Mɛnu ɛ́ ńdɑ́Ꞌ ńcẅɛt 12 - Kɑɑ Fí

Mɑŋɡɛ́ pɔ́p nɔ́nɛŋɡɛ́m

¹ Yɛcɔ́ ŋkʉꞋnɛ yúu cẅɛt nɛfɑŋ ḿbɔ́ wɛcɔ́ mɑŋɡɛ́, ɑ mɑꞋ yɛ́ ndẅí, ɛ́ pɔ́ pɔ lík-nɛm, ńtík mɛku mɛ́ nǔu sɑŋ, ńtɔꞋ cɔꞋ-nɛfɔɔ, pɛcʉ̈ɔ́Ꞌ-sɑŋ pɔ́ yúu ntsɔ̌ppɑ́ nɛ́ nɛɡɛ́m.

² A kɑ pɔ́ mɑŋɡɛ́ shǔutɛ, ḿbɔ́ ŋ́kíi mbíꞋŋɡɔ mɔ́ɔ kɑ pɔ́ ńnɛ́m wɛ́, ɑ pɔ́ ŋ́ɡʉ ḿbí.

³ Yɛcɔ́ yúu pɛn ńcẅɛt nɛfɑŋ, ḿbɔ́ yɛcɔ́ ntɛ́ mɑ́mɑ́ nɔ́nɛŋɡɛ́m wɑ́, ḿbɑŋ pɑ́Ꞌ múk lɑ́, mɛtú mɛ́ pɔ́ sɑɑmbɑ́, mɛndɔ́ŋ mɛ́ pɔ́ nɛɡɛ́m, cɔꞋ-nɛfɔɔ pɔ́ nǔu mɛtú mɛ́ sɑɑmbɑ́ tsʉʉ.

⁴ A kɑ pɔ́ ńdɔk sɑ́ŋ wɛ́ ńzʉk tɑ́Ꞌ nji nǔu Pɛcʉ̈ɔ́Ꞌ-sɑŋ nji yɛ́tɑ́t, ḿbʉ̈ɔt ndǔ tsɛ́tsɑ́Ꞌ, ńtʉ́ʉ mbi mɑŋɡɛ́ ɛ̂wɑ́, ḿbɔ́ ḿbyɛ́p pɑ́Ꞌ ɑ ɡʉ ḿbí ɑ ɡɔ́ɔ ńtíi mɔ́ɔ ḿmi.

⁵ Mɑŋɡɛ́ ɛ̂wɑ́ pí mɔ́ɔ mbɛ́ɛnɛ. A pɔ́ ẅi pɛ́ kɑ tíknɛ wɛ́ ŋɡɔ, ɑ tʉ́ʉ ŋ́kuꞋ pɑ́Ꞌ ɑ ɡʉ ńdɑ́Ꞌ ńdɔk kɛm-tʉ́n, ɛ́sɑ́Ꞌ ŋɡɔŋ nɛ́ ŋɡɔŋ. Pɛ́ sɑꞋ mɔ́ɔ ɛ̂wɑ́ ńdɔk ŋ́kɔ́Ꞌ nɛ́ nɛjɔ́ŋ-Sɛ́, nɛ́ zʉꞋ yí kɔꞋ-nɛfɔɔ-Sɛ́ zúꞋu.

⁶ Mɑŋɡɛ́ ɛ̂wɑ́ kʉɔ ŋ́ɡʉ nɛ́ kɔ̂ŋtɛt, nǔu zʉꞋ yí Sɛ́ kɑ niitɛ́nɛ pɑ́Ꞌ ɑ ɡʉ ńnɑ́ŋ zúꞋu, ńjí ŋɡɔ pɛ́ ɡʉ ńniitɛ ńzẅík wɛ́ zẅíknɛ nǔu mɛlɛ́Ꞌlɑ́Ꞌ ntsɑ́Ꞌ nɛ́ ŋkʉ yɛ́pɑ́ nɛ́ mɛɡɛ́mɛ́nɛ́ntúkú (1.260).

