Mɛnu ɛ́ ńdɑ́Ꞌ ńcẅɛt 21 - Kɑɑ Fí

Nɛfɑŋ nɛ fí mbɑ ndǔ tsɛ́tsɑ́Ꞌ yi fí

¹ M bɛn ŋ́ɡɔ́ɔ ŋ́kɛ́ ńjʉ́ɔ nɛfɑŋ nɛ fí mbɑ ndǔ tsɛ́tsɑ́Ꞌ yi fí. Mbɔ nduŋmbi nɛfɑŋ mbɑ nduŋmbi tsɛ́tsɑ́Ꞌ kɑ kɛ́mɔ́ ḿmɛ, mbɑ ŋki kɛ́ nɛpɑt pɔɔ pɛ́t ɡú pɔ́.

² M bɛn ńjʉ́ɔ tʉ́sɔŋ Lɛ́ɛnɛ́nɛ, Yɛlúsɑlɛm yi fí, pɔ́ ɛ́fú nɛjɔ́ŋ Sɛ́ ḿpfúu, ḿbɔ́ pɑ́Ꞌ nzwɛ́ŋɡʉʉ ẅí ɑ kẅiinɛ mbʉʉ yɛ́ ḿbɔ́ ńzẅíꞋlɛ ndúu mɛ lɑ́.

³ N zúꞋ yɛcɔ́ ŋɡi tɛnnɛ fú zʉꞋ-kɔꞋ-nɛfɔɔ ḿbɔ́ ńcú ŋɡɔ: «Ɛ́ ŋkɔ̂ɔnɛ, mbɔ zʉꞋ yí Sɛ́ nɑ́ŋnɛ zúꞋu, ɛ́ pɔ́ tsɛtsɛt pʉɔmɛsɔŋ. Pɔ́p pɛpɔ́p ɡʉnɛ ńtsʉ́Ꞌ ńnɑ́ŋ, pɔ́p pɔ́ mbɔ̌ wɛ́, ɑ pɔ́ Sɛ́ wɔp.

⁴ A ɡʉ ŋ́ɡɛ ńtuk ŋki-mík mɔ́p tsʉʉ. Nɛvú kɛ́ ɡɛ ḿbɛn ḿbɔ́ ɡú pɔ́. Pɛ́ pɔɔ pɛn ńdɑɑ nɛvú pɔ́. Pɛ́ pɔɔ pɛn ŋ́kíi pɔ́. Pɛ́ pɔɔ pɛn ńjʉ́ɔ ŋɡʉ̈ɔ́Ꞌ pɔ́. Ɛ́ mbíꞋŋɡɔ ŋɡɔŋ lwɛn kɑ mɛ mɔ́.»

⁵ Ŋu ẅí ɑ kɑ nɑ́ŋnɛ ndǔ kɔꞋ-nɛfɔɔ pɛn ńcú ŋɡɔ: «Ŋkɔ̂ɔnɛ mɔ sɛ́ ŋ́ɡɛ kʉ̈ɔ́ lɑ́ pɔ fí fí, ḿbɑ́ɑtɛ ńcú mbɔ̌ mɔ ŋɡɔ: ŊwɑꞋnɛ. Ɛ́ mbíꞋŋɡɔ nu yɔ kɑ́ pɔ́ yi ɛ́ lɑɑ ḿbɔ́ ŋu zúꞋ ḿmʉ́Ꞌlɛ pɔ́, ɛ́ nɛ́nẅín,

⁶ ḿbɛn ńcú mbɔ̌ mɔ ŋɡɔ: Ɛ́ kuꞋ. Mɔ, Alfɑ, ḿbɔ́ Ɔmɛŋɡɑ, ḿbɔ́ nduŋmbi, ḿbɔ́ ndẅiknzʉʉ, mɔ nzɛnɛ ḿbɔ́ ndẅiklɛ́nɛ ɡɑ́k-ŋu lɑɑ ḿbɔ́ ɛ́shí, mbɔ ŋ ɡʉ ŋ́ɡɑ́ ŋki ẅí ɛ́ ɡɛnɛ pɛ́ kɛ ḿbɔ́ pɔ ɡú mbɔ̌ wɛ́. Ẅîwɑ́ ŋki fú nǔu nɛsɑ́Ꞌ-ŋki nɑ́ɑ, ŋ ɡʉ ŋ́ɡɑ́ pɔ níinɛ.

