Mɛnu ɛ́ ńdɑ́Ꞌ ńcẅɛt 20 - Kɑɑ Fí

Nɛfɔɔ-ŋɡuꞋ ntsɑ́Ꞌ

¹ M bɛn ńjʉ́ɔ wɛcɔ́ cʉ̈ɔ́Ꞌ-Sɛ́ fú tʉ́nɛ́pú ḿbɔ́ ḿpfúu, ŋ́ɡẅɛɛ tsɔ́Ꞌ lɔk ńtsɔ́Ꞌ ntsu-nɛpʉ́ kɛ́ ndúŋ, ḿbɛn ŋ́ɡẅɛɛ wɛcɔ́ mɑ́mɑ́ cɛ̂n mbɔ́ wɛ́.

² A ɡẅɛɛ mɑ́mɑ́ nɔ́nɛŋɡɛ́m wɑ́, jʉ́ wɑ́ ẅi ɑ nɔ́ wɑ́ ẅi ɑ kɑ fúnɛ tɛ ŋkɑ́mbi lɑ́, jʉ́ ẅi ɑ dɛɛbɛlɛ, ḿbɛn ḿbɔ́ Sɑ́ttɑ lɑ́, ńdɔk cɛ̂n ɛ̂yɑ́ ŋ́kút wɛ́ pɑ́Ꞌ ɑ ɡʉ ŋ́kɛ́ ḿbɔ́ pɔ mɛŋkʉ nǔu ŋɡuꞋ ntsɑ́Ꞌ.

³ Ŋ́ɡɔ́ɔ ŋ́kɛ́ ńjɛ́Ꞌ wɛ́ ḿmɑꞋ tsɛt nɛpʉ́ kɛ́ ndúŋ, ńdɔk mɑ́jɔ́Ꞌ ńjʉ́ɔꞋ wɛ́ tsɛtú, ńnɑŋ nɛ́ ŋɛmɛ-ŋwɑ́Ꞌ nɛpɔ́ yi ɑ kɛ́ pɛn ńjúk tsɛt mɛŋɡɔŋ mɛŋɡɔŋ ɛ́fúklɛ pʉɔ pɔ́ tɛ ŋɡuꞋ ntsɑ́Ꞌ lɑ́Ꞌ ŋ́kuꞋ. Lɛ́Ꞌ ḿbɔ́ tɛ ŋ́kuꞋ, pɛ́ nɑꞋ ŋ́kíɛꞋ wɛ́ nǔu mɔ́ɔ mɔ̂ŋkɑ́.

⁴ M bɛn ńjʉ́ɔ mɛkɔꞋ-nɛfɔɔ tʉ́ʉtɛ. Pʉɔ tɔ́ ńnɑ́ŋtɛ ndǔ. Ḿbɔ́ pʉɔ pɛ́ ɡɑ́nɛ mɛtʉʉ mbɔ̌ pɔ́p nɛlɔk ńzɑ́Ꞌ ntsɑŋ. N jʉ́ɔ mbɑ mɛtʉ́m-pʉɔ pí pɛ́ kɑ ɡẅɛɛnɛ wɔ́p ńzɑ́Ꞌ mɛtú mɔ́p, ntɛ́ pɑ́Ꞌ pɔ́p jí yɔ́p pɔ ndɑꞋ nu yí Yɛ́su kɑ ɡɛnɛ pɛ́ jí, mbɑ nu-Sɛ́. Mbɔ pɔ́p ŋkɑɑ ɡúꞋlɛ ŋkʉꞋnɛ nɑɑ pɔ́, ŋ́kɛ́ mbɔɔ tɛ́tɔ́k wɛ ɡúꞋlɛ, lii-nɑɑ ɛ̂wɑ́ pɛn mbɔɔ nǔu nɛzíi nɔ́p kɛ nǔu pɔ́ yɔ́p pɔ́. Pɔ́p fú lɑ́Ꞌ-pɛpfú ḿbɛn nzʉʉ, ḿbɛn ḿbɔ́ zúꞋu, pɔ́p pɛ́ Kɛlístɔ tɛmtɛ ɛ́sɑ́Ꞌ mbí nǔu ŋɡuꞋ ntsɑ́Ꞌ.

⁵ Pɛcɔ́ pɛpfú kɛ́ mbɔɔ fú lɑ́Ꞌ-pɛpfú ḿbɛn nzʉʉ ḿbɛn ḿbɔ́ ɡú kɛ́ pɔ́ yi yîyɑ́ ŋɡuꞋ ntsɑ́Ꞌ kuꞋ pɔ́.

⁶ Pɛpɔ́ttú, pʉɔ pí pɔ́p ɡʉ zẅíimɛ nǔu nɛvú nǔu nduŋmbi nɛzẅíimɛ, ɛ́ pʉɔ pí pɔ́p kwɑꞋ pɛ́ Sɛ́. Nɛvú wɛ mbɑ́ɑtɛ yɛ́pɑ́ pɔɔ pɛn ŋ́kuꞋ nɛɡẅɛɛ wɔ́p pɔ́. Pɔ́p ɡʉ ŋ́ɡɛ ḿbɔ́ pɑnɔŋpɔꞋ-Sɛ́, mbɑ pɛ́ Kɛlístɔ, pɔ́p pɛ́ Kɛlístɔ sɑ́Ꞌ mbí nǔu ŋɡuꞋ ntsɑ́Ꞌ.

Ntsɔ ɡwɑt Sɑ́ttɑ

⁷ MɛŋɡuꞋ ntsɑ́Ꞌ ɛ̂mɑ́ ɡʉ ŋ́ɡɛ ḿbɔ́ tɛ kuꞋ, pɛ́ ɡʉ tsɛt ndɑ́tsɑ́ŋ yi Sɑ́ttɑ tsɛtú lɑ́, ŋ́kíɛꞋtɛ mɛcɛ̂n nǔu wɛ́, ńnɑ́ wɛ́.

⁸ A cẅɛt, nɛjúk ɛ́fúklɛ pʉɔ pí pɔ́p tsɛt mɛŋɡɔŋ mɛŋɡɔŋ, ndǔ mbí mɛsɑ́k mɛ́nɛ́kwɑ. Pɛ́ fúŋ mɔnɛ mɛŋɡɔŋ ŋɡɔ Ŋɡɔ́k ḿbɛn ɛ́fúŋ ŋɡɔ Mɑŋɡɔ́k, ɛ́fúklɛ wɔ́p pɔ́Ꞌɔ, ńcúꞋlɛ wɔ́p nɛlɔk ŋ́ɡʉ ḿmɑꞋ ntsɔ. Pɔ́p zɑ́ɑ pɑ́Ꞌ mɛmbɑŋ-sɑŋsɑ́ŋ mi ɛ́ mbʉʉ-ŋki kɛ́ nɛpɑt lɑ́.

⁹ Pɔ́p kɑ puu ńjʉ́ zʉꞋ tsʉʉ ndǔ tsɛ́tsɑ́Ꞌ, ńzɛmɛ mbɑ zʉꞋ yí pʉɔ-Sɛ́ cúꞋlɛ́nɛ ńnɑ́ŋ zúꞋu, ɛ́ pɔ́ tʉ́sɔŋ yí Sɛ́ kɔŋnɛ tɛꞋ. Lɑ́ wɛcɔ́ múk kɛ́ ɛ́fú tʉ́nɛ́pú, ńtɔ́ ńtɔɔ wɔ́p.