⁷ Ntsɔ lɛɛ tɛ ḿvu tʉ́nɛ́pú, Míshɛ̌ɛ, tɑ́tndɑ́-pɛcʉ̈ɔ́Ꞌ-Sɛ́, lɔk pɛcʉ̈ɔ́Ꞌ-Sɛ́ pi pɔ́p nzʉʉ yɛ́, ḿmɑꞋ mɑ́mɑ́ nɔ́nɛŋɡɛ́m ɛ̂wɑ́ nɛ́ ntsɔ. A lɔk pɛcʉ̈ɔ́Ꞌ pɛ́, ńdʉ́ɔꞋ Míshɛ̌ɛ nɛ́ ntsɔ.

⁸ Lɑ́ ŋ́kɛ́ mbɔɔ ntsɔ jʉ́. Yɔ́p zʉꞋ pɔɔ pɛn ḿbɔ́ tʉ́nɛ́pú pɔ́.

⁹ Pɛ́ tsʉ́ʉ wɛ́ pɔ́p pɛcʉ̈ɔ́ pɛ́, ḿbʉɔt ndǔ tsɛ́tsɑ́Ꞌ. A jʉ́ ḿbɔ́ nɔ́ wɑ́ ẅi ɑ kɑ fúnɛ ŋkɑ́ mbi lɑ́, pɛ́ fúŋ wɛ́ ŋɡɔ ndɛɛbɛlɛ, ḿbɛn ɛ́fúŋ wɛ́ ŋɡɔ Sɑ́ttɑ, ɑ jʉ́ ẅi ɑ fúklɛ́nɛ pʉɔmɛsɔŋ tsʉʉ ndǔ tsɛ́tsɑ́Ꞌ.

¹⁰ M bɛn ŋ́kɛ́ ńzúꞋ wɛcɔ́ ŋu lɔk ŋɡi tɛnnɛ, ɛ́fú tʉ́nɛ́pú ḿbɔ́ ńcú ŋɡɔ: «Ɛ́ pʉ́ɔlɑɑ, mbɔ ŋkɑ́ yi pɛ́ ɡʉ ńduk kuꞋ. Ɛ́ pʉ́ɔlɑɑ, mbɔ ŋkɑ́ yi Sɛ́ wɛkŋɛ ɡʉ ńnyɛt mɛtʉʉ mɛ́, jʉ́ tsʉ́Ꞌnɛ ɛ́sɑ́Ꞌ pʉɔ ɛ́ kuꞋ. Ɛ́ pʉ́ɔlɑɑ, mbɔ ŋkɑ́ yi Nzɑ́Ꞌŋkʉ wɛ ẅí ɑ kɑ tsɔ́Ꞌnɛ ɡʉ ńnyɛt mɛ́ mɛtʉʉ kuꞋ. MbíꞋŋɡɔ pɛ́ tsʉ́ʉ ŋu ẅí ɑ ḿbɔ́ ńjúk ńtʉ́ʉ mbi Sɛ́ wɛkŋɛ nɛnɛm pɔ́p nɛtúꞋ, ɛ́fɛn pɔ́ɔpɛ́mɑ́ pɛkŋɛ. Pɛ́ tsʉ́ʉ wɛ́ ḿmɑꞋ ndǔ tsɛ́tsɑ́Ꞌ.»

¹¹ Pɔ́ɔpɛ́mɑ́ pɛkŋɛ kɑ lɛɛtɛ nǔu mɛci-mɔ́ɔ-Njinjɔ, ḿbɛn ńdɛɛtɛ mbɑ nǔu sẅiŋɛ yi pɔ́p kɑ pɔ́ ńcú ńdɔk ńdɛꞋlɛ yúu mi pɔ́p jínɛ nǔu mɔ́ɔ-Njinjɔ, ńjʉ́ ẅîwɑ́ ŋu. Pɔ́p ŋkɑɑ lɔk tú yɔ́p ɛ́fúŋ yɛcɔ́ yúu tɛ ḿbɔ́k pɑ́Ꞌ ḿbɔ́ pɛ́ jẅí wɔ́p pɔ́.

