Mɛnu ɛ́ ńdɑ́Ꞌ ńcẅɛt 15 - Kɑɑ Fí

Nu-pɛcʉ̈ɔ́Ꞌ-Sɛ́ sɑɑmbɑ́ mbɑ yɛ́ ndẅiknzʉʉ ŋɡʉ̈ɔ́Ꞌ

¹ M bɑ́ɑtɛ ńjʉ́ɔ yɛcɔ́ yúu pɛn ńcẅɛt nɛfɑŋ, ḿbɔ́ ɡú tɛꞋ, ḿbɔ́ yi ɛ́ ŋ́ɡɛ pɛ́ vukŋɛ vukŋɛnɛ, ɛ́ pɔ́ Pɛcʉ̈ɔ́Ꞌ-Sɛ́ sɑɑmbɑ́. Pɔ́p tʉ́ʉtɛ ŋ́ɡẅɛɛ mɛŋɡʉ̈ɔ́Ꞌ mɛntɛ́ sɑɑmbɑ́ mi ɛ́ ɡʉ ŋ́kúu nǔu pʉɔmɛsɔŋ, ɛ́ lɔk ḿbɔ́ mɛlẅiknzʉʉ ŋɡʉ̈ɔ́Ꞌ, mbíꞋŋɡɔ lɔ́ŋ-Sɛ́ ɡʉ ŋ́ɡɛ ŋ́ɡɔ ḿbɔ́tnɛ, mbɔ yîyɑ́ ŋɡʉ̈ɔ́Ꞌ lɛɛ mɔ́.

² M bɛn ńjʉ́ɔ yɛcɔ́ ntɛ́ tɛtɑ́ɑ, ɛ́ sɑŋtɛ pɑ́Ꞌ ŋki kɛ́ nɛpɑt, ḿbɔ́ síi pɔ pɑ́Ꞌ yɛcɔ́ ntɛ́ ŋɡɔꞋ yi pɛ́ fúŋnɛ ŋɡɔ Kɛlistɑl lɑ́. Ɛ́ ḿbɔ́ pɔ pɑ́Ꞌ ŋkɑ́ yi múk tsɛtú ḿbɔ́ ŋ́kyɛꞋ zʉꞋ lɑ́. Pʉɔ tʉ́ʉtɛ ndǔ, ḿbɔ́ pʉɔ pi pɔ́p mɑꞋnɛ ntsɔ tɛ ńdɛɛ ŋkʉꞋnɛ nɑɑ, pʉɔ pí pɔ́p ŋ́kɑɑ tɛ́tɔ́k wɛ ɡúꞋlɛ, ŋ́kɛ́ mbɔɔ pɛ́m pɛ́ ŋwɑꞋnɛ mɛnɔ́mbɑɑ mí ɛ́ lɛ́Ꞌlɛ́nɛ lík yɛ́ nǔu pɔ́p pɔ́. Pɛɡɑŋ ɡẅɛɛ mɛcɔ́ mɛntɛ́ nɛlúŋ mbɔ́ pɔ́p, ɛ́ pɔ́ mi Sɛ́ kɑ ɡɑ́nɛ mbɔ̌ pɔ́p.

³ Pɔ́p pɔ́ ńzɔp mɛzɔpŋki mi Mɔ̌sɛ̂ɛ ŋɡɑŋfɑꞋ-Sɛ́ kɑ zɔpnɛ, ḿbɛn ḿbɔ́ ńzɔp mi Mɔ́ɔ-Njinjɔ kɑ zɔpnɛ, ḿbɔ́ ńcú tsɛt mîmɑ́ mɛzɔp ŋɡɔ: «Tsɑpʉɔ Sɛ́ Ŋɡɑŋmɛtʉʉ tsʉʉ, mɛfɑꞋ mú ɡúꞋ tɛꞋ, pɛ́ jʉ́ɔ ḿvukŋɛ vukŋɛnɛ. Gu Fɔɔ ẅí ɔ sɑ́Ꞌnɛ ŋɡɔŋ nɛ́ ŋɡɔŋ. Yúu mi ɔ kɑꞋnɛ nɛɡɛ ɛ́ ndʉ́ŋndʉŋ, ḿbɔ́ nu yi ɛ́ nɛ́nẅín.

