Luka 13 - Azelle New Testament Portions

In ge ta deke masharra ne eya wǝnǝ

¹ Ocha ocho ogomme, se aye ano se nga ze ayemme nga ze nga beze Yeso beleng ba ano Galili, se Bilatus ma we a wuza nye, ocho ogome se nga ze awatǝ topana tonye Ogomo Asharri aviskinye.

² Yeso ma garre magonnye, “Nane se ama wuza a ano Galili ageme, nye ya nǝrǝ ogo ano nga kera odangara ano Galili a masharra?

³ Aye dan nanazene, miya gosan nyi, in ge ta wang garro ayimi erowa ekinyi ne e deke masharra ma geme se nyi wuzaza me ne, nyi ya wiju sakama nye.

⁴ Nyi ya nǝrǝ ano biturrun uru ageme se upingǝri osaru se oma garra a nye a Siluwan, oma wuza nye, nyi ya gusa nga kera zal odangara ano Urshalima a masharra geme ni?

⁵ Miya gosan nyi dan nanezene, in ge ta wang garro ayimi erowa ekinyi e deke masharra ma geme se nyi ya wuzaza me ne nyi ya wiju sakama nane se nga wiju.”

Unǝrǝ a tara otiti okwafu odera abiya

⁶ Nze Yeso nya nye unǝrǝ mi ogina ma go, “Oye ono zanu se ma zen otiti okwafu ayimi uja ome. Ma ra atasa abiya okwafu mi mata morra koyabo ne.

⁷ Nze ma gon ono ogome se maya wankǝli uja me, ‘Nǝrǝ, kane sewai se taro segina miya rasa a narra abiya otiti okwafu ogina, amin ta morra ko kovento ne. Wiya ome, oya opate ara kǝwǝi?’

⁸ “Nze ono ogome se maya wankǝli uja me magarre ma go, ‘Achakura, a deke ome, in nya me rrewai rrivento in gǝsi anyanga me in gwǝrrǝ ome utaki.

⁹ Inga se otiti mi oyo abiya me a arriwai yora ina rreze, inga se ota yo ne agwente ome a vati.’ ”

Yeso ma ngona oye owai a ngamo a dara Asabar

¹⁰ Oye dara Asabar Yeso a masano ogora beroromo,

¹¹ oye owai maze a rame se uruhu obo ma wome a makwene ma puwa marro sewai biturru neng uru. Mata iya ma wǝtuni.

¹² Se Yeso nǝrǝ ni nze matisame ma go, “Owai ana ngonai a ngamo a makwene amai.”

¹³ Ni se ma dorre me, nze ma dorra ma wǝtu, ma tongarra Ogomo Asharri.

¹⁴ Nze ono saru ogora beroromo beme biruwa bi dorra bi sharro me, baka Yeso na ngona woi a ngamo a dara Asabar. Nze ma gon ana geme se nga za ara gemme, “Tumuru tuyanu se tudinye tase towoza etoma, erasa a tumuru tome a ngona nyi a ngamo den a daro Asabar ne.”

¹⁵ Nze Achakura Yeso garre ma go, “Nyi ayebebo kǝwǝi, avizi ayima akanyi se mata buzu bivare abome ne bijake abome a daro Asabar ama ngamen beme aro shinǝ manyi ni?

¹⁶ Owai ogina birruza ban Ibirahim beze Shetan matarǝ mi angame sewai biturrun uru gina, dan derte ze a ngona me a ngamo a daro Asabar ne?”

¹⁷ Se Yeso buku nane nze emme ma me ano nya mene kame zal, odangara ano me ezalla baka to gogorro togeme se mana wuza.

Yemasanga a tara biwo be Masta

¹⁸ “Togomo ta Asharri to neng yǝkǝnǝ neng yaya ze? Neng yaya ze mi neng ngona eme ayankǝnǝ neng no?

¹⁹ Togomo to Ogomo Asharri toze sakama biwo be masta, se oye ono ma yete maka birra a me uja, bi bare bi we otiti, nze ididi ese todo abiya otiti mi.”

²⁰ Yeso ma kuru ma we bi sangarra, “Togomo ta Asharri to neng yǝkǝnǝ neng yaya ze?

²¹ Eyǝnkǝnǝ oyis ze se oye owai ma sakala tomodu to taro ma embini mo wuza aborode, Nze embinin mi ma dorra mawe chebete.”

Arakai ageme se asheno

²² Se Yeso meshe oruna angame a Urshalima, nze ma bete atu pepe neng tugwirigwiri, maya yemasanga ya ano.

²³ Nze oye ono ma sangarra me ma go, “Achakura in go kan, ano a bate keke ze ogomo Asharri maya buza nye?” Nze Yeso gon nye,

²⁴ “Matana ne epete arakai awo shine, baka ano chebete nga ya narro opete ama amagarra akanyene.

²⁵ Inga se achakura na wera ma pate arakai atitǝu mi, nyi ana geme se nyi ya tora a kai, nyi ya terse arakai nyigusa kusu, ‘Achakura, pukudo arakai.’ “Me maya garra ma gon nyi, ‘Mintaru ara geme se nyi na kasuru anumi!’

²⁶ “Nyi ya gusa, ‘Koi woro ma wucu eyabo wucu e shi manyi neng ngo. Ngoma wuza yemasanga atu runa ta yima ape akado.’

²⁷ “Maya kuri magonyi, ‘Min ta ru nyi ni, in ta kuru in uru ara geme se nyikasuru anumi, warna neng me nyi ano wuza eyabo eburu.’

²⁸ “Ayemme nyi rriwa neng urrunza tini. Nga ya nǝri Ibirahim neng Ishaku neng Yakub zal neng to annabi ayima togomo to Ogomo Asharri, ama nyi a ya vati akǝi.

²⁹ Ano ya rasa asuru usunzu, neng uwarru, a tara neng adizi, nga ya chǝkǝnǝ atura tuchǝkǝnǝ tonye a nga wucu emo wucu obaki a togomo to Ogomo Asharri.

³⁰ Segina ano ageme se nga za a bimaso nga ze nga na kuru ano bibura ano bibura nga ze ano bimaso.”

Nane se Yeso ma damo neng Urshalima

³¹ Nze ocho gina ze toye tuFarisi ta rai togon Yeso, “Deke ara agina baka Hiridus maya narro wonaye.”

³² Nze ma gon nye, “Ngame ne eka beze ayebebo akanyi, ‘Kane miya zuzu turuhu tobo in ngona ano a ngamo, innyarru ma nanem meze, a daro otaro ze insa jamu etoma me.

³³ Zal neng nane meze in wucaji neng tano taton kane neng nyarru neng darono a Urshalima, baka edan rreze guna annabi wi ariya ne, inga dan a Urshalima ne.’

³⁴ “Ano Urshalima, ano Urshalima, nyi ma wuza to annabi ano tiza ana geme se ama Toma nye a nyi. Mina dakano a narro wora akanyi sakama bitokoro be worsa abiya me ama tugallun, a nyi ta deken in woronyi.

³⁵ E gina se atitǝu akanyi ana diya aping mi ze, miya biza ka nyi nyizi ma morra onǝra akan gaze ne, se nyi na ngona, ‘Ono sana ze onora ayimi rriji ya Achakura.’ ”