Mɛnu ɛ́ ńdɑ́Ꞌ ńcẅɛt 14 - Kɑɑ Fí

Zɔpŋki-pʉɔ pí Sɛ́ tsʉ́Ꞌnɛ wɔ́p

¹ N jʉ́ɔ pɔ yúu tɛ ḿbɔ́tnɛ ńnɑ́ŋ, ńjʉ́ɔ Mɔ́ɔ-njinjɔɔ, ɑ tʉ́ʉ ndǔ nɛŋkɔ́Ꞌ-Siyɔŋ. Pɔ́p pʉɔ ntsɑ́Ꞌ ŋkʉ nɛ́ ntsɑ́Ꞌ ntsɔ̌pɛ́nɛ́kwɑ nɛ́ mɛɡɛ́mɛ́nɛ́kwɑ pɔ́nɛ (144.000). Mbɔ pɛ́ kɑ ŋwɑꞋnɛ lík-Mɔ́ɔ-Njinjɔ mbɑ yɛ́ Tɑ́t wɛ nǔu nɛzíi nɔ́p.

² N zúꞋ yɛcɔ́ ŋɡi-ŋu fú tʉ́nɛ́pú, ḿpfúu pɑ́Ꞌ mɑ́mɑ́ ŋki ẅí ɛ́ sɛ́ ńjɛ́Ꞌ lɑ́, ḿbɛn ḿbɔ́ pɑꞋ nɛfɑŋ ni ɛ́ kwɛnɛ́nɛ lɑ́, ḿbɛn ḿbɔ́ pɑ́Ꞌ-ŋɡi nɛlúŋ ni pɑpúꞋ yɛcɔ́ ntɛ́ nɛlúŋ sɛ́ ḿbúꞋ lɑ́.

³ Pɔ́p tʉ́ʉ mbi kɔꞋ-nɛfɔɔ, mbɑ mbi mɛyúumɛku mɑ́ mɛ́nɛ́kwɑ mbɑ mbi pɛlʉ́m pîpɑ́, ḿbɔ́ ńzɔp yɛcɔ́ zɔp ŋki fí, ɛ́ pɔɔ pɔ́ pɔ ndɑꞋ pʉɔ ntsɑ́Ꞌ ŋkʉ nɛ́ ntsɑ́Ꞌ ntsɔ̌pɛ́nɛ́kwɑ nɛ́ mɛɡɛ́mɛ́nɛ́kwɑ (144.000) pi pɛ́ kɑ tsúꞋnɛ wɔ́p ndɑ́-kwɑɑ ndǔ tsɛ́tsɑ́Ꞌ pɔ́, mbɔ wɛcɔ́ ŋu ŋ́kɑɑ pɔ́ ɡú tɛ ŋ́kuꞋ nɛzíꞋ yîyɑ́ zɔp ŋki tɛ ńzɔp pɔ́,

⁴ pʉɔ pí pɔ́p pɑŋɡɛ́ ŋkɑɑ ɡɛ mɛnu ndǔmbí pɔ́, pɔ́p pɔ́ pɔ pʉɔ pi pɔ́p ŋkɑɑ mɑŋɡɛ́ jí. Mɔ́ɔ-Njinjɔ ɡʉ ɡɔ́ lɑ́, pɔ́p cʉ́ɔ pɔ nzʉʉ yɛ́. Pʉɔ pi pɛ́ kɑ ɡʉnɛ tsɛtsɛt pʉɔmɛsɔŋ ńtsuꞋ wɔ́p, pɔ́p ḿbɔ́ mbi Sɛ́ mbɑ mbi Mɔ́ɔ-Njinjɔ, ḿbɔ́ pɔ pɑ́Ꞌ ntú-yúu mi ɛ́ fúnɛ ŋkɑ́Ꞌ lɑ́,

⁵ mbɔ pɛ́ ŋkɑɑ mɔ́ zúꞋ cɔtnu cẅɛt ntsu pɔ́p pɔ́, lɔ́Ꞌ yɔ́p pɔɔ ɡú pɔ́.

