Mɛnu ɛ́ ńdɑ́Ꞌ ńcẅɛt 5 - Kɑɑ Fí

Nu-ŋwɑꞋnɛ pɔ́p nu-mɔ́ɔ-Njinjɔ

¹ M bɛn ńjʉ́ɔ ŋu ẅí ɑ kɑ nɑ́ŋnɛ nǔu kɔꞋ-nɛfɔɔ lɑ́, ɑ ɡẅɛɛ tɑ́Ꞌ sɛsɑ ŋwɑꞋnɛ nǔu pɔ́ yɛ́ yi tʉʉ, mbɔ pɛ́ kɑ ŋwɑꞋnɛ yúu nǔu nzɛm tsʉʉ, ŋ́kɑ́tɛ, ńdɔk ŋɛmɛ-ŋwɑ́Ꞌ ńdɔk ńdɑ́t nǔu mɛzʉꞋ sɑɑmbɑ́.

² M bɛn ńjʉ́ɔ wɛcɔ́ Cʉ̈ɔꞋ-Sɛ́ ẅí ɑ ɡẅɛɛnɛ mɛtʉʉ, ɑ cú nɛ́ ŋɡi tɛnnɛ ŋɡɔ: Lɑ́ ŋu ɡú ẅi ɛ́ lɑɑ ḿbɔ́ ɑ kuꞋ ŋu ẅi mbɔ ɑ ŋíɛꞋ ŋɛmɛ-ŋwɑ́Ꞌ ɛ̂yɑ́, ŋ́kíɛꞋ ŋwɑꞋnɛ yɔ?

³ Ńcú pɔ́Ꞌɔ, pɛ́ pɔɔ jʉ́ɔ ŋu fú tʉ́nɛ́pú, kɛ ndǔ tsɛ́tsɑ́Ꞌ pɔ́, kɛ tsɛt tsɛ́tsɑ́Ꞌ pɔ́, ŋ́kuꞋ ŋu ẅí ḿbɔ́ ɑ kíɛꞋ, ḿbɛn ńdíŋɛ yúu mi ɛ́ tsɛtú pɔ́.

⁴ N jʉ́ɔ pɔ́Ꞌɔ, ńzɛ nɛlɑɑ tɛꞋ, mbíꞋŋɡɔ pɛ́ kɑ́ jʉ́ɔ ŋu ẅí ɑ kuꞋ nɛkíɛꞋ tɑ́Ꞌ sɛsɑ pɑk-ŋwɑꞋnɛ ɛ̂yɑ́, ḿbɛn ńdíŋɛ yúu mi ɛ́ tsɛtú pɔ́.

⁵ Lɑ́ wɛcɔ́ ŋu nǔu pɛlʉ́m pɑ́ tɔ́ ńcú mbɔ̌ mɔ ŋɡɔ: Kɔɔ pɛn ńdɑɑ. Ŋu sɛ́. PúꞋntʉʉ ẅí ɑ fɔɔ nǔu tsɛ́nndɑ́-Jẅídɑ, ɛ́ lík-yúu mi ɛ́ fúnɛ nǔu nɛŋɑŋ-fɔɔ Ndɑvît, ɑ kɑ kɛ́ ńdʉ̈ɔ́Ꞌ ntsɔ tɛ ńtsɑ nu kɛpɔŋ. A ɡʉ ńdɔk pɔ́Ꞌɔ, ŋ́kuꞋ ŋu ẅí ḿbɔ́ ɑ kyɛꞌ ŋɛmɛ-ŋwɑ́Ꞌ yi pɛ́ kɑ lɑtnɛ nǔu mɛzʉꞋ sɑɑmbɑ́, ḿbɛn ɛ́fii tɑ́Ꞌ sɛsɑ pɑk-ŋwɑꞋnɛ.

⁶ Ńcú pɔ́Ꞌɔ, m bɛn ŋ́kɛ́ ńjʉ́ɔ mɔ́ɔ-njinjɔ tʉ́ʉ nɛjɔ́ŋ kɔꞋ-nɛfɔɔ, tsɛtsɛt mɛyúumɛku mɛ́nɛ́kwɑ, mbɑ tsɛtsɛt pɛlʉ́m, ḿbɔ́ pɔ pɑ́Ꞌ ŋkɑ́ yi pɛ́ kɑ shɔ́nɛ lɔ́ŋ wɛ lɑ́. Mɛndɔ́ŋ pɔ́ tú wɛ́ sɑɑmbɑ́. Mík mɛ́ pɔ́ sɑɑmbɑ́ ńdɔk ḿbɔ́ mɛzẅikŋɛ sɑɑmbɑ́ mi ɛ́ mɛ́ Sɛ́, mi Sɛ́ sɛ́ ńtúu wɔ́p ŋɡɔŋ zʉꞋ tsʉʉ ndǔ tsɛ́tsɑ́Ꞌ.

⁷ Mɔ́ɔ-Njinjɔ tɔ́ nɛjɔ́ŋ ŋu ẅí ɑ kɑ nɑ́ŋnɛ ndǔ kɔꞋ-nɛfɔɔ lɑ́, ńcẅɛ́ɛ ŋwɑꞋnɛ ɛ̂yɑ́ yi ɑ kɑ ɡẅɛɛnɛ nǔu pɔ́ yɛ́ yi tʉʉ.

