YEREMIA 1 - Jinghpaw Common Language Bible 2009

¹ Ndai laika gaw Benyamin a mungdaw na Anahtot mare e nga ai hkinjawng ni hta na Hilkia a shadang sha Yeremia tsun tawn ai myihtoi ga ni hpe ka da ai laika rai nga ai.

² Dai Madu gaw Yeremia hpe Yuda hkawhkam Amon a kasha Yoshia hkaw dung ai shi masum ning hta e tsun ai hte

³ shi gaw shi hpe Yoshia a kasha Yehoiakim hkawhkam tai wa ai shaloi kalang mi bai tsun wu ai. Dai hpang dai Madu gaw Yoshia a kasha Zedekia hkaw dung ai shi langai ning du hkra law law lang shi hpe tsun nu ai. Dai shaning a shata manga hta Yerusalem na amyu masha ni gaw bawng rim mat wa ai hkrum ma ai.

Yeremia Shaga La Hkrum Ai Lam

⁴ Dai Madu gaw ngai hpe,

⁵ “Ngai gaw nang hpe asak garai n jaw ai kaw nna lata la ni ai, ngai gaw nang garai n shangai aten kaw nna pyi masha amyu baw ni a matu myihtoi tai na lata la ni ai,” ngu nna tsun wu ai.

⁶ Ngai gaw, “Tsaw Htum ai Madu e, ngai gaw kaning ngu shaga na n chye nngai; ngai gaw nau naw kaji nga nngai,” ngu nna htan we ai.

⁷ Rai ti mung dai Madu gaw ngai hpe, “Nang naw kaji nga nngai ngu nna hkum tsun et, rai ti mung ngai nang hpe shangun dat ai amyu masha ni hpang de sa nna ngai nang hpe tsun shaga na matu hkang dat ai lam shagu, shanhte hpe tsun na rai ndai.

⁸ Shanhte hpe hkum hkrit nga et, ngai gaw nang hpe makawp maga na matu nang hte rau nga nga na nngai. Dai Madu ngai nan tsun ni ai!,” ngu nna tsun wu ai.

⁹ Dai hpang dai Madu gaw lata ladawn let nye a nten hpe ahtawk nna ngai hpe, “Madat u, ngai nang hpe jaw ya nga ai mungga hpe nang tsun lu na rai ndai.

¹⁰ Baw kau na hte run kau na matu mung, jahten shabyak kau na hte gumlau jahten kau na matu mung, gaw da na hte hkai da na matu mung, masha amyu baw ni hte mungdan ni a ntsa hta e up na ahkaw ahkang, dai ni jang, ngai nang hpe ap nga nngai,” ngu nna tsun wu ai.

Shingran Lahkawng

¹¹ Dai Madu gaw ngai hpe, “Yeremia e, nang hpa mu n ta?,” ngu nna san wu ai. Ngai chyawm gaw, “Batan hpun lakung langai,” ngu nna htan we ai.

¹² Dai Madu gaw, “Nang jaw nga ndai, ngai gaw nye a mungga ni teng nga ai hpe mu lu na matu sin yu nga na nngai,” ngu nna tsun wu ai.

¹³ Dai hpang dai Madu gaw ngai hpe bai tsun let, “Nang hpa naw mu n ta?,” ngu nna san wu ai. Ngai gaw, “Dingdung maga hta prut nga ai di bu langai hpe ngai mu nngai, dai gaw dagup mat hkyen na zawn rai nga ai,” ngu nna htan nngai.

¹⁴ Shi gaw ngai hpe, “Dingdung maga de na jahten sharun ai gaw ndai mungdan hta shanu nga ai ni yawng a ntsa e prut pru wa na ra ai,

¹⁵ hpa majaw nga yang, ngai gaw dingdung maga de nga ai masha amyu baw ni yawng sa du na matu shaga dat nngai. Shanhte a hkawhkam ni gaw shanhte a tingnyang ni hpe Yerusalem a chyinghka lam ni hte de a bunghku grup yin hkan e mung, Yuda mung na kaga mare ni a grup yin hkan mung sharawt da na mara ai.

¹⁶ Shanhte gaw yubak shut hpyit masai; shanhte ni ngai hpe kau da masai, kaga karai ni hpe shagu hkungga nawng ya masai, hpara sumla ni galaw nna dai ni hpe nawku nga masai majaw nye a amyu masha ni hpe ngai ari jaw na nngai.

¹⁷ Yeremia e, tsun na matu ngai nang hpe hkang da ai lam magup shanhte hpe sa tsun dan su. Ya shanhte hpe hkum hkrit nga et, nang shanhte hte rau nga ai shaloi, ngai nang hpe grau nna pyi hkrit shangun na nngai.

^18-19 Yeremia e, madat u! Ndai mungdan na masha hkum shagu hte Yuda hkawhkam ni, du salang ni, hkinjawng ni hte amyu masha ni gaw nang hpe gumlau na mara ai. Rai ti mung ngai gaw nang hpe shanhte hpe ninghkap na n-gun dai ni jaw ya nga nngai; nang gaw bunghku kum ai mare, hpri shadaw hte magri mang shakum zawn tai na ra ai. Nang hpe makawp maga na matu ngai gaw nang hte rau rai nga nngai majaw shanhte nang hpe dang kau lu na ma n rai. Dai Madu ngai nan tsun ni ai,” ngu nna tsun wu ai.