Pɛcʉ̈ɔ́Ꞌ-Sɛ́ pɛ́tɑ́t

⁶ M bɛn ńjʉ́ɔ wɛcɔ́ tɑ́Ꞌ Cʉ̈ɔꞋ-Sɛ́ pɔ́ tɛ tʉ́nɛfɑŋ ḿbɔ́ ńtɑt, ŋ́ɡẅɛɛ wɛcɔ́ Ŋkʉʉ sʉ́Ꞌnɛ ẅí ɛ́ wɛ kɛ́mɛ, pɑ́Ꞌ ɑ ɡʉ ŋ́ɡʉ ńcẅi mbɔ̌ pʉɔ pí pɔ́p ndǔ tsɛ́tsɑ́Ꞌ, tsɛt mbɑ wɛ́tɛ́ ŋɡɔŋ lɑ́, mbɔ̌ mbɑ yɛ́tɛ́ njẅɛtndɑ́ lɑ́, mbɔ̌ pɑsẅíŋɛ mbɑ yɛ́tɛ́ ntɛ́ sẅiŋɛ lɑ́, mbɔ̌ ntɛ́ nɛ́ ntɛ́ pʉɔmɛsɔŋ.

⁷ A ḿbɔ́ ńdɔk ŋɡi tɛnnɛ ńcú ŋɡɔ: «Pʉʉ pɔ́k Sɛ́, ŋ́ɡɑ́ nɛɡúꞋ mbɔ̌ wɛ́. MbíꞋŋɡɔ ŋkɑ́ yi ɑ ɡʉ ŋ́ŋɑk pʉɔmɛsɔŋ ɛ́ pɑ́Ꞌ mbɔ ɛ́ kuꞋ. Pʉʉ ɡúꞋlɛ ŋu ẅí ɑ kɑ niitɛ́nɛ nɛpú, ńniitɛ tsɛ́tsɑ́Ꞌ, ńniitɛ ŋki kɛ́ nɛpɑt, ńniitɛ mbɑ sɑ́Ꞌŋki.»

⁸ Wɛcɔ́ Cʉ̈ɔꞋ-Sɛ́, ḿbɔ́ mbɑ́ɑtɛ yɛ́pɑ́ pɑ́ɑtɛ ḿbɔ́ ńcú ŋɡɔ: «A vu sɛ́, ŋɡɔ ɑ vu sɛ́. N dɑꞋ mɑ́mɑ́ tʉ́sɔŋ-Mbɑbilɔ̂nɛ ẅi ɑ kɑ pɔ́ ŋ́ɡɛ ŋɡɔŋ nɛ́ ŋɡɔŋ pɔ́ ńnɔ́ mɛluꞋ-ɡɑp yi ɛ́ lɛɛnɛ ntɛ́.»

⁹ Wɛcɔ́ Cʉ̈ɔꞋ-Sɛ́, ḿbɔ́ mbɑ́ɑtɛ yɛ́tɑ́t pɑ́ɑtɛ wɔ́p, ḿbɔ́ ńdɔk ŋɡi tɛnnɛ ńcú ŋɡɔ: «Ŋu lɑɑ ŋ́ɡúꞋlɛ nɑɑ mbɑ tɛ́tɔ́k wɛ, ḿbɛ́m pɛ́ cʉɔꞌ lii-nɑɑ nǔu nɛzíi nɛ́ kɛ nǔu pɔ́ yɛ́ ɔɔ,

¹⁰ ŋɡɑŋ jí ŋɡɔ mbɑ jʉ́ ɡʉ ŋ́ɡɛ ńnɔ́ mɛluꞋ-zɑ́ŋlɔ́ŋ-Sɛ́, mi Sɛ́ ɡʉ ŋ́ɡɛ ńníꞋ tsɛt ntúꞋ-zɑ́ŋlɔ́ŋ yɛ́, tɛ mbɔɔ síi ŋ́ɡwɑtɛ pɔ́. Ŋɡɑŋ pɑ́ɑtɛ ŋ́kúu ŋɡʉ̈ɔ́Ꞌ tsɛt múk-mɛkɑɑ, mbi pɛcʉ̈ɔ́Ꞌ-Sɛ́ pɛ lɛ́ɛnɛ́nɛ mbɑ mbi Mɔ́ɔ-Njinjɔ.»