⁴ Tsɑpʉɔ, mbɔ wɔ̌ nɑ́ kɛ́ pɔ́k wú? Mbɔ wɔ̌ nɑ́ kɛ́ ɡúꞋlɛ lík yú. NdɑꞋ ɡu pɔ́nɛ Ndɛ́ɛnɛ Lɛ́ɛnɛ́nɛ; Mɛŋɡɔŋ tsʉʉ ɡʉ ŋ́ɡɛ ńtɔ́ ŋ́kẅíꞋlɛ mbi ɡu mbíꞋŋɡɔ mbɑ wɔ̌ lɑ́ ńjʉ́ɔ mɛfɑꞋ mú pɑ́Ꞌ ɛ́ tʉ́ʉnɛ ndʉ́ŋndʉŋ.»

⁵ N jʉ́ɔ pɔ yúu tɛ ḿbɔ́tnɛ ńnɑ́ŋ, n jʉ́ɔ zʉꞋ-Sɛ́ tʉ́nɛ́pú, ntɑp ẅi ɛ́ nyɛtnɛ ŋɡɔ Sɛ́ tsɛtsɛt pʉɔ pɛ́, ŋíɛꞋnɛ ńtʉ́ʉ.

⁶ Pɛcʉ̈ɔ́Ꞌ-Sɛ́ sɑɑmbɑ́, pi pɔ́p kɑ ɡẅɛɛnɛ ŋɡʉ̈ɔ́Ꞌ mɛntɛ́ sɑɑmbɑ́ lɑ́, fú zʉꞋ-nɔŋpɔꞋ ńcẅɛt, ḿmɑꞋ fúfú ndẅí tʉʉndɛn, ɛ́ pɔ́ ŋ́ŋwɑŋɛ. Mbɔ pɔ́p lɔk yɛcɔ́ pɑ́ɑ-yúu, ŋ́kíꞋ nzɔꞋ yɔp, ɛ́ pɔ́ yi pɛ́ kɑ lɔk tʉ́n-ŋɡɔ̂l ńniitɛ.

⁷ Wɛcɔ́ tɑ́Ꞌ nǔu mɛyúumɛku mɑ́ mɛ́nɛ́kwɑ, ɡɑ́ mɛntúꞋ sɑɑmbɑ́ mbɔ̌ pɛcʉ̈ɔ́Ꞌ-Sɛ́ pɑ́ sɑɑmbɑ́. MɛntúꞋ ɛ̂mɑ́ pɔ́ mi pɛ́ kɑ lɔknɛ tʉ́n-ŋɡɔ̂l ńniitɛ, zɑ́ŋ lɔ́ŋ-Sɛ́ ẅí ɑ pɔ́nɛ ɡú nǔu mɛŋɡuꞋ mɛŋɡuꞋ pɔ́ tsɛt mɛntúꞋ ɛ̂mɑ́ tɛ ńdúu.

⁸ Mɛtʉʉ-Sɛ́ pɔ́p nɛɡúꞋ wɛ, ɡɛ ndíndí kúu tsɛt zʉꞋ yɛ́ tɛ ńdúu, tɛ wɛcɔ́ ŋu pɔɔ kuꞋ nɛkúu tsɛtú pɔ́, tɛ ńdɑ́Ꞌ ŋ́kúu ŋkɑ́ yi mɛntɛ́ ŋɡʉ̈ɔ́Ꞌ mɑ́ sɑɑmbɑ́ mi ɛ́ mbɔ̌ pɛcʉ̈ɔ́Ꞌ-Sɛ́ sɑɑmbɑ́ lɑ́, lɛɛnɛ tɛ ḿmɛ.