¹⁰ Sɑ́ttɑ ẅí ɑ kɑ pɔ́ ɛ́fúklɛ wɔ́p lɑ́, pɛ́ tsʉ́ʉ wɛ́ ḿmɑꞋ tsɛt ɡʉ́ɔ múk ntʉʉ, nɛjɔ́ŋ ŋkʉꞋnɛ nɑɑ mbɑ nɛjɔ́ŋ ŋɡɛ́mndʉ̈ɔ́Ꞌ-Sɛ́ wɛ cɔtnu. Pɔ́p lɑ́Ꞌ ńtswɛ́ zúꞋu, ńjʉ́ɔ ŋɡʉ̈ɔ́Ꞌ ntɛ́ nɛ́ ntɛ́, nɛnɛm pɔ́p nɛtúꞋ, nǔu mɛŋɡuꞋ mɛŋɡuꞋ.

Sɛ́ ŋ́ŋɑk pʉɔmɛsɔŋ nǔu ndẅiknzʉʉ ŋkɑ́

¹¹ M bɛn ńjʉ́ɔ yɛcɔ́ mɑ́mɑ́ kɔꞋ-nɛfɔɔ tʉ́ʉ, ḿbɔ́ fúfú, n jʉ́ɔ mbɑ ŋu ẅí ɑ nɑ́ŋnɛ ndǔ. Tsɛ́tsɑ́Ꞌ pɔ́p nɛfɑŋ puu ɛ́fú mbi yɛ́ ŋ́kʉɔ. Yɔ́p zʉꞋ pɔɔ pɛn ḿbɔ́ zúꞋu pɔ́.

¹² M bɛn ńjʉ́ɔ pɛpfúsɛ́, pɛ pɛlʉ́m mbɑ mbɔ́ŋkʉ̈ɔ́, pɔ́p tʉ́ʉtɛ mbi kɔꞋ-nɛfɔɔ. M bɛn ńjʉ́ɔ pɑ́Ꞌ pɛ́ ŋíɛꞋnɛ mɛŋwɑꞋnɛ. Pɛ́ ɡɛ ḿbɛn ŋ́ŋíɛꞋ yɛcɔ́, ɛ́ pɔ́ yi pɛ́ kɑ ŋwɑꞋnɛ́nɛ mɛlík-pʉɔ pí pɔ́p ɡẅɛɛnɛ luk kɛ́mɛ tsɛtú. Pɛ́ lɔk yúu mi pɛ́ kɑ ŋwɑꞋnɛnɛ tsɛt mɛŋwɑꞋnɛ ŋ́ŋɑk pɛpfúsɛ́, ŋ́ŋɑk wɔ́p pɔ pɑ́Ꞌ mɛfɑꞋ mɔ́p kɑ pɔ́nɛ.

¹³ Ŋki kɛ́ nɛpɑt ɡɑ́ mɛpfú pʉɔ pí pɔ́p kɑ fʉ̈ɔ́tnɛ ŋki. Nɛvú mbɑ lɑ́Ꞌ-pɛpfú pɛn ŋ́ɡɑ́ mɔ́p mɛpfú, pɛ́ ŋɑk mbɑ wɔ̌ lɑ́ nǔu pɑ́Ꞌ mɛfɑꞋ mɛ́ kɑ pɔ́nɛ.

¹⁴ Pɛ́ ɡɔ́ɔ ŋ́kɛ́ ńjɛ́Ꞌ nɛvú mbɑ lɑ́Ꞌ yi pɛpfú zúꞋu, ḿmɑꞋ tsɛt nɛpʉ́-múk. Nɛpʉ́-múk ɛ̂nɑ́ lɔk ḿbɔ́ nɛvú mbɑ́ɑtɛ yɛ́pɑ́.

¹⁵ Wɔ̌ lɑ́ ẅi pɛ́ ŋkɑɑ jʉ́ɔ lík yɛ́ tsɛt ŋwɑꞋnɛ yí mɛlík-pʉɔ pí pɔ́p ɡẅɛɛnɛ luk kɛ́mɛ tsɛtú pɔ́, pɛ́ mɑꞋ wɛ́ tsɛt nɛpʉ́-múk.