1 Kɔlɛ̂ŋtɛ 14 - Kɑɑ Fí

Zẅikŋɛ Lɛ́ɛnɛ́nɛ ɡɑ́ fuꞋ níinɛ-pʉɔ tsɛt cúꞋlɛ, ŋ́ɡɑ́ wɔ́p nɛ́ mɛtʉʉ pɔ́p lɔk ńcẅɛ́lɛ pʉɔ tsʉʉ

¹ Pɔ́Ꞌɔ lɑ́ pʉʉ piitɛ ɛ́sɑ́Ꞌ tʉʉ ŋ́ɡɛ tɑ́Ꞌ yúu, ɛ́ pɔ́ nɛkɔŋ ŋumɛsɔŋ, pʉʉ pɛn ńtsɑ́ɑ yúu ntɛ́ nɛntɛ yi Zẅikŋɛ Lɛ́ɛnɛ́nɛ lɔknɛ ŋ́ɡɑ́ fuꞋ níinɛ-pʉɔ, nɛlʉ́m pɔ́ nɛtsɑ́ɑ nɛcẅi Ŋkʉʉ ẅí ɛ́ fúnɛ mbɔ̌ Sɛ́.

² MbíꞋŋɡɔ ŋu lɑɑ ńdɔk mɛsẅíŋɛ mi pɛ́ kɑ́ pɔ́ ńjí pɔ́ ńcú nu, mbɔ ɑ kɛ́ ḿbɔɔ ńcú nu mbɔ̌ pʉɔmɛsɔŋ pɔ́. A ŋ́ɡʉ ńcú pɔ mbɔ̌ Sɛ́, mbíꞋŋɡɔ wɛcɔ́ ŋumɛsɔŋ kɑ́ pɔ́ ńzúꞋ nu yi ɑ cúnɛ pɔ́, ŋɡɑŋ sɛ́ ńdɔk mɛtʉʉ-Zẅikŋɛ Lɛ́ɛnɛ́nɛ ńcú nu nǔu yúu mi ɛ́ lʉɔmɛ́nɛ.

³ Lɑ́ ɛ́ ɡʉ nǔu ŋu ẅí ɑ cẅi Ŋkʉʉ ẅí ɛ́ fúnɛ mbɔ̌ Sɛ́, ɑ cú nu mbɔ̌ pʉɔmɛsɔŋ, ńdɔk ńcẅɛ́lɛ wɔ́p pɔ́p kẅiꞋ ńzɑ́p tʉ́m nǔu Sɛ́, ńdɔk ńníꞋ mɛtʉʉ mɔ́p mbɑ nɛlɔk ńníꞋ tʉ́m yɔ́p.

⁴ Ŋu ẅí ɑ sɛ́ ɛ́sẅíŋɛ mɛsẅíŋɛ mi pɛ́ kɑ́ jí, ɛ́ fú pɔ́Ꞌɔ, ńcẅɛ́lɛ́ túmbʉʉ yɛ́ nɛkẅiꞋ ńzɑ́p tʉ́m nǔu Sɛ́. Lɑ́ ɛ́ ɡʉ nǔu ŋu ẅí ɑ cẅinɛ Ŋkʉʉ ẅí ɛ́ fúnɛ mbɔ̌ Sɛ́, ɛ́ lɔk pɔ́Ꞌɔ, ńcẅɛ́lɛ cúꞋlɛ-pʉɔ-Kɛlístɔ tsʉʉ nɛkẅiꞋ ńzɑ́p tʉ́m nǔu Sɛ́.