¹¹ Ndíndí-múk-ŋɡʉ̈ɔ́Ꞌ yɔp ńdɑ́Ꞌ ńjúk ŋ́kɔ́Ꞌ kɔ́Ꞌnɛ nǔu mɛŋɡuꞋ mɛŋɡuꞋ. Mbɑ wɔ̌ lɑ́ ẅi ɑ sɛ́ ŋ́ɡúꞋlɛ nɑɑ, ḿbɛn ḿbɔ́ ŋ́ɡúꞋlɛ tɛ́tɔ́k nɑɑ ɛ̂wɑ́, tɛ mbɔ pɛ́ cʉɔꞌ lii-lík-nɑɑ nǔu wɛ́, ɑ ńdɑ́Ꞌ ńjúk nɛjʉ́ɔ ŋɡʉ̈ɔ́Ꞌ nɛnɛm mbɑ nɛtúꞋ, wɛcɔ́ nɛjẅiitɛ pɔɔ pɔ́ ɡú pɔ́.

¹² Yɔ nu lɔk ńcú ŋɡɔ pʉɔ-Sɛ́, pʉɔ pí pɔ́p ɡẅɛɛnɛ nɛpʉ́ʉ-Sɛ́, ńzɑ́p tʉ́m nǔu Yɛ́su sʉk.

¹³ N zúꞋ yɛcɔ́ ŋɡi-ŋu fú tʉ́nɛ́pú ńcú ŋɡɔ: «ŊwɑꞋnɛ ŋɡɔ: Ɛ́ ɡʉ fú ŋkɔ̂ɔnɛ, pɛpɔ́ttú pɔ́ pʉɔ pí pɔ́p ɡʉ ŋ́ɡɔ ḿpfú, ḿpfú ntsufɑꞋ-Tsɑpʉɔ. Zẅikŋɛ lɛ́ɛnɛ́nɛ pɛ́m ŋɡɔ ɛ́ nu, pîpɑ́ pʉɔ ɡɛ ŋ́ɡʉ jẅiitɛ nǔu mɛfɑꞋ mɔ́p. MbíꞋŋɡɔ mɛfɑꞋ mɔ́p ŋ́ɡɛ pɔ́p ɡẅɛɛ tsɔ́ꞋfɑꞋ yɔ́p.»

Nɛŋɑk pʉɔ ẅí ɛ́ ɡʉ ḿbɔ́ pɔ́p pɑ́Ꞌ nɛlɑk yúu lɑ́

¹⁴ N jʉ́ɔ pɔ yúu tɛ ḿbɔ́tnɛ ńnɑ́ŋ, ŋ́ɡɔ́ɔ ńjʉ́ɔ wɛcɔ́ fúfú mɛlɑ́ɑ, ŋu ńnɑ́ŋ ndǔ ḿbɔ́ pɑ́Ꞌ mɔ́ɔ-ŋumɛsɔŋ lɑ́, ńtɔꞋ cɔꞋ-nɛfɔɔ ní pɛ́ kɑ lɔknɛ tʉ́n-ŋɡɔ̂l ńniitɛ, ŋ́ɡẅɛɛ yɛcɔ́ ntɛ́ níi yi pɛ́ lɔknɛ ńdɑk yúu ŋkɑ́Ꞌ, ɛ́ pɔ́ ńcʉ̈ɔ́k tɛꞋ.

¹⁵ Wɛcɔ́ Cʉ̈ɔꞋ-Sɛ́ fú tsɛt zʉꞋ-Sɛ́ yi ɛ́ tʉ́nɛ́pú ńdɔk ŋɡi tɛnnɛ ńcú mbɔ̌ ŋu ẅí ɑ nɑ́ŋnɛ ndǔ fúfú mɛlɑ́ɑ lɑ́ ŋɡɔ: «Lɔk níi-lɑkyúu, ńdɑk yúu ndǔ tsɛ́tsɑ́Ꞌ. Ŋkɑ́ nɛlɑk yúu kuꞋ, mbíꞋŋɡɔ yúu ndǔ-tsɛ́tsɑ́Ꞌ tʉ̌.»