⁷ Ẅîwɑ́ ŋu pɔ́ ẅi ɑ mɑꞋnɛ ntsɔ tɛ ńtsɑ nu kɛpɔŋ, ŋ ɡʉ ŋ́ɡɛ ŋ́ɡɑ́ yîyɑ́ fuꞋ mbɔ̌ wɛ́, m bɔ́ Sɛ́ wɛ, ɑ pɔ́ mɔ́ɔ wɑɑ.

⁸ Lɑ́ ŋ́kɛ́ ŋ́ɡʉ nǔu pɛntsɔ̌ɔ, mbɑ nǔu pɑpɛ́m ḿbɛn ńdʉꞋ, mbɑ nǔu pɑɡɛ mɛnu ndǔmbí, mbɑ nǔu pɑjẅítɛ pʉɔ, mbɑ nǔu pɑɡɛ mɛnu-ɡɑp, mbɑ nǔu pɑɡẅɛɛ mɛkɑŋ, mbɑ nǔu pɑɡúꞋlɛ yúu ŋɡɔ ɛ́ mɛsɛ́, ŋ́ɡɛ ɡɑŋcɔtnu tsʉʉ, mbɔ yɔ́p yúu mi pɛ́ ɡʉ ŋ́ɡɛ ńdɔk ńtsɔ́Ꞌ fɑꞋ yɔ́p ɛ́ pɑ́Ꞌ pɛ́ ɡʉ ŋ́ɡɛ ḿmɑꞋ wɔ́p tsɛt nɛpʉ́-múk mɛɡʉ̈ɔꞋlɛ, ɛ́ lɔk ḿbɔ́ nɛpfú ŋkɑ́ yɛ́pɑ́.»

Tʉ́sɔŋ-Yɛlúsɑlɛm yi fí

⁹ Wɛcɔ́ Cʉ̈ɔꞋ-Sɛ́ pɛn ńtɔ́ nɛjɔ́ŋ mɔ, ḿbɔ́ wɛcɔ́ tɑ́Ꞌ nǔu pɛcʉ̈ɔ́Ꞌ-Sɛ́ sɑɑmbɑ́ pi pɔ́p kɑ ɡẅɛɛnɛ mɛntúꞋ ɛ̂mɑ́ sɑɑmbɑ́, mɛlẅiknzʉʉ ŋɡʉ̈ɔ́Ꞌ sɑɑmbɑ́ pɔ́ tsɛtú tɛ ńdúu lɑ́, ńtɔ́ pɔ́Ꞌɔ, ńcú mbɔ̌ mɔ ŋɡɔ: «Tɔ́, Mɔ ńnyɛt wú nɛ́ nzwɛ́ŋɡʉʉ, nzwɛ́-mɔ́ɔ-Njinjɔ.»

¹⁰ Ńcú pɔ́Ꞌɔ, Zẅikŋɛ jʉ́ wɑ́ɑ, ńtíi wɑ́ɑ ńdɔk ŋ́ɡʉ ndǔ nɛcɔ́ mɑ́mɑ́ nɛŋkɔ́Ꞌ ńtík, ɛ́ sɑk ŋ́ɡʉ tʉ́ tɛꞋ, ŋ́ɡɔ́ɔ ŋ́kɛ́ ńnyɛt wɑ́ɑ nɛ́ tʉ́sɔŋ lɛ́ɛnɛ́nɛ, Yɛlúsɑlɛm. A pɔ́ ɛ́fú tʉ́nɛ́pú nɛjɔ́ŋ Sɛ́ ḿpfúu.

¹¹ Vuvuk yi ɛ́ ḿbɔ́nɛ nǔu, m̄bɔ́ wɛ Sɛ́, ḿbɔ́ ŋ́ɡɛ ɛ́ ŋwɑŋɛ pɑ́Ꞌ yɛcɔ́ ntɛ́ túkcí, pɑ́Ꞌ túkcí yi pɛ́ fúŋnɛ ŋɡɔ jɑ́spɛ, ŋ́ŋwɑŋɛ ŋwɑŋɛ́nɛ lɑ́.