⁵ N jʉ́ɔ yɑ́ɑ ŋɡɔ ɛ́ pɔŋ ŋɡɔ pʉʉ pɛtsʉʉ sẅiŋɛ mɛsẅíŋɛ mi pʉʉ ŋkɑɑ mɔ́ zíꞋ, lɑ́ ŋ kɔŋ pɔ ŋɡɔ pʉʉ cẅi pɔ Ŋkʉʉ ẅí ɛ́ fúnɛ mbɔ̌ Sɛ́. Nɛcẅi Ŋkʉʉ ẅí ɛ́ fúnɛ mbɔ̌ Sɛ́ ɛ́ pɔŋ ńdɛɛ nɛsẅíŋɛ mɛsẅíŋɛ mi pɛ́ kɑ́ jí pɔ́, tɛ ńdíꞋ ndɑꞋ pɑ́Ꞌ ŋu ɡɔ́ ɛ́sẅíŋɛ, wɛcɔ́ ŋu pɔ́ sɛ́ ḿbɔ́ ŋ́kyɛ́Ꞌtɛ ɛ́sẅíi cúꞋlɛ lɑ ɛ́ cẅɛ́lɛ́ pʉɔ nɛkẅiꞋ ńzɑ́p tʉ́m nǔu Sɛ́.

⁶ Pɔ́ɔpɛ́mɑ́ pɑ́ɑ, pɛkŋɛ cú ŋɡɔ m bɔ́ ńtɔ́ tɛ ŋ́kúu tsɛtsɛt pʉʉ, ńtsʉ́Ꞌ nɛcú nu mbɔ̌ pʉʉ, ńdɔk sẅiŋɛ yi pʉʉ kɑ́ pɔ́ ńjí pɔ́, mbɔ ɛ́ ɡʉ ńcẅɛ́lɛ́ wʉ́ʉ ŋɡɔ́ku? Mɔ nɛcẅɛ́lɛ wʉ́ʉ, ɑ pʉʉ nɛfú nǔu yúu mi n cúnɛ ńjí yúu mi Sɛ́ nyɛtnɛ wɑ́ɑ ɛ́ pɔ́ yɛ lʉɔmɛ́nɛ, mɔ ŋ́ɡɛ pʉʉ jínu nɛ́nẅín nǔu yɛcɔ́ nu. Pʉʉ pɛn ńdúꞋnɛ wɑ́ɑ, ńzúꞋ yɛcɔ́ Ŋkʉʉ ẅí ɛ́ fúnɛ mbɔ̌ Sɛ́. Mɔ fú nǔu nu yi n cúnɛ, ńzíꞋ wʉ́ʉ nɛ́ yɛcɔ́ nu.

⁷ Ɛ́ pɛn ḿbɔ́ ndʉ́ŋndʉŋ nǔu ndɔ́ŋ-mɑ́ndɛ́lɛ́ pɔ́p nɛlúŋ, mɛyúu mi pɛ́ lɔknɛ ḿbúꞋ yúu pɛ́ nʉŋ. Ɛ́ kɑ pɔ́ pɛ́Ꞌnɛ mɛŋɡi mi ɛ́ fúnɛ nǔu mîmɑ́ mɛyúu pɔ́ pɔ tɑ́Ꞌ yúu, mbɔ ḿbɔ́ pɛ́ ɡɔ́ ńjí ŋɡi yi pɛ́ lɔknɛ ndɔ́ŋ-mɑ́ndɛ́lɛ́ ḿbúꞋ ŋ́ɡɛ ŋɡɔ́ku, mbɑ yi nɛlúŋ ŋ́ɡɛ ŋɡɔ́ku,

⁸ ḿbɔ́ ŋɡi-ntɑŋ lɑɑ mbɔɔ cẅɛt sʉ́Ꞌnɛ pɔ́, mbɔ ḿbɔ́ wɔ̌ niitɛ mbʉʉ yɛ nɛɡʉ ḿmɑꞋ ntsɔ?

⁹ Ɛ́ mbɔ̌ pʉʉ ḿbɛn ḿbɔ́ pɔ pɔ́Ꞌɔ, pʉʉ lɑɑ ɛ́sẅíŋɛ mɛsẅíŋɛ mi pɛ́ kɑ́ pɔ́ ńzúꞋ pɔ́, mbɔ pɛ́ ɡʉ ŋ́ɡɛ pɑ́Ꞌ lɑ ńzúꞋ nu yi pʉʉ cúnɛ? Mbɔ pʉʉ zɔtnɛ zɔtnɛ́nɛ pɑ́Ꞌ fɛfʉ̈ɔt lɑ́.

