Mɛnu ɛ́ ńdɑ́Ꞌ ńcẅɛt 18 - Kɑɑ Fí

Nu nǔu pɑ́Ꞌ Mbɑbilɔ̂nɛ kɑ vunɛ

¹ N jʉ́ɔ mɔnɛ mɛyúu tɛ ḿbɔ́tnɛ ńnɑ́ŋ, n jʉ́ɔ wɛcɔ́ Cʉ̈ɔꞋ-Sɛ́ fú tʉ́nɛ́pú ńcúŋ, mɛ́ mɛtʉʉ ɡúꞋ tɛꞋ, wɛ nɛŋwɑ́ŋɛ pûu ŋ́kyɛꞋ tsɛ́tsɑ́Ꞌ tsʉʉ.

² A lɔk ŋɡi tɛnnɛ ńcú ŋɡɔ: «A vu sɛ́. N cú ŋɡɔ ɑ vu sɛ́. N dɑꞋ mɑ́mɑ́ tʉ́sɔŋ-Mbɑbilɔ̂nɛ. Mbɑbilɔ̂nɛ tsʉ́Ꞌ lɑ́ njɛ́Ꞌ-mɛzẅikŋɛ kɛpɔŋ, ńtsʉ́Ꞌ ŋkɑɑ-mɛzẅikŋɛ kɛpɔŋ tsʉʉ, mbɑ yɛ́ pɛshʉ́ŋ pi nji nǔu pɔ́p nɛkwɛ́t, pɛ́ pɛn mbɔɔ wɔ́p kɔŋ,

³ ḿvu sɛ́ pɔ́Ꞌɔ, mbíꞋŋɡɔ, mɛŋɡɔŋ tsʉʉ nɔ́ mɔ́ mɛluꞋ-mpfuꞋ ɛ̂mɑ́ tɛꞋ, mbíꞋŋɡɔ pɔ́p pɛfɔɔ ndǔ tsɛ́tsɑ́Ꞌ kɑ ɡɛ mɔ́ mpfuꞋ, mbɑ pɑ́Ꞌ pɑtɑ́ŋ mɛntɑ́ɑ pi pɔ́p ndǔ tsɛ́tsɑ́Ꞌ tsʉꞋ ɡɑŋŋkɑ́p, mbíꞋ pɑ́Ꞌ ɑ kɑ ɡẅɛɛnɛ-yúu-kẅii ɛ́ zɑ́ɑ tɛꞋ.»

⁴ N zúꞋ yɛcɔ́ ŋɡi fú tʉ́nɛ́pú ḿbɔ́ ńcú ŋɡɔ: «Pʉɔ pɑ́ɑ, pʉʉ fú tsɛt wɔ tʉ́sɔŋ ńcẅɛt, ḿbɔ́k wʉ́ʉ nɛɡɛ mɛnu kɛpɔŋ pɑ́Ꞌ jʉ́, ńjí ŋɡɔ ŋɡʉ̈ɔ́Ꞌ ntɛ́ nɛ́ ntɛ́ yi ɛ́ ɡʉ ŋ́kúu nǔu wɛ́ ɛ́ kɛ́ kúu wʉ́ʉ pɔ́.»

⁵ Ŋɡʉ̈ɔ́Ꞌ ntɛ́ nɛ́ ntɛ́ ɡʉ ŋ́kúu wɛ́, mbíꞋŋɡɔ ɑ kɑ kɛ́ mɔ́ ńtsup mɛnu kɛpɔŋ nǔu mɛcɔ́ tsupnɛ tɛ ɛ́ kɔ́Ꞌ tɛ ŋ́kúu tʉ́nɛ́pú. Mbɑ pɑ́Ꞌ Sɛ́ kɑ kɛ́ ŋ́kẅíitɛ mɛnu kɛpɔŋ mɛ́ mi ɑ ɡɔ́ ŋ́ɡɛ, ɛ́ pɔɔ tʉ́ʉ ndʉ́ŋndʉŋ pɔ́.