⁸ Mɔ́ɔ-Njinjɔ kɑ cẅɛ́ɛ ŋwɑꞋnɛ tɛ ŋ́ɡẅɛɛ, mɛyúumɛku mɑ́ mɛ́nɛ́kwɑ, mbɑ pɛlʉ́m pîpɑ́ ntsɔ̌pɛ́nɛ́kwɑ nɛ́ mɛɡɛ́m mɛ́mbɑ ŋ́kẅíꞋlɛ mbi yɛ́. Mbɑ wɔ̌ lɑ́ nǔu pɔ́p pɔ́ ŋ́ɡẅɛɛ yɛcɔ́ ntɛ́ nɛlúŋ mbɑ mɛntúꞋ mi pɛ́ kɑ lɔknɛ tʉ́n-ŋɡɔ̂l ńniitɛ, lɑmɛ́ndɑɑ pɔ́ tsɛtú tɛ ńdúu, ńdɔk ḿbɔ́ mɛcɛꞋlɛ-pʉɔ-Sɛ́.

⁹ Pɛlʉ́m pɑ́, pɔ́p mɛyúumɛku mɑ́ pɔ́ ńzɔp zɔpŋki fí ńcú tsɛtú ŋɡɔ: Ɔ kuꞋ ŋu ẅí ḿbɔ́ ɔ cẅɛ́ɛ ŋwɑꞋnɛ, ŋ́kuꞋ ŋu ẅí ḿbɔ́ ɔ ŋíɛꞋ ŋɛmɛ-ŋwɑ́Ꞌ yi pɛ́ kɑ lɔknɛ ńdɑt. Pɛ́ kɑ jẅí wú ńdɔk ńnɔŋ pɔꞋ. Ɔ kɑ tswɛt mɛci mú ńdɔk ńtsúꞋ pʉɔ, ńtsúꞋ tɛ mbɑ pʉɔ pí pɔ́p nǔu yɛ́tɛ́ njẅɛtndɑ́ lɑ́, tɛ mbɑ pʉɔ pi pɔ́p sẅiŋɛ́nɛ yɛ́tɛ́ sẅiŋɛ lɑ́, tɛ mbɑ yɛ́tɛ́ ntɛ́ lɑ́, tɛ mbɑ pɛ́ wɛ́tɛ́ ŋɡɔŋ lɑ́, ńtsúꞋ wɔ́p pɔ́Ꞌɔ, pɔ́p pɛn mbɔ̌ Sɛ́.

¹⁰ Ɔ kɑ lɔk wɔ́p ŋ́ɡɛ pʉɔ pi pɔ́p tsɛt nu-nɛfɔɔ-Sɛ́, ḿbɛn ńdɔk wɔ́p ŋ́ɡɛ pɑnɔŋpɔꞋ pɑ́Ꞌ pɔ́p ɡʉ ɛ́fɑꞋ mbɔ̌ Sɛ́ wɛkŋɛ, mbɑ pɑ́Ꞌ pɔ́p ɡʉ ŋ́ɡɛ ɛ́sɑ́Ꞌ pʉɔ ndǔ tsɛ́tsɑ́Ꞌ.

¹¹ M bɛ́t ńdíŋɛ líŋɛ́nɛ, ńzúꞋ ŋɡi pɛcʉ̈ɔ́Ꞌ-Sɛ́, pɔ́p pɔ́ ntsɑ́Ꞌ tɛ mbɔ pɛ́ pɔɔ sɑ́ŋ ńjí ndɛn pɔ́, mbɔ pɔ́p tʉ̈ɔ́Ꞌlɛ kɔꞋ-nɛfɔɔ, mbɑ mɛyúumɛku mɑ́ pɔ́p pɛlʉ́m pɑ́, ńníꞋ sɔŋ,

¹² ḿbɔ́ ńzɔp ńcú ŋɡɔ; Mɔ́ɔ-Njinjɔ ẅí pɛ́ kɑ jẅínɛ wɛ́ lɑ́, ɑ kuꞋ ŋu ẅí ɛ́ lɑɑ ḿbɔ́ pɛ́ ɡɑ́ mɛtʉʉ mbɔ̌ wɛ́, ŋ́ɡɑ́ mɛyúu mbɔ̌ wɛ́, ŋ́ɡɑ́ jínu mbɔ̌ yɛ́, ńtɔꞋ ŋɡúꞋ yɛ, ŋ́ɡɑ́ mɛkuꞋ mbɔ̌ wɛ́, ŋ́ɡɑ́ nɛɡúꞋ mbɔ̌ wɛ́, ńzɔp lík yɛ́.

¹³ M bɛn ńzúꞋ, kʉ̈ɔ́ lɑ́ yi Sɛ́ kɑ niitɛ́nɛ, yi ɛ́ tʉ́nɛ́pú, yi ɛ́ ndǔ tsɛ́tsɑ́Ꞌ, yi ɛ́ tsɛt tsɛ́tsɑ́Ꞌ, yi ɛ́ tsɛt ŋki kɛ́ nɛpɑt tɛ mbɑ kʉ̈ɔ́ lɑ́ yi ɛ́ ndǔmbí lɑ́, ɛ́ pɔ́ ńzɔp ńcú ŋɡɔ: Pɛ́ zɔp lík, ŋ́ɡɛ mɛkuꞋ ńtɔꞋ ŋɡúꞋ yɛ, ŋ́ɡɑ́ nɛsɑ́Ꞌ mbí mbɔ̌ ŋu ẅí ɑ nɑ́ŋnɛ nǔu kɔꞋ-nɛfɔɔ, mbɑ mbɔ̌ mɔ́ɔ-Njinjɔ nǔu mɛŋɡuꞋ mɛŋɡuꞋ.

¹⁴ Pɛ́ zɔp pɔ́Ꞌɔ, mɛyúumɛku mɑ́ mɛ́nɛ́kwɑ ɡɔ́ɔ ŋ́kɛ́ ŋɡɔ ɛ́ pɔ́Ꞌɔ. Pɛlʉ́m pɑ́ ɡɔ́ɔ ŋ́kɛ́ ŋ́kẅíꞋlɛ sɛ́, ŋ́ɡúꞋlɛ Sɛ́.