¹⁰ Mɛsẅiŋɛ-ndǔ tsɛ́tsɑ́Ꞌ mɛntɛ́ tɛ ńzɑ́ɑ, lɑ́ pɛ́ lɔk mbɑ yɛ́tɛ́ lɑ́ ńcú pɔ nu.

¹¹ Lɑ́ ḿbɔ́ yi ŋu lɑɑ ḿbɔ́ ńcú nu mbɔ̌ mɔ, m bɛn mbɔɔ ḿbɔ́ ńjí sẅiŋɛ yɛ́ pɔ́, mbɔ mɔ mbi yɛ́ ḿbɔ́ pɔ ŋɡʉʉ, ɑ pɛn ḿbɔ́ yɛ́ mbi mɔ, ḿbɔ́ pɔ ŋɡʉʉ.

¹² Ɛ́ pɛn ḿbɔ́ mbɔ̌ pʉʉ ḿbɔ́ pɔ pɔ́Ꞌɔ. Pɑ́Ꞌ pʉʉ sɛ́ ḿbɔ́ ńtsɑ́ɑ tɛꞋ ŋɡɔ Zẅikŋɛ Lɛ́ɛnɛ́nɛ lɔk pɔ́fɑꞋ ntɛ́ nɛntɛ ŋ́ɡɑ́ fuꞋ níinɛ yʉ́ʉ lɑ́. Pʉʉ sɛ́ ńnɑ́ŋ ńtsɑ́ɑ ŋɡɔ ɛ́ kẅiꞋ ńzɑ́ɑ lɑ́, ɛ́ pɔ́ pɔ nɛlɔk ŋ́ɡɛ cúꞋlɛ tsʉʉ kẅiꞋ ńzɑ́p tʉ́m nǔu Sɛ́.

¹³ Ɛ́ yúu mi ɛ́ ɡɛnɛ lɑ ŋu ẅí ɑ sẅíŋɛ́nɛ sẅiŋɛ yi pɛ́ kɑ́ pɔ́ ńjí pɔ́, ɑ ɡẅɛɛ nɛcɛꞋlɛ Sɛ́ ŋɡɔ ɑ lɔk nɛkyɛ́Ꞌtɛ ḿbɛn ŋ́ɡɑ́ fuꞋ níinɛ yɛ́,

¹⁴ mbíꞋŋɡɔ n dɑɑ ńtsʉ́Ꞌ nɛcɛꞋlɛ Sɛ́, ńdɔk sẅiŋɛ yi pɛ́ kɑ́ pɔ́ ńjí pɔ́, mbɔ mɔ sɛ́ ńdɔk zẅikŋɛ yɑ́ɑ ńcɛꞋlɛ Sɛ́ lɑ́ ŋ́kɛ́ ḿbɔɔ ḿbɔ́ ńzúꞋ nu yi mɔ sɛ́ ńcú pɔ́.

¹⁵ Tɛ ɛ́ pɔ́Ꞌɔ, pɑ́Ꞌɑ ḿbɔ́ ŋ ɡɛ ŋɡɔ́ku? N jʉ́ɔ ŋɡɔ ŋ ɡʉ ńcɛꞋlɛ Sɛ́ nǔu ntɛ́ yi Zẅikŋɛ-Sɛ́ ńtsʉ́ʉnɛ́nɛ wɑ́ɑ ŋɡɔ n cɛꞋlɛ pɔ́Ꞌɔ, lɑ́ ḿbɛn ńcɛꞋlɛ nǔu ntɛ́ yi ḿbɔ́ ŋu zúꞋ nu yi n cúnɛ. Ŋ ɡʉ ńzɔp ŋki nǔu ntɛ́ yi Zẅikŋɛ Sɛ́ ńtsʉ́ʉnɛnɛ wɑ́ɑ ŋɡɔ n zɔp pɔ́Ꞌɔ, lɑ́ ḿbɛn ńzɔp nǔu ntɛ́ yi mbɔ ŋu zúꞋ yúu mi zɔp cúnɛ,