¹² Ɛ́ kɑ ɡɔ́ ḿbɔ́, mbɔ pɛ́ kɑ pɔ́ɔ tɑ́Ꞌ sɛsɑ tɑ́ɑŋkɑ́Ꞌ ẅi ɛ́ ɡʉ nɛ́ tʉ́, ńdɔk ńzɛmɛ tʉ́sɔŋ ɛ̂wɑ́. Ɛ́ ɡẅɛɛ mɛntsu-ŋkɑ́Ꞌ ntsɔ̌ppɑ́ nɛ́ nɛɡɛ́m. Tɑ́Ꞌ Cʉ̈ɔꞋ-Sɛ́ tʉ́ʉ nǔu wɛ́tɛ́ ntsu lɑ́, ḿbɔ́ ḿbyɛ́p. Mbɔ pɛ́ kɑ ŋwɑꞋnɛ mɛlík ntsɔ̌ppɑ́ nǔu, ɛ́ pɔ́ mɛlík mɛnjẅɛtndɑ́ pʉɔ-Pɑíslɑyɛ̂l ntsɔ̌ppɑ́ nɛ́ nɛɡɛ́m.

¹³ Ɛ́ m̄bɔ́ shʉ́ sɑ́Ꞌ nɛm mɛntsu-ŋkɑ́Ꞌ pɔ́ mɛ́ntɑ́t, ḿbɔ́ shʉ́ kɔŋ, mɛntsu-ŋkɑ́Ꞌ pɔ́ mɛ́ntɑ́t, ḿbɔ́ shʉ́ ntsʉ́ʉ mɛntsu-ŋkɑ́Ꞌ pɔ́ mɛ́ntɑ́t, ḿbɔ́ shʉ́ mbɛ́nɛm, mɛntsu-ŋkɑ́Ꞌ pɔ́ mɛ́ntɑ́t.

¹⁴ Pɛ́ kɑ lɔk mɛmɑ́ ŋɡɔꞋ ntsɔ̌ppɑ́ nɛ́ nɛɡɛ́m ńnɔŋ cʉ́-tɑ́ɑŋkɑ́Ꞌ ẅi ɛ́ kɑ zɛmɛ́nɛ tʉ́sɔŋ, mbɑ yɛ́tɛ́ ŋɡɔꞋ pɔ́ ŋ́ɡẅɛɛ lík tɑ́Ꞌ ŋu nǔu ɡɑŋntúu-Mɔ́ɔ-Njinjɔ pí pɔ́p m̄bɔ́nɛ ntsɔ̌ppɑ́ nɛ́ nɛɡɛ́m.

¹⁵ Cʉ̈ɔꞋ-Sɛ́ ẅi ɑ kɑ pɔ́ ńcú nu mbɔ̌ mɔ ɡẅɛɛ kɛm-yúu mi pɛ́ lɔknɛ ɛ́fʉꞋ yúu, mbɔ pɛ́ kɑ lɔk tʉ́n-ŋɡɔ̂l ńniitɛ, ɑ pɔ́ ŋ́ɡʉ ńdɔk ɛ́fʉꞋ tʉ́sɔŋ, ɛ́fʉꞋ mɛntsu, ɛ́fʉꞋ mbɑ tɑ́ɑŋkɑ́Ꞌ ẅi ɛ́ kɑ zɛmɛnɛ tʉ́sɔŋ.

¹⁶ Tʉ́sɔŋ kɑ ɡẅɛɛ mɛshʉ́ mɛ́nɛ́kwɑ, ɛ́ pɔ́ pɔ ndʉ́ŋndʉŋ. Ntí wɛ́ pɔ́p nɛpɛm nɛ́ pɔ́ pɔ ndʉ́ŋndʉŋ. Cʉ̈ɔꞋ-Sɛ́ lɔk kɛm-yúu mɑ́ ɛ́fʉꞋ tʉ́sɔŋ, ɛ́ pɔ́ yúu pɛkilɔmítɑ, ntsɑ́Ꞌ yɛpɑ́ nɛ́ ŋkʉ yɛpɑ́ (2.200 km). Ntí pɔ́p nɛpɛm mbɑ nɛkɔ́Ꞌ ŋ́ɡʉ tʉ́ pɔ́ pɔ tɑ́Ꞌ yúu.