⁶ Pʉʉ pɛn ŋ́ɡɛ nǔu wɛ́ pɑ́Ꞌ ɑ kɑ zɛɛnɛ ŋ́ɡɛ yɛ́ nǔu pɛcɔ́ pʉɔ. Pʉʉ tsʉ́Ꞌ nɛɡɛ, yúu mi ɑ kɑ ɡɛnɛ nǔu pɛcɔ́ pʉɔ tɑ́Ꞌ ŋkɑ́, pʉʉ ɡɛ nǔu wɛ́ ŋkɑ́ yɛ́pɑ́. NtúꞋ yi ɑ kɑ níꞋnɛ mɛluꞋ tɛnnɛ tsɛtú, ŋ́ɡɑ́ mbɔ̌ pɛcɔ́ pʉɔ, pʉ́ʉ níꞋ mɛ́ tsɛtú ɛ́ pɔ́ mi ɛ́ tɛnnɛ ńdɛɛ mîmɑ́ ŋkɑ́ yɛ́pɑ́.

⁷ Ɛ́ lɑɑ ḿbɔ́ yi ɑ kɑ ɡúꞋ ŋɡɔ́ku lɑ́, ḿbɔ́ tsɛt yúu-mɛsuu ŋɡɔ́ku lɑ́, pʉʉ ɡɑ́ yɛ́ ŋɡʉ̈ɔ́Ꞌ pɔ ndɛnnú, ḿbɛn ŋ́ɡɛ ɑ lɑɑ nɛvú pɔ ndɛnnú. MbíꞋŋɡɔ ɑ kɑ pɔ́ ńcú tsɛt tʉ́m yɛ́ ŋɡɔ: A nɑ́ŋ ndǔ kɔꞋ-pɛmɑ́ɑ, ŋɡɔ ɑ kɑ́ pɔ́ mpfúk pɔ́, ŋɡɔ ɑ kɛ́ lɑ́Ꞌ yɛcɔ́ lɛ́Ꞌ lɑ ńdɑɑ nɛvú pɔ́,

⁸ pɑ́Ꞌ ɑ kɑ pɔ́ ńcú pɔ́Ꞌɔ lɑ́, ŋɡʉ̈ɔ́Ꞌ ntɛ́ nɛ́ ntɛ́ yi pɛ́ kɑ niitɛ́nɛ mbíꞋ wɛ́, ɡʉ ńtɔ́ nǔu wɛ́ pɔ tɑ́Ꞌ lɛ́Ꞌ, ḿbɔ́ nɛpfú, ḿbɔ́ nɛlɑɑ nɛvú, ḿbɔ́ cʉ́, pɛ́ pɛn ńdɔk múk ńtɔɔ wɛ́. MbíꞋŋɡɔ Tsɑpʉɔ Sɛ́ ẅí ɑ ŋ́ŋɑk wɛ́, ɡẅɛɛ mɛtʉʉ.

⁹ Pɔ́Ꞌɔ lɑ́, pɛfɔɔ pínɛ pɔ́p ndǔ tsɛ́tsɑ́Ꞌ tsʉʉ, pi pɔ́p pɛpɔ́p kɑ pɔ́ ńjúk ŋ́ɡɛ mpfuꞋ, ńjúk ŋ́ɡẅɛɛ yúu-mɛsuu, pɔ́p kʉ́ɔꞋ nɛvú ńdɑɑ wɛ́, ŋkɑ́ yi pɔ́p ɡʉ ŋ́ɡɛ ńjʉ́ɔ ndíndí-múk kɔ́Ꞌ, ɑ pɔ́ ɛ́shí.

¹⁰ Pɔ́p ɡʉ ŋ́ɡɛ ńtʉ́ʉ pɔ tɛ ŋɡɑ sɛsɑ, mbíꞋŋɡɔ pɔ́p sɛ́ ḿbɔ́k ŋɡʉ̈ɔ́Ꞌ yi ɛ́ ŋ́kúu wɛ́, ɛ́ pɔ́ ńcú ŋɡɔ: «Ɔ pɛ́ktú. Ɔ pɛ́ktú. Gu mɑ́mɑ́ tʉ́sɔŋ-Mbɑbilɔ̂nɛ. Ɔ kɑ pɔ́ ɡú tɛꞋ. Ndɔɔ yu ɡẅɛɛ wú, ɛ́ ɡʉ ŋ́ɡɔ ńdɛɛ tɑ́Ꞌ hɑ́wɑ mbɔ ɔ mɛ.»