¹⁶ mbíꞋŋɡɔ ŋu lɑɑ ḿbɔ́ pɛ́Ꞌnɛ ŋ́ɡɛ́mtɛ Sɛ́ pɔ ndɑꞋ nǔu ntɛ́ yi Zẅikŋɛ tsʉ́ʉnɛ́nɛ wɛ́ ŋɡɔ ɑ ɡɛ, mbɔ ŋu ẅí ɑ nɑ́ŋnɛ sɛ́ mbɔɔ ḿbɔ́ ńjí nu nǔu yîyɑ́ ntɛ́ pɔ́, ɡʉ ŋ́ɡɔ cú ŋɡɔ ɛ́ pɔ́Ꞌɔ, ńdɔk cɔ́kŋɛ nu yi ŋɡɑŋ lɔknɛ ŋ́ɡɛ́mtɛ Sɛ́, ɛ́ ɡɛ ŋɡɔ́ku pɑ́Ꞌ ɑ kɑ́ pɔ́ ńzúꞋ nu yi ɑ cúnɛ pɔ́ ɔɔ?

¹⁷ Yîyɑ́ ntɛ́ nɛɡɛ́mtɛ Sɛ́ zɛɛ ḿbɔ́ ḿbɔŋ tɛꞋ lɑ́, ɛ́ kɑ́ cẅɛ́lɛ́ wɛcɔ́ ŋu nɛkẅiꞋ ńzɑ́p tʉ́m nǔu Sɛ́ pɔ́.

¹⁸ Mɔ sɛ́ ŋ́ɡɛ́mtɛ Sɛ́ nǔu pɑ́Ꞌ ɑ kɑ ɡɛnɛ ɛ sẅiŋɛ mɛsẅíŋɛ mi mɔ ŋkɑɑ zíꞋ, tɛ ńdɛɛ wʉ́ʉ pɛ́tsʉʉ.

¹⁹ Lɑ́ ɛ́ ɡʉ ŋkɑ́ yi mɔ tsɛt cúꞋlɛ-pʉɔ-Kɛlístɔ, ŋ kɔŋ nɛcú nu mɛtú mɛ́ntɑɑ ɛ́ pɔ́ yi pɛ́ ɡʉ ńzúꞋ, ńjí ŋɡɔ n dɔk pɔ́Ꞌɔ ńzíꞋ pʉɔ nɛ́ yúu, ńdɛɛ nɛcú nu mɛtú ntsɑ́Ꞌ nɛɡɛ́m ɛ́ pɔ́ yi pɛ́ kɑ́ pɔ́ zúꞋ pɔ́.

²⁰ Pɔ́ɔpɛ́mɑ́ pɑ́ɑ, kɔɔ pʉʉ tsʉ́Ꞌ nɛsɑ́ŋ nu, ɛ́sɑ́ŋ pɑ́Ꞌ mbɔ́ŋkʉ̈ɔ́ lɑ́. Pʉʉ ɡʉ nǔu nu kɛpɔŋ ḿbɔ́ pɔ pɛɡɛɡʉʉ. Lɑ́ ŋ́ɡʉ nǔu nɛsɑ́ŋ nu, ńnyɛt ŋɡɔ pʉʉ tsʉklɛ.

²¹ Ɛ́ tsɛt ŋwɑꞋnɛ-Sɛ́, Tsɑpʉɔ cú ŋɡɔ: «Mɔ ŋ́ɡɛ ńtsʉ́Ꞌ nɛcú nu mbɔ̌ Pɑíslɑyɛ̂l ńdɔk pʉɔ ndɛꞋ Pi pɔ́p sẅíŋɛ́nɛ mɛsẅíŋɛ ndɛꞋ. Tɛ mbɑ pɔ́Ꞌɔ, pɔ́p pɔɔ kɔŋ nɛ́ zúꞋ nu yi n cúnɛ pɔ́.»

