Mɛnu ɛ́ ńdɑ́Ꞌ ńcẅɛt 22 - Kɑɑ Fí1 Cʉ̈ɔꞋ-Sɛ́ pɑ́ɑtɛ ńnyɛt wɑ́ɑ nɛ́ mí ẅi ɛ́ ŋki ẅí ɛ́ ɡɛnɛ pɛ́ pɔ́ ɡú, ɛ́ pɔ́ ɛ́síi pɑ́Ꞌ tɛ ńdɛɛ túkcí yi pɛ́ fúŋnɛ ŋɡɔ kɛlistɑl lɑ́, ɛ́ pɔ́ ɛ́fú nǔu kɔꞋ-nɛfɔɔ-Sɛ́ pɔ́p Mɔ́ɔ-Njinjɔ ńcẅɛt. 2 Tʉ́ yi ɛ́ ɡɛnɛ pɛ́ pɔ́ ɡú pɔ́ tsɛtsɛt sɛ̂ndúŋ ɡwɛ́ yi ɛ́ tʉ́sɔŋ, nǔu mɛŋkɑŋ-ŋki mɛmbɑ́, ḿbɔ́ ńzɛ́m ŋkɑ́ ntsɔ̌ppɑ́, ŋɡɔŋ pɛsɑŋ tsʉʉ, mɛntɑ́ɑ pɔ́ pɔ tʉ́. Pɛ́ pɛn ńdɔk mɛfu mɛ́ ńzɔŋ mɛɡɔɔ nǔu pʉɔmɛsɔŋ pi pɔ́p mɛtúu mɛtúu. 3 Yɛcɔ́ ndɔ́ɔ kɛ́ ɡɛ ḿbɛn ḿbɔ́ ɡú pɔ́. KɔꞋ-nɛfɔɔ-Sɛ́ pɔ́p Mɔ́ɔ-Njinjɔ ɡʉ ŋ́ɡɛ ḿbɔ́ tsɛt tʉ́sɔŋ. Pɑfɑꞌ fɑꞋ-Sɛ́ pɔ́ ŋ́ɡúꞋlɛ wɛ́. 4 Pɔ́p ɡʉ ŋ́ɡɛ ḿbɔ́ ńdɔk mík mɔ́p ńjʉ́ɔ shʉ́-Sɛ́. Ɛ́ ɡɔ́ ḿbɔ́, mbɔ pɛ́ ŋwɑꞋnɛ lík yɛ́ nǔu nɛzíi nɔ́p. 5 NɛtúꞋ ŋ́ɡʉ ŋ́ɡɛ ḿbɛn ḿbɔ́ ɡú pɔ́. Pɔ́p pɔɔ ŋ́ɡʉ ŋ́ɡɛ ḿbɛn ńtsɑ́ɑ kyɛꞌ yí ɛ́ fúnɛ nǔu lɑ̂m pɔ́, ŋ́kɛ́ mbɔɔ yɛ́ nɛm tsɑ́ɑ. MbíꞋŋɡɔ Tsɑpʉɔ Sɛ́ ɡʉ ŋ́ɡɛ ńdɔk yɛ́ kyɛꞌ ŋ́kyɛꞋ wɔ́p. Pɔ́p sɑ́Ꞌ mbí nǔu mɛŋɡuꞋ mɛŋɡuꞋ. Nu nǔu pɑ́Ꞌ Yɛ́su sɛ́ ńtɔ́ 6 Cʉ̈ɔꞋ-Sɛ́ pɑ́ɑtɛ ńcú ŋɡɔ: Mɛnu mɔnɛ kɑ́ pɔ́ mi ḿbɔ́ pɛ́ zúꞋ ḿmʉꞋlɛ pɔ́ ɛ́ nɛ́nẅín. Tsɑpʉɔ Sɛ́ ẅi jʉ́ lɔknɛ zẅikŋɛ yɛ́ ńtúu pɑcẅiŋkʉʉ pɛ́ kwɑꞋ jʉ́ túunɛ wɛ́ pɑ́Ꞌ ɑ ɡʉ ńnyɛt mbɔ̌ ɡɑŋfɑꞋ pɛ́ nɛ́ yúu mi ɛ́ ɡʉ ɛ́fɛ́Ꞌnɛ ńtɔ́. 7 Yɛ́su kɑ pɔ́ ńcú ŋɡɔ: Mɔ n ɡʉ fɛ́Ꞌnɛ ńtɔ́. Pɔ́ttú ɑ ŋu ẅí ɑ kúꞋlɛ́nɛ mɛnu mi pɛ́ cúnɛ tsɛt nɛpúꞋ-ŋwɑꞋnɛ-ŋɡɛ́mndʉ̈ɔ́Ꞌ, ɛ́ pɔ́ mi ɛ́ ɡʉ ŋ́ɡɛ ŋkɔ̂ɔnɛ mbɑ mi ɛ́ ɡʉ ńdɑ́Ꞌ lɑ́ ŋ́ɡɛ. 8 Mɔ Jɑ̂ŋ, ŋ kɑ zúꞋ mɔnɛ mɛnu, ḿbɛn ńjʉ́ɔ. Ŋ kɑ zúꞋ mɔnɛ mɛnu ḿbɛn ńjʉ́ɔ pɔ́Ꞌɔ, ńnɔŋ mɛku Cʉ̈ɔꞋ-Sɛ́ nɛɡúꞋlɛ wɛ́, ɑ Cʉ̈ɔꞋ-Sɛ́ ẅi ɑ kɑ pɔ́ ńnyɛt wɑ́ɑ nɛ́ mîmɑ́ mɛnu. 9 Lɑ́ ɑ cú mbɔ̌ mɔ ŋɡɔ: Kɔɔ ɡɛ pɑ́Ꞌɑ. M bɛn ḿbɔ́ yɑ́ɑ pɔ wɛcɔ́ ŋɡɑŋku wu nǔu fɑꞋ, mbɑ wɛ pɔ́ɔpɛ́mɑ́ pú pɑyúdɑ pɑcẅiŋkʉʉ-Sɛ́, mbɑ wɛ pʉɔ pi pɔ́p ɡẅɛɛnɛ mɛnu mi ɛ́ tsɛt yɔ ŋwɑꞋnɛ. Ŋ́ɡúꞋlɛ pɔ Sɛ́. 10 Mbɑ́ɑtɛ ńcú mbɔ̌ mɔ ŋɡɔ: Kɔɔ lʉɔ mɛnu mi pɛ́ cúnɛ tsɛt yɔ ŋwɑꞋnɛ, ɛ́ mɛnu mi ɛ́ ɡʉ ŋ́ɡɛ, mbɑ mi ɛ́ ɡʉ ńdɑ́Ꞌ lɑ ŋ́ɡɛ. Kɔɔ lʉɔ, mbíꞋŋɡɔ ŋkɑ́ yi mɔnɛ mɛnu ɡʉ ḿbuutɛ ɛ́ kẅɛ́Ꞌlɛ tɛ ḿbɔ́ ḿbɑ́ɑtɛ. 11 Pɔ́Ꞌɔ lɑ́, ŋu lɑɑ ḿbɔ́ yi ɑ kɑ́ pɔ́ ŋ́ɡɛ yúu mi ɛ́ ndʉ́ŋndʉŋ mbi Sɛ́ pɔ́, ɑ kɛ́ ŋ́ɡɛ pɔ pɔ́Ꞌɔ, ńdɔk ŋ́ɡʉ nɛ́ mbi. Ŋu ẅi ntsɛ́llɛ́ nǔu wɛ́, ɑ pɛn ŋ́kẅiꞋ ńníꞋ ntsɛ́llɛ́ nǔu wɛ́. Lɑ́ ŋu ẅí ɑ sɛ́ ŋ́ɡɛ yúu mi ɛ́ ndʉ́ŋndʉŋ mbi Sɛ́, ɑ kɛ́ ḿbɛn ŋ́kẅiꞋ ḿbɔ́ ŋ́ɡɛ pɔ yúu mi ɛ́ ndʉ́ŋndʉŋ. Ŋu ẅí ɑ ŋu-Sɛ́, ɑ kɛ́ ḿbɛn ŋ́kẅiꞋ ḿbɔ́ pɔ wɛ́tɛ́. 12 Ɛ́ pʉ́ɔ, Yɛ́su kɛ́ ḿbɔ́ ńcú ŋɡɔ: Ŋ ɡʉ fɛ́Ꞌnɛ ńtɔ́, ŋ ɡẅɛɛ yúu mi ŋ ɡʉ ńdɔk ńtsɔ́Ꞌ fɑꞋ-pʉɔ, ɛ́ pɔ́ ŋ́ɡɑ́ yɛ́ mbɑ wɔ̌ lɑ́ pɔ pɑ́Ꞌ mɛfɑꞋ mɛ́ pɔ́nɛ. 13 Mɔ Alfɑ, ḿbɔ́ Ɔmɛŋɡɑ, ḿbɔ́ nduŋmbi, ḿbɔ́ ndẅiknzʉʉ, ḿbɔ́ nzɛnɛ, ḿbɔ́ ndẅiknzʉʉ. 14 Pɛpɔ́ttú ɛ́ pʉɔ pí pɔ́p suknɛ mɛndẅí mɔ́p tɛ ɛ́ lɛ́ɛnɛ, nɛpɔ́ yi pɔ́p ɡʉ ŋ́kuꞋ nɛfú nǔu mɛntsu-ŋkɑ́Ꞌ, ŋ́kúu tʉ́sɔŋ, ńjʉ́ ntɑ́ɑ-tʉ́ yɑ́ yi ɛ́ ɡɛnɛ pɛ́ tsuŋ ḿbɔ́ ɡú lɑ́. 