¹⁷ Cʉ̈ɔꞋ-Sɛ́ fʉꞋ tɑ́ɑŋkɑ́Ꞌ ẅí ɛ́ kɑ zɛmɛ́nɛ tʉ́sɔŋ, nɛfú sɛ́ ńtʉ́ʉ tʉ́, ɛ́ pɔ́ yúu mítɑ ntsɔ̌ppɑ́ mɛɡɛ́m sɑɑmbɑ́ (72 m), mbɔ ɑ lɔk fʉꞋ yi pɛ́ lɔ ńdɔk fʉ yúu ŋkɔ̂ɔnɛ, ɛ́fʉꞋ.

¹⁸ Pɛ́ kɑ lɔk yɛcɔ́ túkcí ḿbɔ́ɔ tɑ́ɑŋkɑ́Ꞌ, pɛ́ fúŋ yîyɑ́ ntɛ́ túkcí ŋɡɔ Jɑ́spɛ, ntɛ́ ŋɡɔ̂l yi pɛ́ kɑ lɔknɛ ŋ́kút tʉ́sɔŋ, ɛ́ pɔ́ yɛcɔ́ lɔ́Ꞌ pɔɔ nǔu pɔ́, ɛ́ ŋwɑŋɛ ŋwɑŋɛ́nɛ.

¹⁹ Pɛ́ kɑ lɔk ntɛ́ ntɛ́ mɛtúkcí ŋ́kẅii mɛmɑ́ mɛŋɡɔꞋ mi pɛ́ kɑ lɔknɛ ńnɔŋ mɛcʉ́-tɑ́ɑŋkɑ́Ꞌ ẅi ɛ́ kɑ zɛmɛ́nɛ tʉ́sɔŋ. Nduŋmbi cʉ́ pɛ́ lɔk yɛcɔ́ ntɛ́ túkcí yi pɛ́ fúŋnɛ ŋɡɔ jɑ́spɛ ŋ́kẅii, mbɑ́ɑtɛ yɛ́pɑ́ pɛ́ lɔk yɛcɔ́ ntɛ́ túkcí yi pɛ́ fúŋnɛ ŋɡɔ sɑfîi, mbɑ́ɑtɛ yɛ́tɑ́t pɛ́ lɔk ntɛ́ yi pɛ́ fúŋnɛ ŋɡɔ kɑlsɛdɔnî, mbɑ́ɑtɛ yɛ́nɛ́kwɑ pɛ́ lɔk ntɛ́ yi pɛ́ fúŋnɛ ŋɡɔ Ɛmɛlɔd,

²⁰ mbɑ́ɑtɛ yɛ́tɑɑ pɛ́ lɔk ntɛ́ yi pɛ́ fúŋnɛ ŋɡɔ sɑldwɑnɛ, mbɑ́ɑtɛ yɛ́nɛ́ntúkú pɛ́ lɔk ntɛ́ yi pɛ́ fúŋnɛ ŋɡɔ kɔlnɑlinɛ, mbɑ́ɑtɛ sɑɑmbɑ́ pɛ́ lɔk ntɛ́ yi pɛ́ fúŋnɛ ŋɡɔ kɛlisɔlitɛ, mbɑ́ɑtɛ yɛ́nɛ́fɔ́m, pɛ́ lɔk ntɛ́ yi pɛ́ fúŋnɛ ŋɡɔ bɛlil, mbɑ́ɑtɛ yɛ́nɛ́pfúꞋú pɛ́ lɔk ntɛ́ yi pɛ́ fúŋnɛ ŋɡɔ tɔpɑzɛ, mbɑ́ɑtɛ nɛɡɛ́m pɛ́ lɔk ntɛ́ yi pɛ́ fúŋnɛ ŋɡɔ kɛlizɔpɛlɑzɛ, mbɑ́ɑtɛ ntsɔ̌pmɔꞋ nɛ́ nɛɡɛ́m pɛ́ lɔk ntɛ́ yi pɛ́ fúŋnɛ ŋɡɔ hyɑcɛŋtɛ, mbɑ́ɑtɛ ntsɔ̌ppɑ́ nɛ́ nɛɡɛ́m pɛ́ lɔk ntɛ́ yi pɛ́ fúŋnɛ ŋɡɔ ɑmɛ́tistɛ.

