Mɛnu ɛ́ ńdɑ́Ꞌ ńcẅɛt 4 - Kɑɑ Fí

Ntɛ́ yi pɛ́ lɔknɛ ŋ́ɡúꞋlɛ Sɛ́ tʉ́nɛ́pú

¹ N jʉ́ɔ mɔnɛ mɛyúu tɛ ḿbɔ́tnɛ ńnɑ́ŋ, ŋ ɡɔ ńjʉ́ɔ, mbɔ pɛ́ tsɔ́Ꞌ yɛcɔ́ ntsundɑ́ tʉ́nɛ́pú. Ŋ ɡɔ́ɔ ŋ́kɛ́ ḿbɛn ńzúꞋ ŋu ẅí ɑ kɑ zɛɛ ńcú nu mbɔ̌ mɔ, ŋɡi yɛ pɔ́ pɔ pɑ́Ꞌ ŋɡi-ntɑŋ lɑ́, ɑ cú mbɔ̌ mɔ ŋɡɔ: Kɔ́ꞌ tɛ ŋ́kúu zɑꞋnɛ, n nyɛt wú nɛ́ yúu mi ɛ́ ɡʉ ḿbɑ́ɑtɛ ńtɔ́.

² Zẅikŋɛ-Sɛ́ ɡɔ́ɔ ŋ́ɡẅɛɛ wɑ́ɑ, ŋ ɡɔ ńjʉ́ɔ yɛcɔ́ kɔꞋ-nɛfɔɔ tʉ́ʉ tʉ́nɛ́pú, wɛcɔ́ ŋu ńnɑ́ŋ ndǔ.

³ A kɑ ŋwɑŋɛ pɔ pɑ́Ꞌ yɛcɔ́ ntɛ́ mɛŋɡɔꞋ mi ɛ́ mɛtʉʉndɛn, pɛ́ fúŋ yɛcɔ́ ŋɡɔ Jɑ́spɛ, ɛ́fúŋ yɛcɔ́ ŋɡɔ Sɑldwɑnɛ lɑ́. Ŋkɔŋ-ŋɡɛ́mnɔ́ zɛmɛ kɔꞋ-nɛfɔɔ ɛ̂nɑ́ ńníꞋ sɔŋ ḿbɔ́ ŋwɑŋɛ pɑ́Ꞌ yɛcɔ́ ntɛ́ ŋɡɔꞋ tʉʉndɛn yi pɛ́ fúŋnɛ ŋɡɔ Ɛmɛlɔd.

⁴ Mɛcɔ́ mɛkɔꞋ-nɛfɔɔ ntsɔ̌pɛ́nɛ́kwɑ nɛ́ mɛɡɛ́m mɛ́mbɑ́ kɑ zɛmɛ yîyɑ́ kɔꞋ-nɛfɔɔ ńníꞋ sɔŋ. Pɛlʉ́m ntsɔ̌pɛ́nɛ́kwɑ nɛ́ mɛɡɛ́m mɛ́mbɑ́ nɑ́ŋtɛ ndǔ, ḿmɑꞋ mɛfúfú ndẅí, ńtɔꞋ mɛcɔꞋ-nɛfɔɔ mi pɛ́ kɑ lɔknɛ tʉ́n-ŋɡɔ̂l ńniitɛ.

⁵ Mɛnɛ́ɛ-mbʉŋ kɑ pɔ́ ɛ́fú nǔu kɔꞋ-nɛfɔɔ ńcẅɛt. Mɛŋɡi-pʉɔ pɔ́ ɛ́fú nǔu ŋ́kɔ́Ꞌ. Nɛfɑŋ pɔ́ ɛ́fú nǔu ŋ́kwɛnɛ. Mɛkyɛꞌ sɑɑmbɑ́ tʉ́ʉtɛ mbi kɔꞋ-nɛfɔɔ, ḿbɔ́ ŋ́kʉ́, ńdɔk ḿbɔ́ Mɛzẅikŋɛ-sɑɑmbɑ́ mi ɛ́ mɛ́ Sɛ́.

⁶ ZʉꞋ yi ɛ́ ḿbɔ́nɛ mbi kɔꞋ-nɛfɔɔ, ɛ́ ḿbɔ́ pɑ́Ꞌ ŋki kɛ́ ndẅiklɛ yi ɛ́ tʉ́ʉnɛ ŋɡɔ kɛ̂m, ḿbɔ́ síi pɑ́Ꞌ yɛcɔ́ ntɛ́ ŋɡɔꞋ yi pɛ́ fúŋnɛ ŋɡɔ kɛlistɑl. Ɛ́ ḿbɔ́ sɔŋ zʉꞋ yí kɔꞋ-nɛfɔɔ tʉ́ʉnɛ zúꞋu, yɛcɔ́ ntɛ́ yúumɛku, tɛ ḿbɔ́ mɛ́nɛ́kwɑ tʉ́ʉtɛ ńzɛmɛ kɔꞋ-nɛfɔɔ ńníꞋ sɔŋ. Mík pɔ́ tú pɔ́p, mbi mbɑ nzʉʉ.