¹¹ Pɑtɑ́ŋ mɛntɑ́ɑ pínɛ pɔ́p ndǔ tsɛ́tsɑ́Ꞌ ɡʉ ŋ́ɡɛ ḿbɔ́ ńdɑɑ ntɛ́ wɛ́, mbíꞋŋɡɔ pɛ́ kɑ́ pɛ́t ńzúu yúu mi pɔ́p lɔknɛ sɛtímɑ ńtíi ńdɔk ńtɔ́ pɔ́,

¹² ɛ́ yúu pɑ́Ꞌ tʉ́n-ŋɡɔ̂l, mbɑ tʉ́n-ŋkɑ́p. Yúu pɑ́Ꞌ mɛŋɡɔꞋ mi ɛ́ mɛ́ tʉʉndɛn, mbɑ mɛtúkcí, mbɑ mɛndẅí tʉʉndɛn, mbɑ mɛ pɛpɑŋ, mbɑ mɛndẅí mɛsɛlɛk, mbɑ mi ɛ́ pɑŋ ŋɡɔ ɡʉ̂ŋ, mɛpɛlɑ́ŋ mi ɛ́fú nǔu yɛcɔ́ ntɛ́ tʉ́ yi pɛ́ lɔɔ fɛ́Ꞌnɛ ńjʉ́ɔ pɔ́, mbɑ yɛ́tɛ́ ntɛ́ yúu mi pɛ́ kɑ lɔknɛ nɛsɔŋ-shʉ̈ɔ́ ńniitɛ, mbɑ yɛ́tɛ́ ntɛ́ yúu mi pɛ́ lɔk tʉ́ yi ndɛn nǔu tɛꞋ ńniitɛ, mbɑ yi pɛ́ lɔknɛ tʉ́n-Mbɛlɔŋzɛ ńniitɛ, mbɑ yi pɛ́ lɔknɛ kwɑꞋ tʉ́n ńniitɛ, mbɑ yi pɛ́ lɔknɛ yɛcɔ́ ntɛ́ ŋɡɔꞋ yi pɛ́ fúŋnɛ ŋɡɔ mɑ̂bɛlɛ ńniitɛ.

¹³ Yúu pɑ́Ꞌ yɛcɔ́ ntɛ́ yúu-nɑ́Ꞌ pɑ́Ꞌ yi pɛ́ fúŋnɛ ŋɡɔ kɑnɛl mbɑ lɑmɛ́ndɑɑ ntɛ́ nɛ́ ntɛ́, nɛ́ lǐi nɛ́ mɛcɔ́ mɛyúu mi pɛ́ tɔɔnɛ, nɛ́ mɛluꞋ, nɛ́ mɛɡwɛ́t, nɛ́ fɑlîn ntɛ́ nɛ́ ntɛ́, nɛ́ pɛfɔŋ, nɛ́ mɛnjinjɔ, nɛ́ pɛlʉ̈ɔ́ nɛ́ mɛkɑ́lɛk, pɔ́p puꞋ zúu zúunɛ mbɑ wɛ ntsɔ.

¹⁴ Pɑtɑ́ŋ mɛntɑ́ɑ pɔ́ ńcú nǔu tʉ́sɔŋ ŋɡɔ: «Yúu mi ɔ kɑ pɔ́ ńtsɑ́ɑ nɛɡẅɛɛ shí njɛ́Ꞌ ɡu tɛ ḿmɛ. Yúu tsʉʉ yi ɔ kɑ ɡẅɛɛnɛ, ɛ́ pɔ́ yi pɛ́ lɑɑ ŋ́ɡẅɛɛ kɛpɔŋ ɛ́ pʉ́ʉpɛ, mbɑ mi ɛ́ nɑ́ŋ nɑ́ŋnɛ, ɛ́ mɛ mbɔ̌ ɡu, pɛ́ pɛn mbɔɔ lɑ́Ꞌ ḿbɛn ńjʉ́ɔ mîmɑ́ mɛyúu pɔ́.»

