Mɛnu ɛ́ ńdɑ́Ꞌ ńcẅɛt 10 - Kɑɑ Fí

¹ M bɛn ńjʉ́ɔ wɛcɔ́ Cʉ̈ɔꞋ-Sɛ́ ẅi ɑ ɡẅɛɛnɛ mɛtʉʉ, ɑ pɔ́ ɛ́fú tʉ́nɛ́pú ḿpfúu, yɛcɔ́ ntɛ́ mɛlɑ́ɑ pɔɔ mbʉʉ yɛ pɑ́Ꞌ ndẅí pɔɔ mbʉʉ-ŋu lɑ́. Ŋkɔŋ-ŋɡɛ́mnɔ́ zɛmɛ tú yɛ́. Shʉ́ wɛ́ pɔ́ pɑ́Ꞌ lík-nɛm lɑ́. Mɛntɑ́ɑ mɛ́ pɔ́ mɑꞋ mɛlʉ́m-múk mi ɛ́ pʉꞋnɛ́nɛ ńtʉ́ʉ tʉ́ʉnɛ lɑ́.

² A kɑ ɡẅɛɛ wɛcɔ́ mɔ́ɔ mɔ́ŋwɑꞋnɛ mbɔ́ wɛ́, ɛ́ ḿbɔ́ yi fiinɛ, ńtɑɑ ku yɛ́ yi tʉʉ ńtík ndǔ ŋki kɛ́ nɛpɑt, ńtík yi ŋkẅɛpmɛ ndǔ tsɛ́tsɑ́Ꞌ,

³ ŋ́kíi nɛ́ ŋɡi tɛnnɛ pɑ́Ꞌ púꞋntʉʉ ẅí ɑ sɛ́ ńtsuꞋ lɑ́, ŋ́kíi pɔ́Ꞌɔ, pɛ́ zúꞋ nɛpú kwɛnɛ ŋkɑ́ sɑɑmbɑ́.

⁴ Nɛpú kɑ kwɛnɛ ŋkɑ́ sɑɑmbɑ́ pɔ́Ꞌɔ, lɑ́ m bɔ́ ńdɔɔ nɛŋwɑꞋnɛ yúu mi nɛpú cúnɛ, ńzúꞋ ŋɡi-ŋu fú nɛpú ńcú mbɔ̌ mɔ ŋɡɔ: Lʉɔ nu yí nɛpú kwɛnɛ́nɛ ŋkɑ́ sɑɑmbɑ́ ńcú. Kɔɔ ŋwɑꞋnɛ.

⁵ Cʉ̈ɔꞋ-Sɛ́ ẅi n jʉ́ɔnɛ wɛ́ ɑ tʉ́ʉ ńtík ku yɛ́ ndǔ ŋki kɛ́ nɛpɑt, yɛcɔ́ pɔ́ ndǔ tsɛ́tsɑ́Ꞌ lɑ́, ɑ kɑꞋ pɔ́ yɛ́ yi tʉʉ ŋ́ɡɑ́ tʉ́ ḿbɔ́ ŋ́kɑɑ,

⁶ ńdɔk lík-ŋu ẅí ɑ pɔ́ pɔ ɡú nǔu mɛŋɡuꞋ mɛŋɡuꞋ, jʉ́ ẅi ɑ kɑ niitɛ́nɛ nɛpú mbɑ kʉ̈ɔ́ lɑ́ yi ɛ́ tsɛtú, jʉ́ ẅi ɑ kɑ niitɛ́nɛ tsɛ́tsɑ́Ꞌ mbɑ kʉ̈ɔ́ lɑ́ yi ɛ́ ndǔ, jʉ́ ẅí ɑ kɑ niitɛ́nɛ ŋki kɛ́ nɛpɑt mbɑ kʉ̈ɔ́ lɑ́ yi ɛ́ tsɛtú, ŋ́kɑɑ, ńcú ŋɡɔ yɛcɔ́ nɛpɛn ńzẅíꞋlɛ kɑ́ pɛ́t ḿbɔ́ ɡú pɔ́.