²² Ɛ́ lɔk pɔ́Ꞌɔ, ḿbɔ́ ŋɡɔ, Sɛ́ lɛɛ nǔu nɛsẅíŋɛ mɛsẅíŋɛ mi pɛ́ ŋkɑɑ zíꞋ, ńdɛꞋlɛ yɛcɔ́ lii pɔ mbɔ̌ pʉɔ pi pɔ́p kɑ́ zɑ́p tʉ́m nǔu wɛ́ pɔ́, ɛ́ kɛ́ mbɔɔ ńdɛꞋlɛ pɔ́Ꞌɔ, mbɔ̌ pʉɔ pi pɔ́p zɑ́pnɛ tʉ́m nǔu wɛ́ pɔ́. Nɛcẅi Ŋkʉʉ ẅí ɛ́ fúnɛ mbɔ̌ Sɛ́, ɛ́ lɛꞋlɛ yɛcɔ́ yúu pɔ mbɔ̌ pʉɔ pi pɔ́p zɑ́pnɛ tʉ́m nǔu Sɛ́, ɛ́ kɛ́ mbɔɔ mbɔ̌ pʉɔ pi pɔ́p kɑ́ zɑ́p tʉ́m nǔu Sɛ́ pɔ́ pɔ.

²³ Pʉʉ pʉɔ-Kɛlístɔ lɑɑ ḿbɔ́ pɛ́Ꞌnɛ ńcúꞋlɛ pɛ́tsʉʉ, mbɑ wɔ̌ lɑ́ nǔu pʉʉ pɔ́ ńzɛ nɛsẅíŋɛ sẅiŋɛ yi ɑ ŋ́kɑɑ mɔ́ zíꞋ, pʉɔ pi pɔ́p kɑ́ pɔ́ ńjí nu nǔu yîyɑ́ ntɛ́ nɛsẅíŋɛ pɔ́, tɛ mbɑ pʉɔ pi pɔ́p kɑ́ pɔ́ ńzɑ́p tʉ́m nǔu Sɛ́ pɔ́, jɛ́Ꞌ ŋ́kúu ndɑ́, mbɔ pɔ́p kɛ́ lɔk wʉ́ʉ ɛ́fúŋ pɛpɑ́lɛ́ pɔ́ ɔɔ?

²⁴ Lɑ́ ḿbɔ́ yi pʉʉ pɛtsʉʉ lɑɑ ḿbɔ́ ńcẅi pɔ Ŋkʉʉ ẅi ɛ́ fúnɛ mbɔ̌ Sɛ́, ŋu kúu ndɑ́, kɛ ḿbɔ́ pɔ ŋu ẅí ɑ kɑ́ zɑ́p tʉ́m nǔu Sɛ́ pɔ́ pɔ, kɛ ŋu ẅí ɑ kɑ́ jí nu nǔu yîyɑ́ ntɛ́ pɔ́ pɔ, mbɔ kʉ̈ɔ́ lɑ́ yi ɑ sɛ́ ńzúꞋ ɛ́ ɡʉ ŋ́ɡɛ ɑ sɑ́ŋ nu, sẅiŋɛ ɛ̂yɑ́ tsʉʉ cú nu mbɔ̌ wɛ́.

²⁵ Yúu mi ɛ́ ńzɛɛnɛ ḿbɔ́ tsɛt tʉ́m yɛ́ yi lʉɔmɛ́nɛ, cẅɛt mɑ́ntɑ́ɑ, ɑ kẅíꞋlɛ sɛ́, ɛ́sɔp shʉ́ wɛ́ sɛ́, ŋ́ɡɔ ḿbɔ́ ŋ́ɡúꞋlɛ Sɛ́, ḿbɔ́ ńcú ŋɡɔ: «Ɛ́ nɛ́nẅín Sɛ́ tsuŋ ḿbɔ́ tsɛtsɛt pʉʉ.»