¹² Pɔ́Ꞌɔ lɑ́, tʉ́nɛ́pú nɛ́ pɑnɑ́ŋ zúꞋu, pʉʉ tsɑ́ɑtɛ. Lɑ́ ŋ́ɡʉ nǔu ndǔ tsɛ́tsɑ́Ꞌ mbɑ ŋki kɛ́ nɛpɑt, nu pʉɔlɑ́ yi ɛ́ ɡɛnɛ wʉ́ʉ lɑ́. MbíꞋŋɡɔ ndɛɛbɛlɛ pfúu ńtɔ́ ńtsɛ́t wʉ́ʉ, lɔ́ŋ wɛ sɛ́ ńzɑ́ŋ tɛꞋ. A sɛ́ ńjí ŋɡɔ ɑ kɛ́ pɛn ɛ́fɑꞋ yɛ́ fɑꞋ tɛ ntí sɑk pɔ́.

¹³ Mɑ́mɑ́ nɔ́nɛŋɡɛ́m wɑ́, pɔ́ tɛ ńjʉ́ɔ pɑ́Ꞌ pɛ́ tsʉ́ʉnɛ wɛ́ ḿmɑꞋ ndǔ tsɛ́tsɑ́Ꞌ, ńjɛ́Ꞌ ńcʉ́ɔ nzʉʉ mɑŋɡɛ́ wɑ́ ẅí ɑ pínɛ mɔ́ɔ mbɛ́ɛnɛ lɑ́, ńzɛ nɛnɑ́ɑ wɛ́.

¹⁴ Pɛ́ ɡɑ́ mɛpɑp mɛmbɑ́, mɛ́ mɑ́mɑ́ mɑ́ɡúu mbɔ̌ mɑŋɡɛ́ ɛ̂wɑ́ pɑ́Ꞌ ɑ ɡʉ ńdɔk ńtɑt ɡʉ nɛ́ kɔ̂ŋtɛt ńnɑ́ŋ, nǔu yɛ́ zʉꞋ, zʉꞋ yi mɑ́mɑ́ nɔ́nɛŋɡɛ́m wɑ́ kɛ́ pɛn ńjʉ́ɔ wɛ́ pɔ́. ZʉꞋ yi pɛ́ kɑ niitɛ́nɛ nɛlɔk ńzẅík mɑŋɡɛ́ ɛ̂wɑ́, nǔu ŋɡuꞋ yɛ́tɑ́t ŋ́ɡɛ pɛsɑŋ pɛ́nɛ́ntúkú.

¹⁵ Mɑ́mɑ́ nɔ́nɛŋɡɛ́m wɑ́ jɛ́Ꞌ, ŋki ńcẅɛt ńcúŋ nzʉʉ mɑŋɡɛ́ wɑ́ pɑ́Ꞌ mí, nɛpɔ́ yi ɛ́ ɡʉ ńtíi wɛ́.

¹⁶ Lɑ́ tsɛ́tsɑ́Ꞌ cẅɛ́lɛ́ mɑŋɡɛ́ wɑ́, ŋ́ŋɑ́Ꞌ ntsu wɛ́, ŋ́ɡɔ́ɔ ńnɔ́ ŋki ẅí mɑ́mɑ́ nɔ́nɛŋɡɛ́m wɑ́ zɛ́Ꞌnɛ lɑ́.

¹⁷ Lɔ́ŋ mɑ́mɑ́ nɔ́nɛŋɡɛ́m ɛ̂wɑ́ puu ńzɑ́ŋ ntɛ́ mɑŋɡɛ́ wɑ́ tɛꞋ. Nɔ́nɛŋɡɛ́m ɡʉ ńdɔk ntsɔ ńtsʉ́Ꞌ ńdʉɔ́Ꞌ pɔ pfuꞋ njẅɛt mɑŋɡɛ́ ɛ̂wɑ́, pʉɔ pinɛ pɔ́p sɛ́ ŋ́kúꞋlɛ nɛpʉ́ʉ-Sɛ́, ḿbɛn ḿbɔ́ ŋ́kẅíitɛ nu nɛ́nẅín yi Yɛ́su kɑ cúnɛ.

¹⁸ Mɑ́mɑ́ nɔ́nɛŋɡɛ́m pɑ́ɑtɛ ḿbʉꞋ mbʉʉ yɛ ńtʉ́ʉ ndǔ sɑŋsɑ́ŋ ŋkɑŋ ŋki.