⁷ Nduŋmbi nǔu pɔ́p kɑ pɔ́ pɔ pɑ́Ꞌ púꞋntʉʉ lɑ́, mbɑ́ɑtɛ yɛ́pɑ́ pɔ́ pɔ pɑ́Ꞌ mɔ́ɔ-fɔŋ ẅí ɑ ndúu, mbɑ́ɑtɛ yɛ́tɑ́t ɡẅɛɛ shʉ́ wɛ́, ɛ́ pɔ́ pɔ pɑ́Ꞌ wɛ ŋumɛsɔŋ lɑ́, mbɑ́ɑtɛ yɛ́nɛ́kwɑ pɔ́ pɔ pɑ́Ꞌ mɑ́ɡúu ẅi ɑ sɛ́ ńtɑt lɑ́.

⁸ Mbɑ wɛ́tɛ́ lɑ́ nǔu mɛyúumɛku ɛ̂mɑ́ mɛ́nɛ́kwɑ kɑ ɡẅɛɛ mɛpɑp mɛ́ mɛ́nɛ́ntúkú, mík pɔ́ nǔu zʉꞋ tsʉʉ, nzɛmpíi mbɑ nzɛm tsɛtú. Pɔ́p pɔ́ ńzɔp kɛ́ kɑ́ɑ nɛnɛm mbɑ nɛtúꞋ, ńcú ŋɡɔ: Ndɛɛnɛlɛ́nɛ́nɛ, Ndɛɛnɛlɛ́nɛ́nɛ, Ndɛɛnɛlɛ́nɛ́nɛ, ɑ Tsɑpʉɔ Sɛ́ Ŋɡɑŋmɛtʉʉ tsʉʉ, jʉ́ ẅi ɑ ḿbɔ́nɛ ɡú, ɑ ɡú, ɑ pɛn ḿbɔ́ ńtɔ́.

⁹ Ɛ́ pɔ́ ŋɡɔŋ ŋkɑ́ tsʉʉ yi mɛyúumɛku mɔ́nɛ mɛ́nɛ́kwɑ sɛ́ ńzɔp, ńdɔk ŋ́ɡɑ́ nɛɡúꞋ, ńdɔk ŋ́ɡɑ́ mɛkuꞋ, ńdɔk ŋ́ɡɑ́ pɑ́Ꞌlɑ́ mbɔ̌ ŋu ẅí ɑ nɑ́ŋnɛ ndǔ kɔꞋ-nɛfɔɔ ḿbɔ́ pɔ zúꞋu mɛŋɡuꞋ mɛŋɡuꞋ,

¹⁰ pɛlʉ́m pɑ́ ntsɔ̌pɛ́nɛ́kwɑ nɛ́ mɛɡɛ́m mɛmbɑ́, pfúu ŋ́kẅíꞋlɛ mbi ŋu ẅí ɑ nɑ́ŋnɛ ndǔ kɔꞋ-nɛfɔɔ, ŋ́ɡúꞋlɛ wɛ́ ẅi ɑ pɔ́ pɔ ɡú nǔu mɛŋɡuꞋ mɛŋɡuꞋ, ńtsɔ́Ꞌ mɛcɔꞋ-nɛfɔɔ tú pɔ́p, ńnɔŋ mbi kɔꞋ-nɛfɔɔ, ḿbɔ́ ńcú ŋɡɔ:

¹¹ Ɔ ŋu ẅí ɔ kuꞋnɛ mbɑ̌ɑ Tsɑpʉɔ wɛk, ḿbɔ́ Sɛ́ yɛk, Ɔ kuꞋ pɑ́Ꞌ ɛ́ lɑɑ ḿbɔ́ pɛ́ ɡɑ́ nɛɡúꞋ mbɔ̌ ɡu, ŋ́ɡɑ́ mɛkuꞋ mbɔ̌ ɡu, pɑ́Ꞌ ɛ́ lɑɑ ḿbɔ́ ɡu ɡẅɛɛnɛ mɛtʉʉ. Ɛ́ mbíꞋŋɡɔ ɔ kɑ ɡɛ kʉ̈ɔ́ lɑ́ ɛ́ pɔ́ ɡú, ɡu kɑ kɔŋnɛ lɑ mîmɑ́ mɛyúu cẅɛt ndǔmbí, ɡu pɛnnɛ ḿbɔ́ ŋ́kɔŋ lɑ ɛ́ pɔ́ ɡú.