Nu nǔu cúꞋlɛ-Kɛlístɔ nɛnɛn ndʉ́ŋndʉŋ

²⁶ Pɔ́ɔpɛ́mɑ́ pɑ́ɑ pɑ́Ꞌ ɛ́ pɑ́Ꞌɑ lɑɑ pɛkŋɛ ɡɛ ŋɡɔ́ku? Pʉʉ lɑɑ ḿbɔ́ tɛ ńcúꞋlɛ, ŋu wʉʉ ɡẅɛɛ zɔp ŋki ɑ zɔp, ŋu ɡẅɛɛ yúu mi ɑ ɡʉ ńzíꞋ pɛcɔ́ pʉɔ, ɑ zíꞋ, ŋu ɡẅɛɛ yúu mi Sɛ́ sɛ́ ńnyɛt wɛ́, ɑ cú, ŋu ɡẅɛɛ nu yí ɑ ɡʉ ńcú nɛ́ sẅiŋɛ yi pɛ́ kɑ́ pɔ́ ńjí pɔ́ ɑ cú, ŋu ɡẅɛɛ nɛkyɛ́Ꞌtɛ ɑ kyɛ́Ꞌtɛ. Lɑ́ ɛ́ sɛ́ ḿbíkŋɛ ŋɡɔ mîmɑ́ mɛyúu tsʉʉ cẅɛ́lɛ́ nɛlɔk ŋ́ɡɛ cúꞋlɛ-pʉɔ-Kɛlístɔ tsʉʉ kẅiꞋ ńzɑ́p tʉ́m nǔu Sɛ́.

²⁷ Ɛ́ lɑɑ ḿbɔ́ nɛsẅíŋɛ mɛsẅíŋɛ mi pɛ́ kɑ́ jí pɔ́, pʉɔ pɛ́pɑ́ sẅiŋɛ. Pɛ́ cú ŋɡɔ pɛ́ sẅiŋɛ tɛꞋ pʉɔ pɛtɑ́t ɛ́sẅíŋɛ. Tɑ́Ꞌ ŋu sẅiŋɛ tɛ ḿbɔ́tnɛ ńnɑ́ŋ, lɑ wɛcɔ́ ŋu sẅiŋɛ yɛ́, ɛ́ zɛɛ ḿbɛn ḿbíkŋɛ ŋɡɔ wɛcɔ́ ŋu kyɛ́Ꞌtɛ.

²⁸ Ŋu ẅí ɑ ɡʉ ŋ́kyɛ́Ꞌtɛ mɛsẅíŋɛ mi pɛ́ kɑ́ pɔ́ ńjí pɔ́ lɑɑ mbɔɔ jí, ɑ pɑ́ɑ nɛcú nu tsɛt cúꞋlɛ tɛ ŋɡi yɛ kɔ́Ꞌ tʉ́. Ɛ́ pɔ́ pɔ́Ꞌɔ, ŋu cú nu pɔ tsɛt tʉ́m yɛ́ mbɔ̌ Sɛ́.

²⁹ Ɛ́ ɡʉ nǔu nɛcẅi Ŋkʉʉ ẅí ɛ́ fúnɛ mbɔ̌ Sɛ́, pʉɔ pɛ́pɑ́ kɛ pɛtɑ́t ɔɔ, pɔ́ ńcú nu, pɛcɔ́ pʉɔ sɑ́ŋ nu ŋ́ɡɑ́ nǔu nu yi pɔ́p cúnɛ.

³⁰ Lɑ́ ḿbɔ́ yi ŋu lɑɑ ḿbɔ́ ńcú nu, Sɛ́ cú nu mbɔ̌ wɛcɔ́ ŋu ẅí ɑ zúꞋu, ŋɡɑŋ zɑ́Ꞌ nɛcú nu.

³¹ Pɔ́Ꞌɔ, pʉʉ pɛtsʉʉ ɡẅɛɛ shʉ́ nɛcẅi Ŋkʉʉ ẅí ɛ́ fúnɛ mbɔ̌ Sɛ́, ŋu cú tɛ ŋ́ɡɔ ńnɑꞋcí wɛcɔ́ ŋu cẅi yɛ́. Pɔ́Ꞌɔ, ńjí ŋɡɔ pʉɔ pɛtsʉʉ ɡʉ ńjʉ́ pii ńzíꞋ nu-Sɛ́, Ŋkʉʉ ẅí pɛ́ cẅinɛ, níꞋ mɛtʉʉ mɔ́p.