15 Lɑ́ ŋ́kɛ́ ŋ́ɡʉ nǔu pɑɡɛ mɛnu pɑ́Ꞌ mvú, ɛ́ pɑɡẅɛɛ mɛkɑŋ, ɛ́ pɑɡɛ mɛnu mpfuꞋ, ɛ́ pɑjẅítɛ pʉɔ, ɛ́ pɑɡúꞋlɛ yúu ŋɡɔ ɛ́ mɛsɛ́, ḿbɔ́ mbɑ wɔ̌ lɑ́ ẅi ɑ kɔŋnɛ cɔtnu, tɛ ɛ́sẅíi yɛ́ pɔ cɔtnu, pɛɡɑŋ ɡɔ́ŋ nzɛmpíi. 16 Yɛ́su sɛ́ ńcú ŋɡɔ: N túu cʉ̈ɔ́Ꞌ wɑɑ ŋɡɔ ɑ ɡʉ ńcẅi mɔnɛ mɛnu mi ɛ́ nɛ́nẅín mbɔ̌ pʉʉ, ńjí ŋɡɔ pɛ́ ɡʉ ńcú mbɔ̌ mɛcúꞋlɛ-pʉɔ pɑ́ɑ. Mɔ Yɛ́su, lík-yúu mi ɛ́ fúnɛ nǔu nɛŋɑŋ-fɔɔ Ndɑvît, ḿbɔ́ cʉ̈ɔ́Ꞌ-sɑŋ ẅi ɑ kɔ́Ꞌnɛ ńjí ɡɔ́ɔ ŋ́kiɛ. 17 Zẅikŋɛ Lɛ́ɛnɛ́nɛ pɔ́p nzwɛ́ wɛ ɡʉnɛ ńcú ŋɡɔ ńtɔ́. Ɛ́ pɔŋ ŋɡɔ ŋu ẅi ɑ zúꞋnɛ yɔ nu ɑ cú yɛ́ ŋɡɔ tɔ́. Ŋu ẅi nji-ŋki sɛ́ ńzɑ́ŋ wɛ́ ɑ tɔ́. Ŋu ẅí ɑ kɔŋnɛ ɑ nɔ́ ŋki ẅí ɛ́ ɡɛnɛ pɛ́ tsuŋ ḿbɔ́ ɡú, ńnɔ́ pɔ kɛ́ ɡɑ́ yɛcɔ́ yúu. Nu lɔk ńdẅiklɛ 18 Mɔ Jɑ̂ŋ n cú yɔ nu pɑ́Ꞌɑ mbɔ̌ wɛ́tɛ́ ŋu lɑ́ ẅi ɑ ɡʉ ńzúꞋ mɛnu mi pɛ́ cúnɛ tsɛt yɔ ŋwɑꞋnɛ, ɛ́ pɔ́ mɛnu mi ɛ́ ɡʉ ŋ́ɡɛ mbɑ mi ɛ́ ɡʉ ńdɑ́Ꞌ lɑ ŋ́ɡɛ. Ŋu kẅiꞋ yúu nǔu, mbɔ Sɛ́ ɡʉ ŋ́ɡɛ ŋ́ɡʉ nǔu yɛ́ nu, ŋ́kẅiꞋ mɛŋɡʉ̈ɔ́Ꞌ mi pɛ́ lɛ́Ꞌlɛ́nɛ tsɛt yɔ ŋwɑꞋnɛ lɑɑ. 19 Ŋu kɛ́ ŋ́ɡʉ nǔu mɛnu mi pɛ́ cúnɛ tsɛt yɔ ŋwɑꞋnɛ, ɛ́ pɔ́ mi ɛ́ ɡʉ ŋ́ɡɛ mbɑ mi ɛ́ ɡʉ ńdɑ́Ꞌ lɑ ŋ́ɡɛ lɑɑ, cẅɛ́tɛ yɛcɔ́ yúu, mbɔ Sɛ́ ɡʉ ŋ́ɡɛ ńcẅɛ́tɛ yɛ́ yúu mi ɑ ḿbɔ́ ŋ́ɡʉ ŋ́ɡẅɛɛ nǔu mɛntɑ́ɑ-tʉ́ mi ɛ́ ɡɛnɛ pɛ́ tsuŋ ḿbɔ́ ɡú tɛ mbɑ yɛ́ yúu mi ɑ kɛ́nɛ́ ŋ́ɡẅɛɛ tsɛt tʉ́sɔŋ lɛ́ɛnɛ́nɛ yi pɛ́ lɛ́Ꞌlɛ́nɛ tsɛt yɔ ŋwɑꞋnɛ. 20 Ŋu ẅi ɑ sɛ́ ńniitɛ ńcú mɔnɛ mɛnu, cú ŋɡɔ: KwɑꞋ nɛ́nẅín, mɔ ŋ ɡʉ fɛ́Ꞌnɛ ńtɔ́. Ɛ́ pɔ́Ꞌɔ. Tɔ́ mbɑ̌ɑ Tsɑpʉɔ Yɛ́su. 21 Mbɔ́tnɛ-Tsɑpʉɔ Yɛ́su pɔ́ ḿbɔ́ nɛ́ pʉʉ pɛtsʉʉ! |
CABTAL, 2017