbɛn ḿbɔ́tnɛ ńzẅíꞋlɛ mɔ́zʉꞋ, pfuꞋ pɔ́ɔpɛ́mɑ́ pɔ́p pi pɔ́p pɛpɔ́p kɑ pɔ́ ɛ́fɑꞋ fɑꞋ-Sɛ́ tɔ́ tɛ ḿmɛ, mbíꞋŋɡɔ ɛ́ sɛ́ ḿbíkŋɛ ŋɡɔ pɛ́ pɛn ńjẅítɛ wɔ́p ɡúu pɑ́Ꞌ pɔ́p.

¹² Mɔ́ɔ-Njinjɔ pɔ́ ŋíɛꞋ ŋɛmɛ-ŋwɑ́Ꞌ nǔu zʉꞋ mbɑ́ɑtɛ yɛ́nɛ́ntúkú, m bɔ́ ńdíŋɛ, ńzúꞋ tsɛ́tsɑ́ꞌ pûu ńtsʉꞋnɛ pɑ́ꞋtɛꞋ, nɛm shɔtnɛ ɛ́sʉ́ʉ pɑ́Ꞌ ndẅí yi pɛ́ lɔk ńdúŋ nɛvú lɑ́. Sɑŋ pûu ɛ́shɔtnɛ ḿbɑŋ pɑ́Ꞌ mɛci lɑ́.

¹³ Pɛcʉ̈ɔ́Ꞌ-sɑŋ fú nɛpú ŋ́kɛmɛ ḿbʉ̈ɔtnɛ ndǔ tsɛ́tsɑ́Ꞌ pɑ́Ꞌ mɑ́mɑ́ fɛ́m sɛ́ ńdɛɛ, mɛntɑ́ɑ-tʉ́ mi ɛ́ ḿbɔ́nɛ tʉ́ kɛ́mɛ ḿbʉ̈ɔtnɛ sɛ́ pɔ́Ꞌɔ lɑ́.

¹⁴ Nɛpú mɛ pɑ́Ꞌ tɑ́Ꞌ sɛsɑ pɑk-ŋwɑꞋnɛ yí pɛ́ sɛ́ ŋ́kɑ́tɛ lɑ́. Pɛ́ fú nǔu mɛzʉꞋ mí mɛŋkɔ́Ꞌ zúꞋu, tɛ mbɑ nǔu mɛzʉꞋ mí mɛlɑ́Ꞌ mi ŋki kɑ zɛmɛnɛ ńníꞋ sɔŋ zúꞋu, ɛ́sɑꞋ ńdɔk ŋ́ɡʉ.

¹⁵ Pɛfɔɔ pí pɔ́p ndǔ tsɛ́tsɑ́Ꞌ, pɛmɑ́ pʉɔ, pɛtɑ́tndɑ́-pɑlʉ̈ɔ́Ꞌ ntsɔ, ɡɑŋŋkɑ́p, ɡɑŋmɛtʉʉ, pɛkwɑɑ tɛ mbɑ ndúunút. Pɔ́p pɛ́tsʉʉ lʉɔmɛ tsɛt mɛmvuꞋ mbɑ tsɛt mɛŋɡɔꞋ mí ɛ́ ndǔ mɛŋkɔ́Ꞌ,

¹⁶ ḿbɔ́ ńcú mbɔ̌ mɛŋkɔ́Ꞌ, mbɑ mbɔ̌ mɛmɑ́mɑ́ mɛŋɡɔꞋ ŋɡɔ: Pʉʉ kɛ́mɛ ɛ́fyɛ́t wɛ́k, ńdʉɔ wɛ́k. Ŋu ẅí ɑ nɑ́ŋnɛ ndǔ kɔꞋ-nɛfɔɔ lɑ́, pɔɔ pɛn ńjʉ́ɔ wɛ́k pɔ́. Mɔ́ɔ-Njinjɔ pɔɔ pɛn ńzɑ́ŋ lɔ́ŋ nǔu pɛk pɔ́.

¹⁷ MbíꞋŋɡɔ mɑ́mɑ́ lɛ́Ꞌlɑ́Ꞌ yi pɔ́p ɡʉ ńzɑ́ŋ lɔ́ŋ pɑ́Ꞌɑ mbɔ ɛ́ lɑɑ ńtɔ́, mbɔ wɔ̌ ḿvuꞋ?