³² Sɛ́ kɑ ɡɛ ŋɡɔ ɛ́ ɡʉ tsɛtsɛt pʉɔ pi pɔ́p cẅinɛ Ŋkʉʉ ẅí ɛ́ fúnɛ mbɔ̌ wɛ́, mbɑ wɔ̌ lɑ́ nǔu pɔ́p jí yɛ́ ŋkɑ́ yi ɑ ɡʉ ńcú nu, yɛ́ nu pɔɔ vukŋɛ vukŋɛnɛ ńcẅɛt pɔ́,

³³ mbíꞋŋɡɔ Sɛ́ kɑ́ kɔŋ ŋɡɔ pɛ́ nʉŋ ŋ́ɡwɛ́tnɛ ŋkɑŋ pɔ́, ɑ kɔŋ pɔ mbɔ́tnɛ. Ɛ́ ɡʉ nǔu pɑŋɡɛ́, mbɔ pʉʉ ɡẅɛɛ nɛ kɛ́ ŋ́ɡɛ pɔ ndʉ́ŋndʉŋ pɑ́Ꞌ ɛ́ tsɛt mɛndɑ́ cúꞋlɛ-pʉɔ-Kɛlístɔ tsʉʉ ḿbɔ́ pɔ́Ꞌɔ lɑ́,

³⁴ pʉʉ lɑɑ ḿbɔ́ tsɛt cúꞋlɛ pɑŋɡɛ́ nɑꞋ. Pɔ́p kɑ́ ɡẅɛɛ nɛcẅɛ́ɛ sẅiŋɛ ńcú nu pɔ́. Pɔ́p ɡẅɛɛ nɛpɔ́tnɛ ńnɑ́ŋ, ńzẅíꞋlɛ nu yi pɛ́ sɛ́ ńcú, ɛ́ pɔ́ pɑ́Ꞌ nɛpʉ́ʉ-Sɛ́ cúnɛ pɔ́Ꞌɔ.

³⁵ Pɔ́p lɑɑ ńzúꞋ yɛcɔ́ nu, tɛ ḿbɔ́ ńdɔɔ nɛtsuŋ ńjí, pɔ́p ɡʉ ŋ́kúu ndɑ́ lɑ ḿbíkŋɛ pɛlúu pɔ́p. Ɛ́ kɑ́ pɔŋ pɑ́Ꞌ mbɔ pʉɔ-Kɛlístɔ cúꞋlɛ tɑ́Ꞌ zʉꞋ, mɑŋɡɛ́ cú nu pɔ́.

³⁶ Nu-Sɛ́ kɑ sɑ́Ꞌ pɔ lɑ́Ꞌ pʉʉ kii? Kɛ pɛ́ kɑ cú pɔ ndɑꞋ mbɔ̌ pʉʉ?

³⁷ Ŋu lɑɑ ḿbɔ́ ŋ́kwɑŋɛ ŋɡɔ ɑ cẅi Ŋkʉʉ ẅí ɛ́ fúnɛ mbɔ̌ Sɛ́, kɛ pɔ mbɔ̌ Zẅikŋɛ Lɛ́ɛnɛ́nɛ ɔɔ, mbɔ ɑ ɡẅɛɛ nɛjí ŋɡɔ yɔ nu yi ŋ wɑꞋnɛ́nɛ ŋ́ɡɑ́ mbɔ̌ pʉʉ lɑɑ ɛ́ nɛpʉ́ʉ ni ɛ́ fúnɛ mbɔ̌ Tsɑpʉɔ.

³⁸ Lɑ́ ḿbɔ́ yi ŋu lɑɑ ḿmuŋɛ, mbɔ Sɛ́ muŋɛ wɛ́ ɡúu.

³⁹ Pɔ́ɔpɛ́mɑ́ pɑ́ɑ, pɑ́Ꞌ ɛ́ pɔ́Ꞌɔ lɑ́, pʉʉ tsɑ́ɑ tɛꞋ nɛpɔ́ pɑcẅiŋkʉʉ pi pɔ́p fúnɛ mbɔ̌ Sɛ́ ḿbɛn ḿbɑ́ɑ nɛtɔꞋ pɛcɔ́ pʉɔ nɛsẅíŋɛ mɛsẅíŋɛ mi pɔ́p ŋkɑɑ mɔ́ zíꞋ pɔ́.

⁴⁰ Lɑ́ pɛ́ lɔk pɔ mbɔ́tnɛ ŋ́ɡɛ mbɑ kʉ̈ɔ́ lɑ́, kɔɔ ŋu nʉŋ ŋ́ɡwɛ́tnɛ ŋkɑŋ.