¹⁵ Pɑtɑ́ŋ mɛntɑ́ɑ pi pɔ́p kɑ fɛnnɛ yɔ́p yúu-mɛtɑ́ɑ mbɔ̌ wɛ́ lɑ ńdɔk ńtsʉ́Ꞌ ɡɑŋŋkɑ́p ɡʉ ŋ́ɡɛ ńtʉ́ʉ pɔ ŋɡɑ sɛsɑ, ḿbɔ́ ḿbɔ́k ŋɡʉ̈ɔ́Ꞌ yi ɛ́ kúunɛ wɛ́, ḿbɔ́ ŋ́kʉ́ɔꞋ nɛvú,

¹⁶ ḿbɔ́ ńcú ŋɡɔ: «Ɔ pɛ́ktú. Ɔ pɛ́ktú. Gu mɑ́mɑ́ tʉ́sɔŋ ẅí ɔ ḿbɔ́ ḿmɑꞋ ndẅí tʉʉndɛn, ḿmɑꞋ mi ɛ́ pɑŋ pɑŋnɛ, nɛ́ mi ɛ́ pɑŋnɛ ŋɡɔ ɡʉ̂ŋ, ńdɔk yúu tʉ́n-ŋɡɔ̂l ŋ́kẅii mbʉʉ yu, mbɑ mɛŋɡɔꞋ mɛ́ tʉʉndɛn, mbɑ mɛtúkcí, pɛ́ lɔk pɔ tɑ́Ꞌ nɛm wɛ́mɔ́Ꞌ ḿbʉ́ʉpɛ fuꞋ tsʉʉ yi ɛ́ kɑ pɔ́nɛ mbɔ̌ ɡu.»

¹⁷ Ŋɡɔŋ pʉɔ tsʉʉ pínɛ pɔ́p shuŋnɛ pɛsɛtímɑ, ŋɡɔŋ pɑkúu sɛtímɑ ńdɔk ŋ́ɡʉ zʉꞋ, ŋɡɔŋ pɑfɑꞋ fɑꞋ tsɛt sɛtímɑ, ŋɡɔŋ pɑnɛn tsɛt ŋki ńtɑ́ŋ mɛntɑ́ɑ, tʉ́ʉ pɔ ŋɡɑ sɛsɑ,

¹⁸ ḿbɔ́ ńjʉ́ɔ ndíndí-múk ẅi ɛ́ fúnɛ nǔu tʉ́sɔŋ pɑ́Ꞌ ɛ́ sɛ́ ɛ́shí, pɔ́ ŋ́ɡɑ́ ɡwɑ́t ńcú ŋɡɔ: «Yɛ́tɛ tʉ́sɔŋ kɑ pɔ́ yi ḿbɔ́ ɛ́ pɔ́ pɑ́Ꞌ mɑ́mɑ́ tʉ́sɔŋ wɔ?»

¹⁹ Pɔ́p kɑ pɔ́ ŋ́ŋwɑt pɛ́pɛ́p ńdɔk ńzɔ́ꞌ tú yɔ́p, ḿbɔ́ ŋ́kʉ́ɔꞌ nɛvú ŋ́ɡɑ́ ɡwɑ́t ńdɑɑ ńcú ŋɡɔ: «Ɔ pɛ́ktú. Ɔ pɛ́ktú. Gu mɑ́mɑ́ tʉ́sɔŋ ẅí ɔ kɑ ɡẅɛɛnɛ ŋkɑ́p tɛꞋ, ḿbɛn ḿbɔ́ ńzúꞋ sʉ́Ꞌnɛ, ḿbɛn ŋ́ɡɛ pʉɔ pi pɔ́p ɡẅɛɛnɛ sɛtímɑ tsɛt ŋki kɛ́ nɛpɑt tsʉ́Ꞌ pɛɡɑŋŋkɑ́p, ɛ́ pʉɔ́lɑ́, mbɔ ɔ lɔk pɔ tɑ́Ꞌ nɛm wɛ́mɔ́Ꞌ ńtsʉ́Ꞌ kɔ̂ŋtɛt lɑ́.»

²⁰ Pʉʉ tʉ́nɛ́pú, pʉʉ tsɑ́ɑtɛ tsɑ́ɑtɛ́nɛ mbíꞋ pɑ́Ꞌ Bɑbilɔ̂n vunɛ sɛ́. Mbɑ pʉʉ pʉɔ-Sɛ́, pʉʉ ɡɑŋntúu nɛ pɑcẅiŋkʉʉ-Sɛ́, pʉʉ tsɑ́ɑtɛ yʉ́ʉ. MbíꞋŋɡɔ Sɛ́ ŋɑk wɛ́ nǔu nu kɛpɔŋ yi ɑ kɑ ɡɛnɛ nǔu pʉʉ.