⁷ Lɑ́, ɛ́ ɡʉ ŋ́ɡɛ ḿbɔ́ ŋkɑ́ yi Cʉ̈ɔꞋ-Sɛ́ wɛ mbɑ́ɑtɛ sɑɑmbɑ́ zɛnɛ nɛtɔŋ yɛ́ ntɑŋ, yúu mi Sɛ́ kɑ zɑ́pnɛ, ɛ́ pɔ́ yi lʉɔmɛ́nɛ, ɛ́ puutɛ ndʉ́ŋndʉŋ pɑ́Ꞌ ɑ kɑ zɑ́Ꞌnɛ njí ńcú mbɔ̌ pɛŋɡɛ́mndʉ̈ɔ́Ꞌ pɛ́ pɑfɑꞋ mbɔ̌ wɛ́.

⁸ Ńcú pɔ́Ꞌɔ, ŋɡi-ŋu wí n dɑ́Ꞌnɛ ńzɛɛ ńzúꞋ ɛ́ fú tʉ́nɛ́pú ńcú nu lɑ́, ɛ́ pɛn ńcú mbɔ̌ mɔ yɛcɔ́ ŋkɑ́ ŋɡɔ: «Gʉ, fú mbɔ̌ Cʉ̈ɔꞋ-Sɛ́ ẅi ɑ tʉ́ʉnɛ ńtík ku ndǔ ŋki kɛ́ nɛpɑt, yɛcɔ́ pɔ́ ndǔ tsɛ́tsɑ́Ꞌ lɑ́, ńcẅɛ́ɛ mɔ́ɔ» mɔ́ŋwɑꞋnɛ yi pɛ́ fiinɛ lɑ́.

⁹ Ŋ ɡʉ nɛjɔ́ŋ Cʉ̈ɔꞋ-Sɛ́ ɛ̂wɑ́, ḿbúꞋ mbɔ́ mbɔ̌ wɛ́ ŋɡɔ ɑ ɡɑ́ mɔ́ɔ mɔ́ŋwɑꞋnɛ ɛ̂wɑ́ mbɔ̌ mɔ. A cú mbɔ̌ mɔ ŋɡɔ: «Kɔ kwɛ́t. Ɛ́ ɡʉ ŋ́kɛ́ ŋ́kúu nɛpɛm ɡu ńdẅi lẅinɛ, lɑ́, ɛ́ kɛ ḿbɔ́ ntsu ɡu ńdʉʉ pɑ́Ꞌ nɛlʉʉ-ŋwɑ́Ꞌ.»

¹⁰ Ɛ fú mbɔ̌ Cʉ̈ɔꞋ-Sɛ́, ńcẅɛ́ɛ mɔ́ɔ mɔ́ŋwɑꞋnɛ ɛ̂wɑ́, ŋ́kwɛ́t. Ɛ́ pɔ́ ntsu mɔ ńdʉʉ pɑ́Ꞌ ŋwɑ́Ꞌ lɑ́. Tɛ m bɔ́ tɛ mi, ɛ́ kúu nɛpɛm mɔ ńtsʉ́Ꞌ ńdẅi lẅinɛ.

¹¹ Pɛ́ pɑ́ɑtɛ ńcú mbɔ̌ mɔ ŋɡɔ: «Ɛ́ sɛ́ ḿbíkŋɛ ŋɡɔ ɔ pɛn ŋ́ɡʉ ɛ́sɑ́Ꞌ Ŋkʉʉ-Sɛ́ mbɔ̌ pʉɔ ntɛ́ nɛ́ ntɛ́, mbɔ̌ ŋɡɔŋ nɛ́ ŋɡɔŋ, mbɔ̌ pʉɔ pí pɔ́p sẅiŋɛ́nɛ mɛsẅíŋɛ mɛntɛ́ mɛntɛ́, mbɑ mbɔ̌ pɛfɔɔ tɛ ńzɑ́ɑ.»