ZEHKARIA 7 - Jinghpaw Common Language Bible 2009

Dai Madu Gaw N Teng N Man Ai Lusha Gam Ai Hpe Daw Dan Ai

¹ Hkawseng Dari hkaw dung ai mali ning na Hkesle ngu ai shata jahku a mali ya shani e, dai Madu ngai hpe mungga jaw ai.

² Behtela amyu masha ni mung Shareze yan Regemmelek hte shan a masha ni hpe Chyahtum Chyalai N-gun rawng ai dai Madu a Nawku Htingnu de sa nna dai Madu kaw na shaman chyeju hpyi la na matu mung,

³ hkinjawng ni hte myihtoi ni hpe, “Anhte gaw nde nlaw ning na hkra anhte galaw nga saga ai hte maren shata manga hta lusha gam let Nawku Htingnu hten run mat ai majaw, anhte naw sharung shayawt ang na ga ni?,” ngu ai ga san hpe san yu na matu mung shangun dat mu ai.

⁴ Da ndai gaw ngai kaw du wa ai dai Madu a mungga rai nga ai.

⁵ Shi gaw, “Ndai sanit shi ning laman shata manga hte shata sanit hta, lusha gam nna hkrap ngu hkrap ngoi myit yang, dai gaw ngai hpe shagrau sha-a ai amu n rai nga myit dai lam mungdan amyu masha ni hte

⁶ hkinjawng ni hpe tsun dan mu. Shanhte lu sha ma yang, shanhte myit ra ai hte maren lu sha nga ma ai,” ngu nna tsun wu ai.

⁷ Da ndai gaw Yerusalem mare hta ngamu ngamai wa nna amyu masha law law hte hpring nga nhtawm, amyu masha law law hte wa mare ni hta sha n-ga, grup yin mare ni hte dingda ginwang hte sinna maga de na bum lagaw du hkra masha naw shanu nga ai aten hta moi na myihtoi ni a n-gup hte dai Madu tsun ai mungga rai nga ai.

N Madat N Mara Ai Majaw Bawng Dung Hkrum Ai

⁸ Dai Madu gaw Zehkaria hpe ndai mungga jaw wu ai:

⁹ “Moi shawng de nye a amyu masha ni hpe ning ngu ai hkang da ai ga ngai jaw ni ai: ‘Teng man ai hku amu daw dan ai hpe nanhte mu lu na myit dai. Langai hte langai matsan dum ai myit hte n-gaw n wai ai myit madun hkat nga mu;

¹⁰ gaida gaina ni, jahkrai nmai ni, nanhte hta hkan nga nang nga ai maigan masha ni hte ra kadawn nga ai ni kadai hpe mung adip arip hkum rai myit; langai hte langai shada da machyi hkra shangun ai lam hkum maw myit.’

¹¹ “Rai ti mung, nye a amyu masha ni mahtang du ja ai hte n madat hkraw ma ai. Shanhte gaw tinang a myit masin

¹² chyinghka la kau nhtawm, shanhte a myit masin kraw lawang hpe mung lunghkrung zawn ja shangun nga ma ai. Moi na myihtoi ni a n-gup aga hku tsun ai sharin shaga ga hpe shanhte n madat ma ai majaw ngai masin grai pawt nngai.

¹³ Ngai ga tsun yang, shanhte n madat nga ma ai majaw shanhte hpyi nem yang ngai n htan ya na we ai.

¹⁴ Shanhte hpe nbung laru e shapoi mat wa ai zawn maigan mungdan ni de ye kau nngai. Ndai ningru ningja ai mungdan gaw katsi katsang shara tai mat nna, kadai mung dai mung e nga nga na ma ai n rai.