²¹ Wɛcɔ́ Cʉ̈ɔꞋ-Sɛ́ ẅi ɑ ɡẅɛɛnɛ mɛtʉʉ tɛꞋ ɡɔ́ɔ ŋ́kɛ́ ńtíi wɛcɔ́ mɑ́mɑ́ ŋɡɔꞋ, ɛ́ jɔt pɑ́Ꞌ luŋ-ŋɡɛsɑ́ŋ lɑ́, ŋ́ɡɔ ńjɛ́ꞌ ḿmɑꞋ tsɛt ŋki kɛ́ nɛpɑt, ḿbɔ́ ńcú ŋɡɔ: «Ɛ́ lɑɑ ḿbɔ́ yi pɛ́ ńjɛ́ꞌ yɔ ŋɡɔꞋ ḿmɑꞋ, ɛ́ vu ŋki nɛ́ tʉʉ ŋɡɔ́ku ɔɔ, mbɔ ɛ́ ndʉ́ŋndʉŋ pɑ́Ꞌ pɛ́ ɡʉ ŋ́ɡɛ ńjɛ́ꞌ wú Mbɑbilɔ̂nɛ, mɑ́mɑ́ tʉ́sɔŋ, ḿmɑꞋ, ɔ vu yú pɔ́Ꞌɔ. Pɛ́ pɛn mbɔɔ lɑ́Ꞌ ḿbɛn ńjʉ́ɔ wú pɔ́.»

²² Pɛ́ ńdɑ́Ꞌ ḿbɛn ńzúꞋ ŋɡi pɑpúꞋ yɛcɔ́ ntɛ́ nɛlúŋ njɛ́Ꞌ ɡu pɔ́, ŋ́kɛ́ ḿbɔɔ yɛ́ pɑpúꞋ nɛlúŋ nɛ́ yɛ́ pɑtɔ́ŋ mɑndɛ́lɛ mbɑ yɛ́ pɑtɔ́ŋ ntɑŋ njɛ́Ꞌ ɡu pɔ́. Pɛ́ pɔɔ pɛn ńjʉ́ɔ wɛcɔ́ niitɛyuu nɛ́ mbɔ́ njɛ́Ꞌ ɡu pɔ́. Tɛ mbɑ ẅi ɑ fɑꞋ pɔ mbɑ yɛ́tɛ́ fɑꞋ lɑ́. Pɛ́ pɔɔ pɛn ńzúꞋ pɑ́Ꞌ pɛ́ lɔk luŋ ŋ́ɡɔꞌ yúu njɛ́Ꞌ ɡu pɔ́.

²³ Kyɛꞌ yi ɛ́ fúnɛ nǔu lɑ̂m ɛ́ ńdɑ́ꞌ ḿbɛn ŋ́kyɛꞋ zʉꞋ njɛ́Ꞌ ɡu pɔ́. Pɛ́ kɛ́ ḿbɔɔ pɛn ńzúꞋ ŋɡi ndúu-nzwɛ́ŋɡʉʉ pɔ́, ŋ́kɛ́ ḿbɔɔ yɛ́ nzwɛ́ŋɡʉʉ zúꞋ. Pɛ́ pɔɔ zúꞋ pɔ́ꞌɔ pɔ́, mbíꞋŋɡɔ pʉɔ pí pɔ́p kɑ pɔ́ ńtɑ́ŋ mɛntɑ́ɑ ɡu, pɔ́p kɑ pɔ́nɛ pɛmɑ́pʉɔ ndǔ tsɛ́tsɑ́Ꞌ. Ɔ lɔk mɛkɑŋ mú ńdẅɑklɛ mɛŋɡɔŋ tsʉʉ.

²⁴ Mbɑ mbíꞋŋɡɔ pɛ́ kɑ tɔ́ njɛ́Ꞌ ɡu, ńjʉ́ɔ mɛci-pɑcẅiŋkʉʉ-Sɛ́, ńjʉ́ɔ mɛ́ pʉɔ-Sɛ́ mbɑ mɛ́ pʉɔ tsʉʉ pi pɛ́ kɑ jẅítɛ́nɛ wɔ́p ndǔ tsɛ́tsɑ́Ꞌ.