²¹ Mɛntsu-ŋkɑ́Ꞌ ntsɔ̌ppɑ́ nɛ́ nɛɡɛ́m kɑ pɔ́ mɛtúkcí ntsɔ̌ppɑ́ nɛ́ nɛɡɛ́m, mbɑ yɛ́tɛ́ ntsuŋkɑ́Ꞌ pɔ́, mbɔ pɛ́ kɑ lɔk pɔ tɑ́Ꞌ túkcí nǔu mîmɑ́ mɛntɛ́ ńniitɛ. Ndúŋ ɡwɛ́ ẅi ɛ́ lɛɛnɛ tsɛt tʉ́sɔŋ pɔ́, mbɔ pɛ́ lɔk ɡɔ̂l kɛ́ lɔ́Ꞌ ńdɔk ḿbɔ́ɔ, ɛ́ ŋwɑŋɛ ŋwɑŋɛ́nɛ pɑ́Ꞌ ŋɡɛlɑ́shi.

²² Lɑ́ ŋ kɛ́ ńdíŋɛ tʉ́sɔŋ tsʉʉ mbɔɔ ndɑ́-nɛnɔŋpɔꞋ zúꞋu jʉ́ɔ, mbíꞋŋɡɔ ndɑ́-nɛnɔŋpɔꞋ yɛ́ tʉ́sɔŋ ɛ̂yɑ́, ḿbɔ́ pɔ Tsɑpʉɔ Sɛ́, Ŋɡɑŋmɛtʉʉ tsʉʉ mbɑ Mɔ́ɔ-Njinjɔ.

²³ Nɛŋwɑ́ŋɛ-Sɛ́ pɔ́ ŋ́kyɛꞋ yîyɑ́ tʉ́sɔŋ, kyɛꞋ-mɔ́ɔ-Njinjɔ pɛn ḿbɔ́ ŋ́kyɛꞋ wɛ́. Tɛ yîyɑ́ tʉ́sɔŋ pɔɔ pɛn ḿbɔ́ ńtsɑ́ɑ ŋɡɔ nɛm tɑ́Ꞌ zúꞋu pɔ́, ŋ́kɛ́ ḿbɔɔ ḿbɔ́ ńtsɑ́ɑ ŋɡɔ sɑŋ kyɛꞌ zʉꞋ zúꞋu pɔ́.

²⁴ Ŋɡɔŋ nɛ́ ŋɡɔŋ ɡʉ ŋ́ɡɛ ńdɔk pɔ kyɛꞌ yi ɛ́ fúnɛ nǔu wɛ́ ńnɑ́ŋ. Pɛfɔɔ pi pɔ́p ndǔ tsɛ́tsɑ́Ꞌ lɔk wɔp nɛɡúꞋ ńdɔk ńtɔ́ ńnɔŋ zúꞋu.

²⁵ Mɛntsu-ŋkɑ́Ꞌ ɡʉ ŋ́kɛ́ ŋ́ŋíɛꞋnɛ ńtʉ́ʉ tʉ́ʉnɛ ŋkɑ́ tsʉʉ. Pɛ́ pɔɔ lɑ́Ꞌ ńjʉ́ɔꞋ pɔ́, mbíꞋŋɡɔ túꞋ lɔɔ ɛ́sʉ́ʉ zúꞋu pɔ́.

²⁶ Pɛ́ ɡʉ ńdɑ́Ꞌ ńdɔk nɛɡúꞋ pɔ́p mɛkuꞋ ńtúu mɛtúu tsʉʉ, pɔ́p lɔk ńtɔ́ ńnɔɔ zúꞋu.

²⁷ Lɑ́ yɛcɔ́ yúu mi ntsɛ́llɛ́ nǔu, kɛ́ ɡɛ ńdɛɛ tɛ ŋ́kúu zúꞋu pɔ́. Tɛ mbɑ sɑ̌ɑ ŋu ɑ nǔu pɑɡɛ mɛnu ndǔmbí, mbɑ nǔu ɡɑŋcɔtnu. NdɑꞋ pʉɔ pi mɛlík mɔ́p tsɛt ŋwɑꞋnɛ-Mɔ́ɔ-Njinjɔ yi lík-pʉɔ pí pɔ́p ɡẅɛɛnɛ luk kɛ́mɛ tsɛtú, ɡʉ ńdɑ́Ꞌ ŋ́kúu zúꞋu.