YOBA 35 - Jinghpaw Common Language Bible 2009

^1-2 Yoba e, nang gaw Karai Kasang a man e mara n kap nga ndai nga nna na a matu tsun ai ga gaw jaw ai n rai nga ai.

³ Shing n rai, “Nye a yubak gaw nang hpe gara hku akyu jaw a ta? Yubak n galaw ai majaw ngai hpa baw akyu hkam la nga a ni?,” nga nna Karai Kasang hpe san ai gaw n jaw nga ai.

⁴ Ngai gaw nang hte na a manang ni hpe mung htan na nngai.

⁵ Sumsing lamu de mada yu mu! Sumwi ni kade sha tsaw ai shara hta nga nga ai hpe yu yu mu!

⁶ Nang yubak galaw ai rai yang, Karai Kasang hpe machyi hkra lu ai n rai; aten shagu, nang shut hpyit amu galaw ai rai yang, dai gaw shi hpe hpa akyu shapraw ya a ta?

⁷ Grai ding man ai hku nga let, Karai Kasang hpe nang karum lu nga n ni? Karai Kasang gaw nang kaw na hpa mung ra nga ai n rai.

⁸ Kaga masha ni gaw nang galaw ai yubak mara a majaw nni nkri hkrum sha nga ma ai, nang galaw ai mai kaja ai amu gaw shanhte hpe karum ya nga ai.

⁹ Amyu masha ni dip gamyet sha hkrum nga ai shaloi, shanhte yawn madai ma ai; shanhte gaw shanhte hpe hkye la na matu marai langai ngai hpe jahtau nga ma ai.

¹⁰ Rai ti mung, shanhte gaw shanhte a Hpang Wa Ningsang, nsin sin htum ai aten hta shanhte hpe myit mada shara jaw ya ai Karai Kasang hpang de kayin wa ma ai n rai.

¹¹ Shanhte gaw kaga dusat yam nga hte ntsa malen u hta grau hpaji rawng hkra, anhte hpe hpaji rawng shangun ai Karai Kasang hpang de kayin wa ma ai n rai.

¹² Shanhte gaw karum la na matu hpyi jahtau ma ai, rai ti mung Karai Kasang htan ya ai n rai, hpa majaw nga yang, shanhte gaw gumrawng gumtawng ai hte n hkru nga ma ai.

¹³ Jahtau marawn ti mung, dai gaw shanhte a matu kaman lila rai nga ai; Chyahtum Chyalai N-gun Rawng Ai Karai Kasang gaw shanhte hpe n mu, shanhte a nsen hpe n na rai nga ai.

¹⁴ Yoba e, nang gaw Karai Kasang hpe n mu lu nngai nga nna tsun ti mung, hkam sharang ai hte ala nga ndai-na a amu gaw shi a man e rai nga ai.

¹⁵ Nang gaw Karai Kasang ari n jaw ai, shi gaw yubak jaw na matu kachyi mi sha myit lawm ai, ngu nna myit nawn nga ndai.

¹⁶ Ga sha atsun nga ai gaw na a matu kaman lila rai nga ai; nang tsun ai ga hpe nang n chye na nga ndai gaw asan sha rai nga ai.