¹⁶ Ŋu ẅí ɑ lɑ́Ꞌnɛ ńnɑ́ŋ ndǔ fúfú mɛlɑ́ɑ lɑ́ ɡɔ́ɔ ŋ́kɛ́ ḿmɑꞋ níi yɛ, ńdɔk ńdɑk yúu ndǔ tsɛ́tsɑ́Ꞌ, tɛ yúu lɑk lɑknɛ mɛ ndǔ tsɛ́tsɑ́Ꞌ.

¹⁷ Wɛcɔ́ Cʉ̈ɔꞋ-Sɛ́ fú tsɛt zʉꞋ-Sɛ́ yi ɛ́ tʉ́nɛ́pú ńcẅɛt, ḿbɛn ŋ́ɡẅɛɛ yɛ ntɛ́ níi yɑ́ yi pɛ́ lɔknɛ ńdɑk yúu ŋkɑ́Ꞌ lɑ́, ɛ́ pɔ́ ńcʉ̈ɔ́k tɛꞋ.

¹⁸ Wɛcɔ́ Cʉ̈ɔꞋ-Sɛ́ fú zʉꞋ yi pɛ́ nɔŋnɛ pɔꞋ zúꞋu ńcẅɛt, ḿbɔ́ ẅi pɛ́ kɑ ɡɑ́nɛ nu-múk mbɔ̌ wɛ́, ɑ lɔk ŋɡi tɛnnɛ ńcú mbɔ̌ ẅi ɑ lɑ́Ꞌnɛ ŋ́ɡẅɛɛ níi ɛ́ pɔ́ ńcʉ̈ɔ́k tɛꞋ lɑ́ ŋɡɔ: «MɑꞋ níi yu yi ɛ́ sɛ́ ńcʉ̈ɔ́k lɑ́, ńdɔk ńzɑ́Ꞌ mɛntswɑ́ mɛntɑ́ɑ mi pɛ́ kíɛnɛ ńdɔk ńniitɛ mɛluꞋ, ɛ́ pɔ́ ndǔ tsɛ́tsɑ́Ꞌ mbɔ ɛ́ tʉ̌ʉ lɑ́.»

¹⁹ Cʉ̈ɔꞋ-Sɛ́ lɔk níi yɛ, ŋ́ɡʉ ndǔ tsɛ́tsɑ́Ꞌ, ńzɑ́Ꞌ mɛntswɑ́ mi ɛ́ nǔu mɛtʉ́-mɛluꞋ, tsɛt ŋkɑ́Ꞌ-mɛluꞋ ndǔ tsɛ́tsɑ́Ꞌ, ḿbʉɔt tsɛt mɑ́mɑ́ ɡʉ́ɔ, zʉꞋ yi pɛ́ cúꞋnɛ mɛntɑ́ɑ zúꞋu, ŋ́ɡẅɛɛ mɛluꞋ. Nɛcúꞌ tsɛt ɡʉ́ɔ ɛ̂yɑ́ lɔk ńdɛꞋlɛ ŋɡɔ Sɛ́ sɛ́ ńzɑ́ŋ lɔ́ŋ nǔu pʉɔ kɛpɔŋ.

²⁰ Pɛ́ fú tsɛt tʉ́sɔŋ ńcẅɛt tɛ ńjʉ́ɔ yîyɑ́ ɡʉ́ɔ. Pɛ́ ɡɔ́ɔ ŋ́kɛ́ ńcúꞋ mɛntɑ́ɑ ɛ̂mɑ́ tsɛtú, mɛci fúnɛ tsɛt ɡʉ́ɔ ɛ̂yɑ́ ńcẅɛt, ńcúŋ nǔu pɛkílɔmítɑ ŋkʉ yɛ́tɑ́t, nɛkúu sɛ́ pɔ́ tɑ́Ꞌ mítɑ